អន្តរជាតិ

លោក ត្រាំ កំពុងពិនិត្យឡើងវិញនូវការគាំទ្ររបស់អាមេរិកចំពោះចក្រភពអង់គ្លេសពាក់ព័ន្ធប្រជុំកោះហ្វកឡិន

កញ្ញា រតនៈ ម៉ូនីកា
| ០១ កញ្ញា ២០២៦
ម៉ោង ១៦:០៦

លោក ដូណាល់ ត្រាំ (Donald Trump) បានលើកឡើងថា លោកកំពុងពិចារណាឡើងវិញនូវការគាំទ្ររបស់អាមេរិកចំពោះអធិបតេយ្យភាពរបស់អង់គ្លេសលើប្រជុំកោះហ្វកឡិន (Falkland Islands) ដែលអាចនឹងធ្វើឱ្យមានភាពតានតឹងដល់ “ទំនាក់ទំនងពិសេស” រវាងប្រជាជាតិទាំងពីរ។

ប្រធានាធិបតីរូបនេះ បានប្រាប់អ្នកយកព័ត៌មាននៅសេតវិមានថា៖ «ខ្ញុំតែងតែពិនិត្យឡើងវិញនូវរាល់ជំហរទាំងអស់ ហើយនោះគ្រាន់តែជាជំហរមួយក្នុងចំណោមជំហរជាច្រើនប៉ុណ្ណោះ» ជាការឆ្លើយតបនឹងសំណួរអំពីជំហរលើប្រជុំកោះដែលមានជម្លោះជាមួយអាហ្សង់ទីន។

ជាផ្លូវការ អាមេរិកប្រកាន់ជំហរអព្យាក្រឹត ប៉ុន្តែជាក់ស្តែងបានទទួលស្គាល់ការគ្រប់គ្រងរបស់អង់គ្លេសតាំងពីឆ្នាំ១៨៣៣ ដែលធ្លាប់មានជម្លោះយោធាជាមួយអាហ្សង់ទីនក្នុងឆ្នាំ១៩៨២។ មតិរបស់លោក Trump គឺជាសញ្ញាបង្ហាញពីការប្រើប្រាស់ជម្លោះនេះ ជាឧបករណ៍សម្ពាធលើនាយករដ្ឋមន្ត្រីអង់គ្លេស លោក Andy Burnham ឱ្យដំឡើងការចំណាយលើវិស័យការពារជាតិ និង NATO។

ការលើកឡើងនេះ ធ្វើឡើងបន្ទាប់ពីមានរបាយការណ៍ថា អាមេរិកអាចនឹងផ្លាស់ប្តូរជំហរ ខណៈរដ្ឋមន្ត្រីហិរញ្ញវត្ថុអង់គ្លេស លោក John Healey រៀបចំបោះបង់ចោលការប្តេជ្ញាចិត្តចំណាយ ៣% នៃ GDP លើវិស័យការពារជាតិ។

លោក Trump តែងតែដាក់សម្ពាធលើសម្ព័ន្ធមិត្តឱ្យដំឡើងកញ្ចប់ថវិកាការពារជាតិ ដោយចោទថា “កេងចំណេញហ្វ្រី”។ កាលពីខែមេសា អ៊ីមែលបែកធ្លាយរបស់ Pentagon ធ្លាប់បានស្នើឱ្យពិនិត្យឡើងវិញនូវការទាមទារនេះ ដោយសារអង់គ្លេសខ្វះការគាំទ្រចំពោះសង្គ្រាមអ៊ីរ៉ង់។ ការផ្លាស់ប្តូរជំហរនេះ នឹងប៉ះពាល់ផ្លូវចិត្តយ៉ាងខ្លាំងដល់អង់គ្លេស។

កាលពីសង្គ្រាមឆ្នាំ១៩៨២ លោកស្រី Margaret Thatcher ទទួលបានការគាំទ្រផ្នែកកាទូតយ៉ាងរឹងមាំពីលោក Ronald Reagan ដែលបានជួយពង្រឹងចំណងមិត្តភាពរវាងអ្នកទាំងពីរ។ ក្នុងសង្គ្រាមនោះ ទាហានអាហ្សង់ទីន ៦៤៩ នាក់ និងទាហានអង់គ្លេស ២៥៥ នាក់ បានពលីជីវិត។

នាពេលថ្មីៗនេះ លោក Trump បានស្និទ្ធស្នាលជាមួយប្រធានាធិបតីអាហ្សង់ទីន លោក Javier Milei ដោយបានអនុម័តជំនួយ ២០ ប៊ីលានដុល្លារ និងអនុញ្ញាតឱ្យនាំចូលសាច់គោអាហ្សង់ទីន។ លោក Milei បានគាំទ្រយ៉ាងខ្លាំងលើការទាមទារប្រជុំកោះនេះ ទោះបីជាក្នុងការស្ទង់មតិឆ្នាំ២០១៣ ប្រជាជននៅកោះហ្វកឡិនភាគច្រើនលើសលប់ បានបោះឆ្នោតចង់បន្តនៅជាមួយអង់គ្លេសក៏ដោយ។

បញ្ហានេះបានក្តៅគគុកសារជាថ្មី បន្ទាប់ពីជ័យជម្នះរបស់អាហ្សង់ទីនលើអង់គ្លេស ក្នុងវគ្គពាក់កណ្តាលផ្តាច់ព្រ័ត្រ World Cup កាលពីខែកក្កដា នៅពេលកីឡាករអាហ្សង់ទីនពន្លាតបដា “Las Malvinas son Argentinas” (កោះហ្វកឡិនជាកោះរបស់អាហ្សង់ទីន) រហូតធ្វើឱ្យសហព័ន្ធបាល់ទាត់អាហ្សង់ទីន ត្រូវបាន Fifa ពិន័យ ២៣៥ ០០០ ដុល្លារ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។