Social Issues, ព័ត៌មានជាតិ, សង្គម

ពលរដ្ឋជិត ៦ម៉ឺនគ្រួសារ និងស្រូវជាង ៧ម៉ឺនហិកតារងផលប៉ះពាល់ដោយសារទឹកជំនន់

កញ្ញា ទេព វិជ្ជារ៉ា
| ២៩ កញ្ញា ២០២៦
ម៉ោង ២១:០៨

គិតត្រឹមចុងខែកញ្ញា ឆ្នាំ២០២៦ នេះ ស្ថានភាពគ្រោះទឹកជំនន់ និងជំនន់ទឹកភ្លៀងនៅកម្ពុជា បានបន្តប៉ះពាល់យ៉ាងធ្ងន់ធ្ងរដល់រាជធានី-ខេត្តចំនួន ១០ ស្មើនឹង ៥២ ក្រុង-ស្រុក ដោយបានធ្វើឱ្យប្រជាពលរដ្ឋសរុប ៥៧,៩៨០ គ្រួសារ រងផលប៉ះពាល់ (កើនឡើង ១៣,០៩១ គ្រួសារ)។ នេះបើយោងតាមរបាយការណ៍បច្ចុប្បន្នភាពចុងក្រោយពីគណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម.)។

ផ្អែកតាមទិន្នន័យផ្លូវការ គិតចាប់ពីថ្ងៃទី៨ ដល់ថ្ងៃទី២៨ ខែកញ្ញា ឆ្នាំ២០២៦ ការហក់ឡើងនៃទឹកជំនន់ភ្លៀង និងទឹកហូរធ្លាក់ពីប្រទេសជិតខាង បានបង្កផលប៉ះពាល់ដល់ប្រជាពលរដ្ឋប្រមាណ ៥ម៉ឺន៧ពាន់គ្រួសារ (៥៧,៩៨០គ្រួសារ) ជន់លិចផ្ទះសម្បែងជាង ៥ម៉ឺនខ្នង (៥១,៨៧៤ ខ្នង) ក្នុងនោះពលរដ្ឋចំនួន ៤ពាន់៨រយគ្រួសារ (៤,៨១៩គ្រួសារ) ត្រូវបានកម្លាំងសមត្ថកិច្ច និងអាជ្ញាធរមូលដ្ឋានជម្លៀសទៅកាន់ទីទួលសុវត្ថិភាព។ ជាមួយគ្នានេះ ផ្ទៃដីដំណាំស្រូវរងផលប៉ះពាល់កើនឡើងដល់ជាង ៧ម៉ឺន ២ពាន់ហិកតា (៧២,៤៤០ហិកតា)។

ក្នុងចំណោមខេត្តទាំង ១០ ខេត្តបាត់ដំបង រងគ្រោះធ្ងន់ធ្ងរបំផុតក្នុងជំនន់ឆ្នាំ២០២៦ នេះ ដោយកម្ពស់ទឹកស្ទឹងសង្កែហក់ឡើងរហូតដល់ ១៤,១១ ម៉ែត្រ ក្នុងនោះមានពលរដ្ឋរងគ្រោះប្រមាណ ៣ម៉ឺន ២ពាន់គ្រួសារ (៣២,៤៤៧) និងខូចខាតស្រូវ ៤ម៉ឺន ៧ពាន់ហិកតា (៤៧,២៥០)។ អាជ្ញាធរបានបិទចរាចរណ៍លើស្ពាន និងផ្លូវមួយចំនួនក្នុងក្រុងបាត់ដំបងជាបណ្តោះអាសន្ន។

ពលរដ្ឋនៅខេត្តបាត់ដំបង កញ្ញា សា ឌីណា ប្រាប់វីអូឌីថា ទឹកស្ទឹងសង្កែបានស្រកចុះបន្តិច នៅថ្ងៃទី២៩ ខែកញ្ញា នេះ ប៉ុន្តែផ្នែកខ្លះនៃស្រុកឯកភ្នំ និងក្រុងបាត់ដំបង បន្តជន់លិចតាមតំបន់ ជាពិសេសភូមិឋានទំនាប។ កញ្ញាបន្តថា ទោះបីទឹកស្រក តែពលរដ្ឋបន្តជួបប្រទះបញ្ហាពាក់ព័ន្ធនឹងការធ្វើដំណើរ ដោយស្ថានភាពផ្លូវរអិល មានភក់ដោយអន្លើ។ កញ្ញាបញ្ជាក់បន្ថែមថា ជំនន់ពេលនេះពិតជាមានស្ថានភាពធ្ងន់ធ្ងរជាងរាល់ដង។

កញ្ញា សា ឌីណា និយាយថា៖ «បើនិយាយពីទឹកឆ្នាំនេះគឺ ខ្លាំងជាងឆ្នាំមុន ហើយច្រើនជាងឆ្នាំមុន អាចថារៀងរាល់ឆ្នាំចឹង ខែហ្នឹងគឺដល់រដូវទឹកឡើងហើយ ប៉ុន្តែអត់ដល់ច្រើនដូចឆ្នាំនេះទេ។ បើសិនជាសង្កេតមើលទៅ អាចថាដោយសារតែព្យុះនៅប្រទេសជិតខាងផង ហើយយើងមានភ្លៀងធ្លាក់ជាច្រើនថ្ងៃ»។

យោងតាមរបាយការណ៍ចុងក្រោយពីរដ្ឋបាលខេត្តបាត់ដំបង នៅត្រឹមម៉ោង ១រសៀល ថ្ងៃទី២៩ ខែកញ្ញា នេះ កម្ពស់ទឹកស្ទឹងសង្កែចុះមកនៅត្រឹម ១៣,៥០ ម៉ែត្រ។ ប៉ុន្តែនៅក្នុងក្រុង ដូចជា ផ្សារបឹងឈូក និងផ្នែកខ្លះនៃស្រុកឯកភ្នំ នៅបន្តជន់លិចនៅឡើយ។

បន្ទាប់ពីខេត្តបាត់ដំបង ខេត្តដែលរងគ្រោះបន្ទាប់ទៀត មានដូចជាខេត្តសៀមរាប ប៉ះពាល់ពលរដ្ឋជាង ១ម៉ឺន ២ពាន់គ្រួសារ (១២,៣៣៣គ្រួសារ) និងស្រូវជាង ៤ពាន់ហិកតា (៤,៨៦២ហិកតា), ខេត្តបន្ទាយមានជ័យ ប៉ះពាល់ពលរដ្ឋជាង ៣ពាន់គ្រួសារ (៣,២១៤គ្រួសារ) និងស្រូវប្រមាណ ១ម៉ឺន ២ពាន់ហិកតា ខណៈតំបន់ព្រំដែន ដូចជាក្រុងប៉ោយប៉ែត ក៏បានរងការលិចលង់ដោយសារទឹកបន្តហូរធ្លាក់មកពីប្រទេសថៃផងដែរ។ ចំណែកខេត្តរងគ្រោះផ្សេងទៀត មានដូចជា កំពង់ធំ, ត្បូងឃ្មុំ, កំពង់ចាម, ក្រចេះ, ពោធិ៍សាត់, ប៉ៃលិន, ព្រះវិហារ និងឧត្តរមានជ័យ។

អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក សុទ្ធ គឹមកុលមុនី បានគូសបញ្ជាក់ប្រាប់បណ្តាញសារព័ត៌មានក្នុងស្រុកថា ទោះបីជាចំនួនគ្រួសាររងផលប៉ះពាល់មានការកើនឡើង ក្នុងរយៈពេលប៉ុន្មានថ្ងៃចុងក្រោយនេះក្តី ប៉ុន្តែស្ថានភាពទឹកទន្លេមេគង្គនៅតាមស្ថានីយសំខាន់ៗភាគច្រើន កំពុងមាននិន្នាការស្រកចុះជាបណ្តើរៗ និងស្ថិតនៅក្រោមកម្រិតប្រុងប្រយ័ត្ន។

ទន្ទឹមនឹងនេះ ក្រសួងធនធានទឹក និងឧតុនិយម ក៏បានអំពាវនាវឱ្យប្រជាពលរដ្ឋរស់នៅតាមដងស្ទឹង និងតំបន់ងាយរងគ្រោះ បន្តបង្កើនការប្រុងប្រយ័ត្នខ្ពស់ ចំពោះជំនន់ទឹកភ្លៀង និងបាតុភូតធម្មជាតិផ្សេងៗ ដែលអាចកើតមានឡើងជាបន្តទៀត។

ទាក់ទិនរឿងនេះ មន្ត្រីសម្របសម្រួលកម្មវិធីនៃអង្គការលីកាដូប្រចាំទិសពាយ័ព្យ លោក អ៊ិន គង់ជិត កត់សម្គាល់ថា ក្នុងចំណោមខេត្តនៅជាប់ព្រំដែនទាំងអស់ ខេត្តបាត់ដំបងរងគ្រោះពីទឹកជំនន់ខ្លាំងជាងគេ នៅស្រុកមួយចំនួន ដូចជា ស្រុកសំឡូត ស្រុករតនមណ្ឌល ស្រុកសង្កែ ស្រុកឯកភ្នំ ស្រុកបវេល និងក្រុងបាត់ដំបងផ្ទាល់។ លោកបន្តថា ទីតាំងភូមិសាស្ត្រទាំងនេះភាគច្រើនជាវាលទំនាបងាយជន់លិច និងដក់ទឹកយូរ ទោះបីទឹកស្ទឹងស្រកទៅវិញក៏ដោយ។

ជាមួយគ្នានេះ លោកកត់សម្គាល់ថា ប្រជាពលរដ្ឋមួយចំនួនកំពុងរងការខ្វះខាតស្បៀង និងជំនួយផ្សេងៗ ព្រោះទឹកហក់ឡើងលឿន មិនអាចត្រៀមខ្លួនបានទាន់ពេល ខណៈដំណាំស្រូវក្នុងតំបន់នេះរងការខូចខាតធ្ងន់ធ្ងរ ប្រឈមការខាតបង់ក្រោយទឹកស្រក។ ករណីនេះ លោកអំពាវនាវឱ្យអាជ្ញាធរខេត្ត គណៈកម្មាធិការជាតិគ្រប់គ្រងគ្រោះមហន្តរាយ អាជ្ញាធរមូលដ្ឋាន រួមទាំងក្រសួងពាក់ព័ន្ធ ត្រូវបង្កើនការជួយសង្គ្រោះ ដោយធានាលើការហូបចុក សុវត្ថិភាព និងត្រៀមគ្រាប់ពូជចែកជូនពលរដ្ឋសម្រាប់បង្កបង្កើនផលសារជាថ្មី។

លោក អ៊ិន គង់ជិត ថ្លែងថា៖«ត្រូវតែមានការឆ្លើយតបទៅនឹងតម្រូវការជាក់ស្ដែង ដូចជា ការជួយសង្គ្រោះបន្ទាន់ ដែលពួកគាត់អំពាវនាវហៅឱ្យមានការជម្លៀសចេញអីហ្នឹង ទៅរកទីទួលសុវត្ថិភាព ត្រូវតែបញ្ជូនកម្លាំង និងមធ្យោបាយ មានទូក កាណូតអី ទៅដឹក បាទ! ហ្នឹងជាអាទិភាពធំបំផុត។ ហើយទីពីរ យើងត្រូវត្រៀមស្បៀងអាហារសម្រាប់ឧបត្ថម្ភពួកគាត់ហ្នឹង ហើយនិងថ្នាំសង្កូវមួយចំនួន ហើយនិងតង់ សំពត់អីហ្នឹង ដើម្បីឱ្យពួកគាត់បានស្នាក់នៅជាបណ្ដោះអាសន្ន កន្លែងទីទួលសុវត្ថិភាពសិន ទម្រាំគាត់បានត្រឡប់ទៅវិញ»។

តាមការសម្គាល់ ក្នុងឆ្នាំ២០២៦ នេះ មានទឹកជំនន់កើតឡើងបន្តបន្ទាប់គ្នា លើសពី ២ដង ក្នុងរយៈពេលមិនដល់កន្លះឆ្នាំ ខណៈពិភពលោកកំពុងប្រឈមមុខនឹងបាតុភូតរាំងស្ងួត អែលនីញ៉ូ (El Niño) ដែលធ្វើឱ្យរបាយទឹកភ្លៀងប្រែប្រួលខ្លាំង និងបង្កព្យុះជាបន្តបន្ទាប់។

នៅមុនបញ្ហាទឹកជំនន់ កសិករភាគច្រើននៅភាគពាយ័ព្យប្រទេស ដូចជា បាត់ដំបង បន្ទាយមានជ័យ បានរងគ្រោះដោយសារបាតុភូតរាំងស្ងួតម្តងរួចទៅហើយ ដែលធ្វើឱ្យការបង្កបង្កើនផលត្រូវខាតបង់ផ្ទួនៗគ្នា ស្របពេលទឹកជំនន់លើកនេះបានពន្លិចស្រូវពង្រោះ និងខ្លះត្រៀមប្រមូលផល។ ប្រជាពលរដ្ឋអំពាវនាវឱ្យរដ្ឋាភិបាលទម្លាក់កញ្ចប់ជំនួយសង្គម ដើម្បីសង្គ្រោះជីវភាពក្នុងដំណាក់កាលលំបាកនេះ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។