បើទោះបីជាកម្ពុជាបានចេញសេចក្តីថ្លែងការណ៍ ធ្វើការតវ៉ាជាបន្តបន្ទាប់ប្រមាណ ១០០០លើក មកហើយប្រឆាំងនឹងការបន្តកាន់កាប់ទឹកដីកម្ពុជាដោយខុសច្បាប់យ៉ាងណាក្តី ក៏ថៃនៅតែគឃ្លើន និងនៅតែបន្តកាន់កាប់ទឹកដីខ្មែរ ថែមទាំងបន្តរុលចូលមកក្នុងទឹកដីខ្មែរបន្ថែមទៀត។
លើសពីនេះថៃ ថែមទាំងបន្តបែងចែកដីខ្មែរទាំងនោះទៅឱ្យពលរដ្ឋ និងយោធារបស់ខ្លួន ជាបន្តបន្ទាប់ទៀត ដែលបញ្ហានេះ ជំរុញឱ្យមានការលើកឡើងថា ប្រសិនបើស្ថានភាពបែបនេះនៅតែបន្ត កម្ពុជាមិនត្រឹមតែមិនអាចទាមទារទឹកដីមកវិញបាននោះទេ ថែមទាំងបន្តបាត់បង់ទឹកដីកាន់តែច្រើនថែមទៀតទៅថៃ និងក៏ធ្វើឱ្យបញ្ហាវិវាទព្រំដែនកាន់តែស្មុគស្មាញថែមទៀតផងដែរ។
ក្រសួងការបរទេសកម្ពុជា កាលពីថ្ងៃទី១៤ ខែសីហា បានចេញសេចក្តីប្រកាសព័ត៌មានថ្មីមួយទៀត តវ៉ាប្រឆាំងនឹងការបន្តរំលោភបំពានដោយប្រទេសថៃ លើអធិបតេយ្យ និងបូរណភាពទឹកដីរបស់កម្ពុជា នៅតាមបណ្តោយព្រំដែន ខណៈកាលពីថ្ងៃទី១៣ ខែសីហា ឆ្នាំ២០២៦ អាជ្ញាធរថៃបានចែកដីមួយលើកទៀត ដល់ពលរដ្ឋថៃនៅក្នុងភូមិជោគជ័យឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដែលមានទីតាំងស្ថិតនៅចន្លោះបង្គោលព្រំដែនលេខ៤៥ និង៤៧។
កម្ពុជាបានចាត់ទុកសកម្មភាពរដ្ឋបាលខុសច្បាប់របស់ថៃនេះថា ជាការប៉ុនប៉ងយ៉ាងជាក់ច្បាស់ដើម្បីធ្វើឱ្យស្របច្បាប់នូវការកាន់កាប់ដោយខុសច្បាប់របស់ថៃនៅក្នុងតំបន់នេះ ខណៈដែលថៃបដិសេធសិទ្ធិក្នុងការវិលត្រឡប់ដោយសុវត្ថិភាពរបស់ប្រជាជនខ្មែរ ដែលត្រូវបានបណ្តេញចេញដោយបង្ខំពីលំនៅដ្ឋាន និងស្រែចម្ការរបស់ពួកគេនៅក្នុងតំបន់នោះ។
ជាមួយគ្នានេះ លោកប៉ែន បូណា អ្នកនាំពាក្យរដ្ឋាភិបាល បាននិយាយនៅថ្ងៃទី១៧ ខែសីហានេះ ពីបច្ចុប្បន្នភាពដូចនេះថា៖ «សម្រាប់ដំណោះស្រាយព្រំដែនគោក រដ្ឋាភិបាលកម្ពុជាក៏នៅតែប្រកាន់ជំហរច្បាស់លាស់ម៉ឺងម៉ាត់ដដែល គឺជំហរដោះស្រាយដោយសន្តិវិធី តាមរយៈយន្តការទ្វេភាគីដែលមានស្រាប់ និងផ្អែកលើអនុសញ្ញា សន្ធិសញ្ញា និងច្បាប់អន្តរជាតិ។ កម្ពុជាគោរពនិងអនុវត្តយ៉ាងខ្ជាប់ខ្ជួននូវបទឈប់បាញ់និងខ្លឹមសារទាំងស្រុងនៃសេចក្តីប្រកាសរួម ចុះថ្ងៃទី២៧ ខែធ្នូ ឆ្នាំ២០២៥ និងសេចក្តីថ្លែងការណ៍រួមស្តីពីសន្តិភាពទីក្រុងកូឡាឡាំពួ ចុះថ្ងៃទី២៦ ខែតុលា ឆ្នាំ២០២៥ ក៏ដូចជាកិច្ចព្រមព្រៀងផ្សេងទៀត ដែលភាគីទាំងពីរបានឯកភាពគ្នា»។
ការប្រកាសជាថ្មីទៀតរបស់កម្ពុជា គឺស្របពេលដែលសារព័ត៌មានថៃបានចុះផ្សាយថា រដ្ឋាភិបាលថៃគ្រោងចែកដីទំហំ ១០ រ៉ៃ (ប្រហែល ១.៦ហិកតា) ឱ្យកងទ័ពឈុតខ្មៅថៃក្នុងម្នាក់ៗ ដើម្បីសង់ផ្ទះរស់នៅនិងដាំដុះដំណាំផ្សេងៗ ដែលអាចធ្វើជាជញ្ជាំងព្រំដែនដើម្បីការពារទឹកដី។
លោក អ៊ុំ សំអាន អតីតតំណាងរាស្ត្រគណបក្សសង្គ្រោះជាតិ បានប្រាប់វីអូឌីនៅថ្ងៃទី១៧ ខែសីហានេះថា បើសិនជាស្ថានភាពនៅតែដូច្នេះ នោះកម្ពុជាមិនត្រឹមតែមិនអាចទាមទារទឹកដីដែលថៃឈ្លានពាន ចាប់តាំងពីក្រោយបទឈប់បាញ់ប៉ុណ្ណោះទេ វានឹងធ្វើទឹកដីកម្ពុជាបាត់បង់កាន់តែច្រើនបន្ថែមទៀត មិនត្រឹមតែប៉ុណ្ណោះក៏នឹងធ្វើឱ្យបញ្ហាវិវាទព្រំដែនកាន់តែស្មុគស្មាញផងដែរ។
បើតាម លោក សំអាន ការប្តឹងថៃទៅកាន់តុលាការយុត្តិធម៌អន្តរជាតិ (ICJ) តុលាការព្រហ្មទណ្ឌអន្តរជាតិ (ICC) និងសហប្រធានកិច្ចព្រមព្រៀងសន្តិភាពទីក្រុងប៉ារីស ព្រមទាំងការដាក់កងកម្លាំងការពារនៅលើដីជាក់ស្តែង ទើបជាជម្រើសដែលអាចទាមទារទឹកដីដែលថៃឈ្លានពានមកវិញបាន និងថែមទាំងអាចទប់ស្កាត់ការបន្តឈ្លានពានជាបន្តទៀតបាន។
លោកថា៖ «បញ្ហាជម្លោះព្រំដែនកាន់តែស្មុគស្មាញ មិនអាចទាមទារទឹកដីបានមកវិញ មិនអាចទប់ស្កាត់ថៃឈ្លានពានបាន ចុងក្រោយអត់មានជម្រើសអ្វីក្រៅពីកាត់ទឹកដីខ្មែរទៅឱ្យថៃ ដើម្បីប្តូរយកសន្តិភាពនិងអំណាចផ្តាច់ការតពូជរបស់ត្រកូលហ៊ុន អាហ្នឹងជាជម្រើសចុងក្រោយ។ ដូច្នេះខ្មែរមានជម្រើសតែមួយទេ គឺដូរត្រកូលហ៊ុនចេញដាក់មេដឹកនាំថ្មី ដែលមានសមត្ថភាពដើម្បីទប់ស្កាត់ការឈ្លានពានរបស់ថៃ ហើយប្តឹងថៃទៅកាន់តុលាការអន្តរជាតិទាមទារទឹកដីមកវិញ»។
បើតាមអ្នកជំនាញកិច្ចការព្រំដែនពីបក្សប្រឆាំងរូបនេះ បញ្ហាជម្លោះព្រំដែនកម្ពុជា-ថៃ មកដល់ពេលនេះពុំទាន់ឃើញមានតម្រុយណាមួយ ដែលអាចនឹងឈានទៅរកភាពល្អប្រសើរនោះទេ គឺមានតែកាន់តែវិវត្តទៅរកភាពកាន់តែស្មុគស្មាញថែមទៀត នៅពេល លោកថាក់ ស៊ីន អតីតបងប្អូនធម៌លោកហ៊ុន សែន ដែលបានក្លាយជាសត្រូវបានចេញមុខចាប់ដៃគ្នា ជាមួយនាយករដ្ឋមន្ត្រី លោក អានុទីន ខណៈ លោក អានុទីន បង្កើតរដ្ឋាភិបាលចម្រុះជាមួយគណបក្សដែលជាក្មួយរបស់ លោកថាក់ ស៊ីន។
លោកថា៖ «អ៊ីចឹងគេនឹងរួមដៃគ្នាដើម្បីឈ្លានពានទឹកដីខ្មែរ ហើយលោក អានុទីន ហ្នឹងសងសឹកប្អូនធម៌របស់គាត់ គឺលោកហ៊ុន សែន អ៊ីចឹងជម្លោះហ្នឹងអត់ចប់ទេ នៅតែមានជម្លោះដដែលហើយទឹកដីក៏មិនប្រគល់មកឱ្យកម្ពុជាយើងវិញ ហើយនឹងឈ្លានពានទឹកដីកម្ពុជាបន្ថែមទៀត។ អ៊ីចឹងមានតែមេដឹកនាំថ្មីដែលមិនមែនជាគូបដិបក្ខ លោកថាក់ស៊ីន គេអាចចរចាជាមួយថៃ ដើម្បីបញ្ចប់ជម្លោះហ្នឹងហើយនឹងចរចាគ្នាកំណត់ព្រំដែន ឬក៏ប្តឹងថៃទៅកាន់តុលាការអន្តរជាតិ»។
ចំណែក លោក មួង ណារ៉េត អ្នកធ្វើអត្ថាធិប្បាយលើបណ្តាញសង្គម បង្ហាញការយល់ឃើញប្រហាក់ប្រហែលនឹងលោក អ៊ុំ សំអាន ផងដែរ។
លោកថា៖ «អីចឹងនាយករដ្ឋមន្ត្រីថៃបង្ហាញការគោរព ហើយគេត្រូវគ្នា ហើយគេត្រូវគ្នាដឹងគេត្រូវគ្នានៅពេលណាទេ គឺនៅពេលគេវាយយកដីខ្មែរបាន ៧៦ទីតាំង។ នេះជាគ្រោះថ្នាក់បំផុតសម្រាប់ជាតិសាសន៍ខ្មែរនៅពេលខ្មែរឈ្លោះគ្នាបែកបាក់ជាតិ មេដឹកនាំយើងទៅឈ្លោះគ្នាបិទស្ពានអស់ជាមួយថៃបំផ្លាញគ្រប់បែបយ៉ាង ហើយយើងទៅនាំគ្នាមើលងាយ ទៅនាំគ្នាថាថៃរលាយ គេកំពុងតែត្រូវគ្នា គេកំពុងតែពង្រឹងផ្ទៃក្នុងឯកភាពជាតិគ្នា គេកំពុងតែធ្វើឱ្យនយោបាយគេកាន់តែខ្ពស់ ហើយយកដីខ្មែរបាន! នេះគ្រោះថ្នាក់ណាស់គ្មានពេលណាគ្រោះថ្នាក់ជាងពេលនេះទេ»។
គេកត់សម្គាល់ឃើញថា ចាប់តាំងពីក្រោយបទឈប់បាញ់ កាលពីថ្ងៃទី២៧ ខែធ្នូ ឆ្នាំ២០២៥ រហូតមកដល់ពេលនេះ ទាហានថៃបានប្រើបន្លាលួសទូកុងតឺន័របន្តរុលចូលវាទយកដីខ្មែរកើនរហូតដល់៧៦ទីតាំង។ ជាមួយគ្នានេះ ថៃបានសម្រុកសាងសង់សំណង់រឹងផ្សេងៗនៅលើដីខ្មែរទាំងនោះ ដូចជា សាងសង់លេណដ្ឋានទ័ព ជីកប្រឡាយធ្វើផ្លូវបេតុង ធ្វើរបងព្រំដែនបេតុងព្រមទាំងវាស់ដីចែកឱ្យពលរដ្ឋថៃ ខណៈដែលកម្ពុជាតែងតែចេញលិខិតតវ៉ាប្រឆាំងជំទាស់ចំពោះការរំលោភបំពានដោយខុសច្បាប់ទាំងនោះ ប៉ុន្តែថៃហាក់មិនអើពើឡើយ៕
