ក្រសួងរៀបចំដែនដី ចាត់ទុកការបង្ហោះសារនៅលើបណ្តាញសង្គមរបស់លោកឡេង ណាវ៉ាត្រា និងបុគ្គលមួយចំនួនទៀតជាការបំភ្លៃការពិត មានចេតនាញុះញង់ និងបំពានច្បាប់ ក្រោយមានការទម្លាយរឿងដួលរលំក្រុមហ៊ុនឡេងណាវ៉ាត្រា ដែលមានអតិថិជនប្រមាណជា ៣ ៨០០០ គ្រួសារ។
តាមសេចក្តីប្រកាសព័ត៌មាន ចុះថ្ងៃទី០៩ ខែកញ្ញា ឆ្នាំ២០២៦ ក្រសួងរៀបចំដែនដី នគរូបនីយកម្ម និង សំណង់ បានឱ្យដឹងថា ការលើកឡើងនៅលើបណ្តាញសង្គម Facebook របស់គណនីឈ្មោះ ឡេង ណាវ៉ាត្រា តន់ ចន្ទសីម៉ា និង និមល គឺជាការបំភាន់ព័ត៌មាន បំភ្លៃការពិត និងបំពុលបរិយាកាសសង្គម ដែលអាចជាចេតនាញុះញង់ បង្កចលាចល។
ក្រសួងចាត់ទុកទង្វើនេះថា ជាការបំពានទាំងផ្នែកផ្លូវច្បាប់ និងសីលធម៌វិជ្ជាជីវៈ ដែលបានធ្វើឱ្យប៉ះពាល់យ៉ាងធ្ងន់ធ្ងរដល់កិត្តិយស សេចក្តីថ្លៃថ្នូរ និងកិច្ចខិតខំប្រឹងប្រែងរបស់ថ្នាក់ដឹកនាំខ្លួន «ដែលអាចប្រឈមនឹងផ្លូវច្បាប់ ស្របតាមប្បញ្ញត្តិនៃមាត្រា៣០៥ (បទបរិហារកេរ្តិ៍ជាសាធារណៈ) មាត្រា៤៩៤ (ការញុះញង់), មាត្រា៤៩៥ (បទញុះញង់ឱ្យប្រព្រឹត្តបទឧក្រិដ្ឋជាអាទិ៍) មាត្រា៥០២ (បទប្រមាថ) និងមាត្រា៥០៥ (បទញុះញង់ឱ្យប្រព្រឹត្តអំពើប្រឆាំងនឹងអ្នករាជការសាធារណៈ) នៃក្រមព្រហ្មទណ្ឌ»។
ការព្រមានរបស់ក្រសួង ធ្វើឡើងបន្ទាប់ពីលោក ឡេង ណាវ៉ាត្រា ដែលគេស្គាល់ថា ជាមហាសេដ្ឋីអចលនទ្រព្យវ័យក្មេង និងជាបុគ្គលមានទំនាក់ទំនងជិតស្និទ្ធជាមួយគ្រួសារលោក ហ៊ុន សែន បានចេញប្រកាសលើបណ្តាញសង្គមរបស់លោក ពីបញ្ហាប្រឈមនឹងវិបត្តិហិរញ្ញវត្ថុយ៉ាងធ្ងន់ធ្ងរ រហូតឈានដល់ការក្ស័យធន និងបាត់បង់សមត្ថភាពទូទាត់សងប្រាក់ និងសាងសង់ផ្ទះឱ្យអតិថិជនតាមកិច្ចសន្យា។
ក្រោមវិបត្តិនេះ លោក ឡេង ណាវ៉ាត្រា បានប្រកាសស្ម័គ្រចិត្តប្រគល់ទ្រព្យសម្បត្តិ និងគម្រោងអចលនទ្រព្យរបស់ក្រុមហ៊ុន រួមទាំងគម្រោងផ្លូវជាតិលេខ ៦A ជូនរាជរដ្ឋាភិបាល ឬអាជ្ញាធរមានសមត្ថកិច្ច ដើម្បីគ្រប់គ្រង និងចាត់ចែងដោះស្រាយជូនអតិថិជន។
លោកទទួលស្គាល់ថា ក្រុមហ៊ុនពិតជាជួបប្រទះវិបត្តិសាច់ប្រាក់ និងបញ្ហាប្រឈមផ្នែកហិរញ្ញវត្ថុខ្លាំង ធ្វើឱ្យមិនអាចបញ្ចប់ការសាងសង់ ឬទូទាត់ប្រាក់សងអតិថិជនបានតាមការកំណត់។
យ៉ាងណា ក្រសួងរៀបចំដែនដី នគរូបនីយកម្ម និងសំណង់ បានគូសបញ្ជាក់ថា គម្រោងបុរី ឡេង ណាវ៉ាត្រា ផ្លូវជាតិលេខ៦អា និងគម្រោងជ្រៃមួយរយរបស់ក្រុមហ៊ុនហ្គាឡាក់ស៊ី ណាវ៉ាត្រា បានជួបប្រទះវិបត្តិគាំងដំណើរការសាងសង់ និងមិនអាចអនុវត្តតាមកិច្ចសន្យាលក់ទិញជាមួយអតិថិជន និងម្ចាស់ដីជាច្រើនឆ្នាំមកហើយ។
ប៉ុន្តែថា នៅក្នុងកិច្ចប្រជុំ កាលពីថ្ងៃទី២៨ ខែមករា ឆ្នាំ២០២៦ អ្នកឧកញ៉ា ឡេង ណាវ៉ាត្រា បានទទួលស្គាល់ថា ក្រុមហ៊ុនរបស់ខ្លួនពុំមានលទ្ធភាពក្នុងការសាងសង់បញ្ចប់ជូនអតិថិជនទៀតឡើយ ហើយបានយល់ព្រមប្រគល់សិទ្ធិជូនក្រសួងរៀបចំដែនដី ដើម្បីដឹកនាំសម្របសម្រួលដោះស្រាយ ព្រមទាំងឯកភាពលក់ទ្រព្យសម្បត្តិក្រុមហ៊ុន និងទ្រព្យផ្ទាល់ខ្លួន ដើម្បីយកថវិកាមកដោះស្រាយ។
ប៉ុន្តែ ក្រសួងបានសង្កេតឃើញថា មានការចេញមុខបកស្រាយ និងបង្ហោះសារតាមបណ្តាញសង្គមពីសំណាក់គណនីហ្វេសប៊ុកពាក់ព័ន្ធទាំងនោះ គឺធ្វើឱ្យប៉ះពាល់យ៉ាងធ្ងន់ធ្ងរដល់កិត្តិយស សេចក្តីថ្លៃថ្នូរ និងកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីរាជការក្រសួង។ ហើយថា សកម្មភាពទាំងអស់នេះ គឺជាអំពើ បំពានច្បាប់។
ទោះជាបែបនេះក្តី ក្រសួងក៏បានអំពាវនាវដល់អតិថិជនប្រមាណជាង ៣៨០០០ គ្រួសារ នៅទូទាំងប្រទេស បន្តចូលរួមសហការ និងរក្សាភាពស្ងប់ស្ងាត់ ដើម្បីឱ្យក្រុមការងារបន្តនីតិវិធីដោះស្រាយបញ្ហាគម្រោងទាំងនេះឱ្យមានប្រសិទ្ធភាព៕
