ពលរដ្ឋរាប់រយគ្រួសាររស់នៅក្នុងភូមិចំនួន ៤ ក្នុងឃុំតាគ្រាម ស្រុកបាណន់ ខេត្តបាត់ដំបង ប្រកាសមិនទទួលយកដំណោះស្រាយ យកឡានដឹកទឹកស្រោចផ្លូវ ដើម្បីបំបាត់ហុយរបស់អាជ្ញាធរនោះទេ ដោយពួកគាត់អះអាងថា វិធានការនេះអនុវត្តជិត ២០ឆ្នាំមកហើយ គ្មានប្រសិទ្ធភាពឡើយ។
អ្នកភូមិថា ឡានធំៗរាប់រយគ្រឿង ដឹកថ្មជាច្រើនតោនបើកលឿន ឆ្លងកាត់ភូមិឋានរបស់ពួកគាត់បណ្តាលឱ្យមានដីហុយខ្លាំង ខូចផ្លូវ ប៉ះពាល់សុខភាពអ្នកភូមិ និងសុភមង្គលរបស់អ្នកស្រុកបាណន់។
ពលរដ្ឋរស់នៅភូមិប៉ោយស្វាយឃុំតាគ្រាម លោក គង់ ម៉ៅ ប្រាប់វីអូឌីនៅថ្ងៃទី២៨ ខែកក្កដាថា មកទល់ម៉ោងនេះ អ្នកភូមិជាង ៥០នាក់ បូករួមទាំងលោក កើតជំងឺរបេង និងរលាកសួត ដោយសារតែទ្រាំហិតធូលីដីហុយចេញពី រថយន្តដឹកថ្មដង្ហែ របស់ក្រុមហ៊ុនឯកជនកាយភ្នំតាគ្រាម ។
លោកថា អាជីវកម្មកាយភ្នំតាគ្រាម និងភ្នំមួយចំនួនទៀតនៅជុំវិញ បណ្តាលឱ្យបាត់បង់ភ្នំប្រវត្តិសាស្ត្រយ៉ាងហោច ៤ បន្ថែមទៀត នៅរយៈពេលជាង ៥ ឆ្នាំ កន្លងទៅនេះ។
លោក គង់ ម៉ៅ និយាយថា៖ «ជនរងគ្រោះខ្លាំងណាស់ មិនមែនជារឿងធម្មតាទេ កើតរបេងច្រើនណាស់ណាភូមិខ្ញុំនេះ ម្ដុំនេះ កើតរបេង ៥០នាក់ ងាប់អស់ ងាប់ ៤-៥នាក់។ ក្នុងមួយថ្ងៃ ១.០០០ ឡានដឹកតតាមផ្លូវហ្នឹង មួយយប់ទល់ភ្លឺ ផ្លូវខ្ទេចអស់ហើយ។ ភ្នំម្ដុំខ្ញុំនេះ អស់ ៣ភ្នំហើយ អស់រលីងបណ្ដោយ រៀបដល់ដីហើយ»។
កាលពីសប្ដាហ៍មុន អ្នកភូមិដាក់វេនគ្នាបិទផ្លូវជិត ១សប្ដាហ៍ ហាមមិនឱ្យរថយន្តដឹកថ្មរបស់ក្រុមហ៊ុនឯកជនបើកឆ្លងកាត់នោះឡើយ។ ក្នុងពេលតវ៉ា គេឃើញមានប្រធានមន្ទីររ៉ែ និងថាមពល ខេត្តបាត់ដំបង ចុះចួបពលរដ្ឋ ដើម្បីជជែករកដំណោះស្រាយ និងជំរុញឱ្យពលរដ្ឋបើកផ្លូវវិញ។
អ្នកភូមិព្រមានថា ការបិទផ្លូវនេះ ជាជម្រើសចុងក្រោយ ដោយសារសំណើរបស់ពួកគាត់ អាជ្ញាធរមិនដោះស្រាយជាង ១០ ឆ្នាំមកហើយ ធ្វើឱ្យពលរដ្ឋលំបាកវេទនា ស៊ូទ្រាំដេកហិតធូលីដីហុយ និងសំឡេងឡានធំៗដឹកថ្មភ្នំ។ រីឯភ្នំប្រវត្តិសាស្ត្រកេរមរតកដូនតា ដែលអ្នកស្រុកបាណន់ចាត់ទុកថា ជានិមិត្តរូបស្រុកកំណើតរបស់ពួកគាត់ បែរជាបាត់បង់នៅសម័យនេះ។
សំឡេងពលរដ្ឋតវ៉ា៖ «បិទមិនឱ្យបើកមិនឱ្យហុយ តែបើកផ្លូវហុយ វានៅហុយប៉ះពាល់ កូនខ្ញុំ ៤នាក់ ឈឺ»។
វីអូឌី មិនទាន់អាចទាក់ទងសុំការបំភ្លឺជុំវិញរឿងនេះ ពីអភិបាលខេត្តបាត់ដំបង លោក សុខ លូ បាននៅឡើយទេ គិតត្រឹមម៉ោងផ្សាយនេះ។
តែយ៉ាងណា ប្រធានមន្ទីររ៉ែ និងថាមពលខេត្តបាត់ដំបង លោក លឹម ប៊ុនលី បានប្រាប់ពលរដ្ឋក្នុងពេលតវ៉ាថា លោកនឹងជំរុញឱ្យក្រុមហ៊ុនធ្វើអាជីវកម្មថ្មភ្នំដាក់វេនគ្នា ដឹកទឹកស្រោចតាមផ្លូវ ដើម្បីបន្ថយហុយដី។ លោកស្នើឱ្យពលរដ្ឋចូលរួមសហការជាមួយមន្ត្រីជំនាញ ចាត់វិធានការករណីក្រុមហ៊ុនមិនគោរពច្បាប់ ដោយដឹកជញ្ជូនថ្មមិនគ្របត្រឹមត្រូវ និងលើសទ្រង់ ព្រមទាំងធ្វើអាជីវកម្មរ៉ែខុសច្បាប់ ជាដើម។
លោក លឹម ប៊ុនលី និយាយថា៖ «នៅក្នុងនេះ មាន ៤-៥ក្រុមហ៊ុន ដែលរ៉ាប់រងលើការស្រោចទឹក កុំឲ្យបងប្អូនពលរដ្ឋយើងហុយណា ព្រោះគាត់ដាក់វេនគ្នានៅជាប្រចាំ។ ឥឡូវហ្នឹង មានតែចាត់វិធានការបន្ថែមការស្រោចទឹក ពីមុនថា ៦ដង យើងត្រូវបន្ថែមតាមសំណូមពរបងប្អូនប្រជាពលរដ្ឋ បន្ថែមទៀត»។
ពលរដ្ឋឱ្យដឹងទៀតថា ក្រុមហ៊ុនធ្វើអាជីវកម្មជិត ២០ឆ្នាំកន្លងមក រួមមាន ក្រុមហ៊ុន ហេង ឆាត ខនស្រ្តាក់សិន (Heng Chat Construction Co., Ltd) ក្រុមហ៊ុន លឹម ម៉េង គ្រុប (NIM MENG GROUP Co,Ltd) ក្រុមហ៊ុន តាំង ថៃឡុង (Tang Thailong Co,Ltd) និងក្រុមហ៊ុន ធី ឡុង (Thy Long) កំពុងធ្វើអាជីវកម្មវាយកម្ទេចថ្មភ្នំ ស្ទើរតែរលាយភ្នំតាគ្រាមទាំងមូល ដោយគ្មានការទប់ស្កាត់ពីអាជ្ញាធរឡើយ។ រីឯបណ្តុំភ្នំជាច្រើនទៀត ក៏ទទួលរងការកាយយកថ្មលក់ រួមមាន ភ្នំកំពូល ភ្នំកុយ និងភ្នំគូទឈ្នៀង ជាដើម។
អ្នកស្រុកបាណន់ សង្ស័យថា ក្រុមហ៊ុន និងក្រុមឈ្មួញខ្លះ បន្តធ្វើអាជីវកម្មកាយភ្នំលក់ មិនមានអាជ្ញាប័ណ្ណស្របច្បាប់នោះទេ។ រីឯកម្មករភាគច្រើនជាជនជាតិចិន និងវៀតណាម ដែលប្រើគ្រឿងចក្រកាយយកថ្មកែវ និងថ្មម៉ាបមានតម្លៃជិត ២០ឆ្នាំ កន្លងមក។
ជុំវិញរឿងនេះ ប្រធានការិយាល័យអង្គការលីកាដូប្រចាំភាគពាយ័ព្យ លោក អ៊ិន គង់ជិត សង្កេតឃើញថា ពលរដ្ឋលើកគ្នាតវ៉ាបិទផ្លូវពុំមែនជារឿងថ្មីឡើយ ពុំឃើញអាជ្ញាធរដោះស្រាយឱ្យជ្រះស្រឡះនៅឡើយទេជាង ១០ ឆ្នាំមកហើយ។ លោកថា អាជ្ញាធរខេត្តបាត់ដំបងគួរតែរួមគ្នាដោះស្រាយបញ្ហាពលរដ្ឋ ដោយត្រូវពន្លឿនធ្វើផ្លូវបេតុងជំនួសឱ្យការស្រោចទឹកបន្ថយដីហុយ ដែលជាដំណោះស្រាយ ធ្វើឱ្យតែល្អមើល។
លោក អ៊ិន គង់ជិត ថ្លែងថា៖ «គ្រាន់តែឆ្លើយឲ្យរួចតែពីមាត់ ដំណោះស្រាយរបៀបហ្នឹងឲ្យតែល្អមើលហ្នឹង ក្រុមហ៊ុនបើកអាជីវកម្មហ្នឹងរាប់ឆ្នាំហើយ រកបានចំណូលរាប់លានដុល្លារ ហើយគ្រាន់តែដោះស្រាយផ្លូវមួយកំណាត់ប៉ុណ្ណឹង ដោះស្រាយមិនបាន»។
អ្នកភូមិបន្ថែមថា ភ្នំដែលគេកំពុងជីកគាស់កាយស្ទើរតែបាត់រូបរាង និងរាបដល់ដី រួមមាន ភ្នំតាគ្រាម ភ្នំថ្មក្រហម ភ្នំអន្សែ ភ្នំប៉ើយស្វាយ ភ្នំពពូល ភ្នំតាត្រងោល ភ្នំគូទឈ្នៀង ភ្នំដូងប្រេង និងភ្នំគល់ជាដើម។ ភ្នំធម្មជាតិទាំងនេះ ជារនាំងបាំងក្រុងបាត់ដំបង ដែលអ្នកស្រុកចាត់ទុកថា ជាកំផែងការពារក្រុងបាត់ដំបង អាចទប់ទល់ការឈ្លានពានរបស់សៀម។ ពលរដ្ឋខ្លះយំស្តាយស្រណោះកេរមរតកដូនតា ធ្លាប់ផ្តល់ម្លប់បៃតងស្រស់ស្អាតទាក់ទាញភ្ញៀវទេសចរ កំពុងក្លាយជាទីផ្សារកាយថ្មមានតម្លៃលក់ ធ្វើអាជីវកម្មយ៉ាងគគ្រឹកគគ្រេង រំខានសុខដុមរបស់ពលរដ្ឋ៕
