កងកម្លាំងប្រដាប់អាវុធថៃ អមដោយព្រះសង្ឃ បានដំឡើងរូបចម្លាក់ព្រះពុទ្ធមួយអង្គ ក្នុងភូមិសាស្ត្រភ្នំបេង ស្រុកអន្លង់វែង ខេត្តឧត្តរមានជ័យ ជាករណីថ្មីមួយទៀត ដែលថៃបន្តប្រើប្រាស់សំណង់ និងនិមិត្តរូបសាសនា ដើម្បីពង្រឹងការកាន់កាប់ទឹកដីកម្ពុជាដោយខុសច្បាប់។
នេះបើតាមសេចក្តីប្រកាសព័ត៌មានរបស់ក្រសួងការបរទេសកម្ពុជា ចុះថ្ងៃទី២១ខែកញ្ញានេះ ដែលរដ្ឋាភិបាលលោក ហ៊ុន ម៉ាណែត បានគូសបញ្ជាក់ថា រាជរដ្ឋាភិបាលកម្ពុជា បានធ្វើការតវ៉ាជាផ្លូវការយ៉ាងខ្លាំងបន្ថែមទៀតចំពោះការបន្តរំលោភបំពានជាបន្តបន្ទាប់របស់ថៃ មកលើអធិបតេយ្យ និងបូរណភាពទឹកដីរបស់កម្ពុជា តាមបណ្តោយព្រំដែន។
បើតាមក្រសួង នៅថ្ងៃទី១៨ ខែកញ្ញា ឆ្នាំ២០២៦ បន្ទាប់ពីបានធ្វើសកម្មភាពឈូសឆាយដី កងកម្លាំងប្រដាប់អាវុធថៃ អមដោយព្រះសង្ឃថៃ បានដំឡើងរូបចម្លាក់ព្រះពុទ្ធមួយអង្គ ក្នុងភូមិសាស្ត្រភ្នំបេង ស្រុកអន្លង់វែង ខេត្តឧត្តរមានជ័យ នៅចន្លោះបង្គោលព្រំដែនលេខ២ និងលេខ៣។
សម្រាប់កម្ពុជា នេះគឺជាករណីមួយទៀតនៃការដែលប្រទេសថៃបន្តប្រើប្រាស់សំណង់ និងនិមិត្តរូបសាសនា ដើម្បីពង្រឹងការកាន់កាប់ទឹកដីកម្ពុជាដោយខុសច្បាប់ បំពានយ៉ាងច្បាស់លើអធិបតេយ្យ និងបូរណភាពទឹកដីរបស់កម្ពុជា។ ហើយថា កម្ពុជាមិនទទួលស្គាល់ជាដាច់ខាតនូវខ្សែបន្ទាត់ព្រំដែន ឬការទាមទារទឹកដីជាឯកតោភាគីដោយប្រទេសថៃនោះឡើយ។
ការណ៍នេះ កម្ពុជាទាមទារឱ្យប្រទេសថៃ បញ្ឈប់ជាបន្ទាន់ ដើម្បីបន្ធូរបន្ថយភាពតានតឹង ព្រមទាំងរក្សាសន្តិភាព និងភាពជាអ្នកជិតខាងល្អ រវាងប្រទេសទាំងពីរ។
ការតវ៉ាប្រឆាំងទៅនឹងការឈ្លានពានរបស់ថៃ ពីសំណាក់រដ្ឋាភិបាលលោក ហ៊ុន ម៉ាណែត នេះ មិនមែនជាលើកទី១ទេ ក្រោយពីថៃបើកការឈ្លានពានកម្ពុជា រយៈពេលជាង១ឆ្នាំមកនេះ។
ប៉ុន្តែភាគីថៃ នៅតែបន្តរុលចូល កសាងសំណង់រឹង ធ្វើរបងព្រំដែន និងដំឡើងរូបចម្លាក់ផ្សេងៗ លើទឹកដីខ្មែរជាបន្តបន្ទាប់ ក្រោយកម្ពុជាបោះបង់សិទ្ធិការពារខ្លួនលើដីជាក់ស្តែង ក្រោយមានកិច្ចព្រមព្រៀងបទឈប់បាញ់លើកទី២ ចុះថ្ងៃទី២៧ ខែធ្នូ ឆ្នាំ២០២៥មក។
បើតាមបក្សប្រឆាំង មកដល់ពេលនេះ ថៃបានពង្រីកការឈ្លានពានកម្ពុជា នៅខេត្តជាប់ព្រំដែន កើនឡើងដល់ជាង៨០ទីតាំង ដែលពួកគេថា នេះជាហានិភ័យបូរណភាពទឹកដី ក្រោមការដឹកនាំរបស់គ្រួសារលោក ហ៊ុន សែន ដែលគិតតែពីកម្ចាត់ខ្មែរ ដើម្បីពង្រឹងអំណាចតពូជ តែមិនពង្រឹងវិស័យការពារជាតិ ដើម្បីការពារទឹកដី៕
