អ្នកឃ្លាំមើល ជំរុញឱ្យប៉ូលីសអន្តរជាតិតាមដាន និងពិនិត្យលើការបង្ក្រាបឧក្រិដ្ឋកម្មអនឡាញនៅកម្ពុជា ក្រោយអាជ្ញាធរអះអាងថា ការបង្ក្រាបបានបោសសម្អាតទីតាំងអនឡាញទាំងស្រុងលើផ្ទៃប្រទេស។ ការជំរុញនេះ ដោយហេតុថាមន្ត្រី និងអ្នកជំនួញគ្រាក់ៗនៅកម្ពុជា ដែលមានឈ្មោះក្នុងបញ្ជីអ្នកជាប់ពាក់ព័ន្ធឧក្រិដ្ឋកម្មអនឡាញនៅក្រៅសំណាញ់ច្បាប់នៅឡើយ។
ការជំរុញនេះ បន្ទាប់ពីលេខាធិការដ្ឋាននៃគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា នៅថ្ងៃទី២៧ ខែសីហា បានគូសបញ្ជាក់ចំពោះមុខតំណាងបរទេសជិត ៥០ ស្ថាប័នថា កម្ពុជាបានបង្ក្រាបទាំងស្រុងនូវទីតាំង និងសកម្មភាពឆបោកតាមប្រព័ន្ធអនឡាញក្នុងប្រតិបត្តិការជាង១ឆ្នាំមកនេះ។
យោងតាមការលើកឡើងរបស់ប្រធានលេខាធិការដ្ឋាននៃគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា លោក ឆៃ ស៊ីណារិទ្ធ បានឱ្យដឹងថា ចាប់តាំងពីខែកក្កដា ឆ្នាំ២០២៥ ដល់ថ្ងៃទី២០ ខែសីហា ឆ្នាំ២០២៦ កម្លាំងសមត្ថកិច្ចកម្ពុជាបានបើកប្រតិបត្តិការស្រាវជ្រាវ និងត្រួតពិនិត្យទីតាំងសង្ស័យសរុប ៧៩៣ ទីតាំង ដោយក្នុងនោះបានឈានទៅបង្ក្រាបជាក់ស្តែងចំនួន ៦២៤ ទីតាំង និងឃាត់ខ្លួនមុខសញ្ញាសង្ស័យសរុបជិត ៣ម៉ឺននាក់ មាន ៣៩សញ្ជាតិ។
លោកបន្ថែមថា ទោះបីជាទីតាំងធំៗត្រូវបានសម្អាតទាំងស្រុង ក្រុមឧក្រិដ្ឋជនបានប្តូរយុទ្ធសាស្ត្រមកធ្វើសកម្មភាពបែងចែកតូចៗ ដោយលួចលាក់តាមផ្ទះសំណាក់ ខុនដូ ផ្ទះជួល រថយន្ត និងហាងកាហ្វេ ដែលសមត្ថកិច្ចកម្ពុជាបាននិងកំពុងបន្តប្រតិបត្តិការស្រាវជ្រាវ និងបង្ក្រាបមិនបង្អង់ដៃ ដោយគ្មានការលើកលែងឡើយ។
ឆ្លៀតក្នុងឱកាសនោះ លោកបានបញ្ជាក់ថា បច្ចុប្បន្ននេះពុំមានមជ្ឈមណ្ឌលឆបោកតាមប្រព័ន្ធបច្ចេកវិទ្យានៅក្នុងប្រទេសកម្ពុជាទៀតទេ បន្ទាប់ពីការបោសសម្អាត Online Scams ទ្រង់ទ្រាយធំបានទាំងស្រុង។
ផ្ទុយពីការប្រកាសនេះ អ្នកឃ្លាំមើល បានសម្តែងការមន្ទិលសង្ស័យ និងពុំជឿចំពោះពាក្យថា «អស់ទាំងស្រុង»។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ប្រាប់វីអូឌីថា ការលើកឡើងរបស់លោក ឆៃ ស៊ីណារិទ្ធ មិនខុសគ្នាពីការសន្យារបស់លោក ទូច សុខៈ អ្នកនាំពាក្យក្រសួងមហាផ្ទៃ ដែលធ្លាប់អះអាងថានឹងបង្ក្រាបស្កេមអនឡាញឱ្យអស់ត្រឹមខែមេសា។ ជាងនេះទៅទៀត លោកថា ការអះអាងរបស់អាជ្ញាធរកម្ពុជា គឺផ្ទុយពីការពិត ដោយហេតុថា កម្ពុជាមិនបានបង្ក្រាបលើមេខ្លោងធំៗផ្សេងទៀត ដែលអន្តរជាតិរកឃើញថាពាក់ព័ន្ធឧក្រិដ្ឋកម្មអនឡាញ និងដែលមានឈ្មោះក្នុងបញ្ជីទណ្ឌកម្ម។
ក្នុងន័យនេះ លោក ម៉ែន ណាត សង្កត់ធ្ងន់ថា ការបង្ក្រាបឧក្រិដ្ឋកម្មអនឡាញនៅកម្ពុជា អាចធានាថាបោសសម្អាតបានទាំងស្រុង លុះត្រាអាជ្ញាធរកម្ពុជា សហការជាមួយប៉ូលីសអាំងទែប៉ូលអន្តរជាតិ ចាប់ខ្លួនអ្នកពាក់ព័ន្ធ រួមមានលោក កុក អាន លោក លី យ៉ុងផាត់ និងលោក ហ៊ុន តូ យកទៅអនុវត្តទោសតាមច្បាប់។
លោក ម៉ែន ណាត ថ្លែងថា៖ «ហើយទោះបីតែ ទោះបីរដ្ឋាភិបាលកម្ពុជាអះអាងថា មជ្ឈមណ្ឌលឆបោកអស់ហ្នឹង ត្រូវបានបោសសម្អាតហើយក៏ដោយ ក៏គេអត់ជឿដែរ ដោយសារអី? ដោយសារមេខ្លោងធំៗដែលអាមេរិកាំង សហរដ្ឋអាមេរិកផ្តោតមែនទែនហ្នឹង មិនទាន់បាននាំខ្លួនទៅកាត់ទោសទេ»។
ការលើកឡើងរបស់អ្នកឃ្លាំមើលរូបនេះ គឺស្របគ្នានឹងការរកឃើញរបស់អង្គការអន្តរជាតិ ទាក់ទងនឹងការបង្ក្រាបដែលមានភាពមិនប្រក្រតីទៅលើទីតាំងមួយចំនួន ពិសេសនៅតំបន់ប៉ូលឆបោកសំខាន់ៗ ដូចជា នៅក្រុងប៉ោយប៉ែត ក្រុងព្រះសីហនុ និងក្រុងបាវិត។ ជាមួយគ្នានេះ ការបង្ក្រាបទៅលើអគារ ឬទីតាំងភូមិសាស្ត្រធំៗ គ្រាន់តែជាការរំលាយរចនាសម្ព័ន្ធរូបវន្តខាងក្រៅ ដោយបណ្តាញប្រតិបត្តិការនៅតែបន្តក្នុងរួបភាពថ្មី ឬទីតាំងតូចជាងមុន។ លើសពីនេះ មេខ្លោងធំៗ និងអ្នកវិនិយោគពីក្រោយខ្នងមួយចំនួន ដែលមានឈ្មោះក្នុងបញ្ជីខ្មៅ ទណ្ឌកម្មហិរញ្ញវត្ថុ ឬដីកាចាប់ខ្លួនអន្តរជាតិ នៅតែមិនទាន់ត្រូវបានចាប់ខ្លួន ឬកាត់ទោសនៅឡើយ ដោយសារពួកគេបានប្រើប្រាស់បណ្តាញខ្វាត់ខ្វែង និងខែលការពារផ្នែកអាជីវកម្មផ្សេងទៀត ដើម្បីបិទបាំងខ្លួន។
ជាងនេះទៅទៀត ការស៊ើបអង្កេតថ្មីរបស់សារព័ត៌មានអន្តរជាតិ បានរកឃើញថា យុទ្ធនាការបង្ក្រាបឧក្រិដ្ឋកម្មអនឡាញនេះ ក៏កំពុងផ្តល់ឱកាសឱ្យរដ្ឋាភិបាលផ្ទេរទ្រព្យសម្បត្តិរបស់បណ្តាញស្កេមមកគ្រប់គ្រង ពង្រីកប្រព័ន្ធសន្តិសុខ និងរឹតបន្តឹងការគ្រប់គ្រងនយោបាយរបស់ខ្លួនផងដែរ៕
