ក្រសួងការបរទេសកម្ពុជា ទម្លាយឱ្យដឹងពីលិខិតតវ៉ាថ្មីមួយទៀត ប្រឆាំងទៅនឹងការឈ្លានពានរបស់ថៃ ដែលថៃបានជីកប្រឡាយពង្រីកព្រំដែនរំលោភយកដីខ្មែរ រាលដាលដល់តំបន់ចូកគ្រួស ក្នុងភូមិថ្មដូន ស្រុកបន្ទាយអំពិល ខេត្តឧត្តរមានជ័យ។
នេះបើតាមសេចក្តីប្រកាសព័ត៌មាន របស់ក្រសួងការបរទេសកម្ពុជា ចុះថ្ងៃទី២៧ ខែសីហា ឆ្នាំ២០២៦ ដែលបាន«តវ៉ាចំពោះការរំលោភបំពានជាបន្តបន្ទាប់របស់ថៃ មកលើអធិបតេយ្យ និងបូរណភាពទឹកដីរបស់កម្ពុជានៅតាមបណ្តោយព្រំដែន»។
បើតាមក្រសួង នៅថ្ងៃទី២២ និងថ្ងៃទី២៤ ខែសីហា ឆ្នាំ២០២៦ កងកម្លាំងប្រដាប់អាវុធថៃ បានបញ្ជូនគ្រឿងចក្រធុនធ្ងន់ចូលក្នុងទឹកដីកម្ពុជា ដើម្បីជីកប្រឡាយនៅតំបន់ចូកគ្រួស ក្នុងភូមិថ្មដូន ឃុំគោកមន ស្រុកបន្ទាយអំពិល ខេត្តឧត្តរមានជ័យ។
ក្រសួងថា ការរំលោភបំពាននេះ បានកើតឡើងស្របពេលវត្តមាននាយករដ្ឋមន្ត្រីថៃ មកកាន់តំបន់អានសេះ ខេត្តព្រះវិហារ របស់កម្ពុជា កាលពីថ្ងៃទី២៣ ខែសីហា ឆ្នាំ២០២៦ ដោយគ្មានការអនុញ្ញាតពីកម្ពុជា។
សម្រាប់កម្ពុជា ទង្វើទាំងអស់នេះ បញ្ជាក់យ៉ាងច្បាស់ពីការរំលោភបំពានលើអធិបតេយ្យ និងបូរណភាពទឹកដីរបស់កម្ពុជា ដូចដែលបានកំណត់ក្នុងផែនទីខ្នាត១លើ២រយពាន់ ដែលផលិតដោយគណៈកម្មការកំណត់ព្រំដែន រវាងឥណ្ឌូចិន និងសៀម និងមាត្រា៥ នៃអនុស្សរណៈនៃការយោគយល់គ្នា ចុះថ្ងៃទី១៤ ខែមិថុនា ឆ្នាំ២០០០ និងសេចក្តីប្រកាសរួម នៃកិច្ចប្រជុំពិសេសលើកទី៣ របស់គណៈកម្មាធិការព្រំដែនទូទៅ (GBC) ចុះថ្ងៃទី២៧ ខែធ្នូ ឆ្នាំ២០២៥ ផងដែរ។
ក្រសួងសង្កត់ធ្ងន់ថា ទង្វើរបស់ថៃនេះ កម្ពុជាមិនទទួលស្គាល់ជាដាច់ខាត ដែលកម្ពុជាទាមទារឱ្យថៃបញ្ឈប់សកម្មភាពនេះ ក៏ដូចជានៅតំបន់ផ្សេងទៀត ដែលត្រូវបានកងកម្លាំងប្រដាប់អាវុធថៃកាន់កាប់ដោយខុសច្បាប់តាំងពីឆ្នាំមុនមក ដើម្បីបន្ធូរបន្ថយស្ថានការណ៍ ជំរុញការជឿទុកចិត្តគ្នាទៅវិញទៅមក សម្រួលដល់ការដោះស្រាយជម្លោះដោយសន្តិវិធី ហើយងាកមកស្តារទំនាក់ទំនងភាពជាអ្នកជិតខាងល្អនៅតាមបណ្តោយព្រំដែនកម្ពុជា-ថៃ។
ជាការកត់សម្គាល់ ការតវ៉ាររបស់កម្ពុជា ប្រឆាំងនឹងការឈ្លានពានរបស់ថៃនេះ មិនមែនជាលើកទី១ទេ បើគិតចាប់ពីមានបទឈប់បាញ់លើកទី២ ជិត១ឆ្នាំមកនេះ ខណៈដែលមេដឹកនាំកម្ពុជា មិនប្តឹងថៃទៅកាន់តុលាការយុត្តិធម៌អន្តរជាតិ(ICJ) ដើម្បីដាក់សម្ពាធឱ្យថៃដកកងទ័ពចេញពីទឹកដីកម្ពុជា ក្រោយថៃបើកការឈ្លានពានលើកទី១ អំឡុងខែកក្កដា ឆ្នាំ២០២៥។
ប៉ុន្តែការតវ៉ារាប់រយដងរបស់រដ្ឋាភិបាល លោក ហ៊ុន ម៉ាណែត នេះមិនអាចដាក់សម្ពាធឱ្យថៃបញ្ឈប់សកម្មភាពឈ្លានពានទេ ដែលបច្ចុប្បន្នត្រូវបានគណបក្សប្រឆាំងអះអាងថា ថៃបានពង្រីកការឈ្លានពានដីខ្មែរនៅតាមព្រំដែនរហូត ៧៦ទីតាំង។
បច្ចុប្បន្នថៃ កំពុងសម្រុកធ្វើរបងព្រំដែន សាងសង់សំណង់រឹងលើដីខ្មែរទាំងនោះ ដោយឯកតោភាគី ទាំងគ្មានការរំខានពីក្រសួងការពារជាតិកម្ពុជា ចាប់ពីមានបទឈប់បាញ់លើកទី២ជិតមួយឆ្នាំមកនេះ៕
