ជើងហោះហើរដែលត្រូវដឹកប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី (Volodymyr Zelenskyy) ពីប្រទេសម៉ល់ដាវី ទៅកាន់ប្រទេសន័រវែស ត្រូវបានពន្យារពេល នៅពេលដែលអាជ្ញាធរបានបិទដែនអាកាសរបស់ម៉ល់ដាវី ដោយសារតែការបំពានពីដ្រូន។ នេះបើយោងតាមការថ្លែងរបស់អ្នកនាំពាក្យរដ្ឋាភិបាលកាលពីថ្ងៃទី៩ខែកញ្ញា។
នគរបាលម៉ល់ដាវី បានឱ្យដឹងថា ដ្រូនរបស់រុស្ស៊ីមួយគ្រឿងបានធ្លាក់កាលពីថ្ងៃអង្គារ នៅលើវាលផ្កាឈូករ័ត្ន នាជាយភូមិមួយក្នុងស្រុក Riscani ដែលបានបង្កឱ្យមានអគ្គិភ័យចំនួន ៤ កន្លែង ប៉ុន្តែមិនបណ្តាលឱ្យមានមនុស្សរងរបួសនោះទេ។
កាលពីថ្ងៃទី៩ខែកញ្ញា អ្នកនាំពាក្យរដ្ឋាភិបាល លោក Dumitru Ciorici បានឱ្យដឹងថា ប្រទេសម៉ល់ដាវីបានបិទដែនអាកាសរបស់ខ្លួន កាលពីរសៀលថ្ងៃអង្គារ ដើម្បីការពារយន្តហោះដែលកំពុងហោះហើរលើប្រទេសនៅពេលនោះ ដែលធ្វើឱ្យជើងហោះហើរចេញដំណើរចំនួន ៣ ត្រូវពន្យារពេល រួមទាំងជើងហោះហើរដឹកលោក ហ្សេឡេនស្គី ផងដែរ។
អាជ្ញាធរម៉ល់ដាវី បានបញ្ជាក់ថា ដ្រូននោះបានធ្លាក់ និងផ្ទុះនៅចម្ងាយ ១០០ ម៉ាយល៍ ពីអាកាសយានដ្ឋានអន្តរជាតិ Chișinău។ ការរឹតបន្តឹងដែនអាកាសត្រូវបានលុបចោលវិញ ហើយយន្តហោះរបស់លោក ហ្សេឡេនស្គី បានហោះចេញដំណើរបន្ទាប់ពីការពន្យារពេលនោះ។
ដ្រូនដែលបានចូលទៅក្នុងដែនអាកាសម៉ល់ដាវី កាលពីថ្ងៃអង្គារ បានហោះឆ្លងចូលទៅក្នុងប្រទេសរូម៉ានី ដែលជាសមាជិកអង្គការ NATO នៅជិតខាង ហើយត្រូវបានគេតាមដានឆ្លងកាត់ខេត្តមួយចំនួននៅភាគឥសាននៃប្រទេសនេះ។
ក្រសួងបានឱ្យដឹងថា យន្តហោះចម្បាំង F-18 ចំនួនពីរគ្រឿងរបស់កងទ័ពអាកាស និងអវកាសអេសប៉ាញ ត្រូវបានបញ្ជូនឱ្យហោះឡើង ដើម្បីតាមដានគន្លងហោះហើររបស់វា មុនពេលវាហោះចូលដែនអាកាសម៉ល់ដាវីសារជាថ្មី។
កាលពីថ្ងៃទី៩ខែកញ្ញា នគរបាលម៉ល់ដាវី បានឱ្យដឹងថា អ្នកជំនាញខាងគ្រាប់យុទ្ធភណ្ឌបានរកឃើញបំណែកដ្រូន ដែលមានប្រព័ន្ធដំណើការ និងលក្ខណៈសម្បត្តិស្រដៀងទៅនឹងដ្រូនប្រភេទ Geran ដែលក្រុងម៉ូស្គូបានប្រើប្រាស់យ៉ាងទូលំទូលាយនៅក្នុងសង្គ្រាមទ្រង់ទ្រាយធំនៅអ៊ុយក្រែន។
នគរបាលបានថ្លែងថា៖ «ការស៊ើបអង្កេតបានកំណត់ទីតាំងដែលរងការប៉ះទង្គិច ជាកន្លែងដែលមានការផ្ទុះកើតឡើង ហើយបង្កើតបានជារណ្តៅធំមួយ» ដោយបន្ថែមថា អ្នកជំនាញកំពុងបន្តការស៊ើបអង្កេត «ដើម្បីកំណត់ប្រភេទ និងទម្ងន់នៃសារធាតុផ្ទុះ»។
អ៊ុយក្រែនមានព្រំប្រទល់ជាប់ទាំងប្រទេសរូម៉ានី និងម៉ល់ដាវី ហើយចាប់តាំងពីការឈ្លានពានទ្រង់ទ្រាយធំរបស់រុស្ស៊ីក្នុងឆ្នាំ២០២២ ប្រទេសទាំងពីរបានរាយការណ៍អំពីហេតុការណ៍ពាក់ព័ន្ធនឹងដ្រូនរាប់សិបករណីមកហើយ៕
