អន្តរជាតិ

ចក្រភពអង់គ្លេសនឹងផ្តល់ការគាំទ្រផ្នែកយោធា ‘ដើម្បីការពារខ្លួន’ ដល់ប្រទេសអារ៉ាប៊ីសាអូឌីត

កញ្ញា រតនៈ ម៉ូនីកា
| ២២ កញ្ញា ២០២៦
ម៉ោង ១៩:៤០

លោក អាល់ឌី ប៊ើនហាំ (Andy Burnham) នាយករដ្ឋមន្ត្រីអង់គ្លេស បានលើកឡើងថា ចក្រភពអង់គ្លេសនឹងផ្តល់ការគាំទ្រ “លើការចាក់ប្រេងតាមអាកាសដើម្បីការពារខ្លួន” ដល់ប្រទេសអារ៉ាប៊ីសាអូឌីត ជាការឆ្លើយតបទៅនឹងការវាយប្រហារពីក្រុមហ៊ូធី (Houthi) គាំទ្រដោយអ៊ីរ៉ង់នៅប្រទេសយេម៉ែន។

សកម្មភាពនេះអាចនឹងចាប់ផ្តើមក្នុងពេលប៉ុន្មានថ្ងៃខាងមុខ ដោយប្រើប្រាស់យន្តហោះ វ៉ូយ៉ាហ្ស៊ឺ (Voyager) មួយគ្រឿង ផ្អែកនៅ អ៊ែរ.អា.អេហ្វ. អាខ្រូទីរី (RAF Akrotiri) ក្នុងប្រទេសស៊ីប្រុស (Cyprus)។

នាយករដ្ឋមន្ត្រី បានថ្លែងថា ការណ៍នេះធ្វើឡើងតាមសំណើរបស់អារ៉ាប៊ីសាអូឌីត ដោយមានការយល់ព្រមតាមការណែនាំរបស់រដ្ឋមន្ត្រីក្រសួងការពារជាតិ វែស ស្ទ្រីទីង (Wes Streeting) និងរដ្ឋមន្ត្រីក្រសួងការបរទេស អ៊ែត មីលីបាន (Ed Miliband)។ មន្ត្រីរដ្ឋាភិបាល បញ្ជាក់ថា ការផ្តល់ជូននេះ “មានកំណត់ពេល” ដោយដំបូងឡើយអាចមានរយៈពេល “ប៉ុន្មានសប្តាហ៍”។

ក្រុមហ៊ូធី កំពុងជាប់ដៃក្នុងសង្គ្រាមស៊ីវិលជាមួយរដ្ឋាភិបាលយេម៉ែន ហើយថ្មីៗនេះបានវាយប្រហារដោយដ្រូន និងមីស៊ីលបាលីស្ទិកលើរាជធានីរីយ៉ាដ និងទីតាំងថាមពលនៅឆ្នេរសមុទ្រក្រហម។ ការគាំទ្រនេះរួមមានការជួយយន្តហោះចម្បាំងដល់អារ៉ាប៊ីសាអូឌីតក្នុងការបាញ់ទម្លាក់មីស៊ីល និងដ្រូនរបស់ក្រុមហ៊ូធី។

ធ្វើដំណើរទៅកាន់មហាសន្និបាតអង្គការសហប្រជាជាតិនៅញូវយ៉ក លោក ប៊ើនហាំ បានភ្ជាប់ការសម្រេចចិត្តនេះទៅនឹងសំពាធលើតម្លៃជីវភាពដោយថ្លែងថា៖ «យើងចាំបាច់ត្រូវតែរក្សាផ្លូវដឹកជញ្ជូនទាំងនោះឱ្យនៅចំហ ដើម្បីការពារផលប្រយោជន៍របស់ចក្រភពអង់គ្លេស និងតំបន់ទាំងមូល»។

ផ្លូវនាវាចរណ៍ឆ្លងកាត់សមុទ្រក្រហម គឺជាសរសៃឈាមដ៏សំខាន់នៃសេដ្ឋកិច្ចពិភពលោក។ កាលពីពេលថ្មីៗនេះ ក្រុមហ៊ូធីបានកាន់កាប់ទីក្រុងកំពង់ផែយុទ្ធសាស្ត្រ ម៉ូខា (Mokha) និងកោះ ភើរីម (Perim) ដែលជាច្រកចូលសមុទ្រក្រហម។

ការផ្តល់ជូនយន្តហោះចាក់ប្រេងមួយគ្រឿងនេះ ត្រូវគេមើលឃើញថាក្នុងកម្រិតស្រាលនៅឡើយ ឬជាកាយវិការសម្តែងចេញចំពោះសម្ព័ន្ធមិត្ត ខណៈអារ៉ាប៊ីសាអូឌីតកំពុងតស៊ូទប់ទល់នឹងការវាយប្រហារពីក្រុមហ៊ូធី។

ទោះបីជាការជួយនេះមានកំណត់ពេល ប៉ុន្តែជម្លោះនៅយេម៉ែនដែលមានតាំងពីឆ្នាំ ២០១៤ មក កាន់តែស្មុគស្មាញដោយសារក្រុមហ៊ូធីទទួលបានការគាំទ្រពីអ៊ីរ៉ង់។

កាលពីសប្តាហ៍មុន អគ្គលេខាធិការ ណាតូ (NATO) លោក ម៉ាក រុតតេ (Mark Rutte) បានបង្ហើបថា ការគាំទ្រពីអឺរ៉ុបសម្រាប់អារ៉ាប៊ីសាអូឌីតក៏អាចកើតមានផងដែរ។ ចំណែករដ្ឋមន្ត្រីថាមពល លោក ម៉ារទីន ម៉ាក់ខ្លូស្គី (Martin McCluskey) បានប្រាប់សមាជិកសភាថា ចក្រភពអង់គ្លេសកំពុងផ្តល់ការគាំទ្រផ្នែកការពារអាកាសដល់អារ៉ាប៊ីសាអូឌីត។

កាលពីខែមករា ឆ្នាំ២០២៤ ចក្រភពអង់គ្លេសបានចូលរួមជាមួយសហរដ្ឋអាមេរិកក្នុងការវាយប្រហារតាមអាកាសប្រឆាំងគោលដៅក្រុមហ៊ូធីនៅយេម៉ែន។ នាយករដ្ឋមន្ត្រី រីស៊ី ស៊ូណាក់ (Rishi Sunak) នាពេលនោះ បានបញ្ជាក់ថា អង់គ្លេស “ធ្វើសកម្មភាពដើម្បីការពារខ្លួន” ដើម្បីការពារជីវិតមនុស្ស និងនាវាពាណិជ្ជកម្ម៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។