ប្រធានាធិបតី ដូណាល់ ត្រាំ បានប្រកាសថា សហរដ្ឋអាមេរិកនឹងដាក់ «ទណ្ឌកម្មសេដ្ឋកិច្ចធ្ងន់ធ្ងរ» លើប្រទេសទាំងឡាយណាដែលជួយ ឬធ្វើពាណិជ្ជកម្មជាមួយប្រទេសអ៊ីរ៉ង់។
លោកបានសរសេរជាអក្សរពុម្ពធំៗនៅលើបណ្តាញសង្គម Truth Social ថា លោកកំពុងចាប់ផ្តើម «ប្រតិបត្តិការសេដ្ឋកិច្ចដ៏កំទេចកំទីបំផុតមិនធ្លាប់មាន ប្រឆាំងនឹងប្រទេសណាមួយ!» ដោយសារអ៊ីរ៉ង់បរាជ័យក្នុងការធ្វើកិច្ចព្រមព្រៀងជាមួយអាមេរិក។ ការប្រកាសនេះ បានធ្វើឡើងបន្ទាប់ពីកិច្ចព្រមព្រៀងឈប់បាញ់រយៈពេល ៦០ ថ្ងៃ បានផុតកំណត់ ដោយគ្មានសញ្ញានៃដំណោះស្រាយការទូត ឬយោធាដើម្បីបញ្ចប់ជម្លោះនោះទេ។
ចំណាត់ការនេះជាការបន្ថែមសម្ពាធនៃយុទ្ធនាការ «Operation Economic Fury» ដើម្បីដាក់ទណ្ឌកម្មលើធនាគារ ឬក្រុមហ៊ុនបរទេសដែលធ្វើអាជីវកម្មជាមួយទីក្រុងតេហេរ៉ង់។ លោក ត្រាំ បានទាមទារឱ្យបញ្ឈប់ភ្លាមៗនូវការរត់ពន្ធប្រេង ការផ្លាស់ប្តូររូបិយប័ណ្ណ ការផ្ទេរប្រាក់ ការផ្លាស់ប្តូរប្រាក់ ការចុះបញ្ជីនាវា និងក្រុមហ៊ុនបិទបាំងមុខ (front companies)។
ការប្រកាសនេះ បានកើតឡើងបន្ទាប់ពីអារ៉ាប់រួម (UAE) បានប្រកាសកាត់ផ្តាច់ទំនាក់ទំនងហិរញ្ញវត្ថុ និងសេដ្ឋកិច្ចទាំងអស់ជាមួយអ៊ីរ៉ង់ ក្រោយរកឃើញការបាញ់គ្រាប់រ៉ុក្កែតបាលីស្ទិកពីរគ្រាប់ពីអ៊ីរ៉ង់។ ជាការឆ្លើយតប អ៊ីរ៉ង់បានព្រមានប្រទេសជិតខាងក្នុងតំបន់កាត់កោះហ្គាហ្វ (Gulf) ប្រឆាំងនឹងការផ្តល់ការគាំទ្រដល់យោធាសហរដ្ឋអាមេរិក។
ទន្ទឹមនឹងនេះ សហរដ្ឋអាមេរិក និងអូម៉ង់ បាននិងកំពុងចរចាដើម្បីបើកច្រកសមុទ្រ Hormuz ឡើងវិញ ដែលជាផ្លូវទឹកដ៏សំខាន់សម្រាប់ប្រេងឆៅ និងឧស្ម័នធម្មជាតិរាវ (LNG) ប្រហែល ២០% របស់ពិភពលោក។ ការបិទផ្លូវទឹកស្ទើរតែទាំងស្រុងអស់ជិត ៦ ខែមកនេះ បានរុញច្រានតម្លៃថាមពលពិភពលោកឱ្យកើនឡើង និងបង្កើនសម្ពាធលើលោក ត្រាំ មុនការបោះឆ្នោតពាក់កណ្តាលអាណត្តិនៅខែវិច្ឆិកា៕
