តួលេខ ៣៨ ០០០គ្រួសារ ដែលក្រសួងរៀបចំដែនដីអះអាងថា បានរងគ្រោះដោយសារក្រុមហ៊ុនអចលនទ្រព្យឧកញ៉ា ឡេង ណាវ៉ាត្រា ក្លាយជាចំណុចប្រទាញប្រទង់ ខណៈអ្នកជំនួញវ័យក្មេងដែលស្និទ្ធនឹងក្រុមគ្រួសារលោក ហ៊ុន សែន រូបនេះបន្តប្រើបណ្ដាញសង្គមចោទក្រសួងនេះថា បង្ហាញតួលេខគ្មានភាពច្បាស់លាស់ និងបង្កការយល់ច្រឡំដល់សាធារណជន។
លោក ឡេង ណាវ៉ាត្រា បង្ហោះសារទាំងយប់ជិតរំលងអាធ្រាត្រកាលពីថ្ងៃទី១៣ ខែកញ្ញា និងបានកែតម្រូវឡើងវិញ នៅម៉ោង៣ជាងទៀបភ្លឺថ្ងៃទី១៤ ខែកញ្ញា ដោយបញ្ជាក់ថា ខ្លួនបានបន្តផ្ទៀងផ្ទាត់ទិន្នន័យជាមួយក្រសួងរៀបចំដែនដី ដើម្បីបំភ្លឺការភ័ន្តច្រឡំជុំវិញចំនួនអតិថិជន។ លោកបដិសេធចំនួនពលរដ្ឋរងគ្រោះដល់ ៣៨ ០០០គ្រួសារ ដែលក្រសួងរៀបចំដែនដីបានអះអាង។
លោក ឡេង ណាវ៉ាត្រា អះអាងថា តួលេខនេះមិនពិតទេ ហើយក្រុមហ៊ុនក៏កំពុងរងបន្ទុកបំណុលរាប់សិបលានដុល្លារ ដោយសារអតិថិជនមួយចំនួន មិនគោរពកិច្ចសន្យាបង់ប្រាក់។ យ៉ាងណា លោកទទួលស្គាល់ថា ក្រសួងបានជួយសម្របសម្រួល និងពន្លឿនការបំបែកប័ណ្ណ និងផ្ទេរកម្មសិទ្ធិជូនអតិថិជនដោយមិនគិតថ្លៃ។
ក្រៅពីចោទក្រសួងបង្ហាញតួលេខមិនពិត ម្ចាស់ក្រុមហ៊ុនរូបនេះ អះអាងថា ខ្លួនមានអតិថិជនក្នុងដៃសរុប ៣២,២៦០ប័ណ្ណ ឬប្លង់។ ក្នុងនោះ លោកថា បានបញ្ចប់គម្រោងដី និងប្រគល់ជូនអតិថិជនចំនួន ១៥,៣៣៥ប័ណ្ណរួចហើយ ខណៈមានអតិថិជនបង់រំលស់ និងនៅសល់បំណុលមាន ១៦,៩២៥ប្លង់ ដែលភាគច្រើនខកខានបង់ប្រាក់រយៈពេលចន្លោះពី ១ឆ្នាំ ដល់៤ឆ្នាំ ដែលលោកហៅថា ជាបំណុលសរុបប្រមាណ ៦១លានដុល្លារ។
លោក ឡេង ណាវ៉ាត្រា ក៏បញ្ជាក់ថា ប្លង់ដីទាំងនេះ មានឯកសារគ្រប់គ្រាន់ និងកំពុងរក្សាទុកនៅក្រុមហ៊ុន និងក្រសួង ដើម្បីរង់ចាំអតិថិជនមកដោះស្រាយបំណុល។ យ៉ាងណា លោកព្រមានថា បើអតិថិជនមិនអាចទាក់ទងបាន ឬមិនបន្តបង់ប្រាក់នោះ ក្រុមហ៊ុនលោកនឹងប្រគល់ករណីទាំងនោះទៅក្រសួង ដើម្បីសម្របសម្រួលដោះស្រាយ។ ជាចុងក្រោយ លោកថា នៅសល់ដីត្រូវការបំបែកមានត្រឹម ១,៩០៧ឡូត៍ប៉ុណ្ណោះ។
នេះជាការឆ្លើយតបរបស់លោក ឡេង ណាវ៉ាត្រា តបនឹងលិខិតក្រសួងរៀបចំដែនដី កាលពីថ្ងៃទី៩ ខែកញ្ញា ដែលចោទថា ក្រុមហ៊ុននេះ នៅជាប់គាំងអតិថិជនជាង ៣៨ ០០០គ្រួសារ ដោយមិនទាន់អាចផ្តល់ដំណោះស្រាយសមស្រប និងទាន់ពេលវេលា។ ចំណែកក្រសួងរៀបចំដែនដី ក៏ព្រមានប្ដឹងលោក ឡេង ណាវ៉ាត្រា និងបក្ខពួក ក្រោមបទចោទបំភាន់ព័ត៌មាន បំភ្លៃការពិត និងមានចេតនាញុះញង់បង្កចលាចល ដែលប៉ះពាល់ដល់កិត្តិយស និងកិច្ចខិតខំប្រឹងប្រែងរបស់ក្រសួង។
វីអូឌី មិនអាចសុំការឆ្លើយពីអ្នកនាំពាក្យក្រសួងរៀបចំដែនដី លោក សេង ឡូត និងតំណាងក្រុមហ៊ុនបុរី ឡេង ណាវ៉ាត្រា លោក សុំ មនោរម្យ ពន្យល់បន្ថែមបានទេ នៅថ្ងៃទី១៤ ខែកញ្ញា។
ជុំវិញករណីនេះ អ្នកនាំពាក្យគណបក្សប្រជាធិបតេយ្យជឿនលឿន លោក ប៉ោ មករា យល់ថា ការចោទប្រកាន់សាចទឹកដាក់គ្នានេះ មិនមានជាដំណោះស្រាយទេ។ លោកថា ក្រុមហ៊ុន ឡេង ណាវ៉ាត្រា ត្រូវមានកាតព្វកិច្ចតាមកិច្ចសន្យា ហើយបើមិនបានបំពេញជូនអតិថិជន គឺក្រុមហ៊ុនគួរមានដំណោះស្រាយ និងទទួលខុសត្រូវចំពោះការខាតបង់របស់ពលរដ្ឋ។ លោកក៏ជំរុញឱ្យភាគីពាក់ព័ន្ធកុំបន្តអូសបន្លាយដែលនាំឱ្យពលរដ្ឋត្រូវចំណាយកាន់តែច្រើន ទាំងថ្លៃផ្ទះ ឬដីជួល និងការធ្វើដំណើរ ដើម្បីដោះស្រាយ ខណៈអ្នកខ្លះអាចជំពាក់ធនាគារជាដើម។
យ៉ាងណា លោកចង់ឃើញការផ្តល់អាទិភាពសម្របសម្រួលរវាងក្រសួង និងក្រុមហ៊ុនមុនឈានទៅតុលាការ ព្រោះនីតិវិធីអាចចំណាយពេលយូរ និងធ្វើឱ្យពលរដ្ឋខាតបង់បន្ថែម។ លោកសង្កត់ធ្ងន់ថា ស្ថានភាពសេដ្ឋកិច្ចបច្ចុប្បន្នអាចធ្វើឱ្យការរកដៃគូថ្មី ដើម្បីបន្តសាងសង់មានការលំបាក ដែលធ្វើឱ្យការរំពឹងរបស់ពលរដ្ឋអាចបន្តយូរថែមទៀត ដូច្នេះការឈ្លោះប្រកែកគ្នាអំពីចំនួនអ្នករងគ្រោះ គួរតែជៀសវាង ព្រោះវាអាចធ្វើឱ្យការដោះស្រាយកាន់តែយឺតយ៉ាវ។
លោក ប៉ោ មករា ថ្លែងថា៖ «បើយើងនិយាយអំពីចំនួននៃ អ្នកដែលមានបញ្ហាជាមួយនឹងក្រុមហ៊ុន ឡេង ណាវ៉ាត្រា ហ្នឹង ខ្ញុំគិតថា ទោះបីជាចំនួននោះស្ថិតនៅក្នុងកម្រិតណាក៏ដោយ ទោះបីជា ១ម៉ឺននាក់ ១ម៉ឺននាក់ ១ពាន់នាក់ ៤០០-៥00នាក់ក៏ដោយ ប៉ុន្តែអ្វីដែលជាការខកខាននៅក្រុមហ៊ុន ឬក៏ហៅថាក្រុមហ៊ុនអត់បានបំពេញកាតព្វកិច្ចខ្លួនឯង ទៅតាមអ្វីដែលជាកិច្ចសន្យានោះ ក្រុមហ៊ុនត្រូវតែដោះស្រាយបញ្ហាហ្នឹង សម្រាបអតិថិជនហ្នឹងណា ពិសេសគឺពលរដ្ឋដែលគាត់កំពុងតែជួបបញ្ហាលំបាក ពាក់ព័ន្ធទៅនឹងការខកខាននៃការកសាង ឬក៏ថាការប្រគល់ផ្ទះជូនពួកគាត់ណា»។
ចំណែក អ្នកតាមដានភូមិសាស្ត្រនយោបាយ លោក សេង វណ្ណលី យល់ថា លោក ឡេង ណាវ៉ាត្រា មិនគួរផ្ដោតលើការខឹងសម្បារ ឬបដិសេធតួលេខអតិថិជនរងផលប៉ះពាល់ចំនួន ៣៨ ០០០ គ្រួសារនោះទេ ប៉ុន្តែត្រូវបង្ហាញបញ្ជីអតិថិជន និងចំនួនផ្ទះដែលបានប្រគល់រួចឱ្យបានច្បាស់លាស់។ ទន្ទឹមនឹងនេះ លោកជំរុញឱ្យក្រសួងក៏ត្រូវបញ្ជាក់ឱ្យច្បាស់ពីចំនួនពលរដ្ឋរងផលប៉ះពាល់ពិតប្រាកដ និងឆ្លើយតបថា ហេតុអ្វីបានជាទុកឱ្យបញ្ហាអូសបន្លាយជាច្រើនឆ្នាំ មុនមានចំណាត់ការ។
អ្នកឃ្លាំមើលរូបនេះ គូសបញ្ជាក់ថា អ្វីដែលសំខាន់បំផុត គឺការធានាថាពលរដ្ឋដែលបានបាត់បង់ប្រាក់នឹងទទួលបានផ្ទះ ដី និងសំណងសមរម្យ ដោយមិនបន្តរុញដាក់គ្នានៅលើបណ្ដាញសង្គមឡើយ។
លោក សេង វណ្ណលី ថ្លែងថា៖ «ខ្ញុំគិតថា ការបដិសេធតួលេខ មិនអាចលុបការទទួលខុសត្រូវចំពោះអតិថិជន ដែលនឹងរង់ចាំផ្ទះ និងដីរបស់ពួកគាត់បានទេ។ ដូចគ្នានោះដែរ រដ្ឋាភិបាលក៏ត្រូវឆ្លើយថា ហេតុអ្វីបញ្ហានេះ ត្រូវបានទុកឲ្យអូសបន្លាយជាច្រើនឆ្នាំ មុននឹងមានចំណាត់ការខ្លាំងនាពេលថ្មីៗនេះ។ ជាចុងក្រោយអ្វីដែលសំខាន់ មិនមែនថា តើអ្នកណាឈ្នះការជជែកនោះទេ ប៉ុន្តែគឺពលរដ្ឋដែលបានបាត់បង់លុយ ត្រូវទទួលបានផ្ទះ ដី និងសំណងសមរម្យនៅពេលណា»។
គម្រោងក្រុមហ៊ុនបុរី ឡេង ណាវ៉ាត្រា ផ្លូវជាតិលេខ ៦អា និងជ្រែ១០០ បានយឺតយ៉ាវប្រមាណ ៥ឆ្នាំហើយ ពោលគឺតាំងឆ្នាំ២០២១ បន្ទាប់ពីម្ចាស់ក្រុមហ៊ុនប្រមូលលុយសុទ្ធជាង ១៥លានដុល្លារ បរិច្ចាគដល់រដ្ឋាភិបាល និងកាកបាទក្រហមជាដើម។ ចំណែកពលរដ្ឋបានតវ៉ាជារឿយៗ ទាំងបិទផ្លូវនៅមុខបុរីតែនៅគ្មានដំណោះស្រាយ រហូតពួកគេឡើងតវ៉ាដល់ក្រសួងរៀបចំដែនដី។ កាលពីចុងឆ្នាំ២០២៥ ក្រសួងបានចូលសម្របសម្រួល។ យ៉ាងណា គម្រោងបន្តពន្យារពេល៥-៦លើករួចហើយ ទោះក្រសួងចេញអន្តរាគមន៍។ រហូតកាលពីថ្ងៃទី៨ ខែកញ្ញា ឆ្នាំ២០២៦ លោក ឡេង ណាវ៉ាត្រា បានប្រកាសក្ស័យធន និងប្រគល់ទៅក្រសួងរៀបចំដែនដីចាត់ចែងទាំងស្រុង។
ចំណែកពលរដ្ឋធ្លាប់អះអាងប្រាប់វីអូឌី ដោយទទូចឲ្យក្រសួងរៀបចំដែនដីចាត់ចែងប្រមូលថវិកាដែលបង្កកបាននោះឲ្យបានត្រឹមត្រូវ ដើម្បីសង់បញ្ចប់គម្រោងតាមការសន្យា ដោយជៀសវាងបោកប្រាស់ពួកគេ ដូចក្រុមហ៊ុន ឡេង ណាវ៉ាត្រា នាពេលកន្លងទៅ ហើយកុំបង្ខំឱ្យពួកលោកទទួលយកកិច្ចសន្យាថ្មី ផ្ទុយនឹងកិច្ចសន្យាដើម ដូចជាលុបសំណងកិច្ចសន្យាចាស់ ១ខែ ១០០ដុល្លារ និងធានាគុណភាព ៤ឆ្នាំជាដើម។ យ៉ាងណា ពលរដ្ឋព្រមានថា នឹងចេញតវ៉ាមុខក្រសួងរៀបចំដែនដីសារជាថ្មី បើការដោះស្រាយនេះគ្មានតម្លាភាព៕
