សន្និសីទអន្តរជាតិស្តីពីការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យារយៈពេល ២ ថ្ងៃ ចាប់ពីថ្ងៃទី២៣-២៤ ខែកញ្ញានេះ បានបញ្ចប់ទៅដោយប្រកាសពីការប្តេជ្ញាចិត្តរួមចំនួន ១១ ចំណុច ក្នុងគោលបំណងកាត់ផ្តាច់ច្រវាក់ឧក្រិដ្ឋកម្មឆបោកអនឡាញ និងបទល្មើសឆ្លងដែន។
បើតាមសេចក្តីប្រកាសព័ត៌មានរបស់រដ្ឋាភិបាល ចំណុចរួមទាំងនោះបានផ្តោតទៅលើកិច្ចសហប្រតិបត្តិការ និងការអនុវត្តច្បាប់អន្តរជាតិ។ ការកាត់ផ្តាច់ហេដ្ឋារចនាសម្ព័ន្ធ និងហិរញ្ញវត្ថុបណ្តាញឧក្រិដ្ឋជន តាមរយៈការរំលាយទីតាំងឆបោក កាត់ផ្តាច់លំហូរលុយខុសច្បាប់ តាមវិធានការស្ទាក់រារាំង កាត់ផ្តាច់លំហូរហិរញ្ញវត្ថុ និងប្រមូលទ្រព្យសម្បត្តិដែលបានមកពីការឆបោកត្រឡប់មកវិញ។
ការការពារ និងសង្គ្រោះជនរងគ្រោះ ដោយអនុវត្តគោលការណ៍មិនដាក់ទោសទណ្ឌលើជនរងគ្រោះដែលរងការបង្ខំឱ្យធ្វើការនៅក្នុងទីតាំងឆបោក និងប្រឆាំងការជួញដូរមនុស្សជាដើម។
សន្និសីទនេះ បានប្រមូលផ្តុំអ្នកចូលរួមជាង ៦០០ នាក់ មកពី ២៨ ប្រទេស និងអង្គការអន្តរជាតិធំៗ ដូចជា INTERPOL និង UNODC ដែលបង្ហាញពីការប្តេជ្ញាចិត្តខ្ពស់ក្នុងការរួមគ្នាបង្ក្រាបបទល្មើសឌីជីថល ដែលកម្ពុជាធ្វើជាម្ចាស់ផ្ទះ។
ដោយឡែក នៅក្នុងសន្និសីទនោះ រដ្ឋាភិបាលកម្ពុជា បានបង្ហាញការប្តេជ្ញាចិត្តយ៉ាងម៉ឺងម៉ាត់ថា កម្ពុជានឹងមិនអនុញ្ញាតឱ្យមានទីតាំងមានសុវត្ថិភាពសម្រាប់ក្រុមឧក្រិដ្ឋជនឆបោក និងមិនបណ្តោយឱ្យក្រុមទាំងនេះបំផ្លាញការអភិវឌ្ឍជាតិ និងជីវភាពពលរដ្ឋជាង ១៧ លាននាក់ឡើយ។
ក្រៅពីនេះ រដ្ឋាភិបាលបានការពារថា ឧក្រិដ្ឋកម្មឆបោកអនឡាញនេះ មិនមែនមានប្រភពដើមចេញពីកម្ពុជាឡើយ ប៉ុន្តែវាជាការវិវត្តឆ្លងដែនដែលជាប់ពាក់ព័ន្ធនឹងការរីកដុះដាលនៃល្បែងស៊ីសងអនឡាញពីមុន។
សរុបមក ថ្វីត្បិតតែមានសម្ពាធ និងការចោទប្រកាន់ចំៗពីសហរដ្ឋអាមេរិកទៅលើមន្ត្រី និងសែស្រឡាយសាច់ញាតិគ្រាក់ៗក៏ដោយ ក៏មេដឹកនាំកម្ពុជា បានប្រើប្រាស់ទិន្នន័យបង្ក្រាបជាក់ស្តែងមកបង្ហាញ និងប្តេជ្ញាចិត្តបន្តកម្ទេចក្រុមឧក្រិដ្ឋជនអនឡាញទាំងនេះ ដើម្បីស្តារមុខមាត់ប្រទេសឡើងវិញ៕
