អ្នកឃ្លាំមើល ព្រមានថា ពលរដ្ឋគួរប្រុងប្រយ័ត្ន និងពិនិត្យឱ្យច្បាស់ ជៀសវាងហានិភ័យខាតបង់ប្រាក់ មុនចំណាយលុយទិញដីឡូត៍តម្លៃក្រោម ១ពាន់ដុល្លាររបស់លោក ឡេង ណាវ៉ាត្រា នៅសៀមរាប ដែលកំពុងទាក់ទាញចំណាប់អារម្មណ៍អ្នកទិញយ៉ាងណាក៏ដោយ។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ប្រាប់វីអូឌីនៅថ្ងៃទី២១ ខែកញ្ញាថា ដីធ្លីរបស់លោក ឡេង ណាវ៉ាត្រា ភាគច្រើនជាដីសម្បទានសេដ្ឋកិច្ចរបស់រដ្ឋ ដែលផ្តល់សម្រាប់អភិវឌ្ឍន៍ ដូច្នេះលោកមិនអាចលក់ដីទាំងនោះតាមអំពើចិត្តបានទេ។ ប្រសិនបើមិនបន្តអភិវឌ្ឍន៍តាមលក្ខខណ្ឌសម្បទាន រដ្ឋអាចមានសិទ្ធិដកហូត ឬយកដីមកវិញតាមច្បាប់។
លោកអំពាវនាវឱ្យពលរដ្ឋប្រុងប្រយ័ត្ន និងកុំប្រញាប់ទិញ ដោយសារស្ថានភាពកម្មសិទ្ធិ និងការអភិវឌ្ឍដីមិនទាន់មានភាពច្បាស់លាស់ ទោះក្រុមហ៊ុននេះប្រកាសលក់ដីឡូត៍នៅខេត្តសៀមរាបក្នុងតម្លៃក្រោម ១ពាន់ដុល្លារក្នុងមួយឡូត៍។ លោកបារម្ភថា អ្នកទិញអាចប្រឈមនឹងការខាតបង់ប្រាក់ ខណៈមិនទទួលបានដី ដោយសារបញ្ហាវិវាទ និងស្ថានភាពផ្លូវច្បាប់ ពាក់ព័ន្ធនឹងទ្រព្យសម្បត្តិរបស់លោក ឡេង ណាវ៉ាត្រា។
លោក ម៉ែន ណាត ថ្លែងថា៖ «បើមិនដឹងសាច់រឿងទេ សូមកុំសាកល្បង ទៅទិញដីឃើញដីថោកៗរបស់ ឡេង ណាវ៉ាត្រា កុំទិញឱ្យសោះ ប្រយ័ត្នខាតទាំងលុយ ខាតបង់ទាំងលុយ ហើយដីមិនបាន ខាតលុយហើយដីមិនបាន ដូចខ្ញុំជម្រាបជូនអញ្ចឹងថា ដីធ្លីរបស់សេដ្ឋីដីធ្លីរបស់លោក ឡេង ណាវ៉ាត្រា ភាគច្រើនជាដីសម្បទានសេដ្ឋកិច្ចរបស់រដ្ឋាភិបាល ដែលឱ្យធ្វើការអភិវឌ្ឍន៍ មិនថាអភិវឌ្ឍន៍ដី ផ្ទះល្វែង ឬអភិវឌ្ឍន៍អីទេ ឱ្យតែពាក់ព័ន្ធអភិវឌ្ឍន៍ ឧទាហរណ៍ដូចកាលជំនាន់ឆ្នាំ២០២៤អញ្ចឹង គឺរឿងភ្នំតាម៉ៅអញ្ចឹងជាដើម»។
ចំណែក អតិថិជនរងគ្រោះហាក់មិនចាប់អារម្មណ៍នឹងគម្រោងថ្មីរបស់ម្ចាស់ក្រុមហ៊ុននេះទេ។ តំណាងអតិថិជនម្នាក់ លោក កែ រ៉ាវុធ បន្តទទូចឱ្យក្រុមហ៊ុនគោរពកិច្ចសន្យាចាស់របស់ខ្លួនជាមួយអតិថិជន ទោះក្រុមហ៊ុនប្រគល់ឱ្យក្រសួងរៀបចំដែនដីរាប់រងបន្តក៏ដោយ។
លោក កែ រ៉ាវុធ និយាយថា៖ «វាជាកំហុសរបស់ក្រុមហ៊ុន ហើយវាជាកំហុសរបស់ ឡេង ណាវ៉ាត្រា អញ្ចឹង ឡេង ណាវ៉ាត្រា ត្រូវតែទទួល ទំនួលខុសត្រូវទៅ និងកាតព្វកិច្ចរបស់ខ្លួនដែលបានចែងនៅក្នុង កិច្ចសន្យាចាស់»។
ការលើកឡើងដូច្នេះ បន្ទាប់ពីលោក ឡេង ណាវ៉ាត្រា ប្រកាសលក់ដីឡូតិ៍នៅស្រុកបន្ទាយស្រី ខេត្តសៀមរាប ក្នុងតម្លៃ១ឡូតិ៍ ៩៥០ដុល្លារ ដោយគ្រាន់តែចំណាយកាត់ប្លង់កម្មសិទ្ធិខ្លួនឯង ក្រោមឈ្មោះរបស់លោកនិងភរិយា។ លោកថា ប្រាក់លក់នឹងវេរចូលកុងធនាគាររបស់ក្រសួងរៀបចំដែនដីផ្ទាល់ ដើម្បីប្រមូលថវិកាទៅបង្ហើយគម្រោង៦អា និងជ្រែ១០០ នៅខេត្តកណ្ដាល ដែលលោកប្រកាសក្ស័យធន និងផ្ដល់សិទ្ធិឱ្យក្រសួងរៀបចំដែនដីចាត់ចែងបន្ត ដោយមានការលក់ឡាយឡុងដីនៅខេត្តកំពត និងខេត្តបន្ទាយមានជ័យជាដើម។
វីអូឌី មិនអាចសុំការឆ្លើយតបពីតំណាងក្រុមហ៊ុន ឡេង ណាវ៉ាត្រា លោក សុំ មនោរម្យ និងអ្នកនាំពាក្យក្រសួងរៀបចំដែនដី លោក សេង ឡូត បានទេនៅថ្ងៃទី២១ ខែកញ្ញា។
ចំណែក អ្នកនាំពាក្យគណបក្សប្រជាធិបតេយ្យជឿនលឿន លោក ប៉ោ មករា យល់ថា ការលក់ដីឡូត៍អាចជាដំណោះស្រាយមួយផ្នែក ប៉ុន្តែមិនទាន់អាចបញ្ជាក់ថា មានប្រសិទ្ធភាពក្នុងការដោះស្រាយបញ្ហាធំៗរបស់អតិថិជនបានឬយ៉ាងណាទេ។ ឯប្រសិទ្ធភាពអាស្រ័យលើទំហំបញ្ហារបស់អតិថិជន និងថាតើប្រាក់ចំណូលពីការលក់អាចយកមកដោះស្រាយបញ្ហាដែលកើតមានបានកម្រិតណា។ ជាមួយគ្នានេះ លោកមើលឃើញថា ស្ថានភាពសេដ្ឋកិច្ចបច្ចុប្បន្ន អាចប៉ះពាល់ដល់សមត្ថភាព និងការសម្រេចចិត្តរបស់អតិថិជន ក្នុងការទិញដីឡូត៍ផងដែរ ខណៈទំនុកចិត្តរបស់អតិថិជនចាស់ និងអតិថិជនថ្មីក៏ជាបញ្ហាចម្បង។
លោក ប៉ោ មករា ថ្លែងថា៖ «អញ្ចឹងសរុបជារួមមកវិញ ខ្ញុំនៅតែមើលឃើញថា អឺភាព ជឿជាក់ និងការសាងទំនុកចិត្ត ទៅឲ្យប្រជាពលរដ្ឋគឺជារឿងសំខាន់ណាស់ ដូច្នេះប្រសិទ្ធភាពនៃការដោះស្រាយហ្នឹងវាអាស្រ័យទៅលើភាពជឿជាក់និងការស្មោះត្រង់ រវាងគាត់និងអតិថិជន រវាងគាត់និងប្រជាពលរដ្ឋដែលជាអតិថិជនថ្មីហ្នឹង អញ្ចឹងបើសិនជាការទុកចិត្តការជឿជាក់បាន ខ្ញុំគិតថា វាជាដំណោះស្រាយល្អមួយដែរ»។
យ៉ាងណា អ្នកសិក្សាការអភិវឌ្ឍសង្គម លោកបណ្ឌិត មាស នី យល់ ថា ករណីនេះ នៅមិនទាន់មានការបញ្ជាក់ច្បាស់ថា ជាការបោកប្រាស់ដោយចេតនា ឬក្ស័យធនឱ្យពិតប្រាកដ។ លោកថា បើជាការបោកប្រាស់ដោយចេតនា គួរតែមានការស៊ើបអង្កេតដើម្បីឱ្យដឹងថា ប្រាក់ដែលប្រមូលបានរាប់សិបលានដុល្លារ ត្រូវបានយកទៅណា ចំណាយសាងសង់អស់ប៉ុន្មាន និងនៅសល់ប៉ុន្មាន ដើម្បីកំណត់ទំនួលខុសត្រូវ និងដោះស្រាយជូនអ្នករងគ្រោះ។ ប៉ុន្តែ បើជាបញ្ហាក្ស័យធន នោះការលក់ ឬប្រើប្រាស់ទ្រព្យសម្បត្តិ ដើម្បីបង្វិលប្រាក់មកដោះស្រាយជូនអតិថិជនដែលរងផលប៉ះពាល់ អាចចាត់ទុកជាវិធីសាស្ត្រមួយ ក្នុងការដោះស្រាយវិបត្តិអាជីវកម្ម។
លោក មាស នី ថ្លែងថា៖ «សម្រាប់ករណី ឡេង ណាវ៉ាត្រា នេះ ខ្ញុំហាក់ដូចជាមិនទាន់ឃើញមានរដ្ឋាភិបាលបង្ហាញ ឬក៏ក្រសួងហ្នឹងពាក់ព័ន្ធណា បង្ហាញអំពីមូលហេតុច្បាស់លាស់ថា តើជារឿងក្ស័យធន ឬក៏ជារឿងបោកប្រាស់ ប៉ុន្តែបើជារឿងបោកប្រាស់ វាត្រូវតែមានលុយហ្នឹងនៅលើបុគ្គលណាមួយហើយ វាអត់ត្រូវមាន អត់មានអីនៅដៃសោះឡើយ បាទ»។
ចំណែក អ្នកតាមដានភូមិសាស្ត្រនយោបាយ លោក សេង វណ្ណលី យល់ថា ការលក់ដីឡូត៍នៅសៀមរាបអាចជាផ្នែកមួយនៃដំណោះស្រាយបញ្ហាអតិថិជនគម្រោង 6A ប្រសិនបើប្រាក់ដែលបានពីការលក់ត្រូវប្រើដោះស្រាយបញ្ហាអតិថិជនចាស់ និងមានការត្រួតពិនិត្យច្បាស់លាស់។ ប៉ុន្តែបើជាការលក់ថ្មី ដើម្បីយកប្រាក់ពីអតិថិជនថ្មី មកដោះស្រាយបំណុលចាស់ វាអាចបង្កជនរងគ្រោះថ្មី។ ដូច្នេះ រដ្ឋាភិបាលគួរបញ្ជាក់ពីកម្មសិទ្ធិ ប្លង់ បំណុល និងគោលដៅប្រើប្រាស់ប្រាក់ពីការលក់ ព្រមទាំងបង្ហាញច្បាស់ថា វាជាផែនការដោះស្រាយគម្រោង 6A ឬអាជីវកម្មថ្មី។ លោកសង្កត់ធ្ងន់ថា តម្លាភាព និងការត្រួតពិនិត្យមានសារៈសំខាន់ ដើម្បីកុំឱ្យអ្នកទិញថ្មីទទួលបន្ទុកបញ្ហាចាស់៕
