រដ្ឋបាលលោក ត្រាំ បានចេញសេចក្តីជូនដំណឹងចុងក្រោយអំពីផែនការអនុវត្តច្បាប់តឹងរ៉ឹងជាងមុន លើនិស្សិតបរទេស រួមទាំងការរារាំងពួកគេមិនឱ្យស្នាក់នៅក្នុងសហរដ្ឋអាមេរិក លើសពីបួនឆ្នាំឡើយ លុះត្រាតែពួកគេទទួលបានការអនុញ្ញាតពីរដ្ឋាភិបាលសហព័ន្ធ។
សមត្ថភាពក្នុងការផ្លាស់ប្តូរកម្មវិធីសិក្សា និងការផ្ទេរការសិក្សារវាងសាកលវិទ្យាល័យ និងមហាវិទ្យាល័យ ក៏នឹងត្រូវរឹតបន្តឹងផងដែរ។ កន្លងមក គ្រឹះស្ថានឧត្តមសិក្សាមានអំណាច ក្នុងការផ្តល់ការបន្តទិដ្ឋាការ (Visa)។
ក្រសួងសន្តិសុខមាតុភូមិ បានថ្លែងថា គោលនយោបាយដែលនឹងចូលជាធរមាននៅក្នុងខែកញ្ញា គឺដើម្បី «ប្រយុទ្ធប្រឆាំងនឹងការរំលោភបំពានទិដ្ឋាការដែលកំពុងរាលដាល និងពង្រឹងសន្តិសុខជាតិ តាមរយៈការត្រួតពិនិត្យជាប្រចាំ»។
សមាគមអ្នកអប់រំអន្តរជាតិ (Association of International Educators) បានពិពណ៌នាអំពីច្បាប់ថ្មីទាំងនេះថា «ជាការភាន់ច្រឡំ និងមិនចាំបាច់»។
កន្លងមក និស្សិតបរទេសដែលកាន់ទិដ្ឋាការប្រភេទ F-1 និង J-1 អាចស្នាក់នៅក្នុងប្រទេសបានដរាបណាពួកគេបញ្ចប់ការសិក្សា។ ប៉ុន្តែច្បាប់ថ្មីនេះ នឹងកំណត់ពេលវេលាស្នាក់នៅ ដែលអាចប៉ះពាល់ដល់និស្សិតថ្នាក់ក្រោយឧត្តមសិក្សា (ដូចជាថ្នាក់បណ្ឌិត ឬជំនាញវិទ្យាសាស្ត្រ និងបច្ចេកវិទ្យា) ដែលជាទូទៅត្រូវចំណាយពេលលើសពី ៤ ឆ្នាំ ដើម្បីបញ្ចប់ការសិក្សា និងការស្រាវជ្រាវ។
រដ្ឋលេខាធិការក្រសួងសន្តិសុខមាតុភូមិ លោក Markwayne Mullin បានមានប្រសាសន៍ថា៖ «អស់រយៈពេលជាច្រើនទសវត្សរ៍មកហើយ និស្សិតបរទេសត្រូវបានអនុញ្ញាតឱ្យចូលសហរដ្ឋអាមេរិកដោយគ្មានកំណត់ ដែលអនុញ្ញាតឱ្យមនុស្សរាប់ពាន់នាក់ រំលោភបំពានលើប្រព័ន្ធអន្តោប្រវេសន៍របស់យើង ដោយការចុះឈ្មោះចូលរៀនវគ្គសិក្សាបន្តបន្ទាប់មិនចេះចប់ ដើម្បីចៀសវាងការចាកចេញពីសហរដ្ឋអាមេរិក»។
នៅក្រោមច្បាប់ថ្មីនេះ និស្សិតបរទេសក៏នឹងមានពេល ៣០ ថ្ងៃផងដែរ ដើម្បីរៀបចំឥវ៉ាន់ និងចាកចេញបន្ទាប់ពីបញ្ចប់ការសិក្សា ឬផ្លាស់ប្តូរទៅប្រភេទទិដ្ឋាការផ្សេងទៀត ដែលកាត់បន្ថយពីរយៈពេលអនុគ្រោះ ៦០ ថ្ងៃកាលពីមុន។
លោកស្រី Fanta Aw នាយកប្រតិបត្តិនៃអង្គការ NAFSA បាននិយាយថា គោលនយោបាយថ្មីនេះ «បង្កើតឱ្យមានភាពមិនច្បាស់លាស់ និងការភ័យខ្លាចនៅក្នុងប្រព័ន្ធមួយ ដែលបានដំណើរការយ៉ាងល្អជាយូរមកហើយ»។ ច្បាប់ទាំងនេះ គឺជាផ្នែកមួយនៃយុទ្ធសាស្ត្ររបស់រដ្ឋបាលលោក ត្រាំ ក្នុងការកាត់បន្ថយចំនួននិស្សិតបរទេស រួមទាំងការកំណត់ចំនួននិស្សិតនៅមហាវិទ្យាល័យលំដាប់កំពូល និងការលុបចោលទិដ្ឋាការរបស់និស្សិតណាដែលរិះគន់គោលនយោបាយការបរទេសរបស់អាមេរិក៕
