ក្រោយមានការប្រតិកម្មជុំវិញឱសានវាទរុះរើផ្ទះស្នាក់របស់គ្រូបង្រៀននៃសាលាដូង លើភ្នំគិរីរម្យ ពេលនេះ លោកនាយករដ្ឋមន្ត្រី ហ៊ុន ម៉ាណែត បានអន្តរាគមន៍តាមការទាយរបស់ពលរដ្ឋមួយចំនួន។
យោងតាមការផ្សព្វផ្សាយជាផ្លូវការលើទំព័រហ្វេសប៊ុករបស់លោកនាយករដ្ឋមន្ត្រី ហ៊ុន ម៉ាណែត នៅថ្ងៃទី១៩ ខែសីហា នេះ បានបង្ហាញឱ្យឃើញពីជំនួបរវាងលោក ជាមួយស្ថាបនិកសាលាដូង គឺលោក អ៊ុក វណ្ណដេ។ ជាលទ្ធផល លោក ហ៊ុន ម៉ាណែត បានចេញបទបញ្ជាឱ្យយោធភូមិភាគទី៣ និងតំបន់ប្រតិបត្តិការសឹករងកំពង់ស្ពឺ ផ្អាកការអនុវត្តការរុះរើផ្ទះស្នាក់គ្រូបង្រៀន ដោយរក្សាស្ថានភាពដដែល និងឱ្យសាលាដូងបន្តដំណើរការទៅមុខ។
ជាមួយគ្នានេះ លោកបានប្រគល់ភារកិច្ចឱ្យលោក អ៊ាង សុផល្លែត រដ្ឋមន្ត្រីក្រសួងបរិស្ថាន និងលោក ជាម ច័ន្ទសោភ័ណ្ឌ អភិបាលខេត្តកំពង់ស្ពឺ ចាត់តាំងមន្ត្រីជំនាញចុះពិនិត្យ និងផ្ទៀងផ្ទាត់ជាបន្ទាន់នៅលើទីតាំងជាក់ស្តែង ដើម្បីរៀបចំនូវដំណោះស្រាយមួយឱ្យបានសមស្រប និងមានចីរភាព ដែលអាចធានាថាសាលាដូងអាចនៅបន្តដំណើរការបណ្តុះបណ្តាលរបស់កុមារនៅទីនោះ។ លើសពីនេះ លោកបានសម្រេចផ្តល់ការឧបត្ថម្ភប្រចាំខែដល់សាលាដូងផងដែរ។
ការអន្តរាគមន៍របស់លោកនាយករដ្ឋមន្ត្រី ទទួលការសាទរជាច្រើនពីពលរដ្ឋ។ ប៉ុន្តែទន្ទឹមគ្នានេះ មតិរិះគន់ជាច្រើនលើបណ្ដាញសង្គម បានបាញ់ឆ្ពោះទៅអាជ្ញាធរថ្នាក់ក្រោម ទៅលើការអនុវត្តច្បាប់ដែលប៉ះពាល់ដល់ប្រយោជន៍សហគមន៍មូលដ្ឋាន ជាពិសេសគឺវិស័យអប់រំ ក្រោយយោធភូមិភាគទី៣ កាលពីថ្ងៃទី២៨ ខែកក្កដា បានរាយការណ៍ទៅកាន់អភិបាលខេត្តកំពង់ស្ពឺថា សាលាដូងរបស់លោក អ៊ុក វណ្ណដេ បានសង់ផ្ទះស្នាក់នៅបិទផ្លូវសាធារណៈ។ ចំណែកមន្ទីរបរិស្ថានខេត្ត ក៏បានជូនដំណឹងឱ្យរុះរើសំណង់ទាំងនោះក្នុងរយៈពេល ១៤ថ្ងៃ។
លោក អ៊ុក វណ្ណដេ បានបង្ហោះសារស្វែងរកអន្តរាគមន៍ពីភាគីពាក់ព័ន្ធ ក្នុងពេលបីថ្ងៃចុងក្រោយនេះ ដោយបញ្ជាក់ថា លោកមិនមានលទ្ធភាពរុះរើ និងសាងសង់ផ្ទះជូនគ្រូបង្រៀនស្នាក់នៅនោះឡើយ រហូតដល់លោកត្រូវបាននាយករដ្ឋមន្ត្រីហៅឱ្យចូលជួប។
ជុំវិញរឿងនេះ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត លើកឡើងថា វប្បធម៌អន្តរាគមន៍លើរឿងតូចតាចដើម្បីប្រជាប្រិយភាព និងព្រងើយកន្តើយចំពោះបញ្ហាធំចំពោះមុខ គឺមានតាំងពីអាណត្តិរបស់លោក ហ៊ុន សែន មកម្ល៉េះ។ លោកបន្តថា ទង្វើនេះឆ្លុះបញ្ចាំងពីភាពទន់ខ្សោយ និងភាពរញ៉េរញ៉ៃនៃប្រព័ន្ធដឹកនាំរដ្ឋបាលកម្ពុជា បណ្ដាលឱ្យប្រព័ន្ធដឹកនាំថ្នាក់ក្រោមជាប់គាំង គ្មានឯករាជ្យភាព និងរង់ចាំតែបទបញ្ជា ព្រោះខ្លាចប៉ះពាល់ដល់ប្រយោជន៍ និងអំណាចរបស់ក្រុមអ្នកមានឥទ្ធិពល។
លោក ម៉ែន ណាត ថ្លែងថា៖ «កាលណាមេដឹកនាំកំពូលទៅលូកដៃគ្រប់រឿង បញ្ជាក់ថាសង្គមហ្នឹងរញ៉េរញ៉ៃ គ្មានសណ្តាប់ធ្នាប់ ការដឹកនាំប្រទេសហ្នឹងគ្មានច្បាប់ទម្លាប់ត្រឹមត្រូវពិតប្រាកដ ជាការដឹកនាំបែបតាមទំនើងចិត្ត ជាការដឹកនាំប្រទេសតាមបែបទំនើងចិត្ត។ បើគេនិយាយថាយកច្បាប់ទៅប្រើលើអ្វីមួយ គឺគេប្រើលើហ្នឹង បើនិយាយថាគេចង់បង្ក្រាបនរណា គេឱ្យបណ្តាញតុលាការ ឱ្យបណ្តាញអាជ្ញាធរហ្នឹងគេបង្ក្រាបភ្លាម អាហ្នឹងវាអ៊ីចឹង»។
នៅពេលពលរដ្ឋជួបរឿងអយុត្តិធម៌អ្វីមួយ គេតែឃើញមានអំពាវនាវស្វែងរកជំនួយ និងអន្តរាគមន៍ពីក្រុមគ្រួសារថ្នាក់ដឹកនាំ រួមមាន លោក ហ៊ុន សែន លោក ហ៊ុន ម៉ាណែត និងភរិយារបស់លោក។ ប្រសិនបើការអំពាវនាវធ្វើឡើងតាមបណ្ដាញសង្គម នោះពលរដ្ឋនឹងលើកដៃសំពះ ព្រមទាំងនិយាយថា សូមសម្ដេចពុក សម្ដេចម៉ែ និងសម្ដេចបវរធិបតីជួយរកយុត្តិធម៌។ ប្រសិនបើការអំពាវនាវធ្វើនៅខាងក្រៅ ពលរដ្ឋនិយមព្រីនរូបថតថ្នាក់ដឹកនាំមកធ្វើបដាតែម្ដង។
ជាការកត់សម្គាល់ជាក់ស្ដែង ក្នុងរយៈពេលចុងក្រោយនេះ គ្រួសារថ្នាក់ដឹកនាំលូកដៃចូលជាច្រើនករណី ដូចជាករណីគ្រោះថ្នាក់ចរាចរណ៍គ្រួសារតារាសម្ដែងម្នាក់នៅខេត្តកំពត ករណីឃាតករ ស្រី ស៊ីណា ដែលជំរុញឱ្យក្រសួងយុត្តិធម៌មិនអនុវត្តគោលការណ៍ស្រូបទោសជាដើម ដែលសុទ្ធសឹងជាកាតព្វកិច្ច និងតួនាទីរបស់មន្ត្រី អាជ្ញាធរត្រូវអនុវត្តដោយមិនចាំបាច់រង់ចាំបញ្ជា។
ទាក់ទិនរឿងនេះ ប្រធានអង្គការប្រជាធិបតេយ្យខ្មែរ លោក ស៊ឹង សែនករុណា មានប្រសាសន៍ថា ការស្វែងរកអន្តរាគមន៍ពីថ្នាក់ដឹកនាំកំពូល ក៏ដោយសារតែពលរដ្ឋគ្មានជំនឿលើមន្ត្រីថ្នាក់ក្រោម ដែលខ្វះអំណាចសម្រេច និងមិនហ៊ានអនុវត្តច្បាប់លើអ្នកមានប្រាក់ មានអំណាច បណ្តាលឱ្យរឿងក្តីរ៉ាំរ៉ៃដោយសារអំពើពុករលួយ។ លោកបញ្ជាក់ថា សង្គមប្រជាធិបតេយ្យត្រូវប្រគល់អំណាចឱ្យមន្ត្រីមូលដ្ឋានដោះស្រាយបញ្ហាតាមច្បាប់ ដើម្បីទុកពេលឱ្យថ្នាក់ដឹកនាំជាតិដោះស្រាយតែរឿងធំៗចំពោះមុខជាតិ ដូចជាវិបត្តិសេដ្ឋកិច្ច ឬបទល្មើសអនឡាញ ហើយមន្ត្រីដែលគ្មានសមត្ថភាព ឬមិនទទួលខុសត្រូវគួរត្រូវដកហូតមុខតំណែង ដើម្បីកាត់បន្ថយការខាតបង់ថវិកាជាតិ។
លោកលើកឡើងថា៖ «អ៊ីចឹងរឿងណាដែលគេមានសមត្ថកិច្ចក្នុងការសម្រេច មានអំណាចក្នុងការសម្រេច គឺគេដោះស្រាយជូនទៅឱ្យអ្នកពាក់ព័ន្ធទាំងអស់ហ្នឹងហើយ។ ខ្លះហ្នឹងគេមិនចាំបាច់ដល់ថ្នាក់ដឹកនាំអីទេ គឺគេផ្តល់តួនាទីឱ្យអ្នកទាំងអស់ហ្នឹង មានសិទ្ធិ មានអំណាចគ្រប់គ្រាន់នៅក្នុងការដោះស្រាយបញ្ហានៅមូលដ្ឋានរបស់ខ្លួន នៅក្នុងតំបន់របស់ខ្លួនអីចឹងទៅ។ អ៊ីចឹងថ្នាក់ដឹកនាំ គេធ្វើកិច្ចការងារតែរឿងធំៗចំពោះមុខជាតិទេ»។
យ៉ាងណា នៅមានករណីជាប់គាំងជាច្រើនទៀត ដែលមិនទាន់ទទួលបានយុត្តិធម៌ពីអាជ្ញាធរ ឬឱកាសទទួលបានការអន្តរាគមន៍ពីនាយករដ្ឋមន្ត្រី ទោះបីមានការអំពាវនាវ ដូចជាទំនាស់ដីធ្លីរវាងពលរដ្ឋនិងអ្នកមានអំណាច គ្រោះថ្នាក់ចរាចរណ៍បង្កដោយសាច់ញាតិអ្នកធំ ការចាប់ខ្លួន និងចោទប្រកាន់ដោយខុសច្បាប់លើពលរដ្ឋ និងសកម្មជន និងការបំផ្លាញធនធានធម្មជាតិ បែរជាលោករក្សាភាពស្ងប់ស្ងាត់ ទោះបីមានភស្តុតាងលើគោកយ៉ាងណាក្ដី។
អ្នកឃ្លាំមើល គូសបញ្ជាក់ថា ការកែទម្រង់សង្គមឱ្យបានជោគជ័យ និងមានយុត្តិធម៌ពិតប្រាកដ គឺមិនមែនគ្រាន់តែជាការកែប្រែប្រព័ន្ធគ្រប់គ្រងលើក្រដាស និងដោះស្រាយតាមអារម្មណ៍នោះទេ ប៉ុន្តែវាទាមទារឱ្យមានការផ្លាស់ប្តូរចិត្តគំនិតរបស់មនុស្ស ជាពិសេសគឺការមានមេដឹកនាំប្រកបដោយសុចរិតភាព។ ពួកគាត់បន្តថា សង្គមដែលមាន «នីតិរដ្ឋ» ពិតប្រាកដ លុះត្រាពលរដ្ឋ និងអ្នកអនុវត្តច្បាប់គ្រប់រូបត្រូវតែស្ថិតនៅក្រោមច្បាប់ស្មើភាពគ្នា និងទទួលខុសត្រូវតាមតួនាទីរបស់ខ្លួន ដើម្បីធានាបាននូវសុខសន្តិភាព និងភាពសុខសាន្តរបស់ប្រជាជាតិទាំងមូល៕
