វិបត្តិបុរីរបស់ឧកញ៉ា ឡេង ណាវ៉ាត្រា ឈានដល់ការព្រមានចាត់ការតាមច្បាប់ពីក្រសួងរៀបចំដែនដី នគរូបនីយកម្ម និងសំណង់ ដែលការណ៍នេះ ក្រុមអ្នកតាមដាន បង្ហាញការយល់ឃើញថា មេដឹកនាំបក្សកាន់អំណាច កំពុងបង្វែរការចាប់អារម្មណ៍ក្រោយលាងលុយក្នុងរបរអចលនទ្រព្យនេះ អស់ប្រយោជន៍ មុននឹងឈានទៅចាប់ដាក់គុកដូចករណីឧកញ៉ា ឡេង ចាន់ណា ខណៈអ្នករងគ្រោះពិតប្រាកដ គឺពលរដ្ឋចាញ់បោកក្រុមហ៊ុននេះ ជិត ៤ម៉ឺនគ្រួសារឯណោះទេ។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត យល់ថា វិបត្តិគម្រោងបុរី ឡេង ណាវ៉ាត្រា បានឈានដល់ដំណាក់កាលដែលលោក ឡេង ណាវ៉ាត្រា អាចប្រឈមមុខនឹងផ្លូវច្បាប់ និងការផ្លាស់ប្តូរការគ្រប់គ្រងពីក្រសួងរៀបចំដែនដី ប៉ុន្តែលោកអះអាងថា ការសម្រេចចិត្តចុងក្រោយអាស្រ័យលើថ្នាក់ដឹកនាំជាន់ខ្ពស់ គឹលោក ហ៊ុន សែន និងលោក ហ៊ុន ម៉ាណែត ថា ពួកគេចង់បានបែបណា។ សម្រាប់លោក ការដោះស្រាយបញ្ហានេះ នឹងមិនខុសពីគំរូលោកស្រី ឡេង ចាន់ណា នោះទេ ខណៈអតិថិជនរងគ្រោះជិត ៤ម៉ឺនគ្រួសារ នឹងបានត្រឹមបន្តរង់ចាំ។ លើលពីនេះ លោកមើលឃើញថា ករណីលោក ឡេង ណាវ៉ាត្រា អាចមានជាប់ពាក់ព័ន្ធនឹងការលាងលុយឱ្យអ្នកមានអំណាច តាមរយៈការរកស៊ីអចលនទ្រព្យ។
លោក ម៉ែន ណាត ថ្លែងថា៖ «វាចូលដល់វគ្គមួយដែលគេចង់ធ្វើក លោក ឡេង ណាវ៉ាត្រា ហើយ ភាសាសាមញ្ញគឺធ្វើស៊ី។ អញ្ចឹងលោក ឡេង ណាវ៉ាត្រា ប្រឈមទៅនឹងទោសទណ្ឌ ហើយទោសទណ្ឌនេះ គេរង់ចាំតែភ្លើងខៀវពីមេដឹកនាំកំពូលទេ បើសិនជាលោក ហ៊ុន សែន និងលោក ហ៊ុន ម៉ាណែត សម្រេចចិត្តយ៉ាងណាក្រសួងនឹងចាត់ការតាមហ្នឹង។ យើងមើលទៅរបៀបបើសិនជាដាក់ទណ្ឌកម្មលើលោក ឡេង ណាវ៉ាត្រា គឺលោក ឡេង ណាវ៉ាត្រា ធ្វើដូចអ្នកដទៃមុនៗអ៊ីចឹង ដូចអ្នកស្រី ឡេង ចាន់ណា ដូចអ្នកផ្សេងៗអ៊ីចឹង ថាមិនបាច់ចាំសងអតិថិជនទេ របៀបអ៊ីចឹង គឺរបៀបលេងបួនស្លឹកអ៊ីចឹង»។
ការអះអាងរបស់អ្នកឃ្លាំមើលរូបនេះ បន្ទាប់ពីក្រសួងរៀបចំដែនដីព្រមានប្ដឹងលោក ឡេង ណាវ៉ាត្រា និងបក្ខពួកក្រោមបទចោទថា បានបំភាន់ព័ត៌មាន បំភ្លៃការពិត និងមានចេតនាញុះញង់បង្កចលាចល ដែលប៉ះពាល់ដល់កិត្តិយស និងកិច្ចខិតខំប្រឹងប្រែងរបស់ក្រសួង។
លិខិតក្រសួងរៀបចំដែនដី ចេញផ្សាយនៅថ្ងៃទី១០ ខែកញ្ញា បានចោទប្រកាន់លោក ឡេង ណាវ៉ាត្រា និងប្អូនប្រុស គឺលោក ឡេង និមល និងតារាចម្រៀង កញ្ញា តន់ ចន្ទសីម៉ា ដែលចោទក្រសួងថា បានបង្កកទ្រព្យសម្បត្តិម្ចាស់ក្រុមហ៊ុន ដោយគ្មានតម្លាភាពនោះ អាចប្រឈមនឹងផ្លូវច្បាប់តាមមាត្រា៣០៥ ពីបទ បរិហារកេរ្តិ៍ជាសាធារណៈ មាត្រា៤៩៤ ៤៩៥ ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ និងមាត្រា៥០២ និង ៥០៤ ពីបទប្រមាទអ្នករាជការសាធារណៈជាដើម។
ក្រសួងរៀបចំដែនដី អះអាងថា ដើម្បីដោះស្រាយគម្រោងជាប់គាំងដែលមានអតិថិជនជាង ៣៨០០០គ្រួសារនោះ គឺក្រសួង និងក្រុមហ៊ុនបានព្យាយាមរកដៃគូសមស្រប ដើម្បីលក់ឡាយឡុងនូវអចលនទ្រព្យរបស់ក្រុមហ៊ុន និងរបស់លោក ឡេង ណាវ៉ាត្រា ហើយរាល់ការលក់ សុទ្ធតែមានការឯកភាពពីគ្រប់ភាគីពាក់ព័ន្ធ លើតម្លៃដែលអាចលក់បាន។
តាមលិខិតនោះដដែល ក្រសួងបានចោទថា ក្រុមហ៊ុននេះបានធ្វើឱ្យគម្រោងបានជាប់គាំង និងមិនអាចអនុវត្តតាមកិច្ចសន្យាលក់ទិញជាមួយអតិថិជនជាច្រើនឆ្នាំ បណ្តាលឱ្យមានការតវ៉ាតាមរូបភាពផ្សេងៗមកដល់ក្រសួងរៀបចំដែនដីផង។ យ៉ាងណា ក្រសួងថា ករណីជាប់គាំងនេះមិនខុសពីគម្រោងអភិវឌ្ឍន៍អចលនទ្រព្យក្រុមហ៊ុនផ្សេងទៀតទេ ដែលក្រសួងបានដឹកនាំសម្របសម្រួលក្នុងការដោះស្រាយជូនអតិថិជន ប៉ុន្តែក្រសួងចោទថា ក្រុមហ៊ុនលោក ឡេង ណាវ៉ាត្រា នៅតែមិនអាចផ្តល់ដំណោះស្រាយសមស្រប និងទាន់ពេលវេលា ជូនអតិថិជនបានឡើយ។
លើសពីនេះ ក្រសួងអះអាងថា ក្នុងកិច្ចប្រជុំកាលពីថ្ងៃទី២៨ ខែមករា ឆ្នាំ២០២៦ លោក ឡេង ណាវ៉ាត្រា បានប្រគល់សិទ្ធជូនក្រសួងដឹកនាំសម្របសម្រួលការសាងសង់ផ្ទះ និងចាក់បំពេញដី ជូនអតិថិជនក្នុងគម្រោងបុរី ឡេង ណាវ៉ាត្រា ផ្លូវជាតិលេខ ៦អា និងគម្រោងជ្រែ១០០ ស្ថិតនៅភូមិជ្រែ១០០ និងភូមិអន្លង់ស្លែង ឃុំសំបូរមាស ស្រុកមុខកំពូល ខេត្តកណ្តាល និងបានឯកភាពក្នុងការលក់ឡាយឡុងអចលនទ្រព្យពួកគេ ដោយលោក ឡេង ណាវ៉ាត្រា បានបញ្ជាក់ថា ក្រុមហ៊ុនពុំមានលទ្ធភាពក្នុងការសាងសង់បញ្ចប់ជូនអតិថិជនឡើយ។
គិតត្រឹមថ្ងៃទី៩ ខែកញ្ញា ឆ្នាំ២០២៦ ក្រសួងរៀបចំដែនដី បានអះអាងថា ខ្លួនបានដឹកនាំសម្របសម្រួលការសាងសង់បញ្ចប់ និងបានប្រគល់ផ្ទះជូនអតិថិជន ចំនួន ៥៩៨ផ្ទះ និងចេញវិញ្ញាបនបត្រសម្គាល់ម្ចាស់អចលនវត្ថុជូនអតិថិជនដែលបានបង់ប្រាក់គ្រប់ចំនួន១០០% ចំនួន ៥៩៧០ ប័ណ្ណ ព្រមទាំងបានចាក់បំពេញដីបន្ថែមនៅគម្រោងជ្រែ១០០ សម្រេចបានប្រមាណ ៦០% ថែមទៀត។
ការអះអាងរបស់ក្រសួងបែបនេះ ក្រោយពីលោក ឡេង ណាវ៉ាត្រា កាលពីយប់ថ្ងៃទី៨ ខែកញ្ញា ឆ្នាំ២០២៦ បានបង្ហោះសារគួរឱ្យភ្ញាក់ផ្អើលមួយភ្ជាប់ជាមួយនឹងលិខិតបង្កកទ្រព្យរបស់ក្រសួងរៀបចំដែនដី។ លោកប្រកាសថា លោកអស់លទ្ធភាពបញ្ចប់គម្រោងផ្លូវជាតិ៦អា ហើយ ដោយលោកប្រគល់ទ្រព្យទាំងអស់ឱ្យក្រសួងរៀបចំដែនដីចាត់ចែង និងព្រមទទួលទោសតាមច្បាប់។ យ៉ាងណា លោកអះអាងថា គម្រោងផ្លូវជាតិ ៦អានេះ លោកលក់បានចំណូល ១៨៥លានដុល្លារ ប៉ុន្តែចំណាយអស់ ២២១លានដុល្លារ និងត្រូវការទុនបន្ថែមពី ២០ ទៅ ៣០លានដុល្លារទៀតដើម្បីបញ្ចប់គ្រោង។
ក្នុងសំណេរដ៏វែងបន្លាយនោះ លោកបានទទួលស្គាល់ថា បញ្ហានេះដោយសារគម្រោងយឺតយ៉ាវ និងជំពាក់បំណុល។ ក្រៅពីនេះ លោកព្រមឱ្យក្រសួងចាត់ចែងទ្រព្យសម្បត្តិទាំងអស់របស់លោក មិនថាកង់ម៉ូតូឡានទេ សូម្បីដីផ្នូរម្តាយ ក៏លោកប្រគល់ឱ្យដែរ។ ប៉ុន្តែលោកស្នើសុំតែកុំដាក់ទោសប្រពន្ធលោក ដើម្បីមើលថែកូន ហើយលោកក៏សុំទៅព្រះមហាក្សត្រ ដើម្បីបញ្ចប់គោរមងារឧកញ៉ារបស់ខ្លួន និងសាច់ញាតិទាំង ៥នាក់ថែមទៀត។
វីអូឌី មិនអាចសុំការបំភ្លឺបន្ថែមពីលោក ឡេង ណាវ៉ាត្រា និងសាច់ញាតិបានទេ នៅថ្ងៃទី១០ ខែកញ្ញានេះ។ ចំណែកតំណាងក្រុមហ៊ុនលោក សោម មនោរម្យ បានរុញឱ្យវីអូឌីមើលព័ត៌មានរបស់ក្រសួងរៀបចំដែនដី។
រីឯអ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោក សេង ឡូត ក៏មិនអាចសុំការបំភ្លឺពីចំណាត់ការផ្លូវច្បាប់បន្ថែម គិតត្រឹមម៉ោងផ្សាយនេះ។
ក្រឡេកទៅបុគ្គលិករបស់លោក ឡេង ណាវ៉ាត្រា មួយចំនួន បានចេញសារព្រោងព្រាតគាំទ្រម្ចាស់ក្រុមហ៊ុន ក្រោមហេតុផលថា ក្រុមហ៊ុនចិញ្ចឹមមនុស្សជាង ១ពាន់នាក់ជាដើម។ ក្នុងនោះតារាចម្រៀងឱ្យផលិតកម្មរបស់លោក ឡេង ណាវ៉ាត្រា គឹកញ្ញា តន់ ចន្ទសីម៉ា ហាក់សកម្មការពារលោកយ៉ាងខ្លាំង និងចោទប្រកាន់ក្រសួងរៀបចំដែនដីទៅវិញ។
កញ្ញាសរសេររៀបរាប់ថា ដីតំបន់សេដ្ឋកិច្ចពិសេសនៅខេត្តកំពត ១២៤១ហិកតា ដែលព្រះឥន្ទតូចប្រទានអាជ្ញាប័ណ្ណឱ្យ ដែលកញ្ញាហាក់សម្ដៅទៅលោក ហ៊ុន ម៉ាណែត ត្រូវបានលោក សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី លក់ឡៃឡុងក្នុងតម្លៃ ៣៥០០ដុល្លារក្នុងមួយហិចតា។ កញ្ញាបន្តថា គម្រោង៦អា ដែលចំណូលធំអាចបានពីដីនៅសល់ធ្វើផ្ទះ ចន្លោះពី ២៥០លានដុល្លារ ទៅ ៥០០លានដុល្លារ ក៏ត្រូវលក់ឡៃឡុងបណ្ដើរៗដែរ។ កញ្ញាអះអាងថា ដោយសារតែក្រសួងយកដីទៅលក់ថោកៗដូចនេះ ទើប លោក ឡេង ណាវ៉ាត្រា ត្រូវខកគម្រោង ព្រោះខាតច្រើន។
ចំណែកពលរដ្ឋរងគ្រោះដោយសារក្រុមហ៊ុនបុរីលោក ឡេង ណាវ៉ាត្រា នៅគម្រោងផ្លូវជាតិ៦អា ហាក់មិនចាប់អារម្មណ៍នឹងការកាងការពារពីបុគ្គលិកលោក ឡេង ណាវ៉ាត្រា ទេ។ ពួកគេអះអាងដូចគ្នាថា ខ្លួនត្រូវការតែផ្ទះដែលខ្លួនបានទិញតាំងពីឆ្នាំ២០២១ ខណៈដែលខ្លួនទ្រាំរង់ចាំទាំងលំបាក ហើយអ្នកខ្លះខ្ចីធនាគារ និងបង់សងរាល់ខែ។ យ៉ាងណា ពួកគេហាក់ដាក់ក្ដីសង្ឃឹមលើក្រសួងរៀបចំដែនដីជំនួសវិញ ក្រោយមានការបង្កកទ្រព្យរបស់ម្ចាស់ក្រុមហ៊ុន។
តំណាងពលរដ្ឋម្នាក់ គឺលោក កែ រ៉ាវុធ ទទូចឲ្យក្រសួងរៀបចំដែនដីចាត់ចែងប្រមូលថវិកាដែលបង្កកបាននោះ ឲ្យបានត្រឹមត្រូវ ដើម្បីសង់បញ្ចប់គម្រោងតាមការសន្យា ដោយជៀសវាងបោកប្រាស់ពួកគេដូចក្រុមហ៊ុន ឡេង ណាវ៉ាត្រា នាពេលកន្លងទៅ ហើយកុំបង្ខំឱ្យពួកលោកទទួលយកកិច្ចសន្យាថ្មី ផ្ទុយនឹងកិច្ចសន្យាដើម ដូចជាលុបសំណងកិច្ចសន្យាចាស់ ១ខែ ១០០ដុល្លារ និងធានាគុណភាព ៤ឆ្នាំជាដើម។ យ៉ាងណា លោកព្រមានថា នឹងចេញតវ៉ាមុខក្រសួងរៀបចំដែនដីសាជាថ្មី បើការដោះស្រាយនេះគ្មានតម្លាភាព។
លោក កែ រ៉ាវុធ និយាយថា៖ «ព្រោះអីប៉ុន្មានថ្ងៃមុននេះ លោកឧបនាយករដ្ឋមន្ត្រី សាយ សំអាល់ គាត់បានមានប្រសាសន៍ថា គាត់នឹងប្តេជ្ញាចិត្តសាងសង់នូវគម្រោង ៦អា ឲ្យចប់ជាស្ថាពរ។ អ៊ីចឹងអតិថិជនទាំងអស់កំពុងរង់ចាំមើល តើការសន្យារបស់លោក សាយ សំអាល់ ហ្នឹង គាត់ធ្វើអ្វីដូចជាសារអ្វីដែលគាត់មានប្រសាសន៍អត់? បើសិនជាធ្វើអត់បានទេ អតិថិជនទាំងអស់នឹងក្រោកឈរជាថ្មី និងតវ៉ានៅមុខក្រសួងដែនដី»។
រីឯពលរដ្ឋជាច្រើននាក់ទៀត នៅលើបណ្ដាញសង្គមហ្វេសប៊ុក បានចូលរិះគន់លោក ឡេង ណាវ៉ាត្រា យ៉ាងច្រើនសន្ធឹកសន្ធាប់។ លើសពីនេះ ពួកគេសួរថាតើដីនៅព្រៃប្រសព្វ នៅខេត្តបន្ទាយមានជ័យ ដីផ្ទះនៅខេត្តកំពង់ឆ្នាំងជាដើម នឹងគិតយ៉ាងណា បើខ្លួនបានបង់លុយឱ្យគ្រប់ចំនួន និងសង្ឃឹមថា បានដីនិងផ្ទះរស់នៅ។ ពួកគេចោទថា នេះជាការបោកទំនុកចិត្តប្រជាជនស្លូតត្រង់ ដែលខំជឿជាក់ក្រុមហ៊ុន ឡេង ណាវ៉ាត្រា ហើយបែរជាធ្វើឱ្យអតិថិជនអស់សង្ឃឹម និងហូរទឹកភ្នែកទៅវិញ។ ពួកគេភាគច្រើន អះអាងថា លុយដែលយកទិញផ្ទះនិងដីក្រុមហ៊ុននេះ ជាញើសឈាមរបស់ខ្លួន ហើយខ្លះបានខ្ចីធនាគារមកទិញ និងត្រូវជំពាក់ធនាគារនៅឡើយ។
ជុំវិញករណីនេះ អ្នកនាំពាក្យគណបក្សប្រជាធិបតេយ្យជឿនលឿន លោក ប៉ោ មករា យល់ឃើញថា ការទាមទាររបស់ពលរដ្ឋគឺជាសិទ្ធិស្របច្បាប់ ហើយស្ថាប័នរដ្ឋ និងភាគីពាក់ព័ន្ធមានកាតព្វកិច្ចពិនិត្យ និងដោះស្រាយតាមយន្តការច្បាប់ជាកំហិត។ លោកថា ការដែលពលរដ្ឋហ៊ានលើកឡើងពីបញ្ហា និងស្វែងរកអន្តរាគមន៍ពីក្រសួង-ស្ថាប័នពាក់ព័ន្ធ មិនគួរចាត់ទុកថាជាការដាក់សម្ពាធឡើយ ប៉ុន្តែជាការទាមទារឱ្យមានការទទួលខុសត្រូវ និងដោះស្រាយដោយតម្លាភាព ហើយលោកជំរុញឱ្យមានដំណោះស្រាយពិតប្រាកដ ប្រកបដោយយុត្តិធម៌សម្រាប់ពលរដ្ឋរងគ្រោះ។
លោក ប៉ោ មករា ថ្លែងថា៖ «បញ្ហាទាំងអស់នេះ ខ្ញុំមើលឃើញថា វាបានរុញច្រាននូវគេហៅថា ដំណោះស្រាយប្រកបដោយភាពយុត្តិធម៌ណា បើសិនជាដំណោះស្រាយហ្នឹង ត្រូវបានដោះស្រាយចេញនូវពិតៗ ហើយវាទទួលបានផលទៅដល់ក្រុមប្រជាពលរដ្ឋដែលរងគ្រោះ ជាពិសេសគឺអតិថិជននៃក្រុមហ៊ុន ឡេង ណាវ៉ាត្រា តែម្តងណា»។
ចំណែកអ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ យល់ឃើញដែរថា ការទទួលខុសត្រូវជាបឋម គឺស្ថិតលើម្ចាស់បុរីដែលបានប្រកាសក្ស័យធន និងចូលខ្លួនដោះស្រាយតាមផ្លូវច្បាប់។ ប៉ុន្តែបន្ទាប់ពីលោក ឡេង ណាវ៉ាត្រា បានផ្ទេរទ្រព្យសម្បត្តិ និងបញ្ហាដែលនៅសេសសល់ទៅក្រសួងរៀបចំដែនដីនោះ ការចូលរួមដោះស្រាយ និងទូទាត់ជូនប្រជាពលរដ្ឋ គួរស្ថិតក្រោមការទទួលខុសត្រូវរបស់ក្រសួង។ ប៉ុន្តែលោកចោទជាសំណួរសំខាន់នៅពេលនេះ ថាតើក្រសួងនឹងចាត់វិធានការ និងប្រើប្រាស់ទ្រព្យសម្បត្តិដែលបានផ្ទេរមក ដើម្បីដោះស្រាយបញ្ហាជូនប្រជាពលរដ្ឋដែលរងគ្រោះយ៉ាងដូចម្តេច។ ជាពិសេស តើក្រសួងអាចធានាឱ្យមានការទូទាត់ និងដំណោះស្រាយប្រកបដោយយុត្តិធម៌ និងចប់សព្វគ្រប់ ដូចការរំពឹងទុករបស់ប្រជាពលរដ្ឋបានឬយ៉ាងណា។
លោក សេក សុជាតិ ថ្លែងថា៖ «អញ្ចឹង បើសិនជាក្រសួងសម្រេចយ៉ាងម៉េច គឺអាចទៅផ្លូវហ្នឹងហើយ។ ក៏ប៉ុន្តែប្រជាពលរដ្ឋ គឺត្រូវតែសហការជាមួយនឹងក្រសួងរៀបចំដែនដី នគរូបនីយកម្ម ផ្តល់នូវឯកសារ និងកុងត្រាផ្សេងៗ ក៏ដូចជា របាយការណ៍នៃការទូទាត់អីផ្សេងៗហ្នឹង ជាមួយនឹងក្រសួង ដើម្បីស្វែងរកដំណោះស្រាយ ពីព្រោះក្រុមហ៊ុនអចលនទ្រព្យមួយនេះ បានប្រកាសក្ស័យធនហើយ ដូច្នេះមានតែវិធានការផ្លូវច្បាប់ ដែលកើតចេញពីម្ចាស់ដើមបណ្តឹង ជាពលរដ្ឋ ឬក៏ជាក្រសួងរៀបចំដែនដីហ្នឹង បាទ»។
លោក ឡេង ណាវ៉ាត្រា បានលេចធ្លោខ្លាំងក្នុងវិស័យជំនួញ និងសង្គម ក្រោយព្រមក្រាបសំពះលោក ហ៊ុន សែន ហើយក្រោយមកបានទទួលងារ «ឧកញ៉ា» នៅឆ្នាំ២០១៨ និង «អ្នកឧកញ៉ា» នៅឆ្នាំ២០២១។ លោកមានអាជីវកម្មអចលនទ្រព្យជាច្រើន និងជីវិតដ៏ស៊ីវិល័យ ខណៈសមាជិកគ្រួសាររបស់លោកជាច្រើននាក់ ក៏ទទួលបានងារ «ឧកញ៉ា» ផងដែរ។ ទន្ទឹមនឹងនេះ លោកក៏មានឈ្មោះល្បីខាងបរិច្ចាគថវិកាច្រើនលានដុល្លារដល់រដ្ឋាភិបាល និងស្ថាប័នមនុស្សធម៌។
នៅឆ្នាំ២០២១-២០២២ លោកបរិច្ចាគប្រាក់យ៉ាងហោចណាស់ជិត ១៥លានដុល្លារ ដោយរួមមានប្រគល់ជាសាច់ប្រាក់ផ្ទាល់។ ការរីកចម្រើនក្នុងជំនួញ ជីវិតហ៊ឺហា និងការបរិច្ចាគទ្រង់ទ្រាយធំ បានធ្វើឱ្យលោកក្លាយជាបុគ្គលជំនួញដែលទទួលបានការចាប់អារម្មណ៍ខ្លាំងនៅកម្ពុជា។
ស្របពេលជាមួយគ្នា អ្នករិះគន់មួយចំនួន អះអាងថា ភាពល្បីល្បាញ និងឥទ្ធិពលក្រោមនឹមលោក ហ៊ុន សែន នឹងមិនអាចជំនួសការទទួលខុសត្រូវចំពោះអតិថិជនរងគ្រោះឡើយ ទោះលោកធ្លាប់ប្រើប្រាស់កេរ្តិ៍ឈ្មោះ និងការគាំទ្រពីបុគ្គលមានអំណាច ដើម្បីបង្កើនទំនុកចិត្តរបស់សាធារណជនយ៉ាងណាក្ដី ព្រោះការមិនដោះស្រាយបានធ្វើឱ្យខាតបង់យ៉ាងធ្ងន់ធ្ងរ៕
