ប្រភពចំនួនបីបានប្រាប់ទីភ្នាក់ងារសារព័ត៌មាន Reuters ថា ប្រទេសអ៊ីរ៉ង់បានស្នើឱ្យចលនាហ៊ូទី (Houthi) របស់ប្រទេសយេម៉ែន ត្រៀមខ្លួនជាស្រេចដើម្បីបិទផ្លូវដឹកជញ្ជូនប្រេងតាមសមុទ្រក្រហម ប្រសិនបើសហរដ្ឋអាមេរិកវាយប្រហារលើហេដ្ឋារចនាសម្ព័ន្ធអគ្គិសនីរបស់អ៊ីរ៉ង់ ដែលនេះកំពុងបង្កហានិភ័យថ្មីដល់ការផ្គត់ផ្គង់ថាមពលសកល។
ប្រភពជិតស្និទ្ធនឹងក្រុមហ៊ូទីមួយ បាននិយាយថា ក្រុមនេះបានបំពេញការរៀបចំរួចរាល់ ដើម្បីវាយប្រហារលើនាវាដឹកជញ្ជូន ដោយបានពង្រាយគ្រាប់មីស៊ីល និងដ្រូន (Drone) នៅជិតច្រកសមុទ្រ បាប់ អែលម៉ានដេប (Bab el-Mandeb) ដែលជាច្រកទ្វារទៅកាន់សមុទ្រក្រហម ហើយបច្ចុប្បន្នកំពុងរង់ចាំតែបញ្ជាដើម្បីចាប់ផ្តើមប៉ុណ្ណោះ។ លើសពីនេះ តំណាងកងឆ្មាំបដិវត្តន៍អ៊ីស្លាមអ៊ីរ៉ង់ (IRGC) ដែលមានវត្តមាននៅក្នុងប្រទេសយេម៉ែនរួចហើយ នឹងក្លាយជាអ្នកគ្រប់គ្រងលើការសម្រេចចិត្តបិទច្រកសមុទ្រនេះ។
ការវាយប្រហារណាមួយរបស់ក្រុមហ៊ូទីនៅក្នុងសមុទ្រក្រហម នឹងធ្វើឱ្យផ្លូវនាំចេញប្រេងចម្បងទាំងពីររបស់មជ្ឈិមបូព៌ាត្រូវកាត់ផ្តាច់ក្នុងពេលតែមួយ ដោយសារអ៊ីរ៉ង់បានបិទច្រកសមុទ្រ ហូរមូស (Strait of Hormuz) រួចទៅហើយ តាំងពីដើមជម្លោះនៅថ្ងៃទី២៨ ខែកុម្ភៈ នៅពេលដែលអ៊ីស្រាអែល និងសហរដ្ឋអាមេរិកបានវាយប្រហារលើអ៊ីរ៉ង់។
នៅក្នុងសញ្ញានៃភាពតានតឹងដែលកំពុងកើនឡើង ក្រុមហ៊ូទីក៏បានបាញ់មីស៊ីលទៅលើប្រទេសអារ៉ាប៊ីសាអូឌីតផងដែរ បន្ទាប់ពីបានចោទប្រកាន់ព្រះរាជាណាចក្រនេះថា បានទម្លាក់គ្រាប់បែកលើព្រលានយន្តហោះក្រោមការគ្រប់គ្រងរបស់ពួកគេ ដែលវាបានបំបែកកិច្ចព្រមព្រៀងឈប់បាញ់រយៈពេលបួនឆ្នាំរវាងភាគីទាំងពីរ។
ប្រភពក្នុងតំបន់មួយរូប បាននិយាយថា ក្រុមមេដឹកនាំសាសនារបស់អ៊ីរ៉ង់កំពុងស្វែងរកការដាក់សម្ពាធលើសហរដ្ឋអាមេរិក ដោយបង្កើនការខូចខាតដល់សេដ្ឋកិច្ចសកល តាមរយៈការគំរាមកំហែងដល់លំហូរនៃការនាំចេញប្រេងរបស់អារ៉ាប៊ីសាអូឌីត។
ប្រភពដដែលបានបន្ថែមថា៖ «អ្នកណាដែលមានកាំភ្លើងបាញ់ ក៏អាចរំខានដល់ការដឹកជញ្ជូនតាមនាវាបានដែរ។ អ្នកមិនចាំបាច់មានគ្រាប់មីស៊ីលទំនើបៗ ដើម្បីរំខានដល់ការដឹកជញ្ជូននោះទេ»។
សហរដ្ឋអាមេរិក បានចោទប្រកាន់ថា អ៊ីរ៉ង់បានផ្តល់អាវុធ ថវិកា និងការបណ្តុះបណ្តាលដល់ក្រុមហ៊ូទី រួមទាំងការគាំទ្រដែលបញ្ជូនតាមរយៈក្រុមហេសបូឡាហ៍ (Hezbollah) របស់លីបង់ ខណៈដែលទីក្រុងតេអេរ៉ង់បានបដិសេធការចោទប្រកាន់នេះ៕
