Social Issues, ព័ត៌មានជាតិ, សង្គម

ការធ្លាក់ចុះភ្ញៀវកំពុងគំរាមកំហែងជីវភាពពលរដ្ឋនៅប៉ូលសេដ្ឋកិច្ចតំបន់អង្គរ

រតនា ស្រីភាព
| ២១ កញ្ញា ២០២៦
ម៉ោង ២៣:១០

រូបថត៖ បណ្តាញសង្គម

ការធ្លាក់ចុះភ្ញៀវទេសចរអន្តរជាតិ នារដូវកាលនេះ ត្រូវបានអ្នកប្រកបមុខរបរផ្ទាល់នៅតំបន់ប៉ូលសេដ្ឋកិច្ចខេត្តសៀមរាប តំបន់អង្គរ បញ្ជាក់មកថា ជីវភាពពួកគេកំពុងរងការគំរាមកំហែងយ៉ាងខ្លាំង ដោយសារតែប្រាក់ចំណូលធ្លាក់ចុះយ៉ាងគំហុក ស្របពេលដែលវិបត្តិបំណុលកំពុងរួមរឹតនៅឡើយ។

វិបត្តិទាំងនេះ ជំរុញឱ្យមានការគិតពីភាពមិនច្បាស់លាស់មួយ ចោទសួរខ្លួនឯងថា តើជោគវាសនារបស់ពួកគេ ទៅជាយ៉ាងណា ប្រសិនបើវិបត្តិនេះ នៅតែបន្លាយពេល?។

ម៉ោង១០ ព្រឹក ក្រោមថ្ងៃរះក្តៅហែងមុខប្រាសាទអង្គរវត្ត ទីកន្លែងដែលធ្លាប់តែអ៊ូអរដោយសំឡេងជើងដើរ សំឡេងយានយន្ត និងស្នាមញញឹមរបស់ភ្ញៀវទេសចររាប់លាននាក់ ពេលនេះបែរជាស្ងាត់ខុសសព្វមួយដង។

បុរសសម្បុរខ្មៅស្រអែមវ័យ ៤០ ឆ្នាំផ្លាយ ជាអ្នករត់កង់បី កំពុងដេកអង្រឹងលើរម៉ក់កង់បីរបស់គាត់ ដែលចតនៅខាងមុខអង្គរវត្ត ក្នុងដៃកាន់ស្មាតហ្វូន ខណៈកង់បីរបស់គាត់ត្រូវចតចោលគ្មានអ្នកជួលតាំងពីព្រឹកព្រលឹមមកម្ល៉េះ។

ភាពស្រងូតស្រងាត់ និងការខ្សត់ភ្ញៀវយ៉ាងគំហុកនារដូវកាលនេះ មិនត្រឹមតែធ្វើឱ្យកង់បីរបស់គាត់ គ្មានអ្នកជួលនោះទេ ប៉ុន្តែរុញច្រានអ្នករកស៊ីតូចតាចដូចរូបគាត់ គ្មានជម្រើសក្រៅពីផ្អាក ឬបោះបង់ចោលមុខរបរ ដែលជាឆ្នាំងបាយចិញ្ចឹមគ្រួសារប្រចាំជីវិតជាច្រើនឆ្នាំនោះឡើយ។

ក្រោមសម្ពាធបំណុលនិងធ្លាក់ចុះចំណូលប្រចាំថ្ងៃ ឧបករណ៍រកស៊ីធ្លាប់តែរកប្រាក់ចិញ្ចឹមគ្រួសារ ពេលនេះត្រូវទុកចោល ដោយពួកគាត់ខ្លះ ប្តូរមកធ្វើជាកម្មករសំណង់ ដើម្បីដោះទាល់ការហូបចុក និងសងធនាគារ។

អ្នករត់កង់បី នៅតំបន់អង្គរ លោក ស៊ីង ដា ឱ្យដឹងនៅថ្ងៃទី២១ ខែកញ្ញាថា លោកបង្ខំចិត្តផ្អាករត់កង់បីដោយសារខ្សត់ភ្ញៀវ និងថយចុះប្រាក់ចំណូលច្រើន ហើយពេលនេះលោកមកធ្វើកិច្ចការជួយគ្រួសារនៅផ្ទះ។

លោកថា កន្លងទៅពួកលោករកប្រាក់ចំណូលបានចន្លោះពី ៥ម៉ឺនរៀល ដល់ ៧ម៉ឺនរៀលក្នុងមួយថ្ងៃ តែបច្ចុប្បន្នរកប្រាក់សូម្បីតែ ២ម៉ឺនរៀលក៏លំបាក។ លោកបន្ថែមថា សម្ពាធនេះធ្វើឱ្យអ្នករត់កង់បីជាច្រើនបង្ខំចិត្ត ប្តូរមុខរបរមកធ្វើជាកម្មករសំណង់ និងធ្វើការងារផ្សេងៗជំនួស។

លោក ស៊ីង ដា និយាយថា៖ «តែពេលឥឡូវនេះ យើងសឹងតែរក ៣ម៉ឺន ២ម៉ឺន លំបាកមែនទែនបង ហើយមួយចំនួនទៀតឥឡូវ គឺគាត់ឈប់រត់ ហើយគាត់រត់ទៅធ្វើការខ្លះ ធ្វើសំណង់ខ្លះ ហើយដូចខ្ញុំពីមុនធ្លាប់រត់បាន ឥឡូវឈប់រត់ហើយ»។

មិនត្រឹមតែអ្នករត់កង់បីប៉ុណ្ណោះទេប្រឈម ថយចំណូល លោក ស្រ៊ី មុនដេ និងអ្នកស្រី ទិត ស៊ីធួន ដែលជាអ្នកថតរូបប្រចាំខាងមុខប្រាសាទអង្គរវត្ត ក៏លំបាកដែរ ដោយមានថ្ងៃខ្លះ ពួកគាត់រកប្រាក់មិនបានសូម្បីតែ ១ ម៉ឺនរៀល (១០.០០០រៀល)ផង។

អ្នកស្រី ទិត ស៊ីធួន ដែលមានទីលំនៅក្នុងតំបន់រុនតាឯក រៀបរាប់ថា ស្ទើររាល់ថ្ងៃអ្នកស្រីតែងតែងើបពីព្រលឹមរៀបចំកាមេរ៉ា ឈរចាំហៅភ្ញៀវថតរូបខាងមុខអង្គរជាប្រចាំ។ ក៏ប៉ុន្តែស្ថានភាពនាបច្ចុប្បន្ននេះ បែរជាផ្លាស់ប្តូរទាំងស្រុង ដោយសារភ្ញៀវទេសចរភាគច្រើនចាយវាយយ៉ាងត្បិតត្បៀត មិនសូវចំណាយលើសេវាកម្មថតរូបនោះឡើយ ហើយម្យ៉ាងទៀតខ្សត់ភ្ញៀវស្រាប់ផង។

អ្នកស្រី ទិត ស៊ីធួន និយាយថា៖ «មុខរបរប៉ុណ្ណឹង រស់តែប៉ុណ្ណឹងដែរ ស្រឡាញ់ក៏ស្រឡាញ់ ហើយការងារត្រូវរកវាទៅប៉ុណ្ណឹងដែរ។ មិនសូវរកបាននឹងគេទេ បានតិចតួច ជួនកាលអត់ ជួនកាលបានពីរបីម៉ឺន»។

អ្នកថតរូបម្នាក់ទៀត លោក ស្រ៊ី មុនដេ សង្កេតឃើញថា មួយរយៈនេះ ភ្ញៀវទេសចរបរទេសថយចុះច្រើន ក៏ប៉ុន្តែសម្បូរភ្ញៀវទេសចរជាតិ ក្នុងថ្ងៃបុណ្យទាន និងថ្ងៃសម្រាកចុងសប្ដាហ៍។ លោកថា បច្ចុប្បន្នក្រុមជាងថតនៅតំបន់អង្គរ រកចំណូលបានតិចតួច ដោយថ្ងៃខ្លះរកប្រាក់បាន ២ម៉ឺនរៀល ដល់ ៥ម៉ឺនរៀល ក្នុងមួយថ្ងៃ តែនៅពេលខ្សត់ភ្ញៀវ ថ្ងៃខ្លះរកប្រាក់មិនបានសោះ។

លោក ស៊្រី មុនដេ និយាយថា៖ «ភ្ញៀវទេសចរមកដល់លេង ក៏គាត់អត់សូវចំណាយលុយច្រើន ហើយខ្ញុំរកមួយថ្ងៃបានមួយថ្ងៃ ជួនកាលអត់មួយអាទិត្យក៏មានដែរ។ ខ្ញុំរកដល់ផ្គត់ផ្គង់គ្រួសារមិនសូវគ្រប់ ហើយនិងបង់ធនាគារផង ក៏ខ្វះខាត»។

បើក្រឡេកមើលអ្នកផ្តល់សេវាកម្មទេសចរណ៍នៅក្នុងក្រុងវិញ តាមភោជនីយដ្ឋាន ផ្ទះសំណាក់ សណ្ឋាគារ ហាងម៉ាស្សា និងកន្លែងផ្តល់សេវាកម្មផ្សេងៗទៀត ក៏កំពុងជួបប្រទះភាពស្ងាត់គ្មានភ្ញៀវដូចគ្នា។ ហាងលក់ដូរខ្លះផ្អាកដំណើរការ ហាងខ្លះបិទទ្វារបណ្ដោះអាសន្ន ហាងខ្លះកាត់បន្ថយបុគ្គលិក។

អ្នកគ្រប់គ្រងហាងម៉ាហ្សាមួយកន្លែង ក្នុងក្រុងសៀមរាប ស្នើសុំហៅឈ្មោះក្រៅថា លោក ជុំ សានី ប្រាប់ថា ហាងរបស់លោកខែនេះខ្សត់ភ្ញៀវខ្លាំង ដោយថ្ងៃខ្លះគ្មានភ្ញៀវសូម្បីតែម្នាក់។ លោកថា តម្លៃជួលហាងក្នុងមួយខែ ៥៥០ដុល្លារ បូករួមថ្លៃបុគ្គលិក និងចំណាយទឹកភ្លើងសរុបជាង ១ ពាន់ដុល្លារ ក៏ប៉ុន្តែក្នុងខែនេះ គិតត្រឹមថ្ងៃទី១៩ ខែកញ្ញា ហាងរបស់លោករកចំណូលបានតែ ២០០ដុល្លារស្ដើងតែប៉ុណ្ណោះ។

លោកថា ហាងរបស់លោកកំពុងប្រឈមបិទទ្វារ ដោយមិនអាចរកចំណូលទប់ថ្លៃជួល និងបុគ្គលិក។ រីឯ ហាងផ្សេងៗក្នុងក្រុងសៀមរាប ក៏មានស្ថានភាពស្រដៀងគ្នាដែរ។

លោក ជុំ សានី និយាយថា៖ «មកដល់ក្នុងខែនេះ គឺយើងស្ងាត់ភ្ញៀវតែម្តង គឺអត់មាន ពេលខ្លះថ្ងៃខ្លះរកមិនបាន លក់មិនបានមួយម្នាក់ផង ជួនកាលពីរបីថ្ងៃជាប់លក់អត់ដាច់»។

រដ្ឋមន្ត្រីក្រសួងទេសចរណ៍ លោក ហួត ហាក់ ថ្លែងថា កម្ពុជាត្រូវតែបង្កើតផលិតផលទេសចរណ៍ថ្មី កែលម្អ និងពង្រឹងគុណភាពសេវាកម្មទេសចរណ៍ បង្កើនភាពទាក់ទាញ ពង្រឹងសន្តិសុខសុវត្ថិភាពដល់ភ្ញៀវទេសចរ ដើម្បីឆ្លើយតបតម្រូវការភ្ញៀវទេសចរជំនាន់ថ្មី និងដើរឱ្យទាន់យុគសម័យប្រកួតប្រជែង ក្នុងគោលដៅទេសចរណ៍សំខាន់ក្នុងតំបន់ ហើយឈ្នះលើសកលលោក។

លោកថ្លែងបែបនេះ ក្នុងពិធីផ្សព្វផ្សាយ «ផែនការអភិវឌ្ឍន៍ទេសចរណ៍ខេត្តសៀមរាប ឆ្នាំ២០២៦-២០៣០» កាលពីថ្ងៃទី១៧ ខែកញ្ញា ថ្មីៗនេះ។

លោក ហួត ហាក់ ថ្លែងថា៖ «វិស័យទេសចរណ៍របស់យើង បានទទួលកេរដំណែលអស្ចារ្យ អច្ឆរិយពីបុព្វបុរសរបស់កម្ពុជាយើង។ ធ្វើឱ្យកម្ពុជាយើងខុសពីប្រទេសដទៃគឺបេតិកភណ្ឌ»។

អភិបាលរងខេត្តសៀមរាប លោក ង៉ូវ សេងកាក់ ថ្លែងក្នុងពិធីនោះដែរថា ផែនការអភិវឌ្ឍទេសចរណ៍ខេត្តសៀមរាប ជាភារកិច្ចរបស់មន្ត្រីរាជការ ពលរដ្ឋ វិស័យឯកជន និងគ្រប់ភាគីពាក់ព័ន្ធ ត្រូវតែសហការរួមគ្នាធ្វើ។ លោកបន្តថា កិច្ចការអនុវត្តផែនការនេះ ត្រូវតាមដានពិនិត្យនិងវាយតម្លៃ ហើយបើមានបញ្ហាប្រឈម ត្រូវតែដោះស្រាយឱ្យលឿន។

ជុំវិញបញ្ហានេះ ប្រធានសមាគមមគ្គុទ្ទេសក៍អង្គរ លោក ខៀវ ធី មើលឃើញថា បញ្ហា Scam online ជាបញ្ហាប្រឈមមួយផ្នែក ធ្វើឱ្យភ្ញៀវទេសចរថយចុះនៅតំបន់អង្គរ ដែលជាកត្តារួមផ្សំសំខាន់ ធ្វើឱ្យភ្ញៀវទេសចរបរទេស ងាយនឹងទទួលព័ត៌មានមិនច្បាស់លាស់ពីកម្ពុជា។

លោកថា បញ្ហាគ្មានជើងហោះហើរផ្ទាល់ពីប្រទេសផ្សេងៗមកកម្ពុជា ក៏ជាបញ្ហាមួយដែលធ្វើឱ្យភ្ញៀវទេសចរបរទេសអល់អែក មកលេងកម្ពុជាដែរ។

លោក ខៀវ ធី ថ្លែងថា៖ «សង្គ្រាមដែលយើងចាប់ផ្ដើមមាននូវសង្គ្រាម រវាងខ្មែរ-សៀម ព្រំដែននៃសៀម ចេះតែគក្លើនចង់បានទឹកដីហួសប្រមាណពីប្រទេសកម្ពុជា ដែលធ្វើឲ្យរាំងស្ទះដល់ភ្ញៀវទេសចរដែរ ដោយសារតែភ្ញៀវទេសចរកើតបារម្ភខ្លាចក្រែងសុវត្ថិភាពហ្នឹងឯង»។

ប្រធានអង្គការប្រជាធិបតេយ្យខ្មែរក្នុងប្រទេសអូស្ត្រាលី លោក ស៊ឹង សែនករុណា មើលឃើញថា មេដឹកនាំកម្ពុជាបច្ចុប្បន្ន បានបំផ្លាញប្រព័ន្ធប្រជាធិបតេយ្យ ធ្វើឱ្យពលរដ្ឋនៅប្រទេសជឿនលឿន មិនចង់ទៅលេងកម្ពុជា បូករួមការឆបោកអនឡាញ និងការចាប់ជំរិត។ លោកថា ទោះបីជាកម្ពុជាមានទេសភាពស្អាត និងប្រាសាទបុរាណល្អឥតខ្ចោះយ៉ាងណាក៏ដោយ ក៏ភ្ញៀវទេសចរបរទេសខ្លះនៅតែភ័យខ្លាចមកលេងកម្ពុជា ដោយសារស្ថានភាពកម្ពុជានៅតែរំលោភសិទ្ធិមនុស្ស រំលាយគណបក្សសង្គ្រោះជាតិ ដើរប្រាស់ចាកគោលការណ៍លទ្ធិប្រជាធិបតេយ្យ។

លោក ស៊ឹង សែនករុណា ថ្លែងថា៖ «បងប្អូនត្រូវដឹងច្បាស់ថា អ្នកដែលធ្វើឲ្យបងប្អូនប៉ះពាល់ជីវភាព មិនមែនជាបទេសទេ មិនមែនជាគណបក្សនយោបាយប្រឆាំង ឬក៏អ្នករិះគន់សង្គមអីនោះទេ គឺការដឹកនាំរបស់គណបក្សកាន់អំណាចបច្ចុប្បន្នហ្នឹងតែម្តង ដែលដឹកនាំធ្វើឲ្យប៉ះពាល់ដល់ជីវភាពបងប្អូន ឲ្យរងការទុក្ខទោស រងការលំបាក អត់ការងារធ្វើ អត់មុខរបរ អត់ចំណូលអីចឹង។ មេដឹកនាំនយោបាយហ្នឹងតែម្តង ដែលមិនព្រមស្តាប់ គោរពសិទ្ធិមនុស្ស ប្រជាធិបតេយ្យ ហើយនិងយុត្តិធម៌សង្គម»។

របាយការណ៍គ្រឹះស្ថានអង្គរ បង្ហាញថា រយៈពេល ៥ ខែដំបូង គឺចាប់ពីខែមករា ដល់ខែឧសភា ឆ្នាំ២០២៦ មានភ្ញៀវទេសចរអន្តរជាតិជាង ៣ សែននាក់ ( ៣៥៩,៤៧១នាក់) ធ្លាក់ចុះ ៣១.៨% បើធៀបនឹងរយៈពេលដូចគ្នាកាលពីឆ្នាំមុន។ រីឯចំណូលពីការលក់សំបុត្រទទួលបានជាង ១៧លានដុល្លារ (១៧.២លានដុល្លារ) ធ្លាក់ចុះប្រហែល ៣០%។

ក្រៅពីតំបន់រមណីយដ្ឋានអង្គរ របាយការណ៍បង្ហាញពីចំណូលពីតំបន់ប្រវត្តិសាស្ត្រផ្សេងទៀត ក្នុងរយៈពេលដូចគ្នានោះដែរ ដូចជាប្រាសាទកោះកេរទទួលបានជាង ១១ម៉ឺនដុល្លារ និងប្រាសាទបេងមាលាទទួលបានជាង ៧ម៉ឺនដុល្លារអាមេរិក៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។