Social Issues, ព័ត៌មានជាតិ, សង្គម

ក្រុមហ៊ុនដឹកថ្មជាង២០ឆ្នាំធ្វើឱ្យខូចផ្លូវប៉ះពាល់ការរស់នៅរបស់ពលរដ្ឋ៣ស្រុកនៅខេត្តសៀមរាប

រតនា ស្រីភាព
| ២២ កញ្ញា ២០២៦
ម៉ោង ២០:០៧

ពលរដ្ឋខេត្តសៀមរាប ខកចិត្តចំពោះអាជ្ញាធរកសាងផ្លូវគ្មានគុណភាពដដែលៗ បណ្តាលឱ្យផ្លូវជាតិលេខ៦៧ ខូចខាតកាន់តែធ្ងន់ធ្ងរ នៅរយៈពេល ៦ ឆ្នាំកន្លងទៅនេះ។ រីឯសកម្មភាពរថយន្តធំៗដឹកថ្មនិងខ្សាច់ របស់ក្រុមហ៊ុនឯកជន ដែលពួកគាត់មិនស្គាល់ឈ្មោះ ធ្វើឱ្យផ្លូវជាតិមួយខ្សែនេះ មានប្រវែងជិត ៣០ គីឡូម៉ែត្រ រងការខូចខាតកាន់តែធ្ងន់។

ពលរដ្ឋរស់នៅស្រុកអង្គរធំ លោក សៀម រ៉ាន់ ត្អូញត្អែរថា ស្ថានភាពផ្លូវពេលនេះ មានជង្ហុកជ្រៅៗ មិនអាចបើកឡានតូចៗបានឡើយ ហើយអ្នកដំណើរខ្លះត្រូវចំណាយពេលច្រើន ទម្រាំឆ្លងផុតផ្លូវជាតិដ៏លំបាកនេះ។ លោកថា ផ្លូវមួយខ្សែនេះឆ្លងកាត់ស្រុកចំនួន ៣ ខេត្តសៀមរាប លំបាកជាង ៦ ឆ្នាំមកហើយ ហើយអាជ្ញាធរតែងតែកសាងជាបន្តបន្ទាប់ ក៏ប៉ុន្តែគ្មានគុណភាពនោះទេ។ លោកថា ពេលផ្លូវលំបាក ពលរដ្ឋរាប់ពាន់គ្រួសារ រស់នៅយ៉ាងលំបាកវេទនា ពិបាកដឹកជញ្ជូនកសិផល ហើយសិស្សសាលាក៏ពិបាកទៅរៀនដែរ៖

លោក សៀម រ៉ាន់ បានលើកឡើងថា៖ «ថ្នល់ជាតិគេធ្វើផ្លូវកៅស៊ូស្អាតធ្វើរួចពីខាងមុខ ខូចក្រោយ ធ្វើលាបៗ។ ផ្លូវជាតិសេដ្ឋកិច្ចធំណាស់ផ្លូវនេះ ផ្លូវជាតិ សព្វថ្ងៃឈប់ជាតិហើយ កើតជង្ហុក កើតស្រះ»។

ថ្មីៗនេះ ពលរដ្ឋខេត្តសៀមរាបបានថតវីដេអូ បង្ហាញពីទិដ្ឋភាពផ្លូវជាតិលេខ៦៧ រៀបរាប់បែបឌឺដងថា ផ្លូវថ្នល់ក្រាលកៅស៊ូដែលអាជ្ញាធរកសាង បានក្លាយជាស្ទឹង និងទឹកដក់ជ្រៅៗ នៅរដូវវស្សាឆ្នាំនេះ។ លោកថា ពេលរថយន្តដឹកថ្មឆ្លងកាត់ផ្លូវនេះ ប្រៀបដូចជាបុណ្យហែផ្កាថ្មដូច្នេះដែរ។

ពលរដ្ឋបាននិយាយថា៖ «បងប្អូននេះគេហែផ្កា ហែផ្កាថ្ម ផ្លូវខូចមិនបាច់ឆ្ងល់ទេ ហែផ្កាថ្មរាល់ថ្ងៃ។ ឥលូវកើតស្ទឹងហើយ វែងអ៊ីចឹងឯង»។

វីអូឌី មិនទាន់អាចទាក់ទងសុំការបំភ្លឺជុំវិញរឿងនេះ ពីអ្នកនាំពាក្យសាលាខេត្តសៀមរាប លោក លី វណ្ណៈ បាននៅឡើយទេគិតត្រឹមម៉ោងផ្សាយនេះ ដោយទូរសព្ទហៅចូលតែគ្មានអ្នកលើក។

តែយ៉ាងណា កន្លងទៅ ប្រធានមន្ទីររ៉ែ ខេត្តសៀមរាប លោក ឡេង លាត ធ្លាប់ប្រាប់សារព័ត៌មានក្នុងស្រុកថា បច្ចុប្បន្នមានក្រុមហ៊ុនចំនួន ៣ បន្តអាជីវកម្មដឹកថ្ម និងខ្សាច់ ក្នុងនោះមានក្រុមហ៊ុនចិន ២ និងក្រុមហ៊ុនឯកជនខ្មែរមួយ បានដឹកថ្មឆ្លងកាត់ផ្លូវនៅតំបន់នោះ។

ជុំវិញរឿងនេះ អ្នកគ្រប់គ្រងការិយាល័យអង្គការលីកាដូ (LICADHO) ប្រចាំទិសពាយ័ព្យ លោក អ៊ិន គង់ជិត ស្នើឱ្យអាជ្ញាធរខេត្តសៀមរាប ធ្វើរបាយការណ៍ដាក់សំណើទៅក្រសួងសាធារណៈ ដើម្បីពន្លឿនជួសជុល និងស្ថាបនាផ្លូវជាតិមួយខ្សែនេះឡើងវិញ។ លោកថា នៅគ្រាដែលផ្លូវលំបាកធ្វើដំណើរ ជាឧបសគ្គប៉ះពាល់ជីវភាពពលរដ្ឋដឹកជញ្ជូនកសិផលទៅទីផ្សារ និងការប្រកបរចិញ្ចឹមជីវិតប្រឈមបញ្ហារាំងស្ទះ។

លោក អ៊ិន គង់ជិត ថ្លែងថា៖ «ការត្អូញត្អែររបស់ពលរដ្ឋនៅតំបន់ហ្នឹង គឺគាត់ពិតជាលំបាកវេទនាធ្វើដំណើរ ដឹកភោកផល ផលិតផលរបស់គាត់ ពីតំបន់ហ្នឹងមកលក់នៅក្រុងសៀមរាប ជាពិសេសបើមានស្ត្រីឆ្លងទន្លេពេលយប់ ឬក៏មានពលរដ្ឋរងគ្រោះដោយជំងឺ ដោយគ្រោះថ្នាក់ តាមផ្លូវហ្នឹង ជួបប្រទះនូវឧបសគ្គយឺតយូរ»។

អ្នកភូមិខ្លះ បង្ហើបថា កន្លងទៅតំណាងរាស្ត្រគណបក្សកាន់អំណាច ធ្លាប់ចុះទៅឃោសនាបោះឆ្នោត ដោយសន្យាជាមួយពលរដ្ឋមុនពេលបោះឆ្នោតថា នឹងកសាងផ្លូវមានគុណភាព ក៏ប៉ុន្តែមកទល់ពេលនេះ ពលរដ្ឋថា ជាការសន្យាខ្យល់ ធ្វើឱ្យពលរដ្ឋអស់ជំនឿ។

ពលរដ្ឋបន្ថែមថា ផ្លូវជាតិមួយខ្សែខូចខាតខ្លាំងឆ្លងកាត់ឃុំចំនួន ២ គឺឃុំជប់តាត្រាវ ស្រុកអង្គរធំ ឆ្ពោះទៅឃុំគោកដូង ស្រុកអង្គរជុំ និងស្រុកបន្ទាយស្រី ខេត្តសៀមរាប ហើយផ្លូវដែលខូចខាតខ្លាំងជាងគេមានប្រវែងជាង ១០ គីឡូម៉ែត្រ ដែលអាជ្ញាធរទុកចោលជាច្រើនឆ្នាំមកហើយ មិនបានជួសជុល និងសាងសង់ឡើងវិញនៅឡើយទេចាប់តាំងពីឆ្នាំ២០២០ រហូតមក។

ពលរដ្ឋទទូចឱ្យរដ្ឋាភិបាលកសាងផ្លូវថ្នល់មានគុណភាព លុបបំបាត់អំពើពុករលួយ និងអនុវត្តច្បាប់ដល់មន្ត្រីទាំងឡាយណាដែលកិបកេងលុយជាតិស្ថាបនាផ្លូវថ្នល់៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។