អន្តរជាតិ

បន្ទាយការពារអ៊ុយក្រែនកំពុងរងការវាយប្រហារ ខណៈរុស្ស៊ីព្យាយាមដណ្តើមតំបន់ដុនបាសទាំងស្រុង

កញ្ញា រតនៈ ម៉ូនីកា
| ១១ កញ្ញា ២០២៦
ម៉ោង ១៦:២៤

ស្ថានភាពនៅទីក្រុងស្លូពៀនស្ក៍ (Slovyansk) និងក្រាម៉ាតូស្ក៍ (Kramatorsk) មានគ្រោះថ្នាក់ខ្លាំង រហូតដល់នគរបាលអំពាវនាវឲ្យប្រជាជនចាកចេញ។ ទីក្រុងជិតខាងទាំងនេះ គឺជាទីក្រុងធំបំផុតដែលនៅក្រោមការគ្រប់គ្រងរបស់អ៊ុយក្រែននៅតំបន់ដុនបាស។

លោក ប៉ាវឡូ ឌីយ៉ាឆិនកូ (Pavlo Dyachenko) នគរបាលតំបន់ដូណែតស្ក៍ (Donetsk) បាននិយាយថា ការជម្លៀសគ្រួសារដែលមានកុមារបានចាប់ផ្តើមហើយ «នេះជាវិធីតែមួយគត់ដើម្បីសង្គ្រោះជីវិត»។ លោកបន្ថែមថា ទីក្រុងស្លូពៀនស្ក៍ ធ្លាប់រងការវាយប្រហារដោយគ្រាប់បែករំលេច (glide bombs) មួយសប្តាហ៍ម្តង ប៉ុន្តែឥឡូវស្ទើរតែរាល់ថ្ងៃ។

ទីក្រុងស្លូពៀនស្ក៍, ក្រាម៉ាតូស្ក៍ និងកូស្ត្យានទីនីវកា (Kostyantynivka) គឺជាផ្នែកនៃ «ខ្សែក្រវ៉ាត់បន្ទាយ» ការពារជាតិរបស់អ៊ុយក្រែន។ ទោះជាយ៉ាងណា វត្តមានទាហានអ៊ុយក្រែននៅកូស្ត្យានទីនីវកា មានកម្រិត ខណៈរុស្ស៊ីអះអាងថាបានគ្រប់គ្រងទីក្រុងនេះទាំងស្រុង។

ការដណ្តើមយកតំបន់ដុនបាស ទាំងស្រុង គឺជាគោលដៅចម្បងរបស់រុស្ស៊ី។ កងទ័ពរុស្ស៊ីគ្រប់គ្រងស្ទើរតែទាំងស្រុងនៃតំបន់លូហានស្ក៍ (Luhansk) និងប្រហែល ៨០% នៃតំបន់ដូណែតស្ក៍។

អស់រយៈពេលប៉ុន្មានខែមកនេះ តំបន់ជុំវិញក្រាម៉ាតូស្ក៍ និងស្លូពៀនស្ក៍ ជាគោលដៅវាយប្រហារតាមជើងគោករបស់រុស្ស៊ី។ ការដណ្តើមយកទីក្រុងទាំងពីរ នឹងជួយឲ្យរុស្ស៊ីងាយស្រួលបន្តទៅទិសខាងលិច។

លោក វីកទ័រ ម៉ាគូរីន (Viktor Makurin) អ្នកស្ម័គ្រចិត្ត បាននិយាយថា ទីក្រុងទាំងពីររងការវាយប្រហារយ៉ាងខ្លាំងពីដ្រូន និងគ្រាប់បែក ហើយផ្លូវសំខាន់ៗត្រូវគ្របដោយសំណាញ់ការពារដ្រូន។ លោកប្រាប់ BBC ថា «ការបើកបរជុំវិញទីក្រុង គឺមានគ្រោះថ្នាក់ដល់ជីវិត ព្រោះមានដ្រូន FPV ពួនស្ទាក់នៅលើផ្លូវ»។

គ្រាប់បែករំលេចមានទម្ងន់ពី ២៥០គីឡូក្រាម ដល់ ១.៥០០គីឡូក្រាម ហើយលោក ឌីយ៉ាឆិនកូ បញ្ជាក់ថា «ការបំផ្លិចបំផ្លាញរបស់វា គឺធ្ងន់ធ្ងរខ្លាំងណាស់»។ បច្ចុប្បន្ន ក្រាម៉ាតូស្ក៍ គឺជាទីស្នាក់ការកណ្តាលនៃរដ្ឋបាលតំបន់ដូណែតស្ក៍ ជំនួសឱ្យទីក្រុងដូណែតស្ក៍ ដែលត្រូវបានបំបែកខ្លួនគ្រប់គ្រងតាំងពីឆ្នាំ ២០១៤។

តាមទិន្នន័យនគរបាល ជនស៊ីវិលរងរបួសបានកើនឡើងពី ៧០នាក់ ក្នុងខែមិថុនា និងដល់ ២១២នាក់ ក្នុងខែសីហា ហើយគ្រាប់បែករំលេចបានកើនដល់ ១០៩គ្រាប់ក្នុងខែកក្កដា។ កាលពីថ្ងៃទី២៥ ខែសីហា គ្រាប់បែករំលេច ៩ គ្រាប់ បានតម្រង់ទៅក្រាម៉ាតូស្ក៍ ដោយ ៧គ្រាប់ ប៉ះចំអគារស្នាក់នៅ បណ្តាលឱ្យមនុស្ស ២៤នាក់ រងរបួស។

ជោគវាសនានៃតំបន់ដុនបាស គឺជាប្រធានបទក្តៅ ក្នុងជំនួបរវាងប្រធានាធិបតីអ៊ុយក្រែន វ៉ូឡូឌីមៀ ហ្សេលេនស្គី (Volodymyr Zelensky) និងប្រតិភូអាមេរិក ស្ទីវ វីតកូហ្វ (Steve Witkoff) និង ចារ៉េដ គូស្ហណ័រ (Jared Kushner)។

លោក ហ្សេលេនស្គី បានបដិសេធមិនដកទ័ពទេ ដោយលោកលើកឡើងថា លោក ពូទីន (Putin) បានទុកពេលឲ្យឧត្តមសេនីយ៍របស់ខ្លួនរហូតដល់ដាច់ឆ្នាំ ដើម្បីកាន់កាប់ដុនបាសទាំងស្រុង។ លោក ហ្សេលេនស្គី បានបង្កើតក្រុមការងារថ្មីចំនួនពីរ ដឹកនាំដោយឧត្តមសេនីយ៍ អង់ឌ្រី ប៊ីឡេតស្គី (Andriy Biletsky) និង ដេនីស ប្រូកូពិនកូ (Denys Prokopenko)។ ឧត្តមសេនីយ៍អ៊ុយក្រែនម្នាក់ បាននិយាយថា «សមរភូមិចម្បងនៃឆ្នាំនេះ និងឆ្នាំខាងមុខ កំពុងតែកើតឡើងនៅទីនេះ»៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។