សភាតំណាងរាស្ត្រអាមេរិក កាលពីថ្ងៃទី១៥ខែកញ្ញា បានអនុម័តសេចក្តីព្រាងច្បាប់ស្តីពីពន្ធគយ និងទណ្ឌកម្មយ៉ាងទូលំទូលាយមួយ ដើម្បីបង្កើនសម្ពាធសេដ្ឋកិច្ចលើប្រទេសរុស្ស៊ី ជុំវិញការឈ្លានពានលើអ៊ុយក្រែន ហើយបានបញ្ជូនវាទៅប្រធានាធិបតី ដូណាល់ ត្រាំ ដើម្បីចុះហត្ថលេខាឱ្យក្លាយជាច្បាប់។
សេចក្តីព្រាងច្បាប់នេះ មានឈ្មោះថា «ច្បាប់ស្តីពីទណ្ឌកម្មលើរុស្ស៊ី និងអ៊ីរ៉ង់ របស់លោក Lindsey O. Graham ឆ្នាំ ២០២៦» ត្រូវបានអនុម័តក្នុងសំឡេង ២៦២ ទល់នឹង ១៥៩ ដោយមានការគាំទ្រពីសមាជិកបក្សប្រជាធិបតេយ្យចំនួន ៥៨ រូប រួមជាមួយសមាជិកបក្សសាធារណរដ្ឋស្ទើរតែទាំងអស់។
ច្បាប់នេះតម្រង់ទិសដៅលើឧស្សាហកម្មថាមពល និងការពារជាតិរបស់រុស្ស៊ី ក៏ដូចជា «កងនាវាស្រមោល» នៃនាវាដឹកប្រេងដែលគេចវេះពីទណ្ឌកម្ម ដើម្បីកាត់ផ្តាច់ថវិការបស់ក្រុងម៉ូស្គូសម្រាប់សង្គ្រាម។ វាក៏ផ្តល់អំណាចឱ្យលោក ត្រាំ ក្នុងការដំឡើងពន្ធរហូតដល់ ១០០% លើប្រទេសចិន ឥណ្ឌា និងប្រទេសផ្សេងទៀត ដើម្បីកាត់បន្ថយការពឹងផ្អែករបស់ពួកគេលើប្រេង និងឧស្ម័នរុស្ស៊ី ព្រមទាំងពង្រីកទណ្ឌកម្មលើអ៊ីរ៉ង់ផងដែរ។
ទោះជាយ៉ាងណា សេចក្តីព្រាងច្បាប់នេះ បានប្រឈមមុខនឹងការប្រឆាំងពីសមាជិកបក្សប្រជាធិបតេយ្យមួយចំនួន ដែលព្រួយបារម្ភថា វាផ្តល់អំណាចពន្ធគយច្រើនពេកដល់លោក ត្រាំ លើប្រទេសជាសម្ព័ន្ធមិត្ត និងបើកផ្លូវឱ្យមានការលើកលែងទណ្ឌកម្មដោយងាយស្រួល។ រីឯសមាជិកបក្សសាធារណរដ្ឋខ្លះទៀត បារម្ភពីផលប៉ះពាល់នៃការដំឡើងពន្ធលើអ្នកប្រើប្រាស់អាមេរិក មុនការបោះឆ្នោតពាក់កណ្តាលអាណត្តិ។
ទោះជាយ៉ាងណាក៏ដោយ អ្នកគាំទ្របានគូសបញ្ជាក់ថា ការអនុម័តច្បាប់នេះ គឺជាសារដ៏សំខាន់ផ្ញើទៅកាន់ក្រុងម៉ូស្គូ និងពិភពលោកថា សហរដ្ឋអាមេរិកនៅតែបន្តឈរឈ្មោះគាំទ្រអ៊ុយក្រែនយ៉ាងរឹងមាំ ដើម្បីបង្ខំឱ្យរុស្ស៊ីចូលតុចរចា៕
