កងកម្លាំងអាមេរិក បានវាយប្រហារលើនាវាដឹកប្រេងរបស់អ៊ីរ៉ង់ ៥ គ្រឿង ដើម្បីឆ្លើយតបទៅនឹងទីក្រុងតេអេរ៉ង់ដែលបានតម្រង់ទិសដៅវាយប្រហារលើនាវាចម្បាំងអាមេរិកពីរលើក។ នេះបើយោងតាមបញ្ជាការដ្ឋានកណ្តាលអាមេរិក (Centcom)។
Centcom បន្ថែមថា នាវាដឹកប្រេងអ៊ីរ៉ង់ ៤ គ្រឿង ដែលពាក់ព័ន្ធជាមួយកងឆ្មាំបដិវត្តន៍អ៊ីរ៉ង់ (IRGC) ក្នុងឈូងសមុទ្រអូម៉ង់ ត្រូវបានវាយប្រហារ ព្រមទាំងនាវា ១ គ្រឿងទៀត នៅជិតកោះ Kharg ដែលជាកំពង់ផែប្រេងដ៏សំខាន់របស់អ៊ីរ៉ង់ ក៏ត្រូវបានវាយប្រហារផងដែរ។
ទីក្រុងតេអេរ៉ង់ បានឆ្លើយតបដោយបាញ់មីស៊ីលទៅលើមូលដ្ឋានទ័ពអាមេរិក ក្នុងប្រទេសហ្ស៊កដានី ប៉ុន្តែហ្ស៊កដានីបានបាញ់ទម្លាក់មីស៊ីល ១៨ ដើម ក្នុងចំណោម ២០ ដើម។ ការវាយប្រហារសងសឹកគ្នាកើនឡើងកម្តៅក្នុងសប្តាហ៍នេះ គឺជាង ៦ ខែ បន្ទាប់ពីអាមេរិក និងអ៊ីស្រាអែល បានវាយប្រហារលើអ៊ីរ៉ង់កាលពីថ្ងៃទី២៨ ខែកុម្ភៈ។
តម្លៃប្រេងបានកើនឡើងក្នុងការជួញដូរនៅអាស៊ី ដោយប្រេងឆៅ Brent កើនឡើង ១.៥% ដល់ ៩៩.៤១ ដុល្លារ/បារ៉ែល ខណៈប្រេងជួញដូរនៅអាមេរិកកើន ១.៦% ដល់ ៩៤.៥៥ ដុល្លារ។
អ្នកនាំពាក្យកងយោធពលហ្ស៊កដានី និយាយថា មីស៊ីលពីរដើមរបស់អ៊ីរ៉ង់បានធ្លាក់ចូលតំបន់គ្មានមនុស្សរស់នៅ។
អ៊ីរ៉ង់ បានព្រមានពីការវាយប្រហារបន្ថែម ដោយជំរុញឱ្យនាវិកនៃនាវាពាក់ព័ន្ធនឹងអាមេរិកនៅជិតកំពង់ផែក្នុងប្រទេសគែត និងបារ៉ែន “ចាកចេញពីនាវាភ្លាមៗ ព្រោះពួកគេនឹងត្រូវគេតម្រង់ទិសដៅវាយប្រហារ”។
ការកើនឡើងកម្តៅនេះ កើតឡើងបន្ទាប់ពីអ៊ីរ៉ង់បាញ់មីស៊ីលបាលីស្ទិកលើនាវាចម្បាំងអាមេរិក ដែល Centcom និយាយថា “គេចផុតដោយជោគជ័យ” ហើយគ្មានកងទ័ពអាមេរិកណាម្នាក់រងរបួសឡើយ។
ជាការឆ្លើយតប អាមេរិកនិយាយថា នាវាដឹកប្រេងអ៊ីរ៉ង់ទាំង ៥ គ្រឿង គឺជា “ផ្នែកមួយនៃបណ្តាញស្រមោលរាប់ពាន់លានដុល្លារ សម្រាប់ផ្តល់មូលនិធិដល់ IRGC និងក្រុមតំណាងប្រដាប់អាវុធ”។
កោះ Kharg ដែលនាវាអ៊ីរ៉ង់មួយគ្រឿងត្រូវបានវាយប្រហារ គឺជាកំពង់ផែដ៏សំខាន់ដែលប្រេងឆៅអ៊ីរ៉ង់ប្រហែល ៩០% ត្រូវនាំចេញឆ្លងកាត់។
សម្ពាធលើតម្លៃប្រេងកាន់តែធ្ងន់ធ្ងរ ដោយសារក្រុម Houthi ក្នុងប្រទេសយេម៉ែនបានវាយប្រហារលើគ្រឹះស្ថានថាមពលនៅអារ៉ាប៊ីសាអូឌីត បណ្តាលឱ្យមនុស្ស ៧៣ នាក់រងរបួស និងផ្អាកប្រតិបត្តិការបណ្តោះអាសន្ន។
រដ្ឋមន្ត្រីការបរទេសអាមេរិក លោក Marco Rubio ថ្លែងនៅកូឡុំប៊ីថា “អ៊ីរ៉ង់នៅតែបន្តព្យាយាមវាយប្រហារលើនាវាជើងទឹកអាមេរិក។ ហើយរាល់ពេលដែលពួកគេធ្វើបែបនោះ ពួកគេនឹងត្រូវបាត់បង់នាវាដឹកប្រេង”។
ការវាយប្រហាររបស់អាមេរិក កើតឡើងបន្ទាប់ពីអ៊ីរ៉ង់អះអាងថា បានរឹបអូសយកនាវាមុជទឹកគ្មានមនុស្សបើករបស់អាមេរិកនៅច្រកសមុទ្រ Hormuz។
អ្នកនាំពាក្យ Centcom លោក Tim Hawkins និយាយថា ដ្រូនក្រោមទឹកនោះ “បានខូចចរន្តកាលពីជាងមួយថ្ងៃមុន” ហើយវាជា “ម៉ូដែលចាស់ដែលមិនបានប្រមូលទិន្នន័យរសើប ឬផ្ទុកឧបករណ៍សូណា និងរ៉ាដាសម្ងាត់ឡើយ”៕
