សហរដ្ឋអាមេរិក បានផ្អាកការវាយប្រហារលើប្រទេសអ៊ីរ៉ង់ចូលដល់យប់ទីពីរ ខណៈដែលការចរចាផ្លូវការដើម្បីជៀសវាងការវិលត្រឡប់ទៅរកសង្គ្រាមទ្រង់ទ្រាយធំ បានបន្តធ្វើឡើងនៅថ្ងៃទី២៦ខែកក្កដា។
លោក ដូណាល់ ត្រាំ ត្រូវបានគេរាយការណ៍ថា កំពុងថ្លឹងថ្លែងជម្រើសផ្លូវការទូត និងយោធានៅក្នុងជម្លោះដែលមានរយៈពេលជិត ៥ ខែមកនេះ ដោយរំពឹងថា លោក បេនចាមីន នេតាន់យ៉ាហូ នឹងមកទស្សនកិច្ចនៅសេតវិមាននៅថ្ងៃទី២៨ខែកក្កដា។ នាយករដ្ឋមន្ត្រីអ៊ីស្រាអែលរូបនេះ គឺជាអ្នករិះគន់យ៉ាងខ្លាំងចំពោះការចរចារបស់អាមេរិកជាមួយមេដឹកនាំអ៊ីរ៉ង់ ហើយលោកកំពុងស្ថិតក្រោមសម្ពាធនយោបាយ ដើម្បីបង្ហាញថាប្រតិបត្តិការយោធាប្រឆាំងនឹងអ៊ីរ៉ង់ និងក្រុមហេសប៊ូឡោះនៅលីបង់ ទទួលបានលទ្ធផលមុនការបោះឆ្នោតនៅខែតុលា។
ទីក្រុងតេអេរ៉ង់ បាននិយាយនៅថ្ងៃទី២៦ខែកក្កដាថា ខ្លួននឹងផ្អាកការវាយប្រហារ «សងសឹក» ប្រឆាំងនឹងសម្ព័ន្ធមិត្តអាមេរិកនៅក្នុងតំបន់។
អ្នកនាំពាក្យកងទ័ព លោក មហាំម៉ាត់ អាក្រាមីនីយ៉ា បានថ្លែងថា៖ «ក្នុងរយៈពេលពីរយប់កន្លងមកនេះ ជនជាតិអាមេរិកបានបញ្ឈប់ការវាយប្រហាររបស់ពួកគេ។ យុទ្ធសាស្ត្ររបស់យើងជាមូលដ្ឋាន គឺការសងសឹក ដូច្នេះយើងក៏បានផ្អាកប្រតិបត្តិការសងសឹករបស់យើងដែរ»។
ការស្ងប់ស្ងាត់នៃការប្រយុទ្ធគ្នា ដែលបានចាប់ផ្តើមនៅល្ងាចថ្ងៃទី២៤ខែកក្កដា គឺបន្ទាប់ពីមានការវាយប្រហារជិតពីរអាទិត្យ និងការដួលរលំនៃបទឈប់បាញ់ដែលសម្របសម្រួលដោយលោក ត្រាំ។ វ៉ាស៊ីនតោនបានបន្ទោសអ៊ីរ៉ង់ ចំពោះការវាយប្រហារលើកងកម្លាំងអាមេរិក និងការបិទច្រកសមុទ្រ ហរមូស (Hormuz) ដែលជាផ្លូវដឹកជញ្ជូនប្រេង និងឧស្ម័ន ២០% នៃពិភពលោក។ អ្នកការទូតជាន់ខ្ពស់អ៊ីរ៉ង់ និងអូម៉ង់ កំពុងចរចាស្តីពីការបើកផ្លូវទឹកនេះឡើងវិញ ហើយអ្នកនាំពាក្យក្រសួងការបរទេសអ៊ីរ៉ង់ លោក អេសម៉ាអែល បាកាអ៊ី បានបញ្ជាក់ថា អ្នកសម្របសម្រួលកំពុងព្យាយាមបន្ធូរបន្ថយភាពតានតឹង។
អនុប្រធានាធិបតីអាមេរិក លោក ជេឌី វ៉ាន់ស៍ និងប្រធានអគ្គសេនាធិការចម្រុះ លោក ដាន ខេន បានព្រមានលោក ត្រាំ អំពីហានិភ័យនៃសង្គ្រាម និងការថយចុះនៃស្តុកគ្រាប់រំសេវ (ដូចជាមីស៊ីល Patriot និង Tomahawk)។
បន្ទាប់មក លោក ត្រាំ បានបញ្ជាឱ្យលុបចោលការវាយប្រហារថ្មីៗ ហើយបានប្រាប់អ្នកយកព័ត៌មានថា៖ «យើងកំពុងនិយាយជាមួយពួកគេឥឡូវនេះ។ យើងបានរៀបចំរួចរាល់ និងត្រៀមខ្លួនជាស្រេច ប៉ុន្តែយើងកំពុងនិយាយជាមួយពួកគេ»។
លោក នេតាន់យ៉ាហូ នឹងកោះប្រជុំគណៈរដ្ឋមន្ត្រីសន្តិសុខមុនចេញដំណើរទៅអាមេរិក។ លោកបានទាមទារឱ្យអាមេរិកប្រកាន់ជំហររឹងមាំលើកម្មវិធីនុយក្លេអ៊ែរ និងមីស៊ីលរបស់អ៊ីរ៉ង់ ខណៈដែលអ្នកចរចាអាមេរិកបានផ្តល់អាទិភាពលើការបើកច្រកសមុទ្រ ហរមូស។ លោក នេតាន់យ៉ាហូ នឹងធ្វើដំណើរទៅអាមេរិក ចំពេលមានអំពើហិង្សាយ៉ាងធ្ងន់ធ្ងរនៅតំបន់ វ៉េសប៊ែង (West Bank) បន្ទាប់ពីការស្លាប់របស់ជនជាតិប៉ាឡេស្ទីន ៤ នាក់ និងជនជាតិអ៉ីស្រាអែល ២ នាក់ កាលពីថ្ងៃទី២៣ខែកក្កដា៕
