យោងតាមសេចក្តីរាយការណ៍របស់សារព័ត៌មានក្នុងស្រុកនៅថ្ងៃទី១២ និង១៣ ខែសីហា នេះ បានបង្ហាញពីសកម្មភាព រថយន្តសណ្តោងធុនធំជាច្រើនគ្រឿង សស្រាក់សស្រាំដឹកជញ្ជូនទំនិញ ដែលអះអាងថា ជាប្រភេទឈើអារ ចេញពីទីតាំងក្រុមហ៊ុន ជា ចិន្ដា ស្ថិតនៅស្រុកកោះញែក ខេត្តមណ្ឌលគិរី។ សេចក្ដីរាយការណ៍ឱ្យដឹងថា ក្បួនឡានដឹកឈើធ្វើដំណើរលើផ្លូវជាតិលេខ ៧៦ ឆ្ពោះទៅកាន់ទិសដៅមិនច្បាស់លាស់។
សកម្មភាពនេះ កំពុងបង្កើតក្តីបារម្ភដល់ប្រជាពលរដ្ឋ ដោយពួកគាត់បានបញ្ចេញមតិជាច្រើន ក្រោមការផ្សព្វផ្សាយនោះ ទាក់ទងនឹងផលប៉ះពាល់ដល់សុវត្ថិភាពចរាចរណ៍ ការខូចខាតផ្លូវថ្នល់ ជាពិសេសគឺការបាត់បង់ធនធានធម្មជាតិ ដែលកំពុងសេសសល់តិចតួចស្រាប់។
ប្រធានមន្ទីរបរិស្ថានខេត្តមណ្ឌលគិរី លោក ហាក់ វិបុល ប្រាប់វីអូឌីតាមសារសំណេរនៅថ្ងៃទី១៤ ខែសីហា ថា ខាងមន្ទីរបរិស្ថានមិនមានព័ត៌មានលម្អិតច្រើនពាក់ព័ន្ធនឹងវិស័យកសិកម្ម និងរដ្ឋបាលព្រៃឈើនោះឡើយ ដោយណែនាំឱ្យបង្វែរសំណួរទៅខាងក្រសួងកសិកម្ម និងរដ្ឋបាលព្រៃឈើវិញ។ ទោះជាយ៉ាងណា លោកបន្ថែមថា រថយន្តដឹកឈើទាំងនោះពិតជាបានធ្វើចរាចរណ៍លើផ្លូវជាតិលេខ៧៦ ប្រាកដមែន ដោយលោកបានឃើញមានឯកសារដឹកជញ្ជូនត្រឹមត្រូវ ហើយក្រុមហ៊ុន ចិន្តា ក៏មានច្បាប់ទម្លាប់ស្របច្បាប់ផងដែរ។
វីអូឌី មិនអាចសុំការអត្ថាធិប្បាយបន្ថែមពី នាយខណ្ឌរដ្ឋបាលព្រៃឈើខេត្តមណ្ឌលគិរី លោក អ៊ូ សុភក្តី ជុំវិញករណីនេះបានទេនៅថ្ងៃទី១៤ ខែសីហា។
យ៉ាងណា បើយោងតាមការផ្ដល់ព័ត៌មានឱ្យស្ថាប័នសារព័ត៌មានក្នុងស្រុក លោក អ៊ូ សុភក្ដី ឱ្យដឹងថា ឈើទាំងនោះដឹកចេញពីក្រុមហ៊ុន ជា ចិន្ដា និងក្រុមហ៊ុន វាសនា ដែលមានទីតាំងនៅស្រុកកោះញែក។ យ៉ាងណា លោកមិនបានប្រាប់ទេពីគោលដៅដែលត្រូវទម្លាក់ ដោយគ្រាន់តែថា ឈើមាន លិខិតដឹកជញ្ជូនផលអនុផលព្រៃឈើ (PC) ត្រឹមត្រូវ។
ជុំវិញរឿងនេះ នាយកប្រតិបត្តិនៃអង្គការលីកាដូ លោក អំ សំអាត លើកឡើងថា ទោះបីជាឈើនោះដឹកចេញពីក្រុមហ៊ុនដែលទទួលបានសម្បទានដីសេដ្ឋកិច្ចពីរាជរដ្ឋាភិបាលយ៉ាងណាក៏ដោយ ក៏អាជ្ញាធរពាក់ព័ន្ធត្រូវតែមានការត្រួតពិនិត្យឱ្យបានច្បាស់លាស់ តើឈើទាំងអស់នេះពិតជាដឹកជញ្ជូនដោយស្របច្បាប់ឬយ៉ាងណា។ លោកបន្តថា ករណីនៅស្រុកកោះញែកនេះ ត្រូវតែមានការបកស្រាយ និងបញ្ជាក់ឱ្យបានច្បាស់លាស់ ខណៈកន្លងមកអង្គការសង្គមស៊ីវិល តែលើកឡើងពីបញ្ហាដែលកើតចេញពីដីសម្បទានសេដ្ឋកិច្ចដែលប៉ះពាល់ដល់គម្របព្រៃឈើ។
លោក អំ សំអាត និយាយថា៖ «ប្រសិនបើជាទីតាំងនៃការផ្តល់សម្បទានដីសេដ្ឋកិច្ចហ្នឹងវានៅជាប់នឹងព្រៃស្រោង ឬក៏ព្រៃគម្របព្រៃឈើដែលត្រូវការពារជីវៈចម្រុះ ហើយគ្រប់គ្រងដោយបរិស្ថាន អង្គការសង្គមស៊ីវិលតែងតែទាមទារថា សុំឱ្យមានការពិចារណាក្នុងការបញ្ឈប់នូវការផ្តល់សម្បទានដីសេដ្ឋកិច្ចនៅតំបន់ទាំងនោះ ដើម្បីជៀសវាងផលប៉ះពាល់ទៅដល់ព្រៃឈើ ឬក៏គម្របព្រៃឈើ»។
គួរបញ្ជាក់ថា យោងតាមទិន្នន័យពី Globle Forest Watch ចុះផ្សាយនៅថ្ងៃទី០៤ ខែមេសា ឆ្នាំ២០២៤ ដែលបានរកឃើញថា កម្ពុជាបានបាត់បង់ព្រៃឈើចំនួន ១២១,០០០ ហិកតា ក្នុងឆ្នាំ២០២៣ ដោយក្នុងនោះ ៦៦,០០០ ហិកតា គឺនៅក្នុងតំបន់ការពារ។ តំបន់ដែលរងផលប៉ះពាល់ខ្លាំងជាងគេ រួមមាន តំបន់អភិរក្សសត្វព្រៃព្រៃឡង់ ឧទ្យានជាតិបុទុមសាគរ និងឧទ្យានជាតិភ្នំក្រវាញកណ្តាល៕
