ធនាគារជាតិនៃកម្ពុជា បានទម្លាយឱ្យដឹងតិចតួច ជុំវិញវិធានការដែលខ្លួនបានសម្រេចផ្អាកការទូទាត់ប្រាក់បញ្ញើ និងចំណាយមិនចាំបាច់មួយចំនួនរបស់ធនាគារពាណិជ្ជ ឈីហ្វ(ខេមបូឌា) ដោយសំអាងត្រឹមថា បានរកឃើញការខ្វះចន្លោះ ក្នុងការអនុឡោមតាមបទប្បញ្ញត្តិនានា។
នេះបើយោងតាមសេចក្តីជូនដំណឹងរបស់ធនាគារជាតិនៃកម្ពុជា «ស្តីពីការដាក់ឱ្យធនាគារពាណិជ្ជ ឈីហ្វ (ខេមបូឌា)ម.ក ស្ថិតក្រោមអភិបាលបណ្តោះអាសន្ន» ចុះថ្ងៃទី២១ ខែកញ្ញា ឆ្នាំ២០២៦។
ធនាគារជាតិ បានគូសបញ្ជាក់ថា វិធាននេះ ដើម្បីគ្រប់គ្រងស្ថានការណ៍ និងបានតែងតាំងក្រុមហ៊ុន បេកឃើ ធិលលី (ខេមបូឌា) ម.ក ជាអភិបាលបណ្ដោះអាសន្ន សម្រាប់រយៈពេល ៣ ខែ ដោយគិតចាប់ពីថ្ងៃទី២១ ខែកញ្ញា ឆ្នាំ២០២៦នេះទៅ។
អភិបាលបណ្ដោះអាសន្ន មានភារកិច្ចវាយតម្លៃស្ថានភាព និងធ្វើរបាយការណ៍ជូនធនាគារជាតិនៃកម្ពុជា ដើម្បីជាមូលដ្ឋានក្នុងការសម្រេចចាត់វិធានការបន្ត។
ក្នុងអំឡុងពេល៣ខែនេះ អភិបាលបណ្ដោះអាសន្ន ទទួលបានសិទ្ធិពេញលេញក្នុងការគ្រប់គ្រង និងតំណាងឱ្យធនាគារពាណិជ្ជ ឈីហ្វ លើប្រតិបត្តិការទាំងអស់ រួមទាំងការផ្អាកការទូទាត់ប្រាក់បញ្ញើ និងចំណាយមិនចាំបាច់មួយចំនួន។
លើសពីនេះ ធនាគារជាតិ បានអះអាងថា ខ្លួននឹងបន្តតាមដានយ៉ាងប្រុងប្រយ័ត្នខ្ពស់លើការអនុវត្តរបស់អភិបាលបណ្ដោះអាសន្ន និងស្នើសុំឱ្យសាធារណជនតាមដានព័ត៌មានផ្លូវការជាបន្តបន្ទាប់។
តាមរបាយការណ៍នានា ក្រោយពីអន្តរជាតិជំរុញឱ្យបោសម្អាតឧក្រិដ្ឋកម្មឆបោកអនឡាញ និងការលាងលុយកខ្វក់នៅកម្ពុជា ធនាគារ និងគ្រឹះស្ថានហិរញ្ញវត្ថុមួយចំនួនត្រូវបានបិទ ដូចជា ធនាគារ ព្រីនស៍ របស់លោក ចេន ហ្ស៊ី ។ កាស៊ីណូ ២៧ កន្លែង ត្រូវបានដកហូតអាជ្ញាប័ណ្ណ ជាប់ពាក់ព័ន្ធនឹងប្រតិបត្តិការឆបោក និងលាងលុយកខ្វក់។
ក្នុងនោះមានទាំងក្រុមហ៊ុន ហួយវ័ន គ្រុប (Huione Group) និង ហួយវ័ន ផេ ពាក់ព័ន្ធនឹងលោកហ៊ុន តូ ដែលស្ថាប័ននេះ រងទណ្ឌកម្មនិងការចោទប្រកាន់ពីសហរដ្ឋអាមេរិក និងអង់គ្លេស ពីការពាក់ព័ន្ធនឹងការលាងលុយកខ្វក់រាប់ពាន់លានដុល្លារ និងបណ្តាញឧក្រិដ្ឋកម្មឆបោកលំដាប់ពិភពលោក៕
