ការវាយប្រហារដោយក្រុមហ៊ូធី (Houthi) របស់យេម៉ែន លើភាគខាងត្បូងអារ៉ាប៊ីសាអ៊ូឌីត កាលពីថ្ងៃទី៦ខែសីហា បានបណ្តាលឱ្យជនស៊ីវិល ១១ នាក់ រងរបួស ខណៈព្រះរាជាណាចក្រមួយនេះ បានព្រមានថា ការវាយប្រហារសម្របសម្រួលគ្នាដោយក្រុមហ៊ូធី និងក្រុមប្រដាប់អាវុធអ៊ីរ៉ាក់ដែលគាំទ្រដោយអ៊ីរ៉ង់ អាចនឹងកើតឡើងឆាប់ៗនេះ។
លោកឧត្តមសេនីយ៍ទោ ទួរគី អាល់ម៉ាលីគី (Turki al-Maliki) អ្នកនាំពាក្យសម្ព័ន្ធមិត្តយោធាដឹកនាំដោយអារ៉ាប៊ីសាអ៊ូឌីត បានថ្លែងថា ការវាយប្រហារនៅខេត្ត ណាចរ៉ាន (Najran) បានធ្វើឱ្យជនជាតិអារ៉ាប៊ីសាអ៊ូឌីត ៧ នាក់ យេម៉ែន ១ នាក់ អេហ្ស៊ីប ២ នាក់ និងប៉ាគីស្ថាន ១ នាក់ រួមទាំងកុមារអាយុ ៤ ឆ្នាំម្នាក់រងរបួស។ លោកបានចោទប្រកាន់ក្រុមហ៊ូធីថាបានបាញ់ផ្លោងឥតរើសមុខលើតំបន់ស៊ីវិល និងរំលោភលើច្បាប់មនុស្សធម៌អន្តរជាតិ។
មិនទាន់មានការអត្ថាធិប្បាយពីក្រុមហ៊ូធី ឬអ៊ីរ៉ង់នៅឡើយទេ ខណៈដែលសង្គ្រាមអាមេរិក-អ៊ីស្រាអែល ជាមួយអ៊ីរ៉ង់ បានធ្វើឱ្យការគណនាសន្តិសុខរបស់អារ៉ាប៊ីសាអ៊ូឌីតកាន់តែស្មុគស្មាញ។ ជម្លោះរវាងក្រុងរីយ៉ាត (Riyadh) និងក្រុមហ៊ូធី បានជាប់ពាក់ព័ន្ធកាន់តែខ្លាំងជាមួយសង្គ្រាមទូលំទូលាយនេះ ជាពិសេសការបិទផ្លូវសមុទ្រក្រហមដែលរំខានដល់ការនាំចេញប្រេងរបស់អារ៉ាប៊ីសាអ៊ូឌីត។
មន្ត្រីជាន់ខ្ពស់អារ៉ាប៊ីសាអ៊ូឌីតម្នាក់បាននិយាយថា ព័ត៌មានសម្ងាត់អាមេរិក និងអារ៉ាប៊ីសាអ៊ូឌីត បានរកឃើញថា ក្រុមហ៊ូធី និងក្រុមប្រដាប់អាវុធអ៊ីរ៉ាក់ ក្រោមការត្រួតពិនិត្យរបស់ឆ្មាំបដិវត្តន៍ឥស្លាមអ៊ីរ៉ង់ (IRGC) អាចនឹងបើកការវាយប្រហារព្រមគ្នាលើទីតាំងស៊ីវិល ហេដ្ឋារចនាសម្ព័ន្ធថាមពល កំពង់ផែ និងព្រលានយន្តហោះ។
ក្រុងរីយ៉ាតកំពុងពង្រឹងកិច្ចសហប្រតិបត្តិការសន្តិសុខជាមួយសម្ព័ន្ធមិត្ត។ ប្រភពក្នុងតំបន់បានប្រាប់ Reuters ថា ទួរគី អារ៉ាប៊ីសាអ៊ូឌីត និងប៉ាគីស្ថាន ត្រូវចុះហត្ថលេខាលើកិច្ចព្រមព្រៀងការពារជាតិកាលពីថ្ងៃសុក្រ ខណៈនាយករដ្ឋមន្ត្រីប៉ាគីស្ថាន លោក សេបាស ឆារីហ្វ (Shehbaz Sharif) និងប្រធានាធិបតីទួរគី លោក តាយយីប អ៊ែរដូហ្អាន (Tayyip Erdogan) បានអញ្ជើញទៅដល់អារ៉ាប៊ីសាអ៊ូឌីត។
មន្ត្រីអារ៉ាប៊ីសាអ៊ូឌីតបាននិយាយថា ការគំរាមកំហែងនេះ គឺដើម្បីរំខានដល់កិច្ចខិតខំប្រឹងប្រែងការទូតដែលកំពុងដំណើរការ ប៉ុន្តែកិច្ចសហប្រតិបត្តិការរវាងអារ៉ាប៊ីសាអ៊ូឌីត និងអាមេរិក នៅតែមានកម្រិតខ្ពស់បំផុត ហើយអារ៉ាប៊ីសាអ៊ូឌីតបានត្រៀមខ្លួនរួចរាល់ក្នុងការឆ្លើយតបនឹងការឈ្លានពានណាមួយ។
ក្រុមហ៊ូធី បានអះអាងទទួលខុសត្រូវចំពោះការវាយប្រហារលើព្រលានយន្តហោះ ណាចរ៉ាន កាលពីថ្ងៃទី៤ខែសីហា និងបានសម្លាប់ទាហានរដ្ឋាភិបាលយេម៉ែនជាង ៣០ នាក់ កាលពីថ្ងៃទី៦ខែសីហា ។ កាលពីថ្ងៃទី២៩ ខែកក្កដា អារ៉ាប៊ីសាអ៊ូឌីត ក៏បានវាយប្រហាររួមគ្នាជាមួយអាមេរិក ប្រឆាំងនឹងក្រុមគាំទ្រដោយអ៊ីរ៉ង់នៅអ៊ីរ៉ាក់ បន្ទាប់ពីទម្លាក់កំហុសលើពួកគេចំពោះការវាយប្រហារដោយដ្រូនលើទីតាំងប្រេងរបស់ខ្លួន៕
