Political Issues, នយោបាយ, ព័ត៌មានជាតិ

អ្នកវិភាគថា លោក ហ៊ុន ម៉ាណែត កំពុងយកឱកាសថៃឈ្លានពានបង្ក្រាបខ្មែរដើម្បីពង្រឹងអំណាច

កញ្ញា រតនៈ ម៉ូនីកា
| ២៩ កក្កដា ២០២៦
ម៉ោង ២០:៥២

អ្នកវិភាគស្ថានការណ៍នយោបាយពីកម្ពុជា ចាត់ទុកការបង្ហាញភាពជឿជាក់របស់ លោក ហ៊ុន ម៉ាណែត ដែលថ្លែងដោយមោទនភាពថា សង្គ្រាមព្រំដែនមិនអាចផ្តួលរំលំត្រកូល «ហ៊ុន» បាននោះ វាកំពុងបង្ហាញថា មេដឹកនាំរូបនេះ កំពុងយកឱកាសថៃឈ្លានពានទៅបង្ក្រាបខ្មែរដើម្បីពង្រឹងអំណាចតពូជ ដែលធ្វើឱ្យប្រទេសជិតខាងសម្រេចមហិច្ឆតាឈ្លានពានកម្ពុជាបាន ដោយងាយស្រួល។

ជុំវិញបញ្ហានេះ អ្នកជំនាញភូមិសាស្ត្រនយោបាយ លោក សេង វណ្ណលី ប្រាប់វីអូឌីនៅថ្ងៃទី២៩ ខែកក្កដា ថា ការថ្លែងសារទាំងអំនួតរបស់លោក ហ៊ុន ម៉ាណែត លើប្រធានបទព្រំដែនកម្ពុជា-ថៃ មិនមែនកើតឡើងដោយចៃដន្យនោះទេ ប៉ុន្តែវាឆ្លុះបញ្ចាំងពីការគាំទ្រដោយកត្តានយោបាយជាស្នូល និងរចនាសម្ព័ន្ធអំណាចជាច្រើនដែលក្រុមគ្រួសារលោក ហ៊ុន សែន និងគណបក្សប្រជាជនកម្ពុជាបានកសាងយ៉ាងរឹងមាំជាច្រើនទសវត្សរ៍មកនេះ។

លោកមើលឃើញថា មានកត្តា ៤ ដែលនាំឱ្យមេដឹកនាំបច្ចុប្បន្ននេះ ហ៊ាននិយាយទាំងអំនួត ទោះប្រទេសកំពុងរងការឈ្លានពានពីថៃ និងកាន់កាប់ទឹកដីខ្មែរជាង៧០ទីតាំងដោយខុសច្បាប់ក៏ដោយ។

ក្នុងន័យនេះ លោកថា កត្តាទីមួយ គឺការក្តោបក្តាប់អំណាចស្ថាប័នយ៉ាងដាច់ស្រេច ដែលមានខ្នងបង្អែកយ៉ាងរឹងមាំពីកងកម្លាំងប្រដាប់អាវុធ តុលាការ និងស្ថាប័នវិភាគច្បាប់ទាំងអស់នៅក្នុងប្រទេស។ កត្តានេះធ្វើឱ្យពួកគេមានសមត្ថភាពគ្រប់គ្រងស្ថានការណ៍នយោបាយ និងសន្តិសុខផ្ទៃក្នុងបានទាំងស្រុង ដោយមិនព្រួយបារម្ភអំពីការប្រឈមមុខ ឬការគំរាមកំហែងណាមួយដែលអាចអង្រួនកៅអីអំណាចរបស់ពួកគេបានឡើយ។

កត្តាចម្បងទី២ គឺការកម្ទេច និងទប់ស្កាត់កម្លាំងប្រឆាំង ដែលលោកចង់មានន័យថា ចលនាប្រឆាំង ឬសំឡេងរិះគន់ធំៗជុំវិញបញ្ហាព្រំដែន ត្រូវបានបង្ក្រាបស្ទើរតែទាំងស្រុង។

កត្តាទីបី គឺការគ្រប់គ្រង និងបង្វែររបៀបវារៈព័ត៌មាន ខណៈប្រព័ន្ធផ្សព្វផ្សាយក្នុងស្រុកភាគច្រើន និងយន្តការទំនាក់ទំនងសាធារណៈរបស់រដ្ឋ ស្ថិតក្រោមការគ្រប់គ្រងយ៉ាងតឹងរ៉ឹង ដែលអនុញ្ញាតឱ្យលោក ហ៊ុន ម៉ាណែត អាចកំណត់សាច់រឿងតែម្ខាងបានយ៉ាងងាយស្រួល ដោយទាញយកប្រធានបទព្រំដែនមកធ្វើជាឧបករណ៍បង្ហាញពីភាពរឹងមាំ និងសេ្នហាជាតិរបស់បក្សកាន់អំណាច ជំនួសឱ្យការត្រួតពិនិត្យដោយតម្លាភាពពីសាធារណជន។

លោក សេង វណ្ណលី បន្តថា៖ «កត្តាចុងក្រោយ គឺការទាញយកប្រយោជន៍ពីភាពតានតឹងព្រំដែននាពេលកន្លងមក។ លោក ហ៊ុន ម៉ាណែត ខ្លួនឯងធ្លាប់ទទួលបានប្រជាប្រិយភាព និងការកសាងរូបភាពជាអ្នកដឹកនាំកងទ័ពក្នុងជម្លោះព្រំដែនប្រាសាទព្រះវិហារកាលពីអតីតកាល។ ដូច្នេះការលើកឡើងបែបនេះ គឺជាការផ្ញើសារនយោបាយយ៉ាងច្បាស់លាស់ទៅកាន់អ្នកគាំទ្រ និងគូប្រជែងថា បញ្ហាព្រំដែនដែលអ្នកដទៃធ្លាប់ប្រើជាអាវុធវាយប្រហារលើរូបលោក និងគ្រួសារលោក មិនត្រឹមតែមិនអាចផ្តួលរំលំលោកបានប៉ុណ្ណោះទេ ប៉ុន្តែថែមទាំងត្រូវបានលោកប្រើប្រាស់ធ្វើជាគ្រឹះក្នុងការពង្រឹងអំណាច និងភាពស្របច្បាប់នៃនយោបាយតពូជរបស់ត្រកូល ហ៊ុន ទៀតផង បាទ»។

ការលើកឡើងរបស់អ្នកវិភាគធ្វើឡើងបន្ទាប់ពីនាយករដ្ឋមន្ត្រី លោក ហ៊ុន ម៉ាណែត ថ្លែងក្នុងពិធីប្រគល់វិញ្ញាបនបត្រសម្គាល់ម្ចាស់អចលនវត្ថុ ជូនពលរដ្ឋខេត្តកណ្តាល នៅព្រឹកថ្ងៃទី២៩ ខែកក្កដា ដោយមោទនភាពថា សង្គ្រាមព្រំដែនមិនអាចផ្តួលរំលំត្រកូល «ហ៊ុន» បានទេ។

សារនយោបាយនៅចំពោះមុខពលរដ្ឋរាប់ពាន់នាក់ និងមន្ត្រីហែហមទះដៃលើកជើងផង លោក ហ៊ុន ម៉ាណែត អះអាងដោយទឹកមុខស្វាហាប់ថា ជម្លោះព្រំដែនជាមួយថៃ មិនត្រឹមតែមិនអាចធ្វើឱ្យគណបក្សប្រជាជនកម្ពុជា ឬត្រកូល «ហ៊ុន» បាត់បង់អំណាចនោះទេ ប៉ុន្តែផ្ទុយទៅវិញ នឹងក្លាយជាកម្លាំងរួបរួមជាតិនិយម ពង្រឹងការគាំទ្ររដ្ឋាភិបាល និងជំរុញការវិនិយោគ ការកែទម្រង់ និងការអភិវឌ្ឍ ដើម្បីធ្វើឱ្យកម្ពុជាកាន់តែរឹងមាំ និងបន្តរីកចម្រើនក្រោមការដឹកនាំរបស់គណបក្សប្រជាជនកម្ពុជាបន្ថែមទៀត។

លោក ហ៊ុន ម៉ាណែត ថ្លែងថា៖ «មានអ្នកខ្លះ គេដាក់ទិសដៅ គិតថាសង្គ្រាមព្រំដែននេះនឹងធ្វើឱ្យគណបក្សប្រជាជនរលំ ជាពិសេសគេថា ត្រកូលហ៊ុនហ្នឹងរបូតអំណាច ដោយសាររឿងព្រំដែន គេនឹងវ៉ៃ។ អត់ទេ! កុំថាគណបក្សប្រជាជន ឬមួយកម្ពុជាបែកបាក់ អត់មានទេ! រឿងជាតិនិយមនេះធ្វើឱ្យកម្ពុជាកាន់តែរឹងមាំ នៅក្រោម ឬជាមួយរាជរដ្ឋាភិបាល ដឹកនាំដោយគណបក្សប្រជាជនកម្ពុជា»។

សារ លោក ហ៊ុន ម៉ាណែត នៅចំពោះមុខពលរដ្ឋ វាខុសពីសារដែលលោកឆ្លើយតបទៅមេដឹកនាំថៃ ទាក់ទងនឹងរឿងព្រំដែន ខណៈទឹកដីខ្មែរជាច្រើនត្រូវបានថៃគ្រប់គ្រង ដោយឯកតោភាគី ហើយលោក ហ៊ុន ម៉ាណែត បានត្រឹមទទូចឱ្យថៃចូលតុចរចា។ តែលទ្ធផលថៃបន្តច្រានចោលការអំពាវនាវរបស់កម្ពុជា ដែលចង់សុំថៃចរចាទោះមានសង្ឃឹម ១ភាគរយក្ដី។

ជុំវិញករណីនេះ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត យល់ថា សាររបស់លោក ហ៊ុន ម៉ាណែត មិនមែនគ្រាន់តែជាការបង្ហាញទំនុកចិត្តលើអំណាចនោះទេ ប៉ុន្តែជាសារនយោបាយដែលបង្ហាញថា អំណាចតត្រកូលមិនអាចត្រូវបានផ្លាស់ប្ដូរឡើយ។ លោកអះអាងថា លោក ហ៊ុន ម៉ាណែត កំពុងដើរតាមគន្លងរបស់លោក ហ៊ុន សែន ដោយពឹងផ្អែកលើការគ្រប់គ្រងស្ថាប័នរដ្ឋ កងកម្លាំងប្រដាប់អាវុធ តាមរយៈការកម្ចាត់អ្នករិះគន់ ជាជាងការអត់ឱន បើទោះបីពួកគេគ្រាន់ជាពលរដ្ឋស្លូតត្រង់ធម្មតា និងរិះគន់ដើម្បីស្ថាបនាប្រទេសកំណើតរបស់ខ្លួនក្ដី។

អ្នកឃ្លាំមើលរូបនេះ មើលឃើញថា ការប្រកាសអំពីភាពរឹងមាំនៃរចនាសម្ព័ន្ធអំណាចរបស់ លោក ហ៊ុន ម៉ាណែត គឺជាការត្រៀមបន្តគ្រប់គ្រងប្រទេសក្នុងរយៈពេលវែង។

លោក ម៉ែន ណាត ថ្លែងថា៖ «អញ្ចឹងអំណាចទំនើងចិត្តរបស់ក្រុមគ្រួសារហ៊ុនហ្នឹង កាន់តែបង្ហាញក្រឡាសារច្បាស់ទៅៗហើយ គឺលោក ហ៊ុន ម៉ាណែត មិនមែនជាប្រភេទមេដឹកនាំដែលមានអធ្យាស្រ័យល្អទេ! យើងមើលទៅចាប់ពីថ្ងៃហ្នឹងតទៅ គឺមេដឹកនាំហ្នឹងគឺកាន់តែហួសហេតុ ដូចជាងលោក ហ៊ុន សែន ទៅទៀត។ វាអាចទៅជាអញ្ចឹងណា! ម៉្លោះហើយ! ម្ល៉ោះហើយបានជាលោក ហ៊ុន ម៉ាណែត ហ្នឹងហ៊ាននិយាយយ៉ាងព្រហើនថា គ្មាននរណាអាចផ្ដួលរំលំក្រុមគ្រួសារគាត់បានទេ»។

បន្ថែមពីនេះ លោក ម៉ែន ណាត សង្កត់ធ្ងន់ថា រដ្ឋាភិបាលលោក ហ៊ុន ម៉ាណែត នឹងកាន់តែបង្ក្រាបសំឡេងរិះគន់ក្នុងស្រុក ជាជាងដោះស្រាយវិវាទព្រំដែន និងស្វែងរកយុត្តិធម៌ជូនពលរដ្ឋ។ លោកថា បើស្ថានការណ៍បែបនេះកើតឡើងនៅប្រទេស ដូចជា បង់ក្លាដែស ស្រីលង្កា ឬសម័យរបបស៊ូហាតូ នៅឥណ្ឌូនេស៊ីជាដើម នោះរបបដឹកនាំដោយលោក ហ៊ុន ម៉ាណែត ដូចបច្ចុប្បន្ននេះ ច្បាស់ជាត្រូវដួលរលំបាត់ទៅហើយ។ ប៉ុន្តែនៅកម្ពុជា គឺពលរដ្ឋខ្មែរមាការភ័យខ្លាច ហើយបែកបាក់សាមគ្គីអស់ហើយ ដែលនាំឱ្យការផ្លាស់ប្ដូររបបនយោបាយស្ទើរតែពិបាកកើតមាន។

សម្រាប់ក្រុមអ្នកវិភាគនៅតែយល់ថា លោក ហ៊ុន ម៉ាណែត ថា ជាមេដឹកនាំទន់ខ្សោយជាងគេម្នាក់ ក្នុងការការពារអធិបតេយ្យភាពជាតិ ដែលធ្វើឱ្យថៃអាចឈ្លានពាន និងកាន់កាប់ទឹកដីខ្មែរនៅតាមព្រំដែនជាង ៧០ទីតាំង ហើយរដ្ឋាភិបាលបានត្រឹមចេញញត្តិតវ៉ា។ ពួកគេថែមទាំងចោទថា រដ្ឋាភិបាលហាក់មិនប្រញាប់ជំរុញដំណើរការប្ដឹងថៃទៅតុលាការយុត្តិធម៌អន្តរជាតិ (ICJ) នោះទេ ប៉ុន្តែបន្តប្រើអំណាចចាប់ចងពលរដ្ឋ ហើយអួតអាងពីអំណាចតត្រកូលរបស់ខ្លួនដោយឥតអៀនខ្មាស់ ទាំងដែលរដ្ឋាភិបាលពោរពេញដោយអំពើពុករលួយ បក្ខពួកនិយម ការមិនគោរពនីតិរដ្ឋ និងការប្រើអំណាចតាមទំនើងចិត្តជាដើម៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។