លោក ស៊ី ជីនពីង ប្រធានាធិបតីចិន ត្រូវបានរំពឹងថា នឹងដាក់សម្ពាធលើប្រធានាធិបតីអាមេរិក លោក ដូណាល់ ត្រាំ ឱ្យបញ្ឈប់ការលក់អាវុធឱ្យតៃវ៉ាន់ ក្រោមសេចក្តីថ្លែងការណ៍រួមឆ្នាំ១៩៨២ ក្នុងអំឡុងពេលទស្សនកិច្ចនៅរដ្ឋធានីវ៉ាស៊ីនតោននៅសប្តាហ៍នេះ។ នេះបើយោងតាមប្រភពដែលទទួលបានព័ត៌មានលម្អិត។
ប្រទេសចិន តែងតែចាត់ទុកបញ្ហាតៃវ៉ាន់ថាជាបញ្ហាការទូតដ៏រសើប និងសំខាន់បំផុតរបស់ខ្លួន ហើយបានអំពាវនាវម្តងហើយម្តងទៀត ឱ្យសហរដ្ឋអាមេរិកបញ្ឈប់ការលក់អាវុធឱ្យតៃវ៉ាន់។ ទោះជាយ៉ាងណា សហរដ្ឋអាមេរិកត្រូវបានភ្ជាប់កាតព្វកិច្ចដោយច្បាប់ ក្នុងការផ្តល់មធ្យោបាយដល់តៃវ៉ាន់ ដើម្បីការពារខ្លួន ទោះបីជាគ្មានទំនាក់ទំនងការទូតផ្លូវការក៏ដោយ ខណៈដែលរដ្ឋាភិបាលតៃវ៉ាន់បដិសេធការទាមទារអធិបតេយ្យភាពរបស់ក្រុងប៉េកាំង។
ប្រភពនានា បានប្រាប់ Reuters ថា ចិនទំនងជានឹងលើកយកការបកស្រាយរបស់ខ្លួនអំពី “សេចក្តីថ្លែងការណ៍រួម” ឆ្នាំ១៩៨២ ដែលក្នុងនោះអាមេរិកបាននិយាយថា ខ្លួនមានបំណងកាត់បន្ថយការលក់អាវុធឱ្យតៃវ៉ាន់ជាបណ្តើរៗ។
ទោះជាយ៉ាងណា អតីតប្រធានាធិបតី រ៉ូណាល់ រេហ្គាន បានបញ្ជាក់ថា ការកាត់បន្ថយនេះគឺផ្អែកលើការប្តេជ្ញាចិត្តរបស់ចិន ចំពោះដំណោះស្រាយដោយសន្តិវិធីជាមួយតៃវ៉ាន់ប៉ុណ្ណោះ។
លោក ស៊ី អញ្ជើញទៅដល់រដ្ឋធានីវ៉ាស៊ីនតោន នៅថ្ងៃពុធ ដោយការពិភាក្សាផ្លូវការនឹងប្រព្រឹត្តទៅនៅថ្ងៃព្រហស្បតិ៍។
មន្ត្រីភូមិគ្រឹះស្បែកស បាននិយាយថា លោក ត្រាំ នឹងធ្វើការសម្រេចចិត្តលើកញ្ចប់ការលក់អាវុធថ្មីក្នុងពេលឆាប់ៗនេះ ទៅឱ្យតៃវ៉ាន់។ ប្រភពបន្ថែមថា ចិនក៏បានស្នើឱ្យអាមេរិកបញ្ឈប់ការប្រគល់អាវុធដែលតៃវ៉ាន់បានកុម្ម៉ង់រួច ហើយជាការឆ្លើយតប ចិនកំពុងផ្តល់ជំនួយក្នុងការដាក់សម្ពាធលើអ៊ីរ៉ង់ជុំវិញសង្គ្រាមនៅមជ្ឈិមបូព៌ា។
រដ្ឋបាលលោក ត្រាំ កាលពីខែធ្នូ បានអនុម័តកញ្ចប់ការលក់អាវុធតម្លៃ ១១ ពាន់លានដុល្លារ ឱ្យទៅតៃវ៉ាន់ ប៉ុន្តែកញ្ចប់ទីពីរដែលមានតម្លៃប្រមាណ ១៤ ពាន់លានដុល្លារ ត្រូវបានផ្អាកអស់ជាច្រើនខែមកហើយ ដោយលោក ត្រាំ បានរៀបរាប់ថាវាជា “គ្រាប់ឡុកឡាក់ចរចាដ៏ល្អមួយ”។
ឥស្សរជនជាន់ខ្ពស់នៃគណបក្សសាធារណរដ្ឋអាមេរិក បានសម្តែងការគាំទ្រចំពោះតៃវ៉ាន់ មុនពេលកិច្ចប្រជុំកំពូលមកដល់ ដោយបានជំរុញឱ្យលោក ត្រាំ ប្រកាន់ជំហររឹងមាំ។ ទោះជាយ៉ាងណា អតីតមន្ត្រីជាន់ខ្ពស់អាមេរិក លោក Matt Pottinger បាននិយាយថា លោកមិនរំពឹងថានឹងមានអ្វី “សំខាន់ជាដុំកំភួន” លើបញ្ហាតៃវ៉ាន់ ក្នុងអំឡុងជំនួបនៅសប្តាហ៍នេះនោះឡើយ៕
