ក្រោយផ្ទុះរឿងអាស្រូវពុករលួយ ពាក់ព័ន្ធនឹងមន្ត្រីនគរបាលផ្កាយ៣ម្នាក់ ពាក់ព័ន្ធករណីបង្ខាំង ទារប្រាក់ពីពលរដ្ឋរងគ្រោះជាងកន្លះលានដុល្លារ សង្គមស៊ីវិលជំរុញឱ្យរដ្ឋាភិបាលចាត់វិធានការច្បាប់ បោសសម្អាតរឿងអាស្រូវពុករលួយនេះ ដើម្បីបង្កើនជំនឿទុកចិត្តពីពលរដ្ឋ និងអ្នកវិនិយោគនៅកម្ពុជា។
តំណាងរាស្រ្តពីបក្សប្រឆាំង លោក អ៊ុំ សំអាន ប្រាប់វីអូឌី នៅថ្ងៃទី២០ ខែកក្កដា ថា អាជ្ញាធរគួរបើកការស៊ើបអង្កេត និងមានចំណាត់ការទៅលើមន្ត្រីជាន់ខ្ពស់ដទៃទៀត បើពុំនោះទេចំណាត់ការកន្លងមក នឹងមិនអាចជំរុញឱ្យមានការប្រែប្រួលជាប្រព័ន្ធ ក្នុងការលុបបំបាត់អំពើពុករលួយបានឡើយ ពោលគឺគ្រាន់តែជាការធ្វើឱ្យល្អមើល ដើម្បីឱ្យប្រជាពលរដ្ឋស្ងប់ចិត្តមួយគ្រាតែប៉ុណ្ណោះ។
លោកបានបន្ថែមថា បច្ចុប្បន្នអំពើពុករលួយបានរីករាលដាលធ្ងន់ធ្ងរ ប្រៀបដូចជាជំងឺមហារីកដែលមិនអាចព្យាបាលបានទៅហើយ ជាពិសេសពាក់ព័ន្ធនឹងករណីបំផ្លាញធនធានធម្មជាតិ ដូចជាព្រៃឈើ ខ្សាច់ រ៉ែ និងនៅពេលពលរដ្ឋស្វែងរកសេវាសាធារណៈជាដើម។
លោក អ៊ុំ សំអាន ថ្លែងថា៖ «ខ្ញុំយល់ថា ទាំងរដ្ឋាភិបាលលោក ហ៊ុន ម៉ាណែត ទាំងអង្គភាពប្រឆាំងអំពើពុករលួយ ACU អីហ្នឹង គួរតែបើកការស៊ើបអង្កេតជាទូទៅតែម្តងទៅ ទាំងមន្ត្រីពីថ្នាក់លើដល់ថ្នាក់ក្រោម ហើយត្រូវហ៊ានចាត់វិធានការចំពោះមន្ត្រីជាន់ខ្ពស់ផង។ សព្វថ្ងៃហ្នឹងឃើញចាត់ការតែលើមន្ត្រីថ្នាក់ក្រោមបន្តិចបន្តួចតែប៉ុណ្ណោះឯង គ្រាន់តែធ្វើឱ្យល្អមើល ឱ្យប្រជាពលរដ្ឋអស់ចិត្តតែប៉ុណ្ណោះឯង[…]ដូច្នេះត្រូវស៊ើបអង្កេតគ្រប់មន្ត្រីទាំងអស់ដែលបម្រើការរដ្ឋ»។
កាលពីថ្ងៃទី១៦ ខែកក្កដា មានករណីមួយផ្ទុះឡើងក្រោយពលរដ្ឋម្នាក់ឈ្មោះ ហួត សិទ្ធីរាជ បានប្ដឹងមនុស្ស៣នាក់ ពីបទ ចាប់ឃុំឃាំង និងបង្ខាំងដោយខុសច្បាប់ មានស្ថានទម្ងន់ទោស ប៉ះពាល់ដល់សេរីភាពបុគ្គល មិនព្រមដោះលែងបុគ្គលដែលត្រូវបានឃុំឃាំងដោយខុសច្បាប់ កំហែងយក ផ្ដើមគំនិត និងសមគំនិត ដែលបានប្រព្រឹត្តិកាលពីថ្ងៃទី១៣ ខែកក្កដា។
ក្នុងចំណោមបុគ្គលដែលរងបណ្ដឹងទាំងបីនាក់ មានម្នាក់ជានគរបាលទេសចរណ៍នៃអគ្គស្នងការនគរបាលជាតិ គឺ លោក រុន រ័ត្នវាសនា ប្រធាននាយកដ្ឋាននគរបាលទេសចរណ៍ ដែលគេដឹងថាមានឋានៈជាឧត្តមសេនីយ៍ឯក ឬផ្កាយ៣ ដែលពលរដ្ឋរូបនោះអះអាងថាបានចុះចាប់ខ្លួនលោកដោយគ្មានដីកា និងយកទៅឃុំទុកនៅអគ្គនាយកដ្ឋានទេសចរណ៍ក្នុងក្រសួងមហាផ្ទៃ ដោយគ្មានដីកាពីព្រះរាជអាជ្ញា។
ដើមបណ្ដឹង បានបញ្ជាក់ថា លោក រុន រ័ត្នវាសនា និងបក្ខពួកពីរនាក់ទៀត បានកំហែងលោកគ្រប់មធ្យោបាយ ដោយបំភិតបំភ័យថានឹងយកទៅដាក់ពន្ធនាគារ ២០ឆ្នាំ ប្រសិនបើលោកមិនផ្ទេរលុយចំនួន ៥០៥,០០០ ដុល្លារ ដែលមានក្នុងកុងធនាគារឱ្យទៅពួកគេ។
ករណីនេះ បានបង្កឱ្យមហាជនផ្ទុះចម្ងល់ថា ហេតុអ្វីមន្ត្រីនៃនាយកដ្ឋានទេសចរណ៍អាចចាប់បង្ខាំងមនុស្ស និងលូកដៃចូលក្នុងករណីរដ្ឋប្បវេណី និងព្រហ្មទណ្ឌទៅវិញ។
វីអូឌី មិនអាចសុំការអត្ថាធិប្បាយបន្ថែមពីអ្នកនាំពាក្យក្រសួងមហាផ្ទៃ លោក ទូច សុខៈ ជុំវិញករណីនេះបានទេ នៅថ្ងៃទី២០ ខែកក្កដានេះ។
យ៉ាងណា ក្រសួងមហាផ្ទៃ តាមរយៈអ្នកនាំពាក្យ លោក ទុច សុខៈ បានប្រាប់សារព័ត៌មានក្នុងស្រុកនៅថ្ងៃទី១៨ ខែកក្កដា ថា ករណីនេះកំពុងបើកការស៊ើបអង្កេត។
យ៉ាងណា ករណីពុករលួយ និងការអនុវត្តតួនាទីលើសដែនសមត្ថកិច្ចនេះ មិនមែនទើបតែកើតឡើងឡើយនៅក្នុងសង្គមកម្ពុជា។ គេតែងឃើញការប្រើប្រាស់តួនាទី និងអំណាចក្នុងស្ថាប័នរដ្ឋ ទៅកាង ឬជំរិតកេងប្រវ័ញ្ចលើមនុស្សទន់ខ្សោយជាងខ្លួន ទៅក្នុងករណីជម្លោះបុគ្គល គ្រោះថ្នាក់ចរាចរណ៍ ឬការរត់ការឡើងបុណ្យសក្តិជាដើម។
ជាក់ស្ដែងករណី សំណុំរឿងប៉ុនប៉ងសូកប៉ាន់ដើម្បីរត់ការយកតំណែងអភិបាលក្រុងអរិយក្សត្រ ដែលបានក្លាយជាព័ត៌មានធំមួយនៅចុងឆ្នាំ២០២៤ ពាក់ព័ន្ធនឹងឈ្មោះ កន សុខកាយ ដែលមានទំហំទឹកប្រាក់ ៣០ម៉ឺនដុល្លារ។
ចំណែកករណីមួយទៀត កាលពីខែមេសា ឆ្នាំ២០២៦ គឺមន្ត្រីបរិស្ថានពីររូបនៅខេត្តកំពង់ស្ពឺ ដែលត្រូវបានចោទថាបានទាមទារប្រាក់ ១,៥០០ ដុល្លារ ពីរោងចក្រកែច្នៃស្វាយមួយកន្លែង។ ករណីមួយផ្សេងទៀត គឺការឃុំខ្លួន លោក អ៊ុល ប៊ុនណា អនុប្រធានស្នងការនគរបាលខេត្តកណ្ដាល ពាក់ព័ន្ធនឹងការជំរិតទារប្រាក់ពីជនជាតិចិនចំនួន ១៣២,០០០ ដុល្លារ។
ទាក់ទិនរឿងនេះ ប្រធានអង្គការប្រជាធិបតេយ្យខ្មែរ លោក ស៊ឹង សែនករុណា កត់សម្គាល់ថា ការអនុវត្តច្បាប់លើករណីបុគ្គលគឺជាជំហានត្រឹមត្រូវ ប៉ុន្តែវានឹងមិនអាចលុបបំបាត់អំពើពុករលួយបានស្ទើរតែទាំងស្រុងនោះទេ ប្រសិនជារដ្ឋាភិបាល ឬក្រសួងពាក់ព័ន្ធមិនពិនិត្យមើលភាពមានបានមិនប្រក្រតីរបស់មន្ត្រី ចាប់ពីថ្នាក់ដឹកនាំជាន់ខ្ពស់ឡើងទៅនោះ។
លោក ស៊ឹង សែនករុណា ថ្លែងថា៖ «ការលុបបំបាត់នូវអំពើពុករលួយដ៏ពិតប្រាកដ ត្រូវធ្វើឡើងជាប្រព័ន្ធ ហើយមានភាពច្បាស់លាស់ ម៉ឺងម៉ាត់ អនុវត្តទៅតាមច្បាប់ ហើយអ្នកដែលធ្វើការអនុវត្តប្រតិបត្តិច្បាប់ទៀតសោត ត្រូវតែធ្វើឡើងដោយមានឯករាជ្យភាព ដោយមិនត្រូវខ្លាចនូវឥទ្ធិពលអំណាចបុគ្គលណាមួយ ឬក្រុមណាមួយ បក្សពួកណាមួយទេ»។
យោងតាមក្រមព្រហ្មទណ្ឌ មាត្រា ៣៦៤ បានចែងថា អំពើកំហែងយកប្រាក់ ត្រូវផ្ដន្ទាទោសដាក់ពន្ធនាគារ ពី ២ ឆ្នាំ ទៅ ៥ ឆ្នាំ និងពិន័យជាប្រាក់ពី ៤ លានរៀល ទៅ ១០ លានរៀល ហើយអាចពាក់ព័ន្ធនឹងបទល្មើសក្រោម ច្បាប់ស្តីពីការប្រឆាំងអំពើពុករលួយ ប្រសិនបើអ្នកប្រព្រឹត្តគឺជាមន្ត្រីរាជការសាធារណៈ។
អំពើកំហែងយកនេះ ត្រូវមានទោសធ្ងន់ធ្ងរ ជាប់ពន្ធនាគារពី ៧ ឆ្នាំ ទៅ ១៥ ឆ្នាំ ប្រសិនបើមានការប្រើអាវុធ ហើយអាចជាប់ពន្ធនាគារពី ១៥ ឆ្នាំដល់ ៣០ ឆ្នាំ ប្រសិនបើអំពើនេះ ប្រព្រឹត្តឡើងបណ្ដាលឲ្យជនរងគ្រោះស្លាប់ ដោយគ្មានចេតនាសម្លាប់៕
