លោក Pete Hegseth រដ្ឋមន្ត្រីក្រសួងការពារជាតិអាមេរិក បានឱ្យដឹងថា មកដល់ពេលនេះ សហរដ្ឋអាមេរិក បានចំណាយថវិកាប្រមាណ ៣៧.៥ ពាន់លានដុល្លារ (២៨ ពាន់លានផោន) រួចទៅហើយ។
នៅក្នុងការបង្ហាញខ្លួននៅចំពោះមុខគណៈកម្មាធិការថវិកាព្រឹទ្ធសភា លោក Hegseth បាននិយាយថា ការហ្វឹកហ្វឺនយោធានឹងត្រូវកាត់បន្ថយ ប្រសិនបើគ្មានការអនុម័តកញ្ចប់ថវិកាបន្ថែមចំនួន ៨៧ ពាន់លានដុល្លារ ដែលក្នុងនោះ ៦៧ ពាន់លានដុល្លារ នឹងត្រូវប្រើប្រាស់សម្រាប់ប្រតិបត្តិការនៅមជ្ឈិមបូព៌ា។ ការបង្ហាញខ្លួនរបស់លោកបានធ្វើឡើង បន្ទាប់ពីទាហានអាមេរិក ៣ រូប ត្រូវបានសម្លាប់នៅក្នុងតំបន់នោះ។
លោក Hegseth បានបញ្ជាក់ថា «ប្រសិនបើគ្មានថវិកាទាំងនេះទេ យើងនឹងប្រឈមមុខនឹងកង្វះខាតដ៏ធ្ងន់ធ្ងរ ដែលគំរាមកំហុសដល់សមត្ថភាពរបស់យើង ក្នុងការបើកប្រាក់បៀវត្សរ៍ជូនកងកម្លាំង និងការទ្រទ្រង់ប្រតិបត្តិការ» ដោយលោកបានបន្ទោសរដ្ឋបាលលោក Joe Biden ថាបានផ្តល់ថវិកាមិនគ្រប់គ្រាន់ដល់យោធា។ យ៉ាងណាមិញ ប្រភពជិតស្និទ្ធបានប្រាប់ CBS ថា ចំណាយពិតប្រាកដអាចខ្ពស់ជាងនេះ ដោយសារមិនទាន់រាប់បញ្ចូលការជួសជុលមូលដ្ឋានទ័ពដែលខូចខាត។
នៅក្នុងកិច្ចប្រជុំ ក៏មានការដេញដោលគ្នាយ៉ាងក្តៅគគុកផងដែរ។ សមាជិកព្រឹទ្ធសភាបក្សប្រជាធិបតេយ្យ លោកស្រី Kirsten Gillibrand បានចោទប្រកាន់រដ្ឋបាលលោក Trump ថាស្វែងរក «ប្រាក់មិនកំណត់ដើម្បីទិញគ្រាប់បែក» ខណៈប្រជាពលរដ្ឋអាមេរិកកំពុងជួបការលំបាក។
លោក Hegseth បានតបវិញថា លោកកំពុងស្នើសុំ «គ្រាប់បែកដែលត្រឹមត្រូវ នៅពេលវេលាដែលត្រឹមត្រូវ»។ ចំណែកលោកស្រី Patty Murray បានចោទប្រកាន់រដ្ឋបាលនេះថា ព្យាយាមគេចវេះពីដំណើរការបែងចែកថវិកាតាមផ្លូវការ។
បច្ចុប្បន្ន សំឡេងប្រឆាំងមានទាំងនៅក្នុងជួរគណបក្សប្រជាធិបតេយ្យ និងសាធារណរដ្ឋ។ ដោយសារសភានឹងត្រូវសម្រាករហូតដល់ខែកញ្ញា ក្រសួងការពារជាតិនឹងត្រូវរង់ចាំយ៉ាងហោចណាស់ពីរខែទៀត ទើបអាចទទួលបានថវិកាទាំងនេះ។
ក្នុងពេលជាមួយគ្នានោះ ប្រធានាធិបតី Trump បានបង្ហោះថា មានមនុស្ស ១៨ នាក់ បានស្លាប់ក្នុងសង្គ្រាមនេះចាប់តាំងពីចុងខែកុម្ភៈ ហើយលោកត្រូវអញ្ជើញទៅទទួលក្តារមឈូសរបស់ទាហានដែលបានពលីនៅរដ្ឋ Delaware នៅព្រឹកថ្ងៃទី២២ខែកក្កដា៕
