អន្តរជាតិ

ការវាយប្រហារនៅអេហ្ស៊ីបបង្កការព្រួយបារម្ភដល់ការនាំចេញប្រេងតាមតំបន់ស៊ុយអេ

កញ្ញា រតនៈ ម៉ូនីកា
| ៣១ កក្កដា ២០២៦
ម៉ោង ១៧:២២

ការវាយប្រហារដោយដ្រូនដែលបានធ្វើឱ្យខូចខាតនាវាដឹកឧស្ម័នចំនួនពីរគ្រឿង នៅក្នុងដែនទឹកអេហ្ស៊ីប បានធ្វើឱ្យមានការព្រួយបារម្ភជាថ្មីអំពីសន្តិសុខថាមពលជុំវិញព្រែកជីកស៊ុយអេ (Suez Canal) និងបំពង់ប្រេងស៊ូមេត (Sumed pipeline) ដែលជាផ្លូវនាំចេញដ៏សំខាន់សម្រាប់ប្រេងរបស់អារ៉ាប៊ីសាអ៊ូឌីត ចាប់តាំងពីសង្គ្រាមអ៊ីរ៉ង់បានចាប់ផ្តើម។

ទោះបីជាអ៊ីរ៉ង់ និងសម្ព័ន្ធមិត្តហ៊ូធី (Houthi) បានបាញ់ប្រហារលើនាវាដឹកប្រេងដែលឆ្លងកាត់ច្រកសមុទ្រហ័រមុស (Strait of Hormuz) និងបាប់អែលម៉ាន់ដេប (Bab el-Mandeb) ក៏ដោយ ក៏ព្រែកជីកស៊ុយអេ និងបំពង់ប្រេងស៊ូមេតរបស់អេហ្ស៊ីប នៅតែបន្តផ្តល់ផ្លូវនាំចេញដោយសុវត្ថិភាពសម្រាប់ថាមពលសមុទ្រក្រហមរបស់អារ៉ាប៊ីសាអ៊ូឌីត។ ប៉ុន្តែការវាយប្រហារនៅកំពង់ផែដាមៀតតា (Damietta) ជិតសមុទ្រមេឌីទែរ៉ានេ បានបន្ថែមការព្រួយបារម្ភដល់ទីផ្សារអំពីហានិភ័យ ដែលអាចកើតមានចំពោះចំណុចយុទ្ធសាស្ត្រនេះ។

លោក ស៊ូល កាវ៉ូនិច (Saul Kavonic) ប្រធានផ្នែកស្រាវជ្រាវថាមពលនៅក្រុមហ៊ុន MST Marquee បានព្រមានថា ការរំខានដល់ផ្លូវនេះអាចគំរាមកំហែងដល់ការផ្គត់ផ្គង់ប្រេងរហូតដល់ ៥ លានបារ៉ែលក្នុងមួយថ្ងៃ។ ដោយសារស្ទើរតែគ្មាននាវាឆ្លងកាត់ច្រកសមុទ្រហ័រមុស អារ៉ាប៊ីសាអ៊ូឌីតបានបង្វែរទិសដៅប្រេងភាគច្រើនទៅកាន់សមុទ្រក្រហម និងកំពង់ផែយ៉ានប៊ូ (Yanbu)។ ទោះជាយ៉ាងណា ការគំរាមកំហែង និងការវាយប្រហាររបស់ក្រុមហ៊ូធី បានបង្ខំឱ្យនាវាជាច្រើនបង្វែរទិសដៅទៅទិសខាងជើង ឆ្ពោះទៅកាន់ព្រែកជីកស៊ុយអេ និងបំពង់ប្រេងស៊ូមេតវិញ។

ទិន្នន័យពីក្រុមហ៊ុន Kpler និង Vortexa បង្ហាញថា ការដឹកជញ្ជូនប្រេងចេញពីបំពង់ប្រេងស៊ូមេតបានកើនឡើងដល់ ២៨.៧៩ លានបារ៉ែលក្នុងខែកក្កដា។ សម្រាប់អតិថិជននៅអាស៊ី ការបង្វែរទិសដៅតាមស៊ុយអេជំនួសឱ្យច្រកបាប់អែលម៉ាន់ដេប បង្កើនពេលវេលាធ្វើដំណើរលើសពីពីរដងទៅកាន់អាស៊ីបូព៌ា ដែលធ្វើឱ្យការមកដល់ពន្យារពេលប្រហែលមួយខែ និងបន្ថែមថ្លៃចំណាយយ៉ាងច្រើន។

ទោះបីជាមិនទាន់មានភាគីណាមួយចេញមុខទទួលខុសត្រូវចំពោះការវាយប្រហារនេះ ហើយអ្នកវិភាគខ្លះមើលឃើញថា ព្រែកជីកស៊ុយអេមិនទាន់ប្រឈមនឹងការគំរាមកំហែងភ្លាមៗក៏ដោយ ក៏ក្រុមហ៊ូធីបានបង្ហាញថា តំបន់ព្រែកជីកស្ថិតនៅក្នុងកាំបាញ់នៃដ្រូន និងរ៉ុក្កែតរបស់ពួកគេ។ កត្តានេះកំពុងជំរុញឱ្យក្រុមហ៊ូធីធានារ៉ាប់រងដំឡើងថ្លៃបុព្វលាភហានិភ័យសង្គ្រាម (War Risk Premiums) និងធ្វើឱ្យក្រុមហ៊ុនដឹកជញ្ជូនត្រូវវាយតម្លៃឡើងវិញនូវវិធានការសន្តិសុខរបស់ពួកគេ។

អតីតសមាជិកក្រុមប្រឹក្សាភិបាលអាជ្ញាធរព្រែកជីកស៊ុយអេបានអះអាងថា ព្រែកជីកនេះត្រូវបានការពារយ៉ាងតឹងរ៉ឹង ២៤ ម៉ោង ប៉ុន្តែអ្នកជំនាញខាងសមុទ្របានព្រមានថា ការរំខានណាមួយដល់ប្រតិបត្តិការនៅព្រែកជីកស៊ុយអេ នឹងមានផលប៉ះពាល់ភ្លាមៗលើតម្លៃប្រេងសកល ហើយសម្ពាធអតិផរណាពីថ្លៃដឹកជញ្ជូនខ្ពស់ជាងមុន នឹងត្រូវផ្ទេរទៅអ្នកប្រើប្រាស់ស្ទើរតែភ្លាមៗ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។