ថៃបានពង្រីកការឈ្លានពានជីកដីកម្ពុជារាលដាលដល់តំបន់ជាំស្រងាំ ក្នុងខេត្តឧត្តរមានជ័យ ខណៈរដ្ឋាភិបាលលោក ហ៊ុន ម៉ាណែត មិនទាន់រុញសំណុំរឿងព្រំដែនទៅតុលាការអន្តរជាតិ ដើម្បីបង្ខំថៃដកកងទ័ពចេញពីទីកដីកម្ពុជាចំនួន ៧៦ទីតាំងនៅឡើយ។
តំណាងរាស្រ្តមកពីគណបក្យប្រឆាំង គឺលោក អ៊ុំ សំអាន ឱ្យដឹងនៅថ្ងៃទី១៤ខែកញ្ញានេះថា ថៃបានជីកប្រឡាយ រាយបន្លាលួស និងឈូសឆាយ នៅតំបន់ជាំស្រងាំ ក្នុងខេត្តឧត្តរមានជ័យ កាលពីថ្ងៃទី១៣ ខែកញ្ញា ឆ្នាំ២០២៦ ហើយថា ព័ត៌មាននេះពិត ១០០%។
លោកគូសបញ្ជាក់ថា ការចែករំលែករបស់លោក ជុំវិញបញ្ហានេះ ដើម្បីឱ្យប្រជាពលរដ្ឋខ្មែរដឹងថា ថៃកំពុងឈ្លានពានទឹកដីខ្មែរតាមចិត្ត ហើយគ្មានវិធានការទប់ស្កាត់ពីរដ្ឋាភិបាលលោក ហ៊ុន ម៉ាណែត ។
លោកថា៖ «នៅពេលដែលលោក ហ៊ុន ម៉ាណែត មិនប្រើសិទ្ធិស្វ័យការពារហើយ មិនព្រមប្តឹងថៃទៅកាន់តុលាការយុត្តិធម៌អន្តរជាតិ ICJ មិនប្តឹងថៃទៅកាន់សហប្រធាននៃកិច្ចព្រមព្រៀងសន្តិភាពទីក្រុងប៉ារីសឆ្នាំ៩១ មិនប្តឹងថៃទៅកាន់តុលាការព្រហ្មទណ្ឌអន្តរជាតិ ICC ដូច្នេះទឹកដីខ្មែរយើងជិត ៧៦ ទីតាំង នឹងបាត់បង់ជាអចិន្ត្រៃយ៍ ហើយថៃនឹងបន្តឈ្លានពានយកទឹកដីខ្មែរយើងបន្ថែមទៀត នៅពេលដែលលោក ហ៊ុន ម៉ាណែត មិនព្រមប្រើសិទ្ធិស្វ័យការពារ»។
វីអូឌី មិនអាចសុំការឆ្លើយតបជុំវិញការលើកឡើងនេះ ពីអ្នកនាំពាក្យរដ្ឋាភិបាល លោក ប៉ែន បូណា បានទេ គិតត្រឹមម៉ោងផ្សាយនេះ។
មួយវិញទៀត ក្នុងការធ្វើបច្ចុប្បន្នភាពពីបញ្ហាព្រំដែន នៅថ្ងៃទី១៤ខែកញ្ញានេះ ក៏អ្នកនាំពាក្យរូបនេះ មិនបាននិយាយច្រើនពីសកម្មភាពគណៈកម្មការផ្សះផ្សានៃអនុសញ្ញាអង្គការសហប្រជាជាតិស្តីពីនីតិសមុទ្រ(UNCLOS) បានបើកកិច្ចប្រជុំលើកដំបូងរវាងកម្ពុជានិងថៃ នៅថ្ងៃទី១៤ ខែកញ្ញា ឆ្នាំ២០២៦នេះ នៅក្នុងប្រទេសសិង្ហបុរី ដែលមានវត្តមានពីតំណាងពីកម្ពុជា និងថៃចូលរួមនោះដែរ។
លោកថា៖ «ក្នុងនាមជាប្រទេសស្រឡាញ់សន្តិភាព និងគោរពច្បាប់អន្តរជាតិ កម្ពុជាសង្ឃឹមជឿជាក់យ៉ាងមុតមាំថា ច្បាប់អន្តរជាតិ គឺជាមូលដ្ឋានគ្រឹះសម្រាប់ការដោះស្រាយជម្លោះរវាងរដ្ឋនិងរដ្ឋ ដោយសន្តិវិធី និងនៅតែមានតម្លៃមិនអាចខ្វះបាន»។
ទោះជាយ៉ាងក្តី អ្នកនាំពាក្យរូបនេះ ធ្លាប់អះអាងថា កម្ពុជាមិនទទួលស្គាល់ដាច់ខាត ចំពោះការពង្រីកទឹកដីណាមួយពីភាគីថៃ តាមរយៈឯកតោភាគី ឬដោយកងកម្លាំងប្រដាប់អាវុធ បំពានលើច្បាប់អន្តរជាតិ និងកិច្ចព្រមព្រៀងដែលមានស្រាប់។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ហៅការបណ្តោយឱ្យថៃឈ្លានពានយកដីខ្មែរតាមចិត្តចាប់តាំងពីមានបទឈប់បាញ់មក ហាក់ឆ្លុះបញ្ចាំងថា រដ្ឋាភិបាលលោក ហ៊ុន ម៉ាណែត បានបោះបង់ចោលសិទ្ធិការពារខ្លួន ព្រមទាំងច្បាប់អន្តរជាតិ ដែលលោកហៅថាជារដ្ឋាភិបាលគ្មានការទទួលខុសត្រូវចំពោះជាតិសាសន៍ខ្មែរ។
លោកថា៖ «ស្ថានការណ៍បច្ចុប្បន្ន បើរដ្ឋាភិបាលកម្ពុជានៅតែមិនប្តឹងថៃ នៅតែមិនមានកម្រិតការទូតខ្លាំងក្លា នៅតែមិនប្រើសិទ្ធិការពារខ្លួន អាហ្នឹងយើងអត់មានមធ្យោបាយអីទៅទប់ស្កាត់ថៃឈ្លានពានបានទេ»។
ក្រសួងការបរទេសកម្ពុជា កាលពីថ្ងៃទី៨ ខែកញ្ញា ឆ្នាំ២០២៦ បានចេញលិខិតតវ៉ាផ្លូវការជាថ្មីទៀត ទៅកាន់ភាគីថៃ ប្រឆាំងតវ៉ាយ៉ាងខ្លាំងក្លាចំពោះការបន្តរំលោភបំពានលើអធិបតេយ្យភាព និងបូរណភាពទឹកដីកម្ពុជា នៅតាមតំបន់ព្រំដែន។
តាមលិខិតតវ៉ានោះ កម្ពុជាចាត់ទុកសកម្មភាពឯកតោភាគីរបស់ថៃទាំងនេះ ត្រូវបានចាត់ទុកថាជាការរំលោភបំពានយ៉ាងធ្ងន់ធ្ងរលើច្បាប់អន្តរជាតិ ធម្មនុញ្ញសហប្រជាជាតិ និងការប្តេជ្ញាចិត្តទ្វេភាគីនាពេលកន្លងមក។
ក្រោយហេតុផលនេះ កម្ពុជាឱ្យថៃបញ្ឈប់រាល់សកម្មភាព រំលោភបំពានទាំងអស់ជាបន្ទាន់ ដើម្បីរក្សាទំនុកចិត្ត និងទំនាក់ទំនងអ្នកជិតខាងល្អ។ ប៉ុន្តែជាការកត់សម្គាល់ ថៃដែលជាភាគីឈ្លានពានមិនដែលស្តាប់ការអំពាវនាវរបស់កម្ពុជាម្តងណាទេ ទោះភាគីទាំងពីរបានចុះកិច្ចព្រមព្រៀងបទឈប់បាញ់ចំនួនពីរលើក អំឡុងខែកក្កដា និងខែធ្នូ ឆ្នាំ២០២៥ ពោលគឺជាង១ឆ្នាំមកនេះក្តី៕
