ខណៈអង្គភាពប្រឆាំងអំពើពុករលួយ(ACU) ទម្លាយឱ្យដឹងពីវិធានការចាប់ខ្លួនមន្ត្រី ៣រូប នៅក្រសួងការបរទេស ដែលចោទថាជាប់ពាក់ព័ន្ធទៅនឹងក្រុមឧក្រិដ្ឋកម្មឆបោកតាមបច្ចេកវិទ្យានោះ ក្រុមអ្នកតាមដាន ជំរុញឱ្យស្ថាប័នសមីមួយនេះ បង្ហាញមុខមេខ្លោងនៅពីក្រោយបទឧក្រិដ្ឋនេះ ដើម្បីលាងជម្រះការចោទថា រដ្ឋាភិបាលចាត់វិធានការតែអ្នកពាក់ព័ន្ធតូចតាច ចំណែកមេខ្លោងធំៗដែលអន្តរជាតិរកឃើញនៅបន្តលាក់ទុក ដែលនឹងធ្វើឱ្យកម្ពុជាបន្តរងគ្រោះធ្ងន់ធ្ងរ។
ការជំរុញនេះ បន្ទាប់ពីតំណាងអយ្យការអមសាលាដំបូងរាជធានីភ្នំពេញ ទម្លាយឱ្យដឹងពីការសម្រេចចោទប្រកាន់មន្រ្តីក្រសួងការបរទេស លោក ថូ សំណាង និងគូកន ២នាក់ទៀតជាផ្លូវការ និងអាចប្រឈមការផ្តន្ទាទោសដល់ ១០ឆ្នាំ ក្រោយអង្គភាពប្រឆាំងអំពើពុករលួយ (ACU) រកឃើញថា ពួកគេពាក់ព័ន្ធករណីចេញប័ណ្ណឱ្យបណ្តាញឧក្រិដ្ឋកម្មអនឡាញ។
ជុំវិញរឿងនេះ គណបក្សប្រឆាំង និងអ្នកឃ្លាំមើល ទាមទារឱ្យអង្គភាពប្រឆាំងអំពើពុករលួយ ពង្រីកការស៊ើបអង្កេតរកអ្នកនៅពីក្រោយទាំងអស់ដោយតម្លាភាព ខណៈស្ថាបនស៊ើបអង្កេតរបស់អាមេរិក ហៅកាត់ថា FBI ក៏កំពុងស៊ើបអង្កេតលើបណ្តាញមេខ្លោងដែលត្រូវបានចោទថា ជាមន្ត្រីពាក់ព័ន្ធនឹងបក្សកាន់អំណាច។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ប្រាប់វីអូឌីនៅថ្ងៃទី២៥ ខែសីហា ដោយអំពាវនាវដល់ស្ថាប័នពាក់ព័ន្ធទាំងអស់ រួមទាំងតុលាការ អង្គភាពប្រឆាំងអំពើពុករលួយ ក្រសួងយុត្តិធម៌ និងក្រសួងការបរទេសផ្ទាល់ ត្រូវសហការគ្នាស៊ើបអង្កេតដោយតម្លាភាព និងយុត្តិធម៌។
លោកថា ការដាក់ទោសត្រឹមមនុស្សបីនាក់ក្នុងរឿងលក់លិខិតការទូត និងសំណុំរឿងពុករលួយទឹកប្រាក់វាល់លានដុល្លារនេះ មិនអាចបំពេញចិត្តសាធារណជនបានទេ ខណៈមេខ្លោងធំៗដែលស្និទ្ធនឹងរដ្ឋាភិបាល មិនត្រូវបានចាប់ខ្លួនតាមការទាមទារ ដូចក្នុងបញ្ជីខ្មៅរបស់សហរដ្ឋអាមេរិក រួមមាន លោក ហ៊ុន តូ លោក កុក អាន លោក ទ្រី ភាព និងលោក លី យ៉ុងផាត់ ជាដើម។ លោកចាត់ទុកការផ្ដន្ទាទោសមនុស្សតែបីនាក់នេះ គឺជាវិធីសាស្ត្ររបស់រដ្ឋាភិបាលលោក ហ៊ុន ម៉ាណែត ដើម្បីលុបលាងកំហុសរបស់ខ្លួន និងខ្លាចពាក់ព័ន្ធបន្តបន្ទាប់ដល់ លោក ហ៊ុន សែន ដែលជាមេខ្លោងធំនៅក្រោយនៃឧក្រិដ្ឋកម្មអនឡាញនៅកម្ពុជា។
លោក ម៉ែន ណាត ថ្លែងថា៖ «ពីព្រោះរឿងនេះស្រាវជ្រាវចុះស្រាវជ្រាវឡើងវាពាក់ព័ន្ធទៅដល់លោក ហ៊ុន សែន ទៅទៀត ព្រោះលោក ហ៊ុន សែន ហ្នឹងគឺនៅខាងក្រោយខ្នងនៃបទឧក្រិដ្ឋជនអនឡាញ ដែលល្បីល្បាញខាងអាក្រក់អសោចលើឆាកអន្តរជាតិហ្នឹង។ យើងមើលៗដូចជា លោក លី យ៉ុងផាត់ លោក កុក អាន លោក ហ៊ុន តូ អីជាអ្នកណា? គឺជាមនុស្សជំនិតរបស់លោក ហ៊ុន សែន ហើយហ្នឹងជាសាច់ញាតិរបស់លោក ហ៊ុន សែន អ៊ីចឹងរឿងការលក់ទិដ្ឋាការ ការប្រព្រឹត្តិអំពើពុករលួយខ្នាតធំនៅក្រសួងការបរទេសនេះ មិនមែនតែមនុស្សពីរបីនាក់ហ្នឹង អាចបញ្ចប់រឿងបានទេ គួរណាស់មនុស្សច្រើនដែលពាក់ព័ន្ធនៅក្នុងរឿងហ្នឹង»។
ការលើកឡើងនេះ បន្ទាប់ពីតំណាងអយ្យការអមសាលាដំបូងរាជធានីភ្នំពេញ កាលពីថ្ងៃទី២៤ ខែសីហា បានសម្រេចចោទប្រកាន់មន្រ្តីក្រសួងការបរទេស លោក ថូ សំណាង ដែលជាអគ្គនាយកនៃនាយកដ្ឋានក្រសួងការបរទេសទទួលបន្ទុកកិច្ចការច្បាប់ កុងស៊ុល និងព្រំដែន និងគូកន២នាក់ទៀតជាផ្លូវការ និងអាចប្រឈមការផ្តន្ទាទោសដល់ ១០ឆ្នាំ។
ក្នុងនោះលោក ថូ សំណាង ជាប់ចោទពីបទ «បំផ្លាញដោយចេតនា និងគៃបំបាត់ដោយទុច្ចរិត បទរំលោភអំណាច និងបទសម្អាតប្រាក់» តាមមាត្រា ៦០១ នៃក្រមព្រហ្មទណ្ឌ មាត្រា៣២ មាត្រា៣៥ កថាខណ្ឌទី២ នៃច្បាប់ស្តីពីការប្រឆាំងអំពើពុករលួយ មាត្រា៣ និងមាត្រា៣៨ នៃច្បាប់ស្ដីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម ឆ្នាំ២០២០។ ចំណែកលោក ណុប រដ្ឋា និងលោក យស់ រ៉ាណេ ជាប់ចោទពីបទ «សមគំនិតក្នុងអំពើ បំផ្លាញដោយចេតនា និងគៃបំបាត់ដោយទុច្ចរិត បទរំលោភអំណាច និងបទសម្អាតប្រាក់» តាមមាត្រាដូចគ្នា។
វីអូឌី មិនអាចសុំការបំភ្លឺពីអ្នកនាំពាក្យអង្គភាពប្រឆាំងអំពើពុករលួយ លោក សយ ចន្ទវិចិត្រ បានទេនៅថ្ងៃទី២៥ ខែសីហានេះ ដើម្បីចង់ដឹងថាតើអ្នកណាជាអ្នកបញ្ជា ទទួលផល និងមានមន្ត្រី ឬអ្នកមានអំណាចផ្សេងទៀត ដែលពាក់ព័ន្ធនឹងការចេញលិខិតទាំងនេះ ឈានទៅបំបែកបណ្ដាញទាំងមូល។
អនុប្រធានគណបក្សកម្លាំងជាតិ លោក សុខ គឹមសេង យល់ថា ករណីលួចលក់សន្លឹកវីសារបស់ក្រសួងការបរទេស កំពុងបង្កមន្ទិលថា ការចាប់ខ្លួនមនុស្សត្រឹម ៣នាក់ អាចមិនទាន់គ្រប់គ្រាន់នឹងទំហំនៃបទល្មើស ដែលប៉ះពាល់ដល់កិត្តិយស និងមុខមាត់ជាតិឡើយ។ លោកថា មតិសាធារណជន និងគណបក្សនយោបាយ ជំរុញឱ្យអាជ្ញាធរវែកមុខអ្នកនៅពីក្រោយ ដែលមានអំណាច និងតួនាទីធំជាងនេះ ដើម្បីធានាថា អ្នកពាក់ព័ន្ធគ្រប់រូបត្រូវទទួលខុសត្រូវតាមច្បាប់ មិនមែនចប់ត្រឹមនេះទេ។
លោក សុខ គឹមសេង ថ្លែងថា៖ «ដើម្បីឱ្យការអនុវត្តច្បាប់ ឱ្យមានការជឿជាក់ពីប្រជាពលរដ្ឋ គឺអាជ្ញាធរមានសមត្ថកិច្ច តុលាការ ជាពិសេសរដ្ឋាភិបាលត្រូវតែវែកមុខអ្នកដែលមានការទទួលខុសត្រូវធំ ព្រោះដូចខ្ញុំជម្រាបអ៊ីចឹងថា កិច្ចការងារនេះ គឺធំណាស់ ហើយវាប៉ះពាល់ដល់កិត្តិយសមុខមាត់ កិត្តិយសជាតិ អញ្ចឹងត្រូវតែវែកមុខរកអ្នកដែលទទួលខុសត្រូវធំជាងហ្នឹងទៀត»។
ចំណែកប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជា លោក គិន ភា សម្ដែងនូវការសាទរចំពោះអង្គភាពប្រឆាំងអំពើពុករលួយ ដែលមានចំណាត់ការជាក់ស្តែងទៅលើ លោក ថូ សំណាង និងអ្នកពាក់ព័ន្ធពីររូបទៀត។ យ៉ាងណា លោករំពឹងថា វិធានការនេះនឹងបន្តទៅមុខទៀត ដើម្បីរកតួអង្គពាក់ព័ន្ធ ដែលជាសហចារី ឬអ្នកសមគំនិត ឬអ្នកគប់គិតទទួលផលប្រយោជន៍ផ្សេងទៀត។
លោក គិន ភា ថ្លែងថា៖ «បើសិនជាអង្គភាពប្រឆាំងអំពើពុករលួយ ឬក៏តុលាការ អាចរកឃើញតួអង្គពាក់ព័ន្ធដទៃទៀត ហើយយកពួកគេមកផ្ដន្ទាទោសតាមច្បាប់ជាធរមាន ខ្ញុំគិតថា នោះ ទីមួយបង្កើតភាពស្អាតស្អំក្នុងសង្គម តម្លាភាព គណនេយ្យភាព នៅក្នុងសង្គមយើងផង ហើយក៏ជាការលើកកម្ពស់ទំនុកចិត្តរបស់ប្រជាពលរដ្ឋចំពោះស្ថាប័នជាតិដែរបាទ»។
យ៉ាងនេះក្តី អ្នកឃ្លាំមើល បន្តក្រើនរំលឹកថា ករណីនេះ រដ្ឋាភិបាលលោក ហ៊ុន ម៉ាណែត កាន់តែទាមទារឱ្យមានការស៊ើបអង្កេតស៊ីជម្រៅ ស្របពេលដែលអង្គភាពប្រឆាំងអំពើពុករលួយ ចាត់វិធានការពាក់ព័ន្ធនឹងការលក់សន្លឹកវីសាជាង ៦០០០សន្លឹក និងបន្តបាត់ ៤០០០សន្លឹកទៀត។
លើសពីនេះ ពួកគេព្រមានថា បើវិធានការលើបណ្តាញឧក្រិដ្ឋកម្មឆបោកគ្មានប្រសិទ្ធភាព ស្របពេលដែល FBI របស់អាមេរិកកំពុងត្រូវការនោះទេ វាអាចធ្វើឱ្យពាក្យស្លោករបស់រដ្ឋាភិបាលថា ការអនុវត្តចំពោះគ្រប់គ្នាដោយគ្មានការលើកលែង ពុំមានន័យ ហើយវានឹងជំរុញឱ្យកម្ពុជាក្លាយជាប្រទេសដែលអ្នកវិនិយោគកាន់តែភ័យខ្លាច ពាក់ព័ន្ធនឹងការមិនចាប់មេឧក្រិដ្ឋកម្មឆបោកនោះ យកទៅផ្តន្ទាទោស ដែលវានឹងធ្វើឱ្យពលរដ្ឋខ្មែរទូទាំងប្រទេស ក្លាយជាជនរងគ្រោះទាំងអយុត្តិធម៌ ខណៈពួកគេមិនជាប់ពាក់ព័ន្ធក្នុងរឿងនេះទាល់តែសោះនោះ៕
