សហរដ្ឋអាមេរិក និងកាណាដា កំពុងខិតជិតឈានដល់កិច្ចព្រមព្រៀងពាណិជ្ជកម្មមួយ ដែលទីក្រុងវ៉ាស៊ីនតោនអាចនឹងកាត់បន្ថយអត្រាពន្ធលើរថយន្ត និងលោហៈធាតុដែលនាំចូលពីកាណាដា។
ប្រធានាធិបតីអាមេរិក លោក ដូណាល់ ត្រាំ បានគំរាមដាក់ពន្ធថ្មីលើទំនិញកាណាដា ចាប់ពីថ្ងៃទី១៩ខែសីហា ប៉ុន្តែបានពន្យារពេលទៅថ្ងៃទី២២ខែសីហា ដោយសារមានការរីកចម្រើនក្នុងការចរចា។ លោក ត្រាំ ថ្លែងថា ភាគីទាំងពីរ “ប្រហែលជាអាចឈានដល់កិច្ចព្រមព្រៀង” ខណៈនាយករដ្ឋមន្ត្រីកាណាដា ម៉ាក កានី (Mark Carney) បានលើកឡើងថា ការចរចាកំពុងឆ្ពោះទៅរកកិច្ចព្រមព្រៀង។
អ្នកចរចាត្រូវប្រឈមមុខនឹងកាលបរិច្ឆេទកំណត់ត្រឹមថ្ងៃទី២២ខែសីហា ដែលជាពេលពន្ធលើទំនិញកាណាដាតម្លៃ ២០ ពាន់លានដុល្លារ ត្រូវចាប់ផ្តើមអនុវត្ត។ ក្រសួងការបរទេសអាមេរិក បានឱ្យដឹងថា រដ្ឋមន្ត្រីការបរទេសអាមេរិក ម៉ាកូ រូប៊ីអូ (Marco Rubio) នឹងជួបរដ្ឋមន្ត្រីការបរទេសកាណាដា អានីតា អាណាន់ (Anita Anand) នៅសេតវិមាននាថ្ងៃទី២០ខែសីហា។
ប្រភពព័ត៌មាន ឱ្យដឹងថា កិច្ចព្រមព្រៀងនេះ អាចកាត់បន្ថយពន្ធលើរថយន្តនាំចូលពីកាណាដាមកត្រឹម ១៥% ពីចំនួន ២៥% បច្ចុប្បន្ន ខណៈកាណាដាកំពុងជំរុញឱ្យបញ្ចុះមកត្រឹម ១០%។ ការកាត់បន្ថយនេះមិនទាន់គិតបញ្ចូលការកាត់កងតម្លៃសមាសភាគផលិតនៅអាមេរិកនៅឡើយទេ ដែលនឹងធ្វើឱ្យអត្រាពន្ធជាក់ស្តែងធ្លាក់ចុះទាបជាងនេះ។ ចំណែកពន្ធលើដែកថែប និងអាលុយមីញ៉ូមនឹងត្រូវកាត់បន្ថយពាក់កណ្តាលមកត្រឹម ២៥% ក្រោមប្រព័ន្ធកូតាប្រចាំឆ្នាំ ៤ លានតោន។
លោក កានី បានពិភាក្សាជាមួយអភិបាលខេត្តទាំង ១០ របស់កាណាដា ដោយអភិបាលខេត្ត ណូវ៉ា ស្កូធា បានបញ្ជាក់ថា លោក កានី បានស្នើឱ្យបណ្តាខេត្តនាំយកគ្រឿងស្រវឹងពីអាមេរិកទៅដាក់លើធ្នើហាងវិញ ប្រសិនបើមានកិច្ចព្រមព្រៀងចុងក្រោយ។
តំណាងពាណិជ្ជកម្មអាមេរិក លោក ជេមីសុន ហ្គ្រៀ (Jamieson Greer) បានថ្លែងថា កិច្ចព្រមព្រៀងនេះនឹងការពារកម្មករអាមេរិក និងពង្រឹងសេដ្ឋកិច្ចអាមេរិកខាងជើង។
លោក ត្រាំ បានសរសើរកិច្ចព្រមព្រៀងនេះ ដោយបញ្ជាក់ថា ក្រុមហ៊ុនផលិត និងកសិករអាមេរិកនឹងមិនបង់ពន្ធលើការនាំចេញទៅកាណាដានោះទេ។
សេតវិមាន បានឱ្យដឹងថា កាណាដាបានប្តេជ្ញាលុបចោលការប្រព្រឹត្តមិនស្មើភាពលើគ្រឿងស្រវឹង ហ្វ្រូម៉ាស និងយានយន្តអាមេរិក។ យ៉ាងណាមិញ ការស្ទង់មតិ Leger បង្ហាញថា ៥៦% នៃជនជាតិកាណាដាមិនចង់ឱ្យលោក កានី ធ្វើការសម្បទានបន្ថែមទៀតដល់អាមេរិកនោះទេ៕
