រមណីយដ្ឋានអង្គរ ជាតំបន់បេតិកភណ្ឌដ៏ល្បីល្បាញលំដាប់ពិភពលោក តែងតែទទួលភ្ញៀវទេសចររាប់ពាន់នាក់ជារៀងរាល់ថ្ងៃ ក៏ប៉ុន្តែពលរដ្ឋរស់នៅតំបន់មុខអង្គរឯណេះវិញ កំពុងរញ៉េរញ៉ៃនឹងស្ថានភាពផ្លូវលំមួយខ្សែនៅខាងមុខប្រាសាទអង្គរវត្ត មានជង្ហុក និងភក់ល្បាប់ ខូចខាតជាច្រើនឆ្នាំមកហើយ។
ស្ថានភាពនេះ មិនត្រឹមតែធ្វើឱ្យពលរដ្ឋលំបាកធ្វើដំណើរ និងប៉ះពាល់ដល់ជីវភាពប៉ុណ្ណោះទេ ថែមទាំងប៉ះពាល់សម្រស់វិស័យទេសចរណ៍នៅចំពោះមុខភ្ញៀវទេសចរអន្តរជាតិ។ តើពលរដ្ឋមានមតិ និងសំណូមពរយ៉ាងណាខ្លះ?
ផ្លូវក្រាលកៅស៊ូមួយខ្សែ បែកចេញពីផ្លូវ ៣០ ឆ្ពោះទៅកាន់ផ្សារភូមិភាគ មានប្រវែងជាង ៤គីឡូម៉ែត្រ ដែលជាខ្សែផ្លូវដ៏សំខាន់ និងមមាញឹកក្នុងក្រុងអង្គរខេត្តសៀមរាប តភ្ជាប់យ៉ាងសំខាន់សម្រាប់ពលរដ្ឋធ្វើដំណើរ ហើយភ្ញៀវទេសចរតែងតែជិះកង់បីឆ្លងកាត់ ដើម្បីទស្សនាកម្សាន្តតំបន់រមណីយដ្ឋានអង្គរ។ ក៏ប៉ុន្តែផ្ទុយស្រឡះពីភាពរស់រវើកនៃតំបន់ទេសចរណ៍អង្គរ ផ្លូវលំមួយខ្សែនេះ នៅតែទ្រុឌទ្រោម ខូចខាតអស់ពេលជាច្រើនឆ្នាំមកហើយ។
ភាពរញ៉េរញ៉ៃដោយសារផ្លូវមានជង្ហុកភ្នែកមាន់ច្រើន កំពុងបង្កគ្រោះថ្នាក់ចរាចរណ៍ ដែលតែងតែកើតមានជារៀងរាល់ថ្ងៃលើផ្លូវនេះ មិនត្រឹមតែប៉ះពាល់សេដ្ឋកិច្ចពលរដ្ឋមូលដ្ឋានប៉ុណ្ណោះទេ។ ការដេកទន្ទឹងរង់ចាំអាជ្ញាធរកសាងផ្លូវឱ្យរឹងមាំ ឬចាក់បេតុង គឺជាក្តីស្រមៃរបស់ពលរដ្ឋនៅតំបន់អង្គរ។
អ្នកផ្តល់សេវាកម្មភ្ញៀវទេសចរនៅតំបន់អង្គរ ថ្លែងសុំមិនបញ្ចេញឈ្មោះប្រាប់វីអូឌី នៅថ្ងៃទី០៨ ខែមិថុនាថា ផ្លូវនេះប្រៀបដូចជាខោរហែក ដែលអាជ្ញាធរតែងតែជួសជុលជារៀងរាល់ឆ្នាំ ហើយក្រោយពីជួសជុលរួចមិនបានប៉ុន្មានខែផង នៅតែខូចដដែលៗ។ លោកថា នៅពេលផ្លូវលំបាក ពលរដ្ឋខាំមាត់សង្កត់ចិត្ត ពេលខ្លះខឹងអាជ្ញាធរ ដែលមើលរំលងបញ្ហានេះ មិនដោះស្រាយឱ្យជ្រះស្រឡះ ច្រើនឆ្នាំមកហើយ រហូតមកទល់ពេលនេះ។
អ្នកផ្តល់សេវាកម្មភ្ញៀវទេសចររូបនោះ និយាយថា៖ «បើជំនាន់មុនថា យើងជិះរទេះគោទៅវារលាក់ ឥឡូវជិះឡាន ជិះរ៉ឺម៉កកង់បី វារលាក់ចង់ផ្ងារក្រោយទៀត អ៊ីចឹងយើងគួរខ្មាស់ភ្ញៀវទេសចរទេ»។
បុរសដដែល បន្ថែមថា ផ្លូវនេះជាចរន្តសេដ្ឋកិច្ចយ៉ាងសំខាន់របស់អ្នកស្រុកអង្គរ ធ្វើដំណើរច្រើន និងមានភ្ញៀវទេសចរធ្វើដំណើរច្រើនក្នុងថ្ងៃបុណ្យជាតិធំៗ។ លោកបារម្ភថា ផ្លូវលំបាកនៅខាងមុខរមណីយដ្ឋានប្រវត្តិសាស្ត្រដ៏ល្បីល្បាញនេះ បង្កជារូបភាពមិនល្អ ប៉ះពាល់មុខមាត់រដ្ឋាភិបាល។
នៅរដូវភ្លៀង ផ្លូវមួយខ្សែនេះ មានភក់ល្បាប់ក្នុងជង្ហុក និងរណ្តៅដក់ធំៗ ហើយរៀងរាល់ពេលភ្លៀងធ្លាក់ ផ្លូវនេះក្លាយជាអន្ទាក់ដ៏គ្រោះថ្នាក់សម្រាប់អ្នកជិះម៉ូតូ និងកង់បី។ រីឯឡាន និងម៉ូតូ តែងតែបើកបរគេចជង្ហុក ធ្លាក់ចិញ្ចើមផ្លូវ បណ្តាលឱ្យកើតមានគ្រោះថ្នាក់ចរាចរណ៍ ដោយដួលម៉ូតូ និងក្រឡាប់កង់បីជាញឹកញាប់។
ចំណែកឯនៅរដូវប្រាំងវិញ បញ្ហានេះ ក៏មិនបានថមថយឡើយ ស្ថានភាពផ្លូវប្រែមកពីភក់ទៅជាដីហុយ ហើយរាល់ពេលមានរថយន្ត ឬកង់បីបើកឆ្លងកាត់ ដីហុយទ្រលោមដូចផ្សែង ប៉ះពាល់អ្នកធ្វើដំណើរ និងពលរដ្ឋរស់នៅជាប់ផ្លូវ ។ ឯភ្ញៀវទេសចរបរទេសដែលជិះកង់បីលំហែកម្សាន្ត ត្រូវយកដៃបាំងមុខ ខ្ទប់ច្រមុះ និងប្រឈមនឹងការហុយ ប្រឡាក់សម្លៀកបំពាក់។
អាជីវករលក់ដក់ជាប់ផ្លូវ ថ្លែងក្នុងលក្ខខណ្ឌសុំលាក់ឈ្មោះ ព្រោះបារម្ភពីសុវត្ថិភាព សង្កេតឃើញថា ផ្លូវនេះជាតំបន់ទេសចរណ៍យ៉ាងសំខាន់ និងសម្បូរពលរដ្ឋធ្វើដំណើរច្រើន ប្រសិនបើអាជ្ញាធរសាងសង់ចាក់បេតុងរឹងមាំ នឹងជួយសម្រួលជីវភាពពលរដ្ឋ។ លោកថា រថយន្តទេសចរណ៍ភាគច្រើនបើកឆ្លងកាត់ផ្លូវនេះ មុនបើកចូលទស្សនាអង្គរ ហើយនៅពេលផ្លូវខូច នឹងប៉ះពាល់ប្រាក់ចំណូលពលរដ្ឋមូលដ្ឋាន និងអារម្មណ៍ភ្ញៀវទេសចរ។
ពលរដ្ឋរូបនោះ និយាយថា៖ «បើសិនជាផ្លូវនេះធ្វើស្អាត ប្រព័ន្ធសេដ្ឋកិច្ចចរាចរណ៍តាមផ្លូវនេះគឺល្អហ្មង ព្រោះមកតាំងពីគគីរបេ គោកត្នោត ស្វាយចេក ស្វាយអីមក គឺមកហ្មង ពីព្រោះផ្លូវ ផ្លូវនោះអីឥឡូវគេធ្វើបេតុង។ ដល់តែពេលមកដល់អាផ្លូវយើងជិតដល់ក្រុងនេះ បែរជាមានបញ្ហាកើតឡើងមក ហើយចំផ្លូវតំបន់ទេសចរណ៍ដែលឡានតូច ឡានធំ ដែលគេត្រូវធ្វើដំណើរ»។
អ្នកប្រើប្រាស់បណ្ដាញសង្គមម្នាក់ឈ្មោះ ហៀរោម សុខា បានសរសេរសារក្នុងខ្ទប់ខាំមិន (Comment) ថ្មីៗនេះថា គាត់ជិះកាត់ផ្លូវនេះស្ទើររាល់ថ្ងៃពេលយប់ ធ្លាក់ចូលជង្ហុកស្ទើរចងបាក់ក។ អ្នកស្រីឆ្ងល់ថា ពលរដ្ឋធ្វើផ្ទះកន្លែងណាក្តី ក្នុងតំបន់រមណីយដ្ឋានអង្គរ ក៏អាជ្ញាធរជាតិអប្សរាមើលឃើញដែរ តែត្រង់ផ្លូវខូច ដែលអាជ្ញាធរកាន់កាប់ក្បែរភ្នែក បែរជាមើលមិនឃើញ។
អ្នកស្រីបន្ថែមថា ផ្លូវនេះមិនក្រោម ១០ឆ្នាំចុងក្រោយនេះ បើជួសជុលវិញ ធ្វើមុខខូចក្រោយ មិនដឹងរៀនជំនាញសាលាណាទេ?
អ្នកប្រើប្រាស់បណ្ដាញសង្គមម្នាក់ទៀត ឈ្មោះ វី កញ្ញា បានសរសេរសារក្នុងខ្ទង់ខាំមិនដែរថា ពេលខ្ញុំជិះទៅផ្ទះម្តងៗចង់ធ្លាក់ថ្លើម ឃើញតែធ្វើរហូតផ្លូវនេះ គឺគ្មានស្តង់ដារ ធ្វើហើយជិះបានតែ ៦ ខែខូចទៀត។ អ្នកស្រីសំណូមពរឱ្យអាជ្ញាធរចាក់បេតុង ដើម្បីកុំឱ្យខាតថវិការដ្ឋច្រើន ណាមួយតំបន់ទេសចរណ៍ផង។
វីអូឌី មិនទាន់អាចទាក់ទងសុំការបំភ្លឺជុំវិញរឿងនេះ ពីអ្នកនាំពាក្យរដ្ឋបាលខេត្តសៀមរាប លោក លី វណ្ណៈ បាននៅឡើយទេ គិតត្រឹមម៉ោងផ្សាយនេះ។
ចំណែក អាជ្ញាធរជាតិអប្សរា ក៏ពុំទាន់អាចទាក់ទងបានដែរ នៅថ្ងៃដដែលនេះ។ តែយ៉ាងណា ថ្មីៗនេះ គេឃើញអាជ្ញាធរជាតិអប្សរាបានជួសជុលផ្លូវនេះបានមួយផ្នែក និងកំពុងសម្រុកជួសជុលបន្ត។
ជុំវិញរឿងនេះ ប្រធានសមាគមមគ្គុទ្ទេសក៍ទេសចរណ៍អង្គរ លោក ខៀវ ធី មើលឃើញថា ផ្លូវនេះគ្រប់គ្រងដោយអាជ្ញាធរជាតិអប្សរា ក្នុងតំបន់រមណីយដ្ឋានអង្គរ ដែលមានភ្ញៀវទេសចរឆ្លងកាត់ និងពលរដ្ឋធ្វើដំណើរច្រើន អាជ្ញាធរគួរតែពន្លឿនកសាងឱ្យមានគុណភាព។ លោកថា ភ្ញៀវទេសចរដែលទៅស្នាក់អាស្រ័យនៅតាមសណ្ឋាគារក្នុងក្រុងសៀមរាបផ្នែកខាងលិច ចាំបាច់ត្រូវធ្វើដំណើរតាមផ្លូវនេះ នៅពេលផ្លូវលំបាកប៉ះពាល់អារម្មណ៍ភ្ញៀវទេសចរ។
លោក ខៀវ ធី និយាយថា៖ «មួយខ្សែនេះ ផ្លូវបាឡុងនេះ! ថ្នល់កាន់តែជ្រៅ ដោយសារតែខែភ្លៀងទឹកដក់ ការធ្វើចរាចរណ៍ចុះឡើងៗ វាដូចទន្ទ្រាំឱ្យកាន់តែក្រឡុកខ្លាំងឡើងៗ។ បើយើងមិនជួសជុលទេ កាន់តែខូចខ្លាំងទៀតបាទ! អញ្ចឹងជួសជុលទៅ ដើម្បីអភិវឌ្ឍន៍ទេសចរណ៍។ សូមអាជ្ញាធរខេត្តមេត្តាជួយពន្លឿនការជួសជុលផ្លូវនេះឱ្យបានលឿន»។
ពលរដ្ឋបន្ថែមថា ពេលមានបុណ្យជាតិធំៗ និងកម្មវិធីផ្សេងៗក្នុងតំបន់អង្គរ ផ្លូវមួយខ្សែនេះមានរថយន្ត និងអ្នកដំណើរច្រើនចង្អៀតណែន ដែលអាជ្ញាធរជាតិអប្សរាគួរតែពន្លឿនកែលម្អហេដ្ឋារចនាសម្ព័ន្ធផ្លូវថ្នល់ ក្នុងតំបន់រមណីយដ្ឋានអង្គរគ្រប់ច្រកល្ហក ដើម្បីជួយសម្រួលការធ្វើដំណើររបស់ភ្ញៀវទេសចរ លើកកម្ពស់មុខមាត់ជាតិ និងតម្លៃបេតិកភណ្ឌកម្ពុជា។
ពលរដ្ឋទទូចឱ្យអាជ្ញាធរជាតិអប្សរា និងអាជ្ញាធរពាក់ព័ន្ធ កសាងផ្លូវជារឿងចាំបាច់ ជាផ្នែកមួយអភិរក្សកេរដំណែលបុព្វបុរស ដែលជាគោលដៅទេសចរណ៍ដ៏ស្រស់បំព្រង៕
