លោក ដូណាល់ ត្រាំ បានព្យាយាមជាលើកទីពីរក្នុងការកម្រិតសិទ្ធិទទួលបានសញ្ជាតិដោយសារកំណើត (birthright citizenship) ក្នុងរដ្ឋធម្មនុញ្ញ ត្រឹមតែប៉ុន្មានសប្តាហ៍ បន្ទាប់ពីតុលាការកំពូលសហរដ្ឋអាមេរិកបានបដិសេធសំណើដំបូងរបស់លោក ក្នុងការបដិសេធសញ្ជាតិស្វ័យប្រវត្តិចំពោះកុមារដែលកើតពីអន្តោប្រវេសន៍ខុសច្បាប់ និងជនបរទេសកាន់ទិដ្ឋាការបណ្តោះអាសន្ន។
កាលពីថ្ងៃទី៦ខែសីហា លោក ត្រាំ បានចុះហត្ថលេខាលើបទបញ្ជាចំនួនពីរ ដែលស្វែងរកការពង្រីកប្រភេទកុមារដែលមិនមានសិទ្ធិទទួលបានសញ្ជាតិអាមេរិកដោយស្វ័យប្រវត្តិ និងហាមឃាត់ «ទេសចរណ៍សម្រាលកូន» (birth tourism)។
លោក ត្រាំ បានព្យាយាមរុះរើសិទ្ធិទទួលបានសញ្ជាតិដោយសារកំណើតជាយូរមកហើយ ហើយបានធ្វើឱ្យកិច្ចខិតខំប្រឹងប្រែងនេះ ក្លាយជាចំណុចកណ្តាលនៃយុទ្ធនាការបង្រ្កាបអន្តោប្រវេសន៍របស់លោក។ ប្រធានាធិបតីរូបនេះ បានរិះគន់តុលាការកំពូលជុំវិញ «ការសម្រេចចិត្តដ៏សែនសោកស្តាយទាក់ទងនឹងសិទ្ធិទទួលបានសញ្ជាតិដោយសារកំណើត» ដោយលោកបានបន្ថែមថា៖ «វាជាការសម្រេចចិត្តដ៏សោកស្តាយបំផុត ដូច្នេះយើងកំពុងធ្វើការកែសម្រួល ដោយសារតែវាមិនមានយុត្តិធម៌ទាល់តែសោះ»។
បទបញ្ជាថ្មីទីមួយ ស្វែងរកការពង្រីកនិយមន័យនៃកុមារដែលមិនអាចទទួលបានសញ្ជាតិដោយសារកំណើត។
លោក ស្តេហ្វិន មិលល័រ (Stephen Miller) អ្នករៀបចំផែនការគោលនយោបាយរបស់ លោក ត្រាំ បាននិយាយថា បទបញ្ជានេះ មានគោលបំណងរាប់បញ្ចូលទាំងកុមារនៃសមាជិក «អង្គការភេរវករបរទេស» ក្រុមមនុស្សដែលធ្វើសកម្មភាពជំនួសមុខឱ្យរដ្ឋាភិបាលបរទេស បុគ្គលិករដ្ឋាភិបាលបរទេសកាន់តែច្រើន ប្រជាជនដែលកើតក្នុងដែនដីអាមេរិកាំងសាម៉ូអា (American Samoa) និងកុមារដែលឪពុកម្តាយ «បានប្រព្រឹត្តអំពើបោកប្រាស់ដើម្បីទទួលបានសញ្ជាតិ»។
បទបញ្ជាទីពីរ គឺតម្រង់ទិសដៅលើ «ទេសចរណ៍សម្រាលកូន» ដែលជាការធ្វើដំណើរមកអាមេរិកក្នុងបំណងសម្រាលកូន ដើម្បីឱ្យកូនទទួលបានសញ្ជាតិ។ លោក ត្រាំ បានអះអាងថា មនុស្ស «រាប់សែននាក់» បានប្រព្រឹត្តទង្វើនេះ ហើយលោកបានថ្លែងថា៖ «ពួកគេបានយកសិទ្ធិទទួលបានសញ្ជាតិដោយសារកំណើតមកធ្វើជារឿងកំប្លែង… វាជារឿងអាម៉ាស់ ហើយយើងនឹងមិនបណ្តោយឱ្យវាកើតឡើងនោះទេ»។
ទោះជាយ៉ាងណា ទិន្នន័យរដ្ឋាភិបាលបង្ហាញថាមានការកើតត្រឹមតែ ៩,៦០០ នាក់ប៉ុណ្ណោះ ពីមាតាដែលមានអាសយដ្ឋាននៅបរទេសក្នុងឆ្នាំ២០២៤ ដែលស្មើនឹងតិចជាង ១% នៃទារកទាំងអស់ដែលកើតនៅអាមេរិកក្នុងមួយឆ្នាំៗ។
បទបញ្ជាទីពីរនេះ បានណែនាំឱ្យភ្នាក់ងារសហព័ន្ធតម្រង់ទិសដៅលើ «អ្នកប្រតិបត្តិការទេសចរណ៍សម្រាលកូន»។ ការធ្វើដំណើរមកអាមេរិកក្នុងបំណងសម្រាលកូនឱ្យទទួលបានសញ្ជាតិ គឺរាប់ចូលជាបទល្មើសភូតភរទិដ្ឋាការ (visa fraud) និងជាអំពើខុសច្បាប់ស្រាប់ទៅហើយ។
បទបញ្ជាទាំងនេះ នឹងប្រឈមមុខនឹងការប្តឹងតវ៉ានៅតុលាការយ៉ាងប្រាកដ។ កាលពីថ្ងៃទី៣០ ខែមិថុនា តុលាការកំពូលបានបដិសេធបទបញ្ជាមុនរបស់លោក ដោយបញ្ជាក់ថា រដ្ឋធម្មនុញ្ញធានាសញ្ជាតិដល់ស្ទើរតែគ្រប់គ្នាដែលកើតនៅលើទឹកដីអាមេរិក។
អង្គការសេរីភាពស៊ីវិលអាមេរិក (ACLU) បាននិយាយថា បទបញ្ជាទាំងនេះគឺជាការព្យាយាមផ្ទុយពីរដ្ឋធម្មនុញ្ញមួយទៀត ដោយលោក ខូឌី វូហ្វស៊ី (Cody Wofsy) តំណាង ACLU បានបញ្ជាក់ថា៖ «តុលាការកំពូលបានសម្រេចលើបញ្ហានេះរួចហើយ… គ្មានបទបញ្ជាបន្ថែមណាមួយអាចផ្លាស់ប្តូរអត្ថន័យនៃរដ្ឋធម្មនុញ្ញបានឡើយ»៕
