យោធិន១៨នាក់ ដែលអះអាងថា នៅកងវិស្វកម្មបញ្ជាការដ្ឋានស្ថាបនាស្ពាន៧១៥ មានទីតាំងជាប់ស្ពានចោមចៅក្នុងរាជធានីភ្នំពេញ អំពាវនាវរករដ្ឋាភិបាលជួយផ្តល់យុត្តិធម៍ ដោយសំអាងថា ពួកគេត្រូវបានមេបញ្ជាការបណ្តេញចេញពីក្របខ័ណ្ឌ ទាំងមិនប្រាប់ពីមូលហេតុ ក្រោយបម្រើជាតិជាង១០ឆ្នាំ។
ពួកគេថា៖ «ការងារនេះ ទើបដូរមេកងថ្មី អញ្ចឹងពួកខ្ញុំអត់ដឹងថា ខ្ញុំខុសមូលហេតុអី រឿងមួយអីទេនៅបញ្ជាការដ្ឋានកងស្ថាបនាស្ពាន៧១៥នៅជាប់ស្ពានចោមចៅ ហើយអ្នកណាដែលគាត់ប្រកាសថាបញ្ឈប់លុបចេញពីក្របខ័ណ្ឌ។ មេបញ្ជាការរងកងស្ថាបនាស្ពាន៧១៥ គាត់ឈ្មោះ លុយ ដារិន»។
នេះបើយោងតាមវីដេអូមានរយៈពេលជាង៣នាទី ដែលគេបានចែកចាយលើបណ្តាញសង្គម នាថ្ងៃទី២១ខែកញ្ញា ឆ្នាំ២០២៦។
យោធិនទាំងនោះ បាននិយាយថា ពួកគេបានបម្រើជាតិ ចាប់ពីចន្លោះជាង១០ទៅ២០ឆ្នាំហើយ តែត្រូវគេបញ្ឈប់មេបញ្ជាការរងអង្គភាព ហៅទៅប្រាប់កាលពីថ្ងៃទី១៤ខែកញ្ញាថា ពួកគេត្រូវបានបណ្តេញចេញពីក្របខណ្ឌ ទាំងគ្មានបញ្ជាក់ពីមូលហេតុ ឬលិខិតផ្លូវការ ខណៈពួកគេនៅសល់ប្រមាណ ១ ឆ្នាំទៀត នឹងដល់ពេលចូលនិវត្តន៍។
លោកថា៖ «ខ្ញុំអត់ចង់បានអីក្រៅពីអ្វីដែលពួកខ្ញុំខំតស៊ូតាំងពីឆ្នាំ២០១១មកដល់សព្វថ្ងៃ លក្ខណៈ ១៦ឆ្នាំ ១៥ឆ្នាំ ២០ឆ្នាំ ១១ឆ្នាំ យើងតស៊ូតាំងពីហ្នឹងមកដល់រយៈពេលនេះ ឥឡូវដល់គាត់បញ្ឈប់ខ្ញុំ ពួកខ្ញុំក៏មានឈ្មោះអាត្រែតដែរ ប៉ុន្តែអាត្រែតក្នុងរយៈពេល ១ឆ្នាំទៀត ទើបដល់ពួកខ្ញុំអាត្រែត។ ឥឡូវគាត់បញ្ឈប់អត់មានមូលហេតុ គឺអត់មានអីទាំងអស់។ អញ្ចឹងខ្ញុំសុំឲ្យក្រសួងដែលពាក់ព័ន្ធការងារខាងដោះស្រាយទាហាននេះ ជួយដោះស្រាយឲ្យពួកខ្ញុំផង»។
ការណ៍នេះ ពួកគេអំពាវនាវឱ្យក្រសួងពាក់ព័ន្ធ និងរដ្ឋាភិបាលជួយផ្តល់យុត្តិធម៌ ដោយបារម្ភថា ពួកគេនឹងបាត់បង់ប្រាក់ចូលនិវត្តន៍ និងអត្ថប្រយោជន៍ផ្សេងទៀត បើពួកគេត្រូវបានបណ្តេញចេញទាំងគ្មានកំហុសដូចការបញ្ជាក់ពីប្រភពខាងលើ។
វីអូឌី មិនអាចស្វែងរកការពន្យល់បន្ថែមពីយោធិនទាំង១៨នាក់ បានទេ គិតត្រឹមម៉ោងផ្សាយនេះ ខណៈមេបញ្ជាការរងដែលរងការចោទ និងអ្នកនាំពាក្យក្រសួងការពារជាតិ អ្នកស្រី ម៉ាលី សុជាតា មិនអាចទាក់ទងបាន។
យ៉ាងណា ហ្វេសប៊ុកឈ្មោះ ធីដាលក់គ្រឿងក្រអូប ដែលអះអាងថា ជាគ្រួសារកងទ័ពខាងលើ អំពាវនាវរកមេដឹកនាំជួយទប់ស្កាត់វិធាននេះ ដើម្បីកុំឱ្យការតស៊ូដើម្បីបុព្វជាតិរបស់ពួកគេខ្លះរហូត២០ឆ្នាំ បែរជាមកទទួលរងនូវភាពអយុត្តិធម៌បែបនេះ។
ប្រភពនោះ និយាយក្នុងសម្តីដើមថា៖ «ពួកគាត់ខំប្រឹងតស៊ូណាស់ដើម្បីជាតិ ចេញធ្វើការងារក្នុងព្រៃជ្រៅចាកចេញឆ្ងាយពីគ្រួសារប្រពន្ធកូន មកនៅតំបន់ដែលគ្មានសេវាទូរស័ព្ទ ធ្វើផ្លូវថ្នល់ ធ្វើស្ពាន ដាំបង្គាលព្រំដែន ហាលក្តៅហាលខ្យល់ភ្លៀងព្យុះ ដាច់បាយដាច់ទឹក ធ្វើការទាំងឈឺមានរបួស ឈឺគ្រុនចាញ់ និងជួបឧបសគ្គជាច្រើនៗទៀត[…] តែពួកគាត់ក៏នៅតែទ្រាំមិនចុះចាញ់ទេ ដើម្បីប្រទេសជាតិ។ ហេតុអ្វីមកទទួលរងនៅភាពអយុត្តិធម៌បែបនេះ តើអំពើល្អដែលកន្លងមកពួកគាត់បានបម្រើជាតិ តើថ្នាក់លើមានមើលឃើញពួកគាត់ដែរឬទេ?»។
ជុំវិញរឿងនេះ តំណាងរាស្ត្រពីបក្សប្រឆាំង លោក អ៊ុំ សំអាន និយាយថា ការបញ្ឈប់ ឬបណ្តេញកងកម្លាំងមានតែថ្នាក់ក្រសួងប៉ុណ្ណោះ ដែលអាចធ្វើបាន ដែលការណ៍នេះ លោកជំរុញឱ្យក្រសួងការពារជាតិ ចេញបំភ្លឺជូនសាធារណជន ដើម្បីកុំឱ្យវិធាននេះ ក្លាយជាការបំបាក់ទឹកចិត្តកងទ័ពផ្សេងទៀត ដែលកំពុងប្រឈមមុខនឹងទង្វើថៃឈ្លានពាន បាក់ទឹកចិត្ត។
លោកថា៖ «យ៉ាងហោចក៏ត្រូវប្រាប់ផ្ទាល់មកដែរ មិនហ៊ានប្រាប់ជាសាធារណៈ ឬក៏ជាលិខិតអី ថា អ្នកឯងខុសអីៗអញ្ចឹងទៅ អាហ្នឹងគេអាចទទួលយកបាន។ ប្រសិនជាអត់ មិនប្រាប់ពីមូលហេតុ អាហ្នឹងវាធ្វើឱ្យគាត់មានការតវ៉ាអញ្ចឹងឯង ហើយវាប៉ះពាល់ទៅដល់ទឹកចិត្តទាហានដែលនៅជួរមុខ ដែលកំពុងប្រឈមមុខជាមួយទាហានថៃ ដែលកំពុងឈ្លានពានទឹកដីខ្មែរយើងអញ្ចឹងណា៎»។
តាមសេចក្តីរាយការណ៍នានា កងឯកភាពស្ថាបនាថ្នល់-ស្ពានលេខ ៧១៥ ឬហៅកាត់ថា កងឯកភាពលេខ ៧១៥ គឺជាអង្គភាពវិស្វកម្មដ៏សំខាន់មួយ ស្ថិតក្រោមការគ្រប់គ្រងរបស់បញ្ជាការដ្ឋានវិស្វកម្មនៃអគ្គបញ្ជាការដ្ឋាននៃកងយោធពលខេមរភូមិន្ទ។
កងកម្លាំងវិស្វកម្មមួយនេះ មានតួនាទីយ៉ាងសកម្មក្នុងការកសាងហេដ្ឋារចនាសម្ព័ន្ធផ្លូវថ្នល់ និងស្ពានយុទ្ធសាស្ត្រនានា ជាពិសេសគឺការស្ថាបនាផ្លូវក្រវាត់ព្រំដែន ដើម្បីការពារបូរណភាពទឹកដី និងបង្កលក្ខណៈងាយស្រួលដល់ការធ្វើដំណើររបស់ប្រជាពលរដ្ឋ និងកងទ័ព៕
