ក្រសួងមហាផ្ទៃ គាំទ្រព្រឹទ្ធសភាកម្ពុជា ដោយជំរុញឱ្យថៃដកកងទ័ពចេញពីទឹកដីកម្ពុជា បើមិនចង់ឱ្យរឿងរាលដាលដល់សហគមន៍អន្តរជាតិ ដោយថា យោធាថៃ បាននិងកំពុងបន្តរំលោភយ៉ាងធ្ងន់ធ្ងរលើអធិបតេយ្យភាព និងបូរណភាពទឹកដីកម្ពុជា តាមរយៈការកាន់កាប់ទីតាំងស៊ីវិល ការបំផ្លិចបំផ្លាញទ្រព្យសម្បត្តិពលរដ្ឋស៊ីវិល និងការរារាំងប្រជាពលរដ្ឋកម្ពុជាជិត ២ម៉ឺននាក់ មិនឱ្យវិលត្រឡប់ទៅកាន់លំនៅឋានដើមវិញ។
សេចក្តីប្រកាសព័ត៌មានរបស់ក្រសួងមហាផ្ទៃ ចុះថ្ងៃទី០១ ខែកញ្ញា ឆ្នាំ២០២៦ បានលើកឡើងថា ចាប់តាំងពីបទឈប់បាញ់រវាងកម្ពុជា និងថៃ បានចូលជាធរមាន កាលពីថ្ងៃទី២៧ ខែធ្នូ ឆ្នាំ២០២៥ ផ្អែកតាមសេចក្តីប្រកាសរួមនៃកិច្ចប្រជុំពិសេសលើកទី៣ របស់គណៈកម្មាធិការព្រំដែនទូទៅ (GBC) ភាគីថៃ ពុំបានអនុវត្តតាមកាតព្វកិច្ចបទឈប់បាញ់នេះឱ្យបានពេញលេញ និងស្មោះត្រង់ឡើយ។
ផ្ទុយទៅវិញ យោធាថៃបាននិងកំពុងបន្តរំលោភយ៉ាងធ្ងន់ធ្ងរលើអធិបតេយ្យភាព និងបូរណភាពទឹកដីកម្ពុជា តាមរយៈការកាន់កាប់ទីតាំងស៊ីវិល ការបំផ្លិចបំផ្លាញទ្រព្យសម្បត្តិពលរដ្ឋស៊ីវិល និងការរារាំងប្រជាពលរដ្ឋកម្ពុជា ដែលបច្ចុប្បន្នមានចំនួនជិត ២ម៉ឺននាក់ (១៨ ៧០៣នាក់) មិនឱ្យវិលត្រឡប់ទៅលំនៅឋានវិញ។
ជាមួយគ្នានេះ ក្រសួងមហាផ្ទៃ ក៏បានបង្ហាញការគាំទ្រប្រធានព្រឹទ្ធសភា លោក ហ៊ុន សែន ដែលបានលើកឡើងកាលពីពេលថ្មីៗនេះថា ប្រសិនជាថៃ ពិតជាមានបំណងចង់បញ្ចៀសការយកចិត្តទុកដាក់បន្ថែមទៀតពីសហគមន៍អន្តរជាតិ ចំពោះស្ថានការណ៍នេះ មធ្យោបាយដែលមានប្រសិទ្ធភាពបំផុត មិនមែនជាការទាមទារឱ្យកម្ពុជានៅស្ងៀមនោះទេ។
ប៉ុន្តែត្រូវដោះស្រាយស្ថានភាពជាក់ស្តែងដែលបង្កឱ្យមានការព្រួយបារម្ភ ពោលគឺថៃត្រូវដកកម្លាំងរបស់ខ្លួនចេញពីទឹកដីកម្ពុជា បញ្ឈប់សកម្មភាពផ្លាស់ប្តូរស្ថានភាពលើដី ឬបង្កើតស្ថានភាពថ្មីលើដីជាក់ស្តែង និងអនុញ្ញាតឱ្យប្រជាជនកម្ពុជា ភៀសខ្លួនអាចវិលត្រឡប់ទៅកាន់លំនៅឋានរបស់ខ្លួនវិញដោយសុវត្ថិភាព និងដោយសេចក្តីថ្លៃថ្នូរ។
ក្រសួងមហាផ្ទៃ ក៏បានអំពាវនាវយ៉ាងទទូចទៅកាន់ភាគីថៃ រួមទាំងមជ្ឈដ្ឋានថ្នាក់ដឹកនាំថៃ ដែលមានការយល់ដឹងពីច្បាប់អន្តរជាតិ និងបណ្តាមិត្តភក្តិអាស៊ាន សហគមន៍អន្តរជាតិ និងអង្គការសហប្រជាជាតិ ចូលរួមជំរុញ និងតាមដានការអនុវត្តឱ្យបានពេញលេញនូវសេចក្តីប្រកាសរួមនៃកិច្ចប្រជុំពិសេស GBC ថ្ងៃទី២៧ ខែធ្នូ ឆ្នាំ២០២៥ ហើយជាពិសេសត្រូវពន្លឿនការចុះវាស់វែងខណ្ឌសីមារបស់ក្រុមការងារ JBC ផ្អែកលើផែនទីអនុសញ្ញា និងសន្ធិសញ្ញារវាងបារាំង-សៀម ផែនទី និងកំណត់ហេតុបោះបង្គោលព្រំដែនរបស់គណៈកម្មការបោះបង្គោលព្រំដែនឥណ្ឌូចិន-សៀម ព្រមទាំងកិច្ចព្រមព្រៀង និងឯកសារផ្លូវការដែលភាគីទាំងពីរបានឯកភាពគ្នា។
កម្ពុជា ក៏បានបញ្ជាក់ដែរថា ផ្អែកតាមគោលការណ៍ច្បាប់អន្តរជាតិ «ដរាបណា អ្នកដែលកំពុងកាន់កាប់ខុសច្បាប់ ត្រូវបានតវ៉ាប្រឆាំងជានិច្ចដោយម្ចាស់ដែនដី ដរាបនោះ អ្នកដែលកំពុងកាន់កាប់ដោយខុសច្បាប់ នឹងមិនទទួលបានសិទ្ធិកាន់កាប់ស្ថាពរឡើយ។ ផ្ទុយទៅវិញ ដរាបណាម្ចាស់ដែនដីនៅតែប្រឆាំងតវ៉ាជានិច្ច ដរាបនោះ ខ្លួនមិនបាត់បង់សិទ្ធិដោយការផុតអាជ្ញាយុកាលឡើយ»។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត យល់ឃើញថា ការចេញសេចក្តីប្រកាសព័ត៌មានរបស់ក្រសួងមហាផ្ទៃ ជារឿងល្អមួយ ដើម្បីបញ្ជាក់ពីជំហររបស់ខ្លួនក្នុងការការពារជនស៊ីវិល និងអធិបតេយ្យភាពរបស់កម្ពុជា ប៉ុន្តែជាមួយគ្នានេះ ក្រសួងការបរទេស ត្រូវធ្វើការងារផ្ទាល់បន្ថែមទៀតជាមួយសហគមន៍អន្តរជាតិ ដើម្បីបង្ហាញថាថៃមិនបានបញ្ឈប់ការឈ្លានពានទឹកដីកម្ពុជានោះទេ ទោះបីមានបទឈប់បាញ់ក៏ដោយ។
លោកបន្តថា ការមិនប្តឹងថៃទៅតុលាការអន្តរជាតិ ហើយបង្ខំឱ្យថៃដកកងទ័ពពីកម្ពុជាដោយខ្លួនឯងនោះ គឺមិនអាចទៅរួចនោះទេ។
លោកថា៖ «វាមានតែ២ទេ ដែលអាចឱ្យថៃដកកងទ័ពចេញពីកម្ពុជាបានជាស្ថាពរ ទី១ ប្តឹង ទី២ សម្ពាធអន្តរជាតិដោយកម្រិតខ្ពស់បំផុត ហើយសម្ពាធអន្តរជាតិ តាមរយៈវេទិកាអន្តរជាតិ តាមរយៈកិច្ចប្រជុំអង្គការសហប្រជាជាតិ ឬក៏ក្រុមប្រឹក្សាសន្តិសុខអង្គការសហប្រជាជាតិ ឬក៏មានអាស៊ានចូលរួម និងពួកមហាអំណាច មានចិន មានអង់គ្លេស មានបារាំង មានអាមេរិកាំងអីចូលរួមទៀត អាហ្នឹងបានអាចមានសម្ពាធខ្លាំងក្លាបាន ហើយក្រៅពីហ្នឹងវាមានកិច្ចព្រងព្រៀងសន្តិភាពទីក្រុងប៉ារីស ក៏កម្ពុជាគួរយកអាហ្នឹងមកធ្វើជាសក្ខីកម្មក្នុងការប្តឹងផ្តល់ដែរ»។
សកម្មភាពនេះ យោធាថៃ សម្រុកធ្វើរបងព្រំដែន ពង្រីកយកដីខ្មែរ ដោយឯកតោភាគី តាមដែនថៃចង់បាន រួមទាំងការជីកប្រឡាយ រាយបន្លាលួសព័ទ្ធយកដីខ្មែរ ថៃសាងសង់សំណង់រឹង និងធ្វើលេណដ្ឋានឈរជើងរបស់កងទ័ពលើទីតាំងទាំង ៧៦ទីតាំង ដែលថៃបានដណ្តើមគ្រប់គ្រងអំឡុងខែកក្កដា និងខែធ្នូ ឆ្នាំ២០២៥ ទាំងគ្មានការរំខានពីក្រសួងការពារជាតិកម្ពុជា៕
