ប្រធានាធិបតី ដូណាល់ ត្រាំ បានប្រាប់មហាសន្និបាតអង្គការសហប្រជាជាតិ (UNGA) ថា លោកកំពុងប្រឈមមុខនឹង “ការសម្រេចចិត្តដ៏ធំមួយ” ថាតើត្រូវវាយប្រហារលើប្រទេសអ៊ីរ៉ង់ម្តងទៀត ឬស្វែងរកកិច្ចព្រមព្រៀងសន្តិភាព។
សមាជិកម្នាក់នៃប្រតិភូអ៊ីរ៉ង់ បានអង្គុយស្តាប់ក្នុងអំឡុងពេលសុន្ទរកថារបស់លោក នៅក្រុងញូយ៉ក ដែលក្នុងនោះលោក ត្រាំ បានព្រមានថា លោកអាច “បំផ្លាញ” សាធារណរដ្ឋឥស្លាមនេះ ប្រសិនបើជម្លោះនៅតែមិនអាចដោះស្រាយបាន។ លោក ត្រាំ ក៏បានបដិសេធ “រដ្ឋាភិបាលពិភពលោក” (Global government) សន្យាសម្រុះសម្រួលសន្តិភាពរវាងរុស្ស៊ី និងអ៊ុយក្រែន ផងដែរ ហើយធានាថា អាមេរិកនឹងឈ្នះក្នុងការប្រកួតប្រជែងផ្នែកបច្ចេកវិទ្យា AI។
លោកបានចាប់ផ្តើមសុន្ទរកថា ដោយការអួតសរសើរពីសមិទ្ធផលលើផ្នែកសេដ្ឋកិច្ច ការបង្ក្រាបអន្តោប្រវេសន៍ និងការបង្ក្រាបបទល្មើស មុនពេលចំណាយពេលភាគច្រើនដើម្បីការពារសកម្មភាពយោធាប្រឆាំងនឹងអ៊ីរ៉ង់ ដែលលោកអះអាងថា បានរារាំងក្រុងតេអេរ៉ង់មិនឱ្យទទួលបានអាវុធនុយក្លេអ៊ែរ។ លោកបានបញ្ជាក់ថា៖ «តើកិច្ចព្រមព្រៀងនឹងត្រូវធ្វើឡើងជាមួយអ៊ីរ៉ង់ ដែលអនុញ្ញាតឱ្យពួកគេកសាងឡើងវិញ… ឬមួយក៏ខ្ញុំត្រូវបំផ្លាញសាធារណរដ្ឋឥស្លាម ហើយធ្វើវាឱ្យបានឆាប់រហ័ស?»។ លោកបន្ថែមថា កិច្ចព្រមព្រៀងអាចនឹងសម្រេចបានបន្ទាប់ពីការបោះឆ្នោតនាខែវិច្ឆិកា។
ក្រោយមក លោក ត្រាំ បានប្រាប់អ្នកយកព័ត៌មានថា មន្ត្រីអាមេរិកមានជំនួប “ប្រកបដោយផលវិជ្ជមានខ្លាំង” រយៈពេលបីម៉ោងជាមួយប្រតិភូអ៊ីរ៉ង់នៅក្រៅកិច្ចប្រជុំ។
ប្រធានបេសកជនពិសេសអាមេរិក លោក Steve Witkoff បានបញ្ជាក់ថា ការពិភាក្សាតាមរយៈអ្នកសម្រុះសម្រួលនេះ “មានភាពស្ថាបនា និងមានសង្ឃឹម”។
នៅក្នុងសុន្ទរកថារបស់លោក លោក ត្រាំ បានទស្សន៍ទាយសារជាថ្មីថា ការទូតរបស់លោកនឹងបញ្ចប់សង្គ្រាមរុស្ស៊ី នៅអ៊ុយក្រែនបានយ៉ាងឆាប់រហ័ស។ លោកក៏បានកាត់បន្ថយការព្រួយបារម្ភអំពី AI ដោយសន្យាថា អាមេរិកនឹងមិនបោះបង់ចោលការនាំមុខរបស់ខ្លួនទៅឱ្យប្រទេសចិនឡើយ ហើយបានស្នើឱ្យហៅ AI ថាជា “បញ្ញាកំពូល” (Super intelligence) វិញ។
នៅក្រៅកិច្ចប្រជុំ លោក ត្រាំ បានចុះហត្ថលេខាលើកិច្ចព្រមព្រៀងពង្រឹងវត្តមានយោធាអាមេរិកនៅហ្គ្រីនឡែន និងបានជួបប្រជុំជាមួយប្រធានាធិបតីអ៊ុយក្រែន លោក Zelensky នាយករដ្ឋមន្ត្រីអង់គ្លេស លោក Andy Burnham និងមេដឹកនាំមកពីបណ្តាប្រទេសអារ៉ាប់ជាច្រើន។
មុននេះបន្តិច លោក Guterres បានថ្លែងសុន្ទរកថាលាគ្នាក្នុងនាមជាអគ្គលេខាធិការ UN ដោយព្រមានអំពីស្នាមប្រេះឆាក្នុងពិភពលោក។ ផ្ទុយទៅវិញ លោក ត្រាំ បានរិះគន់ UN ថាមាន “របៀបវារៈឆ្វេងនិយមជ្រុល” ដោយសង្កត់ធ្ងន់លើអធិបតេយ្យភាពជាតិ និងអំណាចយោធាអាមេរិក “ដែលគ្មានគូប្រៀប”។ លោកក៏បានចោទប្រកាន់រដ្ឋាភិបាលគុយបាថាបានបង្កើតទំនាក់ទំនងជាមួយក្រុមឆ្វេងនិយមនៅអាមេរិក ដែលធ្វើឱ្យប្រតិភូគុយបាដើរចេញពីបន្ទប់ប្រជុំនៅពេលលោកហៅកោះនេះថាជា “រដ្ឋដែលបរាជ័យ”៕
