ប្រមុខដឹកនាំនៃអង្គការណាតូ (NATO) និងគណៈកម្មការអឺរ៉ុប បានព្រមានថា រុស្ស៊ីកំពុងមានសកម្មភាពកាន់តែប្រថុយប្រថាន និងបានប្តេជ្ញាឆ្លើយតបទៅនឹង «ស្ថានភាពមិនធម្មតាថ្មី» នេះ។
ប្រធានគណៈកម្មការអឺរ៉ុប លោកស្រី Ursula von der Leyen បានថ្លែងបន្ទាប់ពីអាល្លឺម៉ង់បានទម្លាក់កំហុសលើរុស្ស៊ី ចំពោះការប៉ុនប៉ងវាយប្រហារដោយដ្រូននៅអាកាសយានដ្ឋាន Leipzig ថា៖ «ហេតុការណ៍នៅ Leipzig បង្ហាញពីការកើនឡើងនៃភាពតានតឹងថ្មី នៅលើទឹកដីសហភាពអឺរ៉ុប ដែលបណ្តាលមកពីរុស្ស៊ីដោយផ្ទាល់»។
លោកស្រីបានបន្ថែមថា៖ «យើងត្រូវតែត្រៀមខ្លួនឆ្លើយតបឱ្យបានលឿន និងល្អជាងមុន»។ អគ្គលេខាធិការអង្គការណាតូ លោក Mark Rutte បានថ្លែងថា សម្ព័ន្ធមិត្តទាំងមូលឈរ «ក្នុងស្មារតីសាមគ្គីភាពពេញទំហឹងជាមួយអាល្លឺម៉ង់»។
រុស្ស៊ីបានបដិសេធការចោទប្រកាន់របស់អាល្លឺម៉ង់ ចំពោះការវាយប្រហារដោយដ្រូនលើកប៉ាល់ដឹកទំនិញអ៊ុយក្រែន។ ទោះជាយ៉ាងណា ការស៊ើបអង្កេតរបស់អាល្លឺម៉ង់ បានបញ្ជាក់ថា រុស្ស៊ីស្ថិតនៅពីក្រោយហេតុការណ៍នេះ ហើយជនសង្ស័យពីរនាក់ត្រូវបានរកឃើញអត្តសញ្ញាណ។
ទីក្រុងប៊ែរឡាំង បានប្រកាសបិទស្ថានកុងស៊ុលរុស្ស៊ីនៅក្រុង Bonn និងស្ថាប័នវប្បធម៌ Russian House ខណៈរុស្ស៊ីបានបដិសេធការចោទប្រកាន់ និងបានប្រកាសបិទមជ្ឈមណ្ឌលវប្បធម៌ Goethe-Institut របស់អាល្លឺម៉ង់វិញ។ លោក វ៉្លាឌីមៀ ពូទីន បានថ្កោលទោសវិធានការរបស់អាល្លឺម៉ង់ថាជាកំហុសដ៏ធ្ងន់ធ្ងរ។
ខណៈទីក្រុងប៊ែរឡាំងរៀបចំការឆ្លើយតបជាមួយសម្ព័ន្ធមិត្ត រួមទាំងការបន្ថែមទណ្ឌកម្ម រដ្ឋមន្ត្រីការបរទេសសហភាពអឺរ៉ុប ក៏បានពិភាក្សាអំពីសកម្មភាពប្រឆាំង «កងនាវាស្រមោល» របស់រុស្ស៊ីដែលដឹកជញ្ជូនប្រេងគេចវាងទណ្ឌកម្មផងដែរ។
លើសពីនេះ ប្រទេសសមាជិកសហភាពអឺរ៉ុបជាច្រើន កំពុងជំរុញឱ្យប្រើប្រាស់ទ្រព្យសកម្មរុស្ស៊ីដែលត្រូវបង្កកជាង ១៩៣ ប៊ីលានអឺរ៉ូ ដើម្បីជួយអ៊ុយក្រែន។
លោកស្រី von der Leyen និងលោក Mark Rutte បានគូសបញ្ជាក់ថា ហេតុការណ៍នេះគឺជាផ្នែកនៃលំនាំនៃសកម្មភាពប្រថុយប្រថានកាន់តែច្រើនឡើង រួមទាំងការរំខានដល់ហេដ្ឋារចនាសម្ព័ន្ធ និងអំពើបំផ្លិចបំផ្លាញរោងចក្រផលិតបរិក្ខារការពារជាតិ។
លោកស្រី Von der Leyen បានបញ្ជាក់ថា សហភាពអឺរ៉ុបបានយល់ព្រមផ្តល់កម្ចីដល់អ៊ុយក្រែនចំនួន ៩០ ប៊ីលានអឺរ៉ូ រួចហើយ ហើយបានសន្យាថា អឺរ៉ុប និងណាតូនឹងបន្តបង្កើនសម្ពាធលើទីក្រុងម៉ូស្គូ រហូតទាល់តែរុស្ស៊ីឈប់វាយប្រហារលើប្រទេសអ៊ុយក្រែន៕
