ប្រជាជនរុស្ស៊ីកំពុងឆ្ពោះទៅកាន់ការបោះឆ្នោតជ្រើសរើសរដ្ឋឌូម៉ា (State Duma) ថ្មី នៅក្នុងការបោះឆ្នោតដែលត្រូវបានគ្រប់គ្រងយ៉ាងតឹងរ៉ឹង ខ្វះការប្រកួតប្រជែង និងស្ទើរតែគ្មានការសង្ស័យចំពោះលទ្ធផលឡើយ។
គណបក្សរុស្ស៊ីរួបរូម (United Russia) របស់លោក វ៉្លាឌីមៀរ ពូទីន ត្រូវបានគេរំពឹងថានឹងពង្រីកការក្ដាប់អំណាចលើសភា ជាមួយគណបក្សប្រឆាំងក្នុងប្រព័ន្ធ។ ការបោះឆ្នោតរយៈពេល ៣ ថ្ងៃនេះ ចាប់ផ្តើមនៅថ្ងៃសុក្រ ដោយលទ្ធផលនឹងចេញនៅថ្ងៃអាទិត្យ។
ការបោះឆ្នោតសភាឌូម៉ាលើកដំបូង ចាប់តាំងពីការឈ្លានពានអ៊ុយក្រែនទ្រង់ទ្រាយធំក្នុងឆ្នាំ២០២២មក កំពុងប្រព្រឹត្តទៅក្នុងបរិបទនៃសង្គ្រាម ដែលកំពុងជ្រៀតជ្រែកកាន់តែខ្លាំងចូលទៅក្នុងជីវិតប្រជាជនរុស្ស៊ី ខណៈការវាយប្រហារដោយដ្រូនរបស់អ៊ុយក្រែន បង្ហាញពីក្តីបារម្ភកើនឡើង។
វិមានក្រឹមឡាំង បានរឹតបន្តឹងអំណាចកាន់តែខ្លាំង ដោយបានហាមឃាត់គណបក្ស យ៉ាប្រូកូ (Yabloko) ដែលជាគណបក្សប្រឆាំងសង្គ្រាម មិនឱ្យចូលរួមឡើយ។ កត្តានេះបន្សល់ទុកត្រឹមតែ «គណបក្សប្រឆាំងក្នុងប្រព័ន្ធ» (systemic opposition) ដែលត្រូវបានអនុញ្ញាតឱ្យរិះគន់អាជ្ញាធរតែលើផ្ទៃខាងក្រៅ ប៉ុន្តែតែងតែយល់ស្របតាមគណបក្សកាន់អំណាចលើបញ្ហាសំខាន់ៗ។
ការឃោសនានយោបាយនាពេលនេះ មានភាពស្ងប់ស្ងាត់ខ្លាំង។ លោកស្រី ហ្វារីដា រូស្តាម៉ូវ៉ា (Farida Rustamova) អ្នកវិភាគនយោបាយ បានកត់សម្គាល់ថា បេក្ខជនជាច្រើនចៀសវាងការនិយាយអំពីបញ្ហារសើប ហើយគ្មានគណបក្សណាមួយហ៊ានលើកឡើងអំពីសង្គ្រាមឡើយ។
ប្រភពជិតស្និទ្ធនឹងវិមានក្រឹមឡាំង បាននិយាយថា អាជ្ញាធររក្សាការបោះឆ្នោតឱ្យស្ងប់ស្ងាត់ ដើម្បីកាត់បន្ថយចំនួនអ្នកបោះឆ្នោតមិនពេញចិត្ត។
ជាមួយគ្នានេះ លោក វ៉្លាឌីមៀរ ហ្គេលម៉ាន់ (Vladimir Gelman) សាស្ត្រាចារ្យនៅសាកលវិទ្យាល័យ Helsinki បានបន្ថែមថា គោលបំណងនៃការបោះឆ្នោត គឺដើម្បីផ្តល់ឱ្យវិមានក្រឹមឡាំងនូវប្រភពនៃភាពស្របច្បាប់ និងបង្កើតរូបភាពថាមានការយល់ព្រមពីសាធារណជន។
នៅក្នុងសារតាមទូរទស្សន៍ លោក ពូទីន បានផ្សារភ្ជាប់ការចូលរួមបោះឆ្នោតទៅនឹងសង្គ្រាមនៅអ៊ុយក្រែន ដោយបង្ហាញថា វាជាការបង្ហាញពីឯកភាពជាតិ។ លោក ពូទីន ខ្លួនឯងទទួលបានអាណត្តិ ៦ ឆ្នាំម្តងទៀតកាលពីឆ្នាំ២០២៤ ដែលពន្យារពេលការគ្រប់គ្រងអំណាចរបស់លោក យ៉ាងហោចណាស់រហូតដល់ឆ្នាំ ២០៣០។
ទោះជាយ៉ាងណា សារៈសំខាន់នៃការបោះឆ្នោតសម្រាប់ប្រជាជនរុស្ស៊ី គឺស្ថិតនៅលើអ្វីដែលនឹងកើតឡើងបន្ទាប់ពីនេះ។ ដោយសារកងទ័ពរុស្ស៊ីសម្រេចបានផលតិចតួច ព័ត៌មានលេចឮអំពីការកែនទ័ពទ្រង់ទ្រាយធំមួយផ្សេងទៀតបានរីករាលដាល និងជំរុញឱ្យបុរសវ័យក្មេងមួយចំនួនចាកចេញពីប្រទេស។
ទោះបីជាលោក ពូទីន បានបដិសេធថាគ្មានផែនការកែនទ័ពថ្មីក៏ដោយ ការធានានេះមិនគ្រប់គ្រាន់សម្រាប់បុរសមួយចំនួនឡើយ ដោយពួកគេជ្រើសរើសចាកចេញពីប្រទេសជាបណ្តោះអាសន្ន ដើម្បីរង់ចាំមើលថាតើមានអ្វីផ្លាស់ប្តូរបន្ទាប់ពីការបោះឆ្នោត៕
