កម្មករជាង ២០០០នាក់ ធ្វើការនៅរោងចក្រផលិតកាបូប ជេ អេស (JS Leather Collection Phnom Penh Co., Ltd.) ស្ថិតនៅសង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ បានផ្ទុះការតវ៉ាធ្វើកូដកម្ម ទាមទារឱ្យថៅកែរោងចក្របញ្ឈប់អ្នកគ្រប់គ្រងជនជាតិកូរ៉េម្នាក់ ដែលបៀតបៀនកម្មការិនី និងតែងធ្វើទុក្ខបុកម្នេញរំលោភសិទ្ធិលើកម្មករ ព្រមទាំងដោះស្រាយបញ្ហាធំក្លិនកាវនៅក្នុងរោងចក្រដែលធ្វើឱ្យប៉ះពាល់ដល់សុខភាពរបស់កម្មករ។
កំពុងឈរធ្វើកូដកម្មនៅមុខរោងចក្រ ជេ អេស នាព្រឹកថ្ងៃទី០៣ ខែសីហា ឆ្នាំ២០២៦ កម្មការិនី ម៉ុស ចរិយា បានឱ្យដឹងថា ដើមចមដែលនាំឱ្យកម្មករជាង ២០០០នាក់ បាននាំគ្នាធ្វើកូដកម្មនេះ ដោយសារតែកាលពីរសៀលថ្ងៃសុក្រសប្តាហ៍មុន អ្នកគ្រប់គ្រងរោងចក្រជនជាតិកូរ៉េ បានចូលទៅបន្ទប់ពេទ្យក្នុងរោងចក្រ មានបំណងយកទូរស័ព្ទថតកម្មការិនី ២នាក់ ដែលកំពុងដោះអាវកោសខ្យល់ ដែលទង្វើនេះជាការបៀតបៀនកេរ្តិ៍ខ្មាស់របស់កម្មករជាស្ត្រី។
កម្មការិនីរូបនោះ និយាយថា៖ «ចង់បានដំណោះស្រាយ កុំឱ្យគាត់រំលោភសិទ្ធិបំពានបៀតបៀនកេរ្តិ៍ខ្មាស់ពួកយើងទៀត ព្រោះពួកយើងជាស្ត្រី គាត់ជាបុរស គាត់ជាបុរសជនជាតិកូរ៉េម្នាក់ រឿងអីទៅចូលមន្ទីរពេទ្យយើងរបស់មនុស្សស្រី រឿងអីគាត់អត់សួរថា ក្នុងនោះមានមនុស្សស្រីអត់ កម្មការិនីកំពុងដោះអាវ គាត់ចូលទៅមានគោលបំណងថត តែអត់ដឹងថាថតឬអត់ទេ តែគាត់បានអើតមើល ចឹងពួកយើងគ្រាន់តែចង់បានយុត្តិធម៌តែប៉ុណ្ណឹងទេ»។
កម្មការិនីរោងចក្រ ជេ អេស ម្នាក់ទៀត អ្នកស្រី ថុល ចាន់ធឿន បាននិយាយថា ក្នុងពេលបំពេញការងារ អ្នកគ្រប់គ្រងជនជាតិកូរ៉េរូបនេះ តែងតែប្រើប្រាស់ពាក្យសម្តីខ្លាំងៗ គាបសង្កត់កម្មករ និងបានកំណត់ចំនួនដេរលើសពីកម្លាំងរបស់កម្មករ ដែលធ្វើឱ្យកម្មករមិនសប្បាយចិត្ត ហើយចុងក្រោយនេះ អ្នកគ្រប់គ្រងរូបនោះ បានចូលទៅបន្ទប់ពេទ្យខណៈដែលកម្មការិនីពីរនាក់ កំពុងដោះអាវកោសខ្យល់ ដែលជាទង្វើបៀតបៀនមកលើស្រី្តជាកម្មករ។
អ្នកស្រីថា៖ «ដល់គាត់[អ្នកគ្រប់គ្រងរោងចក្រ]ធ្វើអំពើចឹង ទី១ ខ្ញុំចង់ដកគាត់ចេញអត់ឱ្យគាត់នៅគ្រប់គ្រងនៅហ្នឹងទេ រឿងចំណុចសំខាន់គឺចឹង ហើយទី២ ខ្ញុំចង់ឱ្យគាត់ហ្នឹងកុំប្រើអំពើដូចថាកំណត់ចំនួនលើសពីកម្លាំង[…] ដល់ពេលកំណត់អត់បានគាត់ប្រើពាក្យសម្តីមិនសមរម្យចឹងទៅណា គាត់ថាឱ្យកម្មករពួកគាត់អត់សមរម្យ»។
ចំណែក កម្មការិនី ចំរើន បូលី ធ្វើការនៅរោងចក្រជេ អេស ដែរនោះ បានលើកឡើងដែរថា ការធ្វើកូដកម្មនេះ កម្មករ-កម្មការិនី ទាមទារឱ្យរោងចក្រដោះស្រាយបញ្ហាធំក្លិនកាវ ដកអ្នកគ្រប់គ្រងរោងចក្រជនជាតិកូរ៉េដែលបៀតបៀនកម្មការិនីក្នុងរោងចក្រ និងគោរពសិទ្ធិកម្មករ។ អ្នកស្រីបន្តថា ចាប់តាំងពីអ្នកគ្រប់គ្រងរោងចក្រនេះមកកាន់ការងារខ្ទង់ ១ឆ្នាំមកនេះ កម្មករបាននាំគ្នាតវ៉ាទៅកាន់ថៅកែជាច្រើនដងមកហើយ ប៉ុន្តែមិនមានដំណោះស្រាយ ទើបពួកគាត់នាំគ្នាចេញមកធ្វើកូដកម្មនៅមុខរោងចក្រតែម្តង ដោយសារតែអត់ទ្រាំនឹងការគាបសង្កត់របស់អ្នកគ្រប់គងទៀតលែងបាន។
អ្នកស្រី៖ថា «ចង់ឱ្យគាត់[ថៅកែរោងចក្រ និងក្រសួងស្ថាប័នពាក់ព័ន្ធ]ដោះស្រាយចឹងណា ព្រោះតវ៉ាច្រើនដងហើយ តវ៉ានៅខាងក្នុងច្រើនដងហើយតែវាអត់បានអីចឹងណា បានតែមួយធម្មតាៗចឹងណា ពេលតវ៉ាគាត់រឹតតែខ្លាំង។ និយាយរួម គឺសំណូមពរឱ្យគាត់ជួយអន្តរាគមន៍ឱ្យតាហ្នឹង[អ្នកគ្រប់គ្រងរោងចក្រជនជាតិកូរ៉េ] បើសិនជាអាចឱ្យគាត់ឈប់តែម្តង កុំឱ្យគាត់នៅកាន់ទៀត ព្រោះកម្មករមានបញ្ហាច្រើន មានសម្ពាធច្រើន»។
វីអូឌី មិនអាចស្វែងរកការអត្ថាធិប្បាយរឿងនេះ អ្នកគ្រប់គ្រងជនជាតិកូរ៉េ លោក WANG EUMLEE និងតំណាងរោងចក្រ JS CORP (JS Leather Collection Phnom Penh Co., Ltd.) បានទេ គិតត្រឹមម៉ោងផ្សាយនេះ។
យ៉ាងណា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ស៊ុន មេសា បានឱ្យដឹងតាមតេឡេក្រាមថា ក្រសួងបានដោះស្រាយដោយជោគជ័យ ចំពោះកង្វល់របស់កម្មករនិយោជិតនៅរោងចក្រ ជេ អេស ដោយភាគីទាំងអស់បានឈានដល់កិច្ចព្រមព្រៀងរួម ហើយកម្មករនិយោជិតនឹងចូលបម្រើការងារវិញជាធម្មតា ចាប់ពីថ្ងៃទី៤ ខែសីហា ស្អែកនេះ។
លោកបន្តថា តាមកិច្ចព្រមព្រៀង ភាគីក្រុមហ៊ុនបានឯកភាពកែលម្អការគ្រប់គ្រង និងបរិយាកាសការងារ ផ្លាស់ប្តូរទីតាំងម៉ាស៊ីនដែលបង្កផលប៉ះពាល់ដល់កម្មករនិយោជិត ធានាមិនរើសអើងសហជីព និងតំណាងកម្មករ និងអនុវត្តច្បាប់ការងារ និងបទបញ្ជាផ្ទៃក្នុងឱ្យបានត្រឹមត្រូវ។ ចំណែកកម្មករនិយោជិតបានឯកភាពបញ្ចប់វិវាទ និងចូលបម្រើការងារវិញជាធម្មតា ដោយបញ្ហាដែលអាចកើតមាននាពេលអនាគត នឹងត្រូវដោះស្រាយតាមរយៈការសន្ទនា និងនីតិវិធីសន្តិវិធី។
លោកថា៖ «នៅពេលបងប្អូនមានបញ្ហា ក្រសួងមិនរង់ចាំទេ គឺចុះអន្តរាគមន៍ភ្លាម ស្តាប់គ្រប់ភាគី និងស្វែងរកដំណោះស្រាយដែលមានតុល្យភាព ស្របតាមច្បាប់ ដើម្បីការពារផលប្រយោជន៍កម្មករនិយោជិត និងរក្សានិរន្តរភាពអាជីវកម្មរបស់សហគ្រាស។ ការដែលបងប្អូនកម្មករចូលធ្វើការវិញជាធម្មតា គឺជាលទ្ធផលជាក់ស្តែងនៃការសន្ទនា ការយោគយល់ និងការទទួលខុសត្រូវរួមរបស់គ្រប់ភាគី»។
ប្រធានគ្រប់គ្រងកម្មវិធីការងារនៃអង្គការសង់ត្រាល់ លោក ឃុន ថារ៉ូ សង្កេតឃើញថា ជាទូទៅទម្រង់ប្រើប្រាស់អំពើហិង្សា ការប្រើប្រាស់ពាក្យសម្តី ឥរិយាបទ អាកប្បកិរិយា ឬក៏ការបៀតបៀនផ្លូវភេទនេះ តែងតែកើតមានជារឿយៗទៅលើកម្មករ ក្នុងវិស័យវាយនភណ្ឌកាត់ដេរ និងវិស័យសេវាកម្មជាដើម ហើយទង្វើឬសកម្មភាពទាំងនេះ ក៏អាចចាត់ថ្នាក់ថាជាកំហុសធ្ងន់ធ្ងរ ដែលទាមទារឱ្យក្រុមហ៊ុន និងរោងចក្រសហគ្រាស ត្រូវធ្វើការស៊ើបអង្កេតដោយតម្លាភាព និងមានដំណោះស្រាយបន្ទាន់។
លោកបន្តថា៖ «កន្លងទៅ វិវាទការងារដែលកើតចេញមកពីការប្រើប្រាស់នូវអំពើហិង្សា ការបៀតបៀនផ្លូវភេទនេះ វាអត់ទាន់មានយន្តការជាក់លាក់មួយនៅក្នុងយន្តការនៃការដោះស្រាយវិវាទ ដោយបញ្ហានេះជារឿយៗកម្មករច្រើនតែមានការផ្ទុះការតវ៉ា នៅក្នុងការដែលពួកគាត់មិនសប្បាយចិត្ត នូវអាកប្បកិរិយារបស់គណៈគ្រប់គ្រង ឬក៏ប្រធានផ្នែកណាមួយដែលគាត់បានប្រើប្រាស់នូវអំពើរំលោភបំពាន ឬការបៀតបៀនផ្លូវភេទ ចឹងអាចំណុចនេះ វាលុះត្រាតែមានការធ្វើអធិការកិច្ច ហើយប្រសិនបើការរកឃើញថាអាហ្នឹងវាផ្ទុយពីច្បាប់ស្តីពីការងារ ឬក៏ស្ថិតនៅក្នុងទម្រង់នៃការប្រព្រឹត្តកំហុសធ្ងន់របស់និយោជក អាហ្នឹងវាជាដែនសមត្ថកិច្ចរបស់ក្រុមហ៊ុន អ្នកគ្រប់គ្រងរបស់ក្រុមហ៊ុននៅក្នុងការចាត់វិធានការ»។
គួររំលឹកដែរថា កាលពីអំឡុងខែកុម្ភៈ ឆ្នាំ២០២២ កម្មករបម្រើការងារនៅរោងចក្រ JS នៅសាខាទី១ ប្រមាណ ៥០០នាក់ ធ្លាប់បានប្រមូលផ្ដុំតវ៉ាអស់រយៈពេល២ថ្ងៃផងដែរ ដើម្បីទាមទារប្រាក់ជំនាញដែលថៅកែសន្យាផ្ដល់ជូនពួកគេ៕
