សកម្មជនការពារព្រៃឈើជនជាតិដើមភាគតិចកួយ នៅខេត្តស្ទឹងត្រែង លោក អ៊ុក ម៉ៅ បង្ហាញជំហរថា លោកនៅតែបន្តការពារព្រៃឈើ ទោះតុលាការកាត់ឱ្យចាញ់ក្តីមេឈ្មួញមានអំណាចក៏ដោយ។
ការអះអាងរបស់លោក អ៊ុក ម៉ៅ ចំពេលតុលាការខេត្តស្ទឹងត្រែង គ្រោងប្រកាសសាលក្រម ប្តឹងចោទលោកពីបទបរិហារកេរ្តិ៍ ដែលនឹងប្រកាសនៅឆាប់ៗនេះ ដែលដើមបណ្តឹងត្រូវគេដឹងថាជាឈ្មួញមានអំណាច។
លោក អ៊ុក ម៉ៅ ប្រាប់វីអូឌីនៅថ្ងៃទី១២ ខែសីហាថា ប្រសិនបើតុលាការកាត់ទោសឱ្យរូបលោកចាញ់ក្តី ក្នុងសំណុំរឿងនេះ លោកនឹងប្ដឹងទាស់ទៅសាលាឧទ្ធរណ៍បន្តទៀត ដើម្បីទាមទារយុត្តិធម៌ជូនសហគមន៍ និងការពារផលប្រយោជន៍ជាតិ។
លោកថា សកម្មភាពការពារព្រៃរបស់លោក ព្រមទាំងសហគមន៍ ស្របតាមគោលនយោបាយរបស់រាជរដ្ឋាភិបាល និងព្រះរាជបន្ទូលរបស់ព្រះមហាក្សត្រ ព្រះនរោត្តម សីហមុនី ដែលតែងតែទទូចឱ្យកូនខ្មែរចូលរួមអភិរក្ស និងថែធនធានធម្មជាតិ។
លោកទទូចឱ្យតុលាការទម្លាក់ចោលការចោទប្រកាន់នេះ ព្រោះលោកពុំបានប្រព្រឹត្តកំហុសដូចការចោទប្រកាន់ឡើយ។
លោក អ៊ុក ម៉ៅ និយាយថា៖ «បងប្អូនក្នុងគ្រុប បើបងប្អូនចង់បានព័ត៌មាន បងប្អូនមកយកព័ត៌មានទៅ ក្នុងដីសហគមន៍ភ្នំជម្រកសត្វ។ មានគ្រឿងចក្រកំពុងតែបំផ្លិចបំផ្លាញដីសហគមន៍ភ្នំជំរករកសត្វ។ អ្នកស្រី កែ កុលសោភា គាត់មក គាត់មកទន្ទ្រានយកដីសហគមន៍របស់ប្រជាពលរដ្ឋ នៅភូមិឆ្វាំង ឃុំស្អាង ហ្នឹងឯង។ ហើយមិនតែប៉ុណ្ណោះ បែរជាគាត់ចាប់ប្រធានសហគមន៍ដាក់ពន្ធនាគារបាត់ទៅហើយបាទ»។
ការប្តឹងផ្តល់នេះ ធ្វើឡើងក្រោយពីសកម្មជនការពារព្រៃឈើរូបនេះ បានធ្វើដំណើរទៅថតរូបបង្ហោះតាមបណ្ដាញសង្គម បង្ហាញការមិនពេញចិត្ត ពីសកម្មភាពប្រើគ្រឿងចក្រ កាយក្រវាត់ទន្ទ្រានយកដីព្រៃសហគមន៍ ភ្នំជម្រកសត្វទំហំជាង ៣ពាន់ហិកតា (៣.០៦៤ហិកតា) ដើម្បីធ្វើជាកម្មសិទ្ធិឯកជន ដែលប្រព្រឹត្តឡើងដោយម្ចាស់ក្រុមហ៊ុនលឹម វត្តី គឺអ្នកស្រី កែកុល សោភា កាលពីថ្ងៃទី១៦ ខែឧសភា ឆ្នាំ២០២៤។
តំណាងអយ្យការអមសាលាដំបូងខេត្តស្ទឹងត្រែង លោក យ៉ុង សុខខឿន បានចេញដីកាបង្គាប់ឱ្យលោក អ៊ុក ម៉ៅ វ័យ ៥៧ឆ្នាំ ឱ្យចូលខ្លួនក្នុងសវនាការ ជំនុំជម្រះរឿងក្តី នៅថ្ងៃទី១១ ខែសីហា ជុំវិញការប្តឹងចោទ ពីបទ ប៉ះពាល់ដល់សិទ្ធិខាងរូបភាពនៃបុគ្គល និងបរិហារកេរ្តិ៍ជាសាធារណៈ ដែលប្រព្រឹត្តឡើងនៅភូមិឆ្វាំង ស្រុកថាឡាបរិវ៉ាត់ ខេត្តស្ទឹងត្រែង។
ក្រោយបិទសវនាការ តុលាការប្រកាសថា សេចក្តីសម្រេចសំណុំរឿងនេះ នឹងប្រកាសឱ្យដឹងនៅថ្ងៃទី១០ ខែកញ្ញា ខាងមុខ។
មកទល់ពេលនេះ សកម្មជនការពារព្រៃឈើ លោក អ៊ុក ម៉ៅ កំពុងជាប់បណ្ដឹងនៅតុលាការជាង២០ សំណុំរឿងមកហើយ ដោយសារតែចេញមុខការពារព្រៃឈើ និងមិនពេញចិត្តចំពោះអាជ្ញាធរខេត្តស្ទឹងត្រែង មិនអនុវត្តបទបញ្ជារបស់រដ្ឋាភិបាល ការពារព្រៃ ស្មោះត្រង់ចំពោះជាតិ។
ជនជាតិដើមភាគតិចកួយ លោក អ៊ុក ម៉ៅ ចាត់ទុកការប្ដឹងផ្ដល់នេះ ជាការបំបាក់ស្មារតីពលរដ្ឋ ដែលឈឺឆ្អាលរឿង បទល្មើសព្រៃឈើពាក់ព័ន្ធនឹងមន្ត្រីខិលខូចធំៗមួយចំនួន។ លោកថា ក្រុមឈ្មួញមានចេតនាបំបាក់ស្មារតីពលរដ្ឋ មិនឱ្យនិយាយការពិត ពីការធ្វើប្លង់យកដីសហគមន៍ដ៏ធំសម្បើមនេះ។
លោក អ៊ុក ម៉ៅ បន្តថា៖ «ពេលដែលប្តឹងផ្តល់ខ្ញុំហ្នឹង គេបំបាក់ស្មារតី ដែលប្រជាពលរដ្ឋណាដែលមានហ៊ាននិយាយរឿងមន្ត្រីធំៗដែលរុករាន ឈ្លានពានដីសហគមន៍ ដីដែលយកទៅហើយធំធាត់ណា ដល់ពេលប្តឹងខ្ញុំទៅ អញ្ចឹងទៅ បំបាក់ស្មារតីប្រជាពលរដ្ឋអត់ឱ្យហ៊ាននិយាយ»។
វីអូឌី មិនទាន់អាចទាក់ទងតំណាងអយ្យការអមសាលាដំបូងខេត្តស្ទឹងត្រែង លោក យ៉ុង សុខខឿន បាននៅឡើយទេ គិតត្រឹមម៉ោងផ្សាយនេះ។
រីឯម្ចាស់ក្រុមហ៊ុនថ្មម៉ាប លឹម វត្តី អ្នកស្រី កែកុល សោភា ដែលជាដើមបណ្ដឹង ក៏មិនទាន់អាចទាក់ទងបានដែរ។
ជុំវិញរឿងនេះ អនុប្រធានផ្នែកសិទ្ធិមនុស្ស និងដីធ្លីនៃសមាគមការពារសិទ្ធិមនុស្សអាដហុក(ADHOC) លោក យិន ម៉េងលី យល់ថា ដើម្បីវាយតម្លៃថា ការលើកឡើងរបស់លោក អ៊ុក ម៉ៅ ត្រឹមត្រូវ ឬយ៉ាងណា តុលាការគួរតែចុះស៊ើបអង្កេត និងស្រាវជ្រាវដល់ទីតាំងដីព្រៃជាក់ស្តែង ដើម្បីស្វែងរកការពិត។
លោកថា អាជ្ញាធរខេត្តស្ទឹងត្រែង និងមន្ត្រីជំនាញពាក់ព័ន្ធត្រូវសហការគ្នា ការពារទ្រព្យសម្បត្តិជាតិ ខណៈដែលសកម្មភាពរបស់ លោក អ៊ុក ម៉ៅ ការពារផលប្រយោជន៍ជាតិកេរមរតកដូនតា។
លោកថា៖ «ប្រជាពលរដ្ឋលើកឡើង ហើយយើងអត់ទាន់បានទៅរកថា អាហ្នឹងវាជារឿងពិត ឬរឿងមិនពិត ហើយយើងចោទថាជាការបរិហាកេរ្តិ៍ វាអត់ត្រឹមត្រូវទេ។ អញ្ចឹងត្រូវតែរកសិន តើជាការពិតអត់? ដីសាធារណៈរបស់រដ្ឋ ជាគោលការណ៍ទាល់តែដីហ្នឹង វាលែងមានផលប្រយោជន៍សាធារណៈ ហើយអ្នកដែលបំម្លែងដីហ្នឹង ទាល់តែមានអនុក្រឹត្យពីរាជរដ្ឋាភិបាល ទោះបីជាមានប្លង់សុរិយោដីក៏ដោយ តែធ្វើនៅលើដីប្រភេទសាធារណៈដោយមិនមានការបំម្លែង ការកសាងប្លង់ហ្នឹងមិនត្រឹមត្រូវដែរ»។
កាលពីថ្ងៃទី២៦ ខែមិថុនា ឆ្នាំ២០២៤ តុលាការខេត្តស្ទឹងត្រែង សម្រេចបញ្ជូនប្រធានសហគមន៍អេកូទេសចរណ៍ភ្នំជម្រកសត្វ លោក ម៉ឹង រដ្ឋា ទៅឃុំខ្លួនក្នុងពន្ធនាគារខេត្តស្ទឹងត្រែង ពាក់ព័ន្ធនឹងសំណុំរឿង បទល្មើសព្រៃឈើ ផ្អែកតាមបណ្ដឹងរបស់មន្ត្រីបរិស្ថាន។
ការឃុំខ្លួននេះ ធ្វើឡើងក្រោយពីប្រធានសហគមន៍រូបនេះ បានតវ៉ាមិនពេញចិត្តនឹងទង្វើរបស់អាជ្ញាធរខេត្តនេះដែលអនុញ្ញាតឱ្យឈ្មួញមានឥទ្ធិពលម្នាក់ គឺអ្នកស្រី កែកុល សោភា ម្ចាស់ក្រុមហ៊ុន លីន វត្តី ឈូសឆាយដីព្រៃអភិរក្ស ទំហំជាង ៣ ពាន់ហិកតា (៣០៦៤ហិកតា) ប៉ះចំដីព្រៃសហគមន៍ដែនជម្រកសត្វ ប៉ះពាល់ប្រភពចំណូលសហគមន៍ និងព្រៃឈើបន្សល់ចុងក្រោយទាក់ទាញភ្ញៀវទេសចរ។
ដើមបណ្តឹងក្នុងសំណុំរឿងនេះ គឺអ្នកស្រី កែកុល សោភា ជាម្ចាស់ក្រុមហ៊ុនថ្មម៉ាបលឹម វត្តី និងត្រូវជាភរិយារបស់លោក ទូច គង្គា មានតួនាទីជាអភិបាលរងខេត្តស្ទឹងត្រែង។
ព្រៃសហគមន៍ភ្នំជម្រកសត្វមានផ្ទៃដីជាង ៤ ពាន់ហិកតា គឺជាឃ្លាំងទ្រព្យធម្មជាតិដ៏មានតម្លៃសម្រាប់ប្រជាសហគមន៍ អាស្រ័យផលចិញ្ចឹមជីវិត និងជាតំបន់អេកូទេសចរណ៍ធម្មជាតិដ៏ស្រស់ស្អាត កំពុងប្រឈមការបាត់បង់ទាំងមូល។
រីឯដើមឈើធំៗ និងភ្នំធម្មជាតិជាច្រើន ដែលជាដំបូលបៃតងក្រាស់ឃ្មឹក ហើយជាជម្រកដ៏សុខសាន្តរបស់សត្វព្រៃរាប់សិបប្រភេទ ក៏កំពុងប្រឈមការថយចុះស្ទើរតែទាំងស្រុង ក្រោយពីមានសកម្មភាពរបស់ក្រុមហ៊ុនថ្មម៉ាបលឹម វត្តី ចូលទៅតំបន់នោះជាង ៥ ឆ្នាំមកហើយ៕
