ក្រោយបែកធ្លាយរឿងសូកប៉ាន់មេប៉ូលិសខេត្តព្រៃវែង លោក ឈឿន ប៊ុនឆន ដែលថា បានតម្រូវឱ្យឧកញ៉ាមានឥទ្ធិពលម្នាក់ឈ្មោះ ជឹម សុខ បង់ប្រាក់ប្រចាំខែចំនួន ១ម៉ឺនដុល្លារ ជាថ្នូរនឹងការអនុញ្ញាតឱ្យនាំគោក្របីឆ្លងដែនទៅលក់នៅវៀតណាមនោះ ជំរុញឱ្យមានការរិះគន់ថា អំពើពុករលួយបែបប្រទាក់ក្រឡាគ្នា បានសន្សល់ទុករហូតរដ្ឋាភិបាលលោក ហ៊ុន ម៉ាណែត ។
ក្រុមអ្នកតាមដាន ជំរុញឱ្យរដ្ឋាភិបាលលោក ហ៊ុន ម៉ាណែត ពន្លឿនការកែទម្រង់ និងបង្កើនគណនេយ្យភាពក្នុងការបង្ក្រាបអំពើពុករលួយ និងបើកការស៊ើបអង្កេតដោយឯករាជ្យ លើសំណុំរឿងដ៏ចម្រូងចម្រាសនេះ ដើម្បីជំរុញតម្លាភាពសង្គម ។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ប្រាប់វីអូឌីនៅថ្ងៃទី៤ ខែសីហា ថា សំណុំរឿងដែលឧកញ៉ា ជឹម សុខ ប្តឹងស្នងការនគរបាលខេត្តព្រៃវែង និងស្នងការរងជុំវិញការចោទប្រកាន់ពាក់ព័ន្ធការទារប្រាក់ គួរត្រូវបានអង្គភាពប្រឆាំងអំពើពុករលួយ (ACU) ស៊ើបអង្កេតទាំងភាគីអ្នកចោទ និងអ្នករងការចោទប្រកាន់។
លោកលើកហេតុផលថា ភាគីទាំងពីរត្រូវមានទំនួលខុសត្រូវមុខច្បាប់ដូចគ្នា ព្រោះច្បាប់បានចែងពីការដាក់ទោសទណ្ឌទាំងលើអ្នកសូក និងទទួលសំណូក។ លោកក៏រិះគន់ថា ការបណ្តោយឱ្យមន្ត្រីរាជការមួយចំនួនប្រកបអាជីវកម្មផ្ទាល់ខ្លួន ដូចករណីលោក ជឹម សុខ ដែលមានតួនាទីជាសមាជិកក្រុមប្រឹក្សាខេត្តផង បង្កហានិភ័យទំនាស់ផលប្រយោជន៍ និងអំពើពុករលួយ។
លោកចាត់ទុកថា ករណីនេះឆ្លុះបញ្ចាំងពីភាពខ្សោយនៃការគ្រប់គ្រងរដ្ឋបាលសាធារណៈ និងវប្បធម៌និទណ្ឌភាព ដែលធ្វើឱ្យមន្ត្រីពាក់ព័ន្ធអំពើពុករលួយកម្រទទួលការផ្តន្ទាទោសណាស់។ លោកអំពាវនាវឱ្យរដ្ឋាភិបាលលោក ហ៊ុន ម៉ាណែត ពន្លឿនការកែទម្រង់រដ្ឋបាល ពង្រឹងគណនេយ្យភាព និងអនុវត្តច្បាប់ដោយស្មើភាពចំពោះអ្នកពាក់ព័ន្ធទាំងអស់។
លោក ម៉ែន ណាត ថ្លែងថា៖ «អាហ្នឹងវាសបង្ហាញឲ្យឃើញថា រដ្ឋាភិបាលកម្ពុជា តាំងពីថ្នាក់កំពូល រហូតដល់ថ្នាក់មូលដ្ឋាន គឺវាពោរពេញទៅដោយអំពើស៊ីសំណូកសូកប៉ាន់ ពុករលួយ ហើយមិនដែលឃើញមន្ត្រីពុករលួយទាំងអស់ហ្នឹងទទួលទោស ទទួលទណ្ឌកម្មតាមផ្លូវច្បាប់ទេ គឺថានៅតែគប់គិតគ្នាស៊ីសំណូកសូប៉ាន់យើងទៅ ហើយពេលខ្លះបែកធ្លាយរឿងស៊ីសំណូកសូប៉ាន់ហើយ ក៏នៅតែពួកមន្ត្រីរាជការគ្នាឯងដោះសារយកខ្លួនឯង ហើយផ្ដល់តួនាទីផ្ដល់អំណាចឲ្យគ្នាអញ្ចឹងទៅ»។
ការលើកឡើងរបស់អ្នកឃ្លាំមើលដូច្នេះ បន្ទាប់ពីឧកញ៉ា ជឹម សុខ ដែលគេរាយការណ៍ថា ជាឈ្មួញល្បីឈ្មោះ និងមានងារជាឯកឧត្តមក្នុងតួនាទីជាសមាជិកក្រុមប្រឹក្សាខេត្តព្រៃវែង និងជាប្រធានសភាពាណិជ្ជកម្មខេត្តដ៏មានឥទ្ធិពល សម្រេចប្ដឹងស្នងការខេត្តលោក ឈឿន ប៊ុនឆន និងស្នងការរងលោក ឡេង ពៅ ជាផ្លូវការទៅកាន់ក្រសួងមហាផ្ទៃ និងអគ្គស្នងការនគរបាលជាតិ កាលពីថ្ងៃទី៣ ខែសីហា។
បណ្ដឹងនោះ លោកបានចោទស្នងការខេត្តព្រៃវែងចំៗ ពីបទ កំហែងយក និងរំលោភអំណាច តាមមាត្រាច្បាប់ ៣៦៣ ៣៦៤ និងមាត្រា ៥៨៦ នៃក្រមព្រហ្មទណ្ឌ ដែលប្រព្រឹត្តនៅខេត្តព្រៃវែង តាំងពីឆ្នាំ២០២៣ ដល់ឆ្នាំ២០២៦។
លោក ជឹម សុខ អះអាងថា ខ្លួនរកស៊ីរបរនាំគោក្របីទៅលក់នៅវៀតណាមតាំងពីឆ្នាំ២០០២ និងទទួលស្គាល់ថា ខ្លួនធ្លាប់ផ្ដល់កម្រៃតិចតួចជូនអាជ្ញាធរ ដើម្បីសម្រួលភាពងាយស្រួលក្នុងការរកស៊ី។ ប្រភពបន្តដោយចោទលោក ឈឿន ប៊ុនឆន ថា បានតម្រូវឱ្យលោកបង់សេវាការពាររបរនវប្រចាំខែ ១ម៉ឺនដុល្លារ ក្រោយកាន់តំណែងជាស្នងការខេត្តនៅឆ្នាំ២០២៣ ជារៀងរាល់ខែ។
លុះនៅខែមិថុនា ឆ្នាំ២០២៦ ក្រុមហ៊ុនរបស់ឈ្មួញរូបនេះ មានបញ្ហាហិរញ្ញវត្ថុ ក៏ស្នើពន្យារពេលបង់នៅចុងខែវិញ ប៉ុន្តែលោកថា ស្នងការបានបដិសេធ រហូតដល់រារាំងការនាំគោក្របី និងស្រូវរបស់លោកទៅវៀតណាមដោយស្របច្បាប់។ តាមរយៈបណ្ដឹងនោះឈ្មួញរូបនេះ បានស្នើក្រសួងមហាផ្ទៃ ផ្អាកតួនាទីមន្ត្រីប៉ូលិស២រូបនេះជាបណ្ដោះអាសន្ន ដើម្បីបើកការស៊ើបអង្កេត។
ឆ្លើយតបនឹងករណីនេះ អ្នកនាំពាក្យរងក្រសួងមហាផ្ទៃ លោក ទូច សុឃៈ ប្រាប់វីអូឌីតាមរយៈសំណេរលើតេឡេក្រាមនៅថ្ងៃទី៤ ខែសីហា ថា ក្រសួងមហាផ្ទៃកំពុងពិនិត្យតាមច្បាប់លើករណីនេះ ដោយឱ្យភាគីទាំងសងផ្ដល់ភស្តុតាងពាក់ព័ន្ធ។
លោកអះអាងបន្តថា ក្រសួងផ្ដល់លទ្ធភាពជូនភាគីទាំងសងខាង ក្នុងការដាក់បន្ទុកផ្អែកលើភស្តុតាង និងដោះបន្ទុកផ្អែកលើភស្តុតាង។ លោកសង្គត់ធ្ងន់ថា ក្រសួងនឹងអនុវត្តច្បាប់ជាធំ បើករណីពិនិត្យឃើញថា អង្គហេតុ អង្គច្បាប់ និងភស្តុតាងស៊ីសង្វាក់។ លើសពីនេះ លោកក្រើនរំលឹកចំពោះមន្ត្រីនគរបាល ខណៈក្រសួងបានបង្កើតបទវិន័យនគរបាលជាតិ ដែលត្រូវតែអនុវត្ត ទន្ទឹមនឹងច្បាប់ពាក់ព័ន្ធជាច្រើនទៀតនៅជាធរមាន ដែលត្រូវគោរពដូចគ្នា។ ចុងក្រោយ លោកអំពាវនាវទាំងមន្ត្រីនគរបាលជាតិ ទាំងសាធារណជន ត្រូវតែគោរពច្បាប់ និងវិន័យនគរបាល។
បើយោងតាមការទម្លាយរបស់ក្រុមមនុស្សគាំទ្របក្សកាន់អំណាច បានបង្ហោះលើហ្វេសប៊ុកជាបន្តបន្ទាប់ បានបង្ហាញថា លោក ជឹម សុខ បានវេរលុយជាប្រចាំខែដល់មេប៉ូលិសខេត្តព្រៃវែង លោក ឈឿន ប៊ុនឆន តាមរយៈស្នងការរងលោក ឡេង ពៅ តាមរយៈធនាគារក្នុងស្រុក។
យ៉ាងណាក៏ដោយ ករណីនេះ ហាក់ពុំមែនជារឿងថ្មីទេ ព្រោះការសូកប៉ាន់ ឬជំរិតទារប្រាក់ពីឈ្មួយតែងមានជាហូរហែ ដូចករណីអតីតអនុរដ្ឋលេខាធិការក្រសួងមហាផ្ទៃ លោក កឹម ជាតិ បានទារលុយពីឈ្មួយលក់ស្រានូវទឹកប្រាក់រាប់ម៉ឺនដុល្លារ។ ប៉ុន្តែ ករណីនេះបានស្ងាត់ទៅវិញ បន្ទាប់ពីក្រសួងបានត្រឹមកោះហៅជនប្រព្រឹត្តិមកបំភ្លឺ ប៉ុន្តែមិនបានបញ្ជូនសំណុំរឿងទាំងនោះទៅតុលាការនោះទេ។
ដោយឡែក អតីតតំណាងរាស្ត្រគណបក្សសង្គ្រោះជាតិ និងជាអនុប្រធានគណបក្សឆន្ទៈខ្មែរ លោក សុន ឆ័យ ថា លោកមិនទាន់អាចវាយតម្លៃលម្អិតលើសំណុំរឿងរវាងឧកញ៉ា ជឹម សុខ និងមន្ត្រីនគរបាលខេត្តព្រៃវែងទេ ប៉ុន្តែបើករណីនេះជាការពិតមែន វាឆ្លុះបញ្ចាំងពីបញ្ហារចនាសម្ព័ន្ធនៃការប្រើអំណាច និងអំពើពុករលួយក្នុងសង្គម។ លោកថា ជាញឹកញាប់ ក្រុមអ្នកមានអំណាច ឬអ្នកមានទ្រព្យសម្បត្តិ តែងប្រើឥទ្ធិពលដើម្បីទទួលបានប្រយោជន៍ ឬដាក់សម្ពាធលើអ្នកដទៃ ដោយគិតថាខ្លួនអាចគេចផុតពីច្បាប់។ សម្រាប់លោក សុន ឆ័យ នៅតែយល់ថា ប្រព័ន្ធដែលខ្វះនីតិរដ្ឋ និងអនុញ្ញាតឱ្យមានអំពើពុករលួយ នោះក្រុមអ្នកកាន់អំណាចក៏នឹងរងគ្រោះដូចគ្នា។
លោក សុន ឆ័យ ថ្លែងថា៖ «ខ្ញុំមិនដឹងរឿងករណីព្រៃវែង វាមានលក្ខណៈធ្ងន់ធ្ងរប៉ុណ្ណាទេ ប៉ុន្តែធ្លាប់សិក្សាពីសង្គមមនុស្ស នៅពេលដែលក្រុមអំណាចមួយដែលមានលុយកាក់ បុណ្យស័ក្តិ ធ្លាប់តែទៅជិះជាន់អ្នកដទៃ ឬក៏ក្រុមនយោបាយកាន់អំណាច យកអំណាចទៅធ្វើបាបបក្សផ្សេង អ្នកនយោបាយក្រុមផ្សេង ហើយនឹកស្មានថា ខ្លួនដែលជាក្រុមមានអំណាចនោះ អាចនឹងរស់នៅសុខសាន្ត ធ្វើអ្វីបានតាមចិត្ត រួចពីសំណាញ់ច្បាប់ តែទីបំផុតទៅអាអំពើខូចនេះ វា វាខូចទៅដល់អាគ្នាឯងហ្នឹងដែរ»។
ក្នុងឆ្នាំ២០២៥ បញ្ហាអំពើពុករលួយនៅកម្ពុជា នៅតែជាកង្វល់ធំមួយ ដោយពាក់ព័ន្ធនឹងការសូកប៉ាន់ ការប្រើប្រាស់អំណាចដើម្បីផលប្រយោជន៍ផ្ទាល់ខ្លួន ខ្វះតម្លាភាព និងការអនុវត្តច្បាប់មិនស្មើភាពជាដើម។ សន្ទស្សន៍អំពើពុករលួយរបស់អង្គការតម្លាភាពអន្តរជាតិ បង្ហាញថា ការយល់ឃើញអំពីអំពើពុករលួយនៅក្នុងវិស័យសាធារណៈនៅតែមានកម្រិតខ្ពស់។
សម្រាប់អ្នកឃ្លាំមើល និងមន្ត្រីបក្សប្រឆាំងនៅតែយល់ថា បើស្ថានភាពបែបនេះបន្តកើតមាន វានឹងធ្វើឱ្យពលរដ្ឋបាត់បង់ទំនុកចិត្តលើស្ថាប័នរដ្ឋ ព្រោះពលរដ្ឋខិតខំបង់ពន្ធដើម្បីឱ្យមន្ត្រីរាជការទទួលបានប្រាក់បៀវត្សរ៍ ខណៈមន្ត្រីបន្តទទួលសំណូកដែលជាភាពអយុត្តិធម៌យ៉ាងខ្លាំងចំពោះអ្នកបង់ពន្ធ។ លើសពីនេះ ពួកគេអំពាវនាវឱ្យរដ្ឋាភិបាលលោក ហ៊ុន ម៉ាណែត ពិនិត្យឡើងវិញលើសំណុំរឿងដែលមានការចោទប្រកាន់ពាក់ព័ន្ធនឹងអំពើពុករលួយឱ្យមានប្រសិទ្ធភាព៕
