ការឈ្លានពានទឹកដី ការបំផ្លិចបំផ្លាញសម្បត្តិបេតិកភណ្ឌ និងទុក្ខលំបាកជនភៀសសឹកខ្មែរជាង ២ម៉ឺននាក់ ដោយសារការឈ្លានពានពីភាគីថៃ ត្រូវបានកម្ពុជាលើកឡើងនៅក្នុងមហាសន្និបាតអង្គការសហប្រជាជាតិលើកទី៨១ នាទីក្រុងញ៉ូវយ៉ក សហរដ្ឋអាមេរិក។
កម្ពុជាទាមទារឱ្យថៃគោរពឱ្យបានពេញលេញនូវកិច្ចព្រមព្រៀងនានាដែលមានស្រាប់ រួមទាំងច្បាប់អន្តរជាតិ ដើម្បីស្តារទំនុកចិត្តរវាងប្រទេសទាំងពីរឡើងវិញ និងដើម្បីដោះស្រាយដោយសន្តិវិធី។
នេះបើតាមសេចក្តីថ្លែងការណ៍កម្រាស់ពីរទំព័ររបស់ក្រសួងការបរទេសកម្ពុជា ចុះថ្ងៃទី២៦ ខែកញ្ញា ឆ្នាំ២០២៦ បង្ហាញពីលទ្ធផលនៃការចូលរួមរបស់រដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន នៅក្នុងកិច្ចពិភាក្សាទូទៅនៃមហាសន្និបាតអង្គការសហប្រជាជាតិលើកទី៨១ នៅទីក្រុងញ៉ូវយ៉ក សហរដ្ឋអាមេរិក។
បើតាមសេចក្តីប្រកាសនោះ លោក ប្រាក់ សុខុន បានអំពាវនាវទៅភាគីថៃ អនុវត្តឱ្យបានពេញលេញនូវកិច្ចព្រមព្រៀងទ្វេភាគីដែលមានស្រាប់ រួមមាន «សេចក្តីប្រកាសរួមទីក្រុងកូឡាឡាំពួរ កិច្ចព្រមព្រៀងកុងសង់ស៊ីសហ៊ូសៀន (Fuxian Consensus) និងសេចក្តីថ្លែងការណ៍រួម ថ្ងៃទី២៧ ខែធ្នូ ឆ្នាំ២០២៥ ព្រមទាំងការបន្តសកម្មភាពខណ្ឌសីមា និងវាស់វែងព្រំដែននៃគណៈកម្មការព្រំដែនរួម (JBC) ជាប្រញាប់»។
លើសពីនេះ កម្ពុជាក៏បានគូសបញ្ជាក់ពីការខូចខាតបេតិកភណ្ឌវប្បធម៌ ការបារម្ភចំពោះការគំរាមកំហែងដែលបង្កដោយយុទ្ធភណ្ឌមិនទាន់ផ្ទុះ និងស្ថានភាពមនុស្សធម៌របស់ប្រជាពលរដ្ឋស៊ីវិលខ្មែរជាង ២០.០០០ នាក់ ដែលត្រូវបានភៀសសឹក និងមិនទាន់អាចត្រឡប់ទៅផ្ទះសម្បែងវិញបាន។
ចំពោះការទាមទារដែនសមុទ្រ កម្ពុជាបញ្ជាក់ជាថ្មីពីគំនិតផ្តួចផ្តើមរបស់កម្ពុជាក្នុងដំណើរការនីតិវិធីផ្សះផ្សាដោយបង្ខំ ក្រោមអនុសញ្ញាអង្គការសហប្រជាជាតិស្តីពីនីតិសមុទ្រ (UNCLOS) បន្ទាប់ពីភាគីថៃបានលុបអនុស្សរណៈនៃការយោគយល់គ្នា ឆ្នាំ២០០១ ដោយឯកតោភាគី ដើម្បីការពារសិទ្ធិដែនសមុទ្រអធិបតេយ្យរបស់កម្ពុជា ស្របតាមច្បាប់អន្តរជាតិ។
បើតាមអ្នកឃ្លាំមើលដែលមិនចំណុះឱ្យរដ្ឋាភិបាល ធ្លាប់លើកឡើងថា ក្រោយមានកិច្ចព្រមព្រៀងបទឈប់បាញ់ ភាគីថៃមិនបានគោរពទេ ហើយបន្តរុលចូលឈ្លានពានទឹកដីកម្ពុជាជាបន្តបន្ទាប់ រយៈពេលជាង១ឆ្នាំមកនេះ រហូតគ្រប់គ្រងទឹកដីខ្មែរនៅតាមបណ្តោយព្រំដែនដល់ទៅជាង៨០ទីតាំង ខណៈរដ្ឋាភិបាលលោក ហ៊ុន ម៉ាណែត មិនប្រើសិទ្ធិការពារខ្លួននៅលើដីជាក់ស្តែង ដែលធ្វើឱ្យថៃបន្តធ្វើរបងព្រំដែនលើដីខ្មែរដោយឯកតោភាគី។
ពួកគេបារម្ភថា ដីខ្មែរនឹងបាត់បង់បន្ថែមទៀត បើរដ្ឋាភិបាលលោក ហ៊ុន ម៉ាណែត មិនព្រមរុញសំណុំរឿងព្រំដែននេះទៅកាន់តុលាការព្រហ្មទណ្ឌអន្តរជាតិ (ICC) និងតុលាការយុត្តិធម៌អន្តរជាតិ (ICJ) ឱ្យបានទាន់ពេលទេនោះ៕
