ទោះបីជាមានព័ត៌មានផ្លូវការថា អាជ្ញាធរថៃបានសម្រេចដោះលែងក្រុមអ្នកនេសាទកម្ពុជា នាពេលថ្មីៗនេះក៏ដោយ ប៉ុន្តែរហូតមកទល់ពេលនេះ សាច់ញាតិនៅតែមិនទាន់បានជួបមុខសមាជិកគ្រួសារខ្លួននៅឡើយទេ។
អ្នកស្រី មាស ពុធី ប្រពន្ធកម្មករទូកនេសាទលោក ជូន ភាព ដែលត្រូវបានយោធាថៃចាប់ខ្លួន ប្រាប់វីអូឌីនៅថ្ងៃទី២ ខែកញ្ញា ថា មកទល់ពេលនេះ អ្នកស្រីមិនទាន់បានជួបមុខប្ដីដូចការរំពឹងឡើយ ដោយឮត្រឹមសំឡេងខលតាមទូរស័ព្ទ។
អ្នកស្រីបន្តថា តាមដំណឹងមិនច្បាស់ការ ប្ដីអ្នកស្រីកំពុងស្នាក់នៅច្រកព្រំដែន ក្នុងខេត្តកោះកុង ដែលអាចចំណាយពេលប្រហែលមួយទៅពីរសប្ដាហ៍ទៀត ទើបអាចវិលចូលស្រុកកំណើត។ យ៉ាងណា អ្នកស្រីមិនដឹងពីមូលហេតុដែលត្រូវស្នាក់នៅនោះឡើយ។
អ្នកស្រី ពុធី និយាយថា៖ «ឮថាគាត់ឲ្យគាត់មក ប៉ុន្តែមិនទាន់ដល់។ បងនៅថៃគាត់តេមកថា រយៈមួយអាទិត្យ បើមិនមួយអាទិត្យ ពីរអាទិត្យ ខ្ញុំមិនដឹងដែរ ខ្ញុំអត់ចេះអក្សរ នៅខ្មែរនេះ ហើយគាត់ទៅរកស៊ីសង្ឃឹមគាត់ទៅជួយរកលុយសងគេ ឥឡូវទៅជាប់គ្រលុក ផុងគ្រលុក គ្រោះថ្នាក់គាត់ទៅជាប់(ពន្ធនាគារ)នៅស្រុកគេ»។
តាមការសន្ទនាជាមួយប្ដីក្នុងទូរស័ព្ទ អ្នកស្រីថា ប្ដីអ្នកស្រីពេលខ្លះមានអាហារហូបបានឆ្អែត ជួនកាលក៏អត់។ អវត្តមានរបស់លោក ជូន ភាព ក៏បានធ្វើឱ្យអ្នកស្រី មាស ពុធី ជួបបញ្ហាជីវភាព ខណៈជាងកន្លះឆ្នាំមកនេះ អ្នកស្រីពុំដែលទទួលបានជំនួយ ឬការឧបត្ថម្ភណាមួយនោះឡើយ។ បញ្ហាជីវភាពបានធ្វើឱ្យអ្នកស្រីស្វែងរកការងារធ្វើបន្ថែមជាកម្មកររោងចក្រ ខណៈកូនមានជំងឺគ្រុនឈាមព្យាបាលអស់លុយជាច្រើន បង្កើនសម្ពាធជីវភាពបន្ថែមទៀត។ អ្នកស្រីអំពាវនាវឱ្យអាជ្ញាធរពន្លឿននីតិវិធីដោះលែង ដើម្បីប្ដីអ្នកស្រីបានមករស់នៅជុំប្រពន្ធកូនវិញ។
អ្នកស្រី មាស ពុធី និយាយថា៖ «ខ្ញុំអត់សឹងអី ជំពាក់គេរុំកោះ។ ថ្ងៃមុនហ្នឹងកូនឈឺ ជំពាក់គេ កូនគ្រុនក្ដៅទៅពេទ្យកាល់ម៉ែតអស់មួយកំភ្លូសទៀត ជំពាក់បងប្អូនពេញហើយ ម្នាក់មួយលាន ពីរលាន យកទៅមើលកូនៗអស់មួយពាន់ជាងថ្ងៃមុនហ្នឹង[…] បានគាត់ជោគជ័យ បានគាត់មកដល់ស្រុកដល់ភូមិវិញ រកស៊ីចិញ្ចឹមកូនប្រពន្ធវិញបានហើយ… ប៉ុណ្ណឹងបានហើយ»។
អស់រយៈពេលជាង៧ខែមកហើយ ដែលយោធាជើងទឹកថៃបានចូលមកចាប់ទូកនេសាទ ដែលមានពលរដ្ឋខ្មែរបីនាក់ យកទៅឃុំឃាំងក្រោមការចោទប្រកាន់ថា ចូលដែនទឹកថៃ និងនេសាទខុសច្បាប់។ យោធាថៃបានចូលមកចាប់អ្នកនេសាទទាំងបី នៅក្នុងដែនទឹកកម្ពុជា ដែលមានចម្ងាយ ១១គីឡូម៉ែត្រ ពីកោះយ៉រ ក្នុងទឹកដីខេត្តកោះកុង កាលពីថ្ងៃទី២២ ខែកុម្ភៈ ឆ្នាំ២០២៦។
នៅថ្ងៃទី១ ខែមេសា តុលាការខេត្តត្រាត ប្រទេសថៃ បានកាត់ទោសអ្នកនេសាទខ្មែរពីរនាក់ ឱ្យជាប់ពន្ធនាគារ ៤ខែ និងពិន័យក្នុងម្នាក់ ៩ម៉ឺនបាត ខណៈអ្នកបើកទូកម្នាក់ទៀតត្រូវបានកាត់ទោសឱ្យជាប់ពន្ធនាគារ ១ឆ្នាំ៤ខែ និងពិន័យជាប្រាក់ជាង ១២ម៉ឺនបាត។
មន្ត្រីនាំពាក្យក្រសួងការបរទេស លោក ចាន់ រតនា បានបញ្ជាក់ប្រាប់សារព័ត៌មានក្នុងស្រុក កាលពីថ្ងៃទី៣១ ខែសីហា ថា អ្នកនេសាទខ្មែរទាំង ២នាក់ ត្រូវបានដោះលែងកាលពីថ្ងៃទី២៩ ខែសីហា និងគ្រោងបញ្ជូនត្រឡប់ទៅកម្ពុជាវិញ តាមច្រកចាំយាម ខេត្តកោះកុង ក្នុងរយៈពេលមួយឬពីរថ្ងៃបន្ទាប់។ លោក ចាន់ រតនា បន្តថា អ្នកនេសាទខ្មែរម្នាក់ទៀត ដែលជាអ្នកបើកទូក ត្រូវបន្តជាប់ឃុំរហូតដល់ខែវិច្ឆិកា ទើបត្រូវបានអាជ្ញាធរថៃដោះលែង ដោយសារមានរយៈពេលទោសវែងជាងអ្នកនេសាទពីរនាក់ផ្សេងទៀត។
វីអូឌី មិនអាចសុំការអត្ថាធិប្បាយបន្ថែមពីមន្ត្រីនាំពាក្យក្រសួងការបរទេស លោក ចាន់ រតនា ទៅលើការពន្យារពេលលើការបញ្ជូនអ្នកនេសាទទាំងពីរនាក់បានទេ នៅថ្ងៃទី០២ ខែកញ្ញា។
ចំណែក អភិបាលខេត្តកោះកុង លោកស្រី ឈី វ៉ា បានប្រាប់វីអូឌីនៅថ្ងៃទី០២ ខែកញ្ញា នេះ ជាសារសំណេរតាមរយៈប្រព័ន្ធតេឡេក្រាមថា ជាប់ប្រជុំ មិនទាន់អាចផ្ដល់បទសម្ភាសន៍លើករណីនេះ។
ទាក់ទិនរឿងនេះ មន្ត្រីទទួលបន្ទុកការពារសិទ្ធិពលករចំណាកស្រុកប្រចាំប្រទេសថៃនៃអង្គការសង់ត្រាល់ លោក លឹង សុផុន ប្រាប់វីអូឌីថា តាមនីតិវិធី អាជ្ញាធរថៃនឹងបញ្ជូនជនដែលបញ្ចប់ការអនុវត្តទោស ទៅប៉ុស្តិ៍អន្តោប្រវេសន៍នៅក្នុងស្រុកខ្លងយ៉ៃ ខេត្តត្រាត មុនបញ្ជូនទៅប្រទេសកម្ពុជា។ លោកបន្តថា ក្រៅពីអ្នកនេសាទទាំង២ ក្នុងនោះក៏មានពលករខ្មែរប្រមាណ ៣០នាក់ផ្សេងទៀត កំពុងជាប់នៅប៉ុស្តិ៍អន្តោប្រវេសន៍ខ្លងយ៉ៃ រង់ចាំការត្រឡប់ទៅកម្ពុជាវិញផងដែរ។
លោកថា៖ «គេតែងតែបញ្ជូនទៅខ្លងចាកហ្នឹងឯង នៅក្នុងស្រុកខ្លងយ៉ៃ។ កន្លែងហ្នឹងជាកន្លែងអន្តោប្រវេសន៍ រង់ចាំអាជ្ញាធរហ្នឹងបញ្ជូនទៅព្រំដែនហ្នឹងឯង តែគេមិនទាន់កំណត់ពេលវេលាច្បាស់លាស់ទេ ហើយដោយឡែកពលករ(អ្នកនេសាទ)ពីរនាក់ ដែលអាជ្ញាធរទើបតែដោះលែងកាលពីម្សិលមិញហ្នឹង ក៏គេបញ្ជូនទៅកន្លែងហ្នឹងដែរ»។
យ៉ាងណា ការដោះលែងអ្នកនេសាទនេះ ធ្លាប់ត្រូវបានរំពឹងថា នឹងធ្វើឡើងនៅថ្ងៃទី៣០ ខែកក្កដា ប៉ុន្តែមិនបានកើតឡើងតាមការរំពឹងទុក ដែលធ្វើឱ្យសាច់ញាតិខាតបង់លុយកាក់ ដោយសារត្រូវធ្វើដំណើរទៅចាំទទួលក្នុងមួយលើកៗជិត ២០ម៉ឺនរៀល។ ទន្ទឹមគ្នានេះ នីតិវិធីដោះលែងលើកនេះ ក៏មានភាពយឺតយ៉ាវ ដោយភាគីថៃហាក់មានចេតនាប្រើលេសបុណ្យជាតិ ដើម្បីពន្យារពេល។
លើសពីនេះ មតិសាធារណៈមួយចំនួន ក៏បានរិះគន់ទៅលើរដ្ឋាភិបាលកម្ពុជា ដែលបណ្ដោយឱ្យពលរដ្ឋខ្លួនត្រូវយោធាថៃចាប់ខ្លួនដោយខុសច្បាប់ ហើយយកទៅដាក់ពន្ធនាគារដល់ទៅជាង ៦ខែ៕
