តំណាងសហព័ន្ធសហជីពចំនួន ៧ ស្នើរដ្ឋាភិបាលបន្ថែមប្រាក់ឧបត្ថម្ភការធ្វើដំណើរ ឬស្នាក់នៅចំនួន ៨ដុល្លារអាមេរិក លើប្រាក់ឧបត្ថម្ភការធ្វើដំណើរឬស្នាក់នៅដែលមានស្រាប់ ដល់កម្មករនិយោជិត ដើម្បីជួយសម្រាលបន្ទុកជីវភាពជាក់ស្តែង ឆ្លើយតបនឹងការឡើងថ្លៃប្រេងឥន្ធនៈ និងអតិផរណា ព្រមទាំងជួយឱ្យកម្មករនិយោជិតមានលទ្ធភាពទទួលបានមធ្យោបាយធ្វើដំណើរប្រកបដោយសុវត្ថិភាព។
ការស្នើនេះ បានធ្វើឡើងតាមរយៈការដាក់ញត្តិរបស់តំណាងសហព័ន្ធសហជីពចំនួន ៧ នៅក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី១០ ខែកញ្ញា ឆ្នាំ២០២៦នេះ។ សហព័ន្ធសហជីពទាំង ៧នោះ រួមមាន សហព័ន្ធសហជីពអំណាចយុវជនកម្ពុជា សហព័ន្ធសហជីពឯករាជ្យ សហព័ន្ធសហជីពកម្បុជាឯករាជ្យ សហព័ន្ធសហជីពឥទ្ធិពលការងារ សហព័ន្ធសហជីពបេះដូងកម្មករ សហព័ន្ធសហជីពសេរីឯករាជ្យ និងសហព័ន្ធសហជីពកម្មករនិយោជិតវិស័យទេសចរណ៍កម្ពុជា។
ប្រធានសហព័ន្ធសហជីពឯករាជ្យ លោក រី សិទ្ធីណែត បានឱ្យដឹងនៅមុខក្រសួងការងារបន្ទាប់ពីដាក់ញត្តិថា ក្នុងច្បាប់ស្តីពីការងារ ប្រាក់ឧបត្ថម្ភការធ្វើដំណើរ ឬស្នាក់នៅរបស់កម្មករនិយោជិតក្នុងម្នាក់មានចំនួន ៧ដុល្លារ ហើយក្នុងឆ្នាំ២០២៦នេះ ក្រសួងបានបន្ថែមប្រាក់ធ្វើដំណើរបណ្តោះអាសន្នក្នុងកាលៈទេសៈដែលប្រេងឥន្ធនៈឡើងថ្លៃនេះចំនួន ២.៥០ដុល្លារទៀត ប៉ុន្តែចំនួនទឹកប្រាក់នេះ នៅមិនទាន់អាចជួយសម្រាលបន្ទុកកម្មករនិយោជិតបាននៅឡើយទេ ខណៈប្រាក់ឈ្នួលកម្មករក៏នៅទាប ហើយតម្លៃទំនិញលើទីផ្សារ និងប្រេងឥទ្ធនៈឡើងថ្លៃ។
ការណ៍នេះ លោកថា សហព័ន្ធសហជីពចំនួន ៧ បានស្នើដល់រដ្ឋាភិបាល ជាពិសេសក្រសួងការងារដែលជាសេនាធិការ ពិចារណាបន្ថែមប្រាក់ឧបត្ថម្ភថ្លៃធ្វើដំណើរ ឬស្នាក់នៅចំនួន ៨ដុល្លារអាមេរិក បន្ថែមទៀត ទៅលើប្រាក់ឧបត្ថម្ភដែលមានបច្ចុប្បន្ន ៧ដុល្លារនេះ។
លោកថា៖ «ព្រោះអីការចំណាយជាក់ស្តែងរបស់កម្មករនិយោជិត យើងដឹងហើយវាចម្លោះពី ១២ ទៅ ២៥ដុល្លារក្នុងការធ្វើដំណើរម្នាក់ៗ ហើយកន្លងមក ដោយសារតែប្រាក់ធ្វើដំណើរហ្នឹងអត់គ្រប់គ្រាន់ហ្នឹងហើយ កម្មករនិយោជិតជាច្រើនបានប្រើប្រាស់រថយន្តទ្រុងដែលឈរ ឈរពីគេហដ្ឋានរបស់គាត់ ពីផ្ទះរបស់គាត់ មកដល់រោងចក្រ ហើយត្រឡប់មកវិញក៏គាត់ត្រូវឈរដែរ ចឹងការបន្ថែមប្រាក់ឈ្នួលបន្តិចបន្តួចប្រមាណជា ៨ដុល្លារ ពីលើប្រាក់ធ្វើដំណើរនេះ វាអាចជួយឱ្យកម្មករក្នុងការធូរស្រាលបន្តិច ឬក៏អាចឱ្យតាកុងឡាន អាចដកមនុស្សមួយចំនួន ដើម្បីអាចឱ្យកម្មករនិយោជិតអាចអង្គុយបាន»។
អ្នកស្រី ម៉ន ចន្នា ប្រធានសហព័ន្ធសហជីពបេះដូងកម្មករ បានឱ្យដឹងដែរថា ក្រៅពីការស្នើសុំដំឡើងសាហ៊ុយធ្វើដំណើរបន្ថែម ៨ដុល្លារ លើប្រាក់សាហ៊ុយធ្វើដំណើរបច្ចុប្បន្ននេះ ខាងសហព័ន្ធសហជីពទាំង៧ ក៏ស្នើដល់ក្រុមប្រឹក្សាជាតិប្រាក់ឈ្នួលអប្បបរមា បញ្ចូលការចរចាប្រាក់សាហ៊ុយធ្វើដំណើរនេះ បន្ថែមក្នុងរបៀបវារៈនៃការចរចាប្រាក់ឈ្នួលប្រចាំឆ្នាំផងដែរ ព្រមទាំងពិនិត្យលើការផ្តល់ប្រាក់ឧបត្ថម្ភសាហ៊ុយធ្វើដំណើរបណ្តោះអាសន្ន ២.៥០ដុល្លារ ឱ្យកម្មករជាផ្លូវការតែម្តង។
អ្នកស្រីថា៖ «គោលបំណងរបស់យើងនៅថ្ងៃនេះ យើងទាមទារដើម្បីឱ្យកម្មករបានសាហ៊ុយធ្វើដំណើរ គឺបាន១៥ដុល្លារក្នុងមួយខែ ដើម្បីឱ្យកម្មករយើងហ្នឹងបានលុយសាហ៊ុយធ្វើដំណើរ ១៥ដុល្លារហ្នឹង ទៅជួលឡានជិះ ឡានដែលមានកៅអីត្រឹមត្រូវ[…] កម្មករតាមជនបទហ្នឹង គាត់តែងតែក្រោយពីម៉ោង៣[ភ្លឺ]មកហើយ គាត់ធ្វើការ ហើយគាត់ជិះលើឡានហ្នឹងឈររហូត រហូតមកដល់ក្រុមហ៊ុន ហើយបើមានភ្លៀងទៀត ប៉ះពាល់ ទោះជាគ្របកៅស៊ូហើយ ក៏នៅតែប៉ើង គឺពិបាកមែនទែន ហើយធ្វើឱ្យប៉ះពាល់ដល់សុខភាពរបស់គាត់»។
ជាមួយគ្នានេះ ក្រុមសហព័ន្ធសហជីព ក៏បានស្នើដល់ក្រសួងការងារ ដំឡើងប្រាក់ឈ្នួលសមរម្យជូនកម្មករនិយោជិតផងដែរ ដោយសារតែប្រាក់ឈ្នួលបច្ចុប្បន្ន ២១០ដុល្លារ មិនអាចឱ្យកម្មករទ្រទ្រង់ជីវភាពបានទេ។
អំឡុងពេលដាក់ញត្តិនោះ តំណាងក្រសួងការងារ លោក និន វណ្ណៈ បានចេញមកទទួលញត្តិរបស់សហព័ន្ធសហជីពទាំង៧ ដោយប្រាប់ថា នឹងពាំនាំយកញត្តិនេះដាក់ជូនថ្នាក់ដឹកនាំក្រសួង។
លោកថា៖ «ខ្ញុំនៅទីនេះតំណាងឱ្យក្រសួង គឺខ្ញុំនឹងយកអ្វីដែលជាសំណូមពររបស់បងប្អូនជូនថ្នាក់ដឹកនាំ»។
មន្ត្រីអង្កេតជាន់ខ្ពស់នៃសមាគមការពារសិទ្ធិមនុស្សអាដហុក លោក យី សុខសាន្ត មានប្រសាសន៍ថា ក្នុងបរិបទដែលប្រេងឥន្ធនៈ និងទំនិញលើទីផ្សារឡើងថ្លៃ ក្រសួងការងារគួរពិចារណាលើការស្នើសុំរបស់តំណាងសហព័ន្ធសហជីពទាំង៧នេះ ដោយសារកម្មករនិយោជិតជាកម្លាំងស្នូលក្នុងការជួយដល់ដំណើរការរបស់រោងចក្រសហគ្រាស។ លោកថា ប្រសិនបើកម្មករនិយោជិត នៅបន្តជួបការខ្វះខាតក្នុងជីវភាព ហើយបន្តជិះឡានឈរប្រជ្រៀតគ្នាដូចបច្ចុប្បន្ន នឹងអាចធ្វើឱ្យមានប៉ះពាល់ដល់សុខភាពរបស់ពួកគាត់ និងអាចមានគ្រោះថ្នាក់ចរាចរណ៍កើតឡើងដែរ ហើយនៅពេលដែលកម្មករមានបញ្ហាសុខភាព នោះក៏នឹងធ្វើឱ្យប៉ះពាល់ដល់សង្វាក់ផលិតកម្មរបស់រោងចក្រសហគ្រាសដែរ។
លោកថា៖ «ចឹងរាជរដ្ឋាភិបាលមានលទ្ធភាពគួរតែពិចារណាទៅលើការស្នើសុំរបស់ក្រុមសហជីព ព្រោះគាត់យល់ថា ការដែលរដ្ឋកំណត់ប្រាក់គោល ក៏ដូចជាចំណាយទៅលើការស្នាក់នៅ ហើយនិងការសាហ៊ុយធ្វើដំណើរ គឺមិនគ្រប់គ្រាន់ទៅតាមអ្វីដែលគាត់ស្នាក់នៅបច្ចុប្បន្ននោះទេ ចឹងយើងស្នើសុំទទូចជួយដល់សហជីព ក៏ដូចជាកម្មករ ដើម្បីឱ្យគាត់ទទួលបានប្រាក់ ៨ដុល្លារនេះ ដើម្បីបន្ថែមពីការដោះបន្ទុកនៃការដែលធ្វើដំណើរទៅវាប៉ះពាល់»។
ជាមួយគ្នានេះ មន្ត្រីសិទ្ធិមនុស្សរូបនេះ ក៏បានស្នើដល់ក្រសួងការងារ ពិនិត្យនៅតាមរោងចក្រសហគ្រាសផងដែរ ថាតើមានស្នាក់ការពេទ្យ និងពេទ្យប្រចាំការរោងចក្រឬអត់ ព្រោះបើតាមលោកទទួលព័ត៌មានមក មានរោងចក្រសហគ្រាសខ្លះ មានស្នាក់ការពេទ្យប្រចាំរោងចក្រ តែមិនមានពេទ្យនៅប្រចាំការ ដែលធ្វើឱ្យកម្មករត្រូវរត់ទៅរកពេទ្យឯកជនខាងក្រៅនៅពេលដែលមានបញ្ហាសុខភាពម្តងៗ។
របាយការណ៍ អំឡុងខែមករា ឆ្នាំ២០២៦ ក្រសួងការងារ បញ្ជាក់ថា កម្មករនិយោជិតក្នុងវិស័យកាត់ដេរ មានប្រមាណជាង ១លាននាក់ ក្នុងនោះមានស្ត្រីចន្លោះពី ៧៥ ទៅ ៨០ភាគរយ។
ប្រាក់ឈ្នួលអប្បបរមាឆ្នាំ២០២៦ របស់កម្មករនិយោជិត គឺទទួលបាន ២១០ដុល្លារក្នុងមួយខែ។ ក្រៅពីប្រាក់ឈ្នួលគោល កម្មករនិយោជិតក៏ទទួលបានអត្ថប្រយោជន៍បន្ថែមផ្សេងទៀតផងដែរ ដូចជា ប្រាក់ថ្លៃធ្វើដំណើរ និងស្នាក់នៅចំនួន ៧ដុល្លារក្នុងមួយខែ ប្រាក់រង្វាន់ធ្វើការទៀងទាត់ ១០ដុល្លារក្នុងមួយខែ ប្រាក់អតីតភាពការងារ ប្រាក់បាយថ្ងៃត្រង់ និងប្រាក់ថែមម៉ោង អាស្រ័យលើការកំណត់របស់រោងចក្រនិមួយៗ។
យ៉ាងណា បើតាមការសិក្សាអំពីប្រាក់ឈ្នួលរស់នៅសមរម្យរបស់អង្គការសង់ត្រាល់ ដែលតែងតែផ្អែកលើការគណនាស្តង់ដារជីវភាពរស់នៅសមរម្យ និងផ្អែកលើការកើនឡើងនៃតម្លៃទំនិញ ថ្លៃផ្ទះជួល បន្ទុកគ្រួសារ និងអតិផរណា បានលើកឡើងថា ប្រាក់ឈ្នួលគោលដែលកម្មករគួរទទួលបានពិតប្រាកដ ដើម្បីរស់នៅដោយថ្លៃថ្នូរ គឺចន្លោះពី ៣០០ ទៅ ៤៥០ ដុល្លារ ក្នុងមួយខែ៕
