សហជីពមួយ ជំរុញឱ្យមន្ត្រីក្រសួងការងារ ត្រូវមានយន្តការច្បាស់លាស់កំហិតឱ្យភាគីរោងចក្រ សហគ្រាសអនុវត្តច្បាប់ឱ្យបានពេញលេញ ដើម្បីកាត់បន្ថយរលកតវ៉ាពីសំណាក់កម្មករ ដោយសំអាងថា ត្រឹមមួយឆ្នាំចុងក្រោយបញ្ហានេះ កំពុងជំរុញឱ្យមានការកើនឡើងកូដកម្ម-បាតុកម្ម គួរឱ្យកត់សម្គាល់។
ក្នុងសេចក្តីថ្លែងការណ៍របស់ប្រធានសម្ព័ន្ធសហជីពជាតិ លោក ហ្វា សាលី ចុះថ្ងៃទី០៤ ខែសីហា ឆ្នាំ២០២៦ បានលើកឡើងថា នៅឆមាសទី២ ឆ្នាំ២០២៥ និងឆមាសទី១ ឆ្នាំ២០២៦ ខ្លួនសង្កេតឃើញថា មានកូដកម្ម-បាតុកម្ម បានកើតឡើងជាច្រើនករណី ដែលបណ្តាលមកពីការរើសអើងសហជីព និងការមិនអនុវត្តច្បាប់ស្តីពីការងារ ពីសំណាក់ភាគីនិយោជក។
ម្យ៉ាងវិញទៀត លោកថា រោងចក្រសហគ្រាសមួយចំនួនធំ នៅតែមិនទាន់បានអនុវត្តច្បាប់ស្តីពីការងារឱ្យបានពេញលេញ និងគោរពសិទ្ធិសេរីភាពរបស់កម្មករនៅកន្លែងការងារនៅឡើយ ដោយរោងចក្របានកំណត់ចំនួនឱ្យកម្មករនិយោជិតបំពេញការងារលើសកម្រិត បង្ខំឱ្យកម្មករនិយោជិតធ្វើការងារបន្ថែមម៉ោង លើសពីគោលការណ៍ស្ម័គ្រចិត្ត ការជេរប្រមាថប្រើសំដីអសុរសក្នុងពេលបំពេញការងារ ការគំរាមកំហែងបញ្ចប់កិច្ចសន្យាការងារ និងបញ្ហាមួយចំនួនទៀត។
ប្រភពដដែល បន្តថា បើទោះបីជានៅពេលមានកម្មករនិយោជិតធ្វើកូដកម្ម-បាតុកម្ម ឬការរាយការណ៍ពីភាពអយុត្តិធម៌នៅកន្លែងការងារជាដើមនោះ មន្ត្រីក្រសួងការងារបានចុះដោះស្រាយឆាប់រហ័ស និងទាន់ពេល ប៉ុន្តែលទ្ធផលទាំងនោះ នៅតែមិនទាន់អាចទទួលយកបាន និងគ្មានប្រសិទ្ធភាពនៅឡើយ ក្នុងការជំរុញឱ្យភាគីនិយោជកអនុវត្តបានទាំងស្រុង ល្គិកណាក្រសួងគ្មានយន្តការច្បាស់លាស់ ក្នុងការដាក់កំហិតឱ្យភាគីនិយោជកអនុវត្តឱ្យបានត្រឹមត្រូវ និងមានការផាកពិន័យធ្ងន់ធ្ងរទៅលើរោងចក្រសហគ្រាសដែលមិនគោរពច្បាប់។
ការណ៍នេះ សម្ព័ន្ធសហជីពជាតិ បានអំពាវនាវដល់ថ្នាក់ដឹកនាំក្រសួងការងារ ពិនិត្យចំពោះមន្ត្រីរបស់ខ្លួន ធ្វើយ៉ាងណាឱ្យបំពេញការងារប្រកបដោយសុភវិនិច្ឆ័យត្រឹមត្រូវ តម្លាភាព និងប្រកបដោយវិជ្ជាជីវៈ។
គួរបញ្ជាក់ថា ក្នុងរយៈពេលប៉ុន្មានខែចុងក្រោយនេះ គេសង្កេតឃើញមានករណីកម្មករនិយោជិតនៅតាមបណ្តារោងចក្រមួយចំនួន បានផ្ទុះការតវ៉ាធ្វើកូដកម្មជាបន្តបន្ទាប់ ក្នុងនោះកាលពីថ្ងៃទី៣សីហានេះ កម្មករជាង២ពាន់នាក់ បម្រើការងារនៅរោងចក្រ ជេ អេស បានតវ៉ាទាមទារឱ្យរោងចក្រដកអ្នកគ្រប់គ្រងជនជាតិកូរ៉េចេញ ដោយសារតែអ្នកគ្រប់គ្រងរូបនេះ ប្រើពាក្យសម្តីខ្លាំងៗ រំលោភសិទ្ធិ និងបៀតបៀនកម្មករជាស្ត្រី។
ក្នុងអំឡុងខែកក្កដា ឆ្នាំ២០២៦ កម្មករជាច្រើននាក់ នៅរោងចក្រឈានស៊ីង ស្ថិតក្នុងខេត្តកំពង់ស្ពឺ និងកម្មករ-កម្មការនីជាច្រើនរយនាក់ បម្រើការងារនៅរោងចក្រកាត់ដេរ ខូហ្ស៊ី នីត ខេត្តកណ្តាល ក៏បានផ្ទុះការតវ៉ាធ្វើកូដកម្មនៅមុខរោងចក្រ ទាមទារឱ្យថៅកែទទួលយកថ្នាក់ដឹកនាំសហជីព និងតំណាងកម្មករដែលបានបញ្ឈប់ដោយសារការរើសអើងសហជីព ឱ្យចូលធ្វើការវិញ និងទាមទារឱ្យមានការគោរពលក្ខខណ្ឌការងារមួយចំនួន។
ចំណែក កាលពីថ្ងៃទី០៧ ខែមេសា ឆ្នាំ២០២៦ កម្មករជាង៣០០នាក់នៅរោងចក្រ អ៊ីស ឡូយ៉ាល់ ហ្គាម៉ិន (ខេមបូឌា) ស្ថិតក្នុងខណ្ឌដង្កោ រាជធានីភ្នំពេញ ក៏បានធ្វើកូដកម្មតវ៉ាប្រឆាំងនឹងការរើសអើងសហជីព ក្រោយភាគីរោងចក្រ បញ្ឈប់តំណាងសហជីពពីការងារ ដោយមិនប្រាប់ពីមូលហេតុផងដែរ៕
