Social Issues, ការងារ, ព័ត៌មានជាតិ

កម្មកររាប់ពាន់នាក់នៅរោងចក្រយីដា តវ៉ាឱ្យដកជំនួយការរដ្ឋបាលដែលប្រមាថកម្មករ និងដំឡើងថ្លៃបុង

កញ្ញា ទេព វិជ្ជារ៉ា
| ០៩ កញ្ញា ២០២៦
ម៉ោង ១៩:៤៦

កម្មករ-កម្មការិនីជាច្រើនពាន់នាក់ បម្រើការងារនៅរោងចក្រយីដា ដែលមានទីតាំងនៅឃុំឈើទាល ស្រុកកៀនស្វាយ ខេត្តកណ្តាល បានផ្ទុះការតវ៉ាទ្រង់ទ្រាយធំបិទកំណាត់ផ្លូវលេខ១១០ មុខរោងចក្រ ទាមទារឱ្យថៅកែបញ្ឈប់ជំនួយការរដ្ឋបាលម្នាក់ដែលបានប្រមាថកម្មករ និងទាមទារឱ្យដំឡើងលុយថ្លៃបុង។

កម្មការិនីបម្រើការងារនៅរោងចក្រយីដាជិត១០ឆ្នាំ អ្នកស្រី សែន ធានី បានឱ្យដឹងថា កម្មករ-កម្មការិនីរោងចក្រដេរសម្លៀកបំពាក់ខោប៊យប្រមាណ ៧ពាន់នាក់ បានផ្ទុះការតវ៉ានៅព្រឹកព្រលឹមថ្ងៃទី០៩ ខែកញ្ញា ឆ្នាំ២០២៦នេះ ដោយសារតែមិនអាចទ្រាំនឹងការប្រមាថរបស់ជំនួយការរដ្ឋបាលរោងចក្រជាជនជាតិខ្មែរម្នាក់ឈ្មោះ យូ បូរ៉ា មកលើកម្មករ ខណៈការដេរគិតជាលុយបុងរបស់ពួកគាត់ទៀតសោត ក៏មានការបាត់ជារៀងរាល់ខែ។ ការណ៍នេះ កម្មករទាមទារឱ្យខាងរោងចក្របញ្ឈប់ជំនួយការរូបនេះ ពីការងារ និងគិតគូរថ្លៃបុងឱ្យត្រឹមត្រូវឡើងវិញ។

អ្នកស្រីថា៖ «កម្មករអត់សុខចិត្ត [ជំនួយការរដ្ឋបាល]ដៀលកម្មករចឹង ផុសក្រដាសលុយមកដៀលកម្មករចឹង កម្មករអត់សុខចិត្តទេ សុំដកគាត់ចេញម៉ង ពីការងារហ្នឹង ហើយលុយបុងភាគរយបានច្រើន បើកប្រាក់ខែមកបានតិច[…]ខ្ញុំចង់បានពីរចំណុច ដកគាត់ចេញមួយ និងលុយបុងខ្ញុំ លុយបុងឱ្យគិតសារឡើងវិញ»។

កម្មការិនីរោងចក្រយីដាមួយរូបទៀត អ្នកស្រី អ៊ុន ស្រីលីន និយាយថា កម្មករបានតវ៉ាទាមទារឱ្យបញ្ឈប់ជំនួយការរដ្ឋបាល និងដោះស្រាយលក្ខខណ្ឌមួយចំនួន នៅក្នុងរោងចក្រចំនួន ២ថ្ងៃមកហើយ ប៉ុន្តែទទួលបានលទ្ធផលវិជ្ជមានតិចតួច ទោះពួកគាត់នាំគ្នាចេញតវ៉ាទ្រង់ទ្រាយធំនៅក្រៅរោងចក្រនាថ្ងៃពុធនេះបន្ថែមទៀត។

អ្នកស្រីថា៖ «ពួកខ្ញុំតវ៉ាដកបងបូរ៉ា អ្នកអូហ្វីស HR គាត់និយាយពាក្យអត់ពិរោះជាមួយកម្មករ ហើយទី២ពួកគាត់ចង់តវ៉ាលុយបុងរបស់គាត់ ពួកគាត់ចង់បានពីរចំណុចហ្នឹងទេ ចឹងតវ៉ារយៈពេល៣ថ្ងៃហើយគាត់អត់ទាន់ដោះស្រាយចេញទេ»។

ចំណែក អ្នកស្រី ឆាន ចន្នី ប្រធានសហព័ន្ធសហជីពកម្ពុជាប្រចាំរោងចក្រយីដា ក៏បានឱ្យដឹងដែរថា អំឡុងការតវ៉ានៅក្នុងរោងចក្រនៅថ្ងៃទី០៨ ខែកញ្ញា ម្សិលមិញ ខាងមន្ទីរការងារខេត្តកណ្តាល បានចុះមកសម្របសម្រួលរកដំណោះស្រាយបាន ៣ចំណុច ក្នុងចំណោម ៤ចំណុចដែលកម្មករបានទាមទារ។ ហើយមួយចំណុចដែលនៅសល់នោះ គឺខាងរោងចក្រមិនព្រមបញ្ឈប់ជំនួយការរដ្ឋបាលឈ្មោះ យូ បូរ៉ា នោះទេ ទើបកម្មករនាំគ្នាផ្ទុះការតវ៉ាទ្រង់ទ្រាយធំនៅថ្ងៃនេះ ហើយបន្ថែមការទាមទារមួយចំណុចទៀត គឺទាមទារឱ្យរោងចក្រដំឡើងថ្លៃបុងឡើងវិញ។

មន្ត្រីតំណាងក្រសួងការងារ និងបណ្តុះបណ្តាលវិជ្ជាជីវៈ ដែលបានចុះទៅសម្របសម្រួលរកដំណោះស្រាយនៅរោងចក្រយីដា ដែលមិនបានបញ្ជាក់ឈ្មោះ បានប្រាប់កម្មករថា ជុំវិញការស្នើសុំរបស់កម្មករទាំង២ចំនុច បានដោះស្រាយសះជាហើយ ហើយខាងជំនួយការរដ្ឋបាលឈ្មោះ យូ បូរ៉ា ស្ម័គ្រចិត្តលាឈប់ពីការងារដោយខ្លួន ចាប់ពីថ្ងៃនេះទៅ ហើយការសុំឱ្យពិនិត្យថ្លៃបុងឡើងវិញទាំងអស់ ក៏ខាងរោងចក្រយល់ព្រមតាម។

លោកថា៖ «ចឹងអ្វីដែលបងប្អូនទាមទារ គឺយើងបានដោះ(ស្រាយ)ចប់រួចរាល់ ចឹងបងប្អូនអាចចូលធ្វើការវិញនៅថ្ងៃនេះ ទាន់ទេ ម៉ោង១២ ករណីដែលបងប្អូនអត់ចូលធ្វើការ ថ្ងៃនេះគឺសម្រាកមួយថ្ងៃ ហើយការឈប់សម្រាកនេះគឺយើងទូទាត់ដោះដូរនឹងបំណាច់ឆ្នាំដែលយើងមាន[…]ឥឡូវឈប់ធ្វើ(ការតវ៉ាបិទផ្លូវ)ខុសច្បាប់ទាំងអស់គ្នា ហើយបើកផ្លូវ»។

ការពីថ្ងៃម្សិលមិញ កម្មករ-កម្មការិនីរាប់រយនាក់ បម្រើការងារនៅរោងចក្រលានហ្វា និងប៉ូលស្តា ស្រុកបាកាន ខេត្តពោធិ៍សាត់ ក៏បានប្រមូលផ្តុំតវ៉ាបិទកំណាត់ផ្លូវជាតិលេខ៥ រយៈពេលខ្លីផងដែរ ទាមទារឱ្យរោងចក្របញ្ឈប់មេរដ្ឋបាលដែលប្រើពាក្យសម្តីអសុរោះ និងកាយវិការមិនសមរម្យដាក់កម្មករ។ ក្រោយការតវ៉ា ខាងមេរដ្ឋបាលរូបនោះ ក៏បានលាឈប់ការងារ ហើយកម្មករបានឯកភាពចូលធ្វើការវិញនៅថ្ងៃទី០៩ខែកញ្ញានេះ។

ជុំវិញការប្រើពាក្យមិនសមរម្យលើកម្មករពីសំណាក់រដ្ឋបាល និងអ្នកគ្រប់គ្រងនៅតាមរោងចក្រមួយចំនួននេះដែរ កាលពីថ្ងៃទី១៩ ខែសីហា ឆ្នាំ២០២៦ ក្រសួងការងារ បានចេញសេចក្តីប្រកាសព័ត៌មាន ក្រើនរំលឹកដល់អ្នកគ្រប់គ្រង មេការ និងអ្នកបកប្រែនៃសហគ្រាស ក្រុមហ៊ុន រោងចក្រ ជាពិសេសជនបរទេស ត្រូវគោរពឱ្យបាននូវសុជីវធម៌ វប្បធម៌ ប្រពៃណីទំនៀមទម្លាប់ខ្មែរ និងចៀសវាងដាច់ខាតនូវការប្រើប្រាស់អាកប្បកិរិយា និងពាក្យសម្តីមិនសមរម្យនៅកន្លែងការងារ។

ក្រសួងបន្តថា ក្នុងករណីរកឃើញ ឬទទួលបានពាក្យបណ្តឹង អំពីការប្រើប្រាស់អាកប្បកិរិយា និងពាក្យសម្តីមិនសមរម្យនោះ ក្រសួងនឹងចាត់វិធានការតាមច្បាប់ជាធរមាន ហើយសម្រាប់ជនបរទេស នឹងប្រឈមការដកហូតបណ្ណការងារ និងបណ្តេញចេញពីកម្ពុជា។

អ្នកគ្រប់គ្រងកម្មវិធីការងារនៃអង្គការសង់ត្រាល់ លោក ឃុន ថារ៉ូ បានលើកឡើងថា ការប្រើប្រាស់ភាសាអសុរស ការជេរប្រមាថនៅកន្លែងការងារក្នុងសហគ្រាសរោងចក្រនេះ មិនមែនជារឿងថ្មីនោះទេ ហើយទម្រង់ទាំងអស់នេះ ត្រូវបានចាត់ថ្នាក់ក្នុងកំហុសធ្ងន់ ដូច្នេះត្រូវមានវិធានការតឹងរឹងក្នុងការទប់ស្កាត់ លុបបំបាត់ និងធ្វើយ៉ាងណាឱ្យការអនុវត្តច្បាប់មានប្រសិទ្ធភាព។

លោកបន្តថា ក្នុងករណីមានរឿងនេះកើតឡើង ក្រសួងត្រូវមានយន្តការជាក់លាក់ក្នុងការទទួលបណ្តឹង និងត្រូវចុះធ្វើអធិការកិច្ចជាប្រចាំ និងដោះស្រាយជាប្រព័ន្ធ ក្នុងការលុបបំបាត់ទម្រង់នៃការប្រើប្រាស់អាកប្បកិរិយា ភាសាឬពាក្យសម្តីបែបហិង្សា និងការបៀតបៀន ទៅលើកម្មករនិយោជិតនៅកន្លែងការងារ ព្រមទាំងត្រូវដាក់ពិន័យ និងការដាក់ទោសទណ្ឌចំពោះបុគ្គលដែលប្រព្រឹត្តឱ្យបានតឹងរឹង ទើបអាចមានប្រសិទ្ធភាព។

លោកថា៖ «ចឹងដើម្បីលុបបំបាត់បញ្ហានេះ ខ្ញុំគិតថា យន្តការនៃការដោះស្រាយបណ្តឹងដែលកើតមានឡើង ហើយការទប់ស្កាត់ដោយមានការឆ្លើយតប ហើយដោះស្រាយជាបន្ទាន់ហ្នឹង ជារឿងដែលសំខាន់ ហើយមិនអាចទៅដោះស្រាយករណីមួយបានទេ ពីព្រោះថារោងចក្រសហគ្រាសវាមានរាប់ពាន់គ្រឹះស្ថានសហគ្រាស ជាពិសេសនៅក្នុងវិស័យវាយនភណ្ឌកាត់ដេរ ដេរស្បែកជើង ផលិតធ្វើដំណើរនេះ កម្មករភាគច្រើនហើយដែលគាត់ជួបប្រទះនូវបទពិសោធន៍ទាំងអស់ហ្នឹង»។

បើតាមសហជីពមួយចំនួន ការជេរប្រមាថ ឬបើពាក្យសម្តី និងកាយវិការមិនសមរម្យលើកម្មករនិយោជិត គឺជាបញ្ហាដែលជះឥទ្ធិពលលើកិត្តិយស បញ្ហាផ្លូវចិត្ត និងសេចក្តីថ្លៃថ្នូររបស់មនុស្សគ្រប់គ្នា។អំពើជេរប្រមាថមិនថាធ្វើឡើងចំពោះកម្មករ ឬដោយកម្មករនោះទេ គឺអាចប្រឈមមុខនឹងការពិន័យអន្តរការណ៍ ការបណ្តេញចេញពីការងារដោយគ្មានសំណង ឬការផ្ដន្ទាទោសតាមផ្លូវច្បាប់៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។